3. Khaṇḍapulliyattheraapadānaṃ

12.

‘‘Phussassa kho bhagavato, thūpo āsi mahāvane;

Kuñjarehi tadā bhinno, parūḷho pādapo ² tahiṃ.

13.

‘‘Visamañca samaṃ katvā, sudhāpiṇḍaṃ adāsahaṃ;

Tilokagaruno tassa, guṇehi paritosito ⁴.

14.

‘‘Dvenavute ito kappe, yaṃ kammamakariṃ tadā;

Duggatiṃ nābhijānāmi, sudhāpiṇḍassidaṃ phalaṃ.

15.

‘‘Sattasattatikappamhi, jitasenāsuṃ soḷasa;

Sattaratanasampannā, cakkavattī mahabbalā.

16.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā khaṇḍaphulliyo thero imā gāthāyo abhāsitthāti.

Khaṇḍapulliyattherassāpadānaṃ tatiyaṃ.