| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២២. ពាវីសតិមវគ្គោ
22. Bāvīsatimavaggo
(២១៧) ១០. ខណិកកថា
(217) 10. Khaṇikakathā
៩០៦. ឯកចិត្តក្ខណិកា សព្ពេ ធម្មាតិ? អាមន្តា។ ចិត្តេ មហាបថវី សណ្ឋាតិ, មហាសមុទ្ទោ សណ្ឋាតិ, សិនេរុបព្ពតរាជា សណ្ឋាតិ, អាបោ សណ្ឋាតិ, តេជោ សណ្ឋាតិ, វាយោ សណ្ឋាតិ, តិណកដ្ឋវនប្បតយោ សណ្ឋហន្តីតិ? ន ហេវំ វត្តព្ពេ…បេ.…។
906. Ekacittakkhaṇikā sabbe dhammāti? Āmantā. Citte mahāpathavī saṇṭhāti, mahāsamuddo saṇṭhāti, sinerupabbatarājā saṇṭhāti, āpo saṇṭhāti, tejo saṇṭhāti, vāyo saṇṭhāti, tiṇakaṭṭhavanappatayo saṇṭhahantīti? Na hevaṃ vattabbe…pe….
ឯកចិត្តក្ខណិកា សព្ពេ ធម្មាតិ? អាមន្តា។ ចក្ខាយតនំ ចក្ខុវិញ្ញាណេន សហជាតន្តិ? ន ហេវំ វត្តព្ពេ…បេ.… ចក្ខាយតនំ ចក្ខុវិញ្ញាណេន សហជាតន្តិ? អាមន្តា។ ននុ អាយស្មា សារិបុត្តោ ឯតទវោច – ‘‘អជ្ឈត្តិកញ្ចេវ, អាវុសោ, ចក្ខុំ អបរិភិន្នំ ហោតិ, ពាហិរា ច រូបា ន អាបាថំ អាគច្ឆន្តិ, នោ ច តជ្ជោ សមន្នាហារោ ហោតិ, នេវ តាវ តជ្ជស្ស វិញ្ញាណភាគស្ស 1 បាតុភាវោ ហោតិ។ អជ្ឈត្តិកញ្ចេវ, អាវុសោ, ចក្ខុំ អបរិភិន្នំ ហោតិ, ពាហិរា ច រូបា អាបាថំ អាគច្ឆន្តិ, នោ ច តជ្ជោ សមន្នាហារោ ហោតិ, នេវ តាវ តជ្ជស្ស វិញ្ញាណភាគស្ស បាតុភាវោ ហោតិ។ យតោ ច ខោ, អាវុសោ, អជ្ឈត្តិកញ្ចេវ ចក្ខុំ អបរិភិន្នំ ហោតិ , ពាហិរា ច រូបា អាបាថំ អាគច្ឆន្តិ, តជ្ជោ ច សមន្នាហារោ ហោតិ, ឯវំ តជ្ជស្ស វិញ្ញាណភាគស្ស បាតុភាវោ ហោតី’’តិ 2! អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘ចក្ខាយតនំ ចក្ខុវិញ្ញាណេន សហជាត’’ន្តិ។
Ekacittakkhaṇikā sabbe dhammāti? Āmantā. Cakkhāyatanaṃ cakkhuviññāṇena sahajātanti? Na hevaṃ vattabbe…pe… cakkhāyatanaṃ cakkhuviññāṇena sahajātanti? Āmantā. Nanu āyasmā sāriputto etadavoca – ‘‘ajjhattikañceva, āvuso, cakkhuṃ aparibhinnaṃ hoti, bāhirā ca rūpā na āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa 3 pātubhāvo hoti. Ajjhattikañceva, āvuso, cakkhuṃ aparibhinnaṃ hoti, bāhirā ca rūpā āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Yato ca kho, āvuso, ajjhattikañceva cakkhuṃ aparibhinnaṃ hoti , bāhirā ca rūpā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 4! Attheva suttantoti? Āmantā. Tena hi na vattabbaṃ – ‘‘cakkhāyatanaṃ cakkhuviññāṇena sahajāta’’nti.
សោតាយតនំ…បេ.… ឃានាយតនំ…បេ.… ជិវ្ហាយតនំ…បេ.… កាយាយតនំ កាយវិញ្ញាណេន សហជាតន្តិ? ន ហេវំ វត្តព្ពេ…បេ.… កាយាយតនំ កាយវិញ្ញាណេន សហជាតន្តិ? អាមន្តា។ ននុ អាយស្មា សារិបុត្តោ ឯតទវោច – ‘‘អជ្ឈត្តិកោ ចេវ, អាវុសោ, កាយោ អបរិភិន្នោ ហោតិ, ពាហិរា ច ផោដ្ឋព្ពា ន អាបាថំ អាគច្ឆន្តិ, នោ ច…បេ.… អជ្ឈត្តិកោ ចេវ, អាវុសោ, កាយោ អបរិភិន្នោ ហោតិ, ពាហិរា ច ផោដ្ឋព្ពា អាបាថំ អាគច្ឆន្តិ, នោ ច…បេ.… យតោ ច ខោ, អាវុសោ, អជ្ឈត្តិកោ ចេវ កាយោ អបរិភិន្នោ ហោតិ, ពាហិរា ច ផោដ្ឋព្ពា អាបាថំ អាគច្ឆន្តិ, តជ្ជោ ច សមន្នាហារោ ហោតិ, ឯវំ តជ្ជស្ស វិញ្ញាណភាគស្ស បាតុភាវោ ហោតី’’តិ 5! អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘កាយាយតនំ កាយវិញ្ញាណេន សហជាត’’ន្តិ។
Sotāyatanaṃ…pe… ghānāyatanaṃ…pe… jivhāyatanaṃ…pe… kāyāyatanaṃ kāyaviññāṇena sahajātanti? Na hevaṃ vattabbe…pe… kāyāyatanaṃ kāyaviññāṇena sahajātanti? Āmantā. Nanu āyasmā sāriputto etadavoca – ‘‘ajjhattiko ceva, āvuso, kāyo aparibhinno hoti, bāhirā ca phoṭṭhabbā na āpāthaṃ āgacchanti, no ca…pe… ajjhattiko ceva, āvuso, kāyo aparibhinno hoti, bāhirā ca phoṭṭhabbā āpāthaṃ āgacchanti, no ca…pe… yato ca kho, āvuso, ajjhattiko ceva kāyo aparibhinno hoti, bāhirā ca phoṭṭhabbā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 6! Attheva suttantoti? Āmantā. Tena hi na vattabbaṃ – ‘‘kāyāyatanaṃ kāyaviññāṇena sahajāta’’nti.
៩០៧. ន វត្តព្ពំ – ‘‘ឯកចិត្តក្ខណិកា សព្ពេ ធម្មា’’តិ? អាមន្តា។ សព្ពេ ធម្មា និច្ចា ធុវា សស្សតា អវិបរិណាមធម្មាតិ? ន ហេវំ វត្តព្ពេ។ តេន ហិ ឯកចិត្តក្ខណិកា សព្ពេ ធម្មាតិ។
907. Na vattabbaṃ – ‘‘ekacittakkhaṇikā sabbe dhammā’’ti? Āmantā. Sabbe dhammā niccā dhuvā sassatā avipariṇāmadhammāti? Na hevaṃ vattabbe. Tena hi ekacittakkhaṇikā sabbe dhammāti.
ខណិកកថា និដ្ឋិតា។
Khaṇikakathā niṭṭhitā.
ពាវីសតិមវគ្គោ។
Bāvīsatimavaggo.
តស្សុទ្ទានំ –
Tassuddānaṃ –
អត្ថិ កិញ្ចិ សំយោជនំ អប្បហាយ បរិនិព្ពានំ, អរហា កុសលចិត្តោ បរិនិព្ពាយតិ, អរហា អានេញ្ជេ ឋិតោ បរិនិព្ពាយតិ, អត្ថិ គព្ភសេយ្យាយ ធម្មាភិសមយោ, អត្ថិ គព្ភសេយ្យាយ អរហត្តប្បត្តិ, អត្ថិ សុបិនគតស្ស ធម្មាភិសមយោ, អត្ថិ សុបិនគតស្ស អរហត្តប្បត្តិ, សព្ពំ សុបិនគតស្ស ចិត្តំ អព្យាកតំ, នត្ថិ កាចិ អាសេវនបច្ចយតា, ឯកចិត្តក្ខណិកា សព្ពេ ធម្មាតិ។
Atthi kiñci saṃyojanaṃ appahāya parinibbānaṃ, arahā kusalacitto parinibbāyati, arahā āneñje ṭhito parinibbāyati, atthi gabbhaseyyāya dhammābhisamayo, atthi gabbhaseyyāya arahattappatti, atthi supinagatassa dhammābhisamayo, atthi supinagatassa arahattappatti, sabbaṃ supinagatassa cittaṃ abyākataṃ, natthi kāci āsevanapaccayatā, ekacittakkhaṇikā sabbe dhammāti.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១០. ខណិកកថាវណ្ណនា • 10. Khaṇikakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១០. ខណិកកថាវណ្ណនា • 10. Khaṇikakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១០. ខណិកកថាវណ្ណនា • 10. Khaṇikakathāvaṇṇanā
