| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೫. ಅಗದಙ್ಗಪಞ್ಹೋ
5. Agadaṅgapañho
೫. ‘‘ಭನ್ತೇ ನಾಗಸೇನ, ‘ಅಗದಸ್ಸ ದ್ವೇ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ದ್ವೇ ಅಙ್ಗಾನಿ ಗಹೇತಬ್ಬಾನೀ’’ತಿ। ‘‘ಯಥಾ, ಮಹಾರಾಜ, ಅಗದೇ ಕಿಮೀ ನ ಸಣ್ಠಹನ್ತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಮಾನಸೇ ಕಿಲೇಸಾ ನ ಸಣ್ಠಪೇತಬ್ಬಾ। ಇದಂ, ಮಹಾರಾಜ, ಅಗದಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
5. ‘‘Bhante nāgasena, ‘agadassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti. ‘‘Yathā, mahārāja, agade kimī na saṇṭhahanti, evameva kho, mahārāja, yoginā yogāvacarena mānase kilesā na saṇṭhapetabbā. Idaṃ, mahārāja, agadassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಅಗದೋ ದಟ್ಠಫುಟ್ಠದಿಟ್ಠಅಸಿತಪೀತಖಾಯಿತಸಾಯಿತಂ ಸಬ್ಬಂ ವಿಸಂ ಪಟಿಹನತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ರಾಗದೋಸಮೋಹಮಾನದಿಟ್ಠಿವಿಸಂ ಸಬ್ಬಂ ಪಟಿಹನಿತಬ್ಬಂ। ಇದಂ, ಮಹಾರಾಜ, ಅಗದಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ –
‘‘Puna caparaṃ, mahārāja, agado daṭṭhaphuṭṭhadiṭṭhaasitapītakhāyitasāyitaṃ sabbaṃ visaṃ paṭihanati, evameva kho, mahārāja, yoginā yogāvacarena rāgadosamohamānadiṭṭhivisaṃ sabbaṃ paṭihanitabbaṃ. Idaṃ, mahārāja, agadassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘ಸಙ್ಖಾರಾನಂ ಸಭಾವತ್ಥಂ, ದಟ್ಠುಕಾಮೇನ ಯೋಗಿನಾ।
‘‘‘Saṅkhārānaṃ sabhāvatthaṃ, daṭṭhukāmena yoginā;
ಅಗದೇನೇವ ಹೋತಬ್ಬಂ, ಕಿಲೇಸವಿಸನಾಸನೇ’’’ತಿ॥
Agadeneva hotabbaṃ, kilesavisanāsane’’’ti.
ಅಗದಙ್ಗಪಞ್ಹೋ ಪಞ್ಚಮೋ।
Agadaṅgapañho pañcamo.
