| Library / Tipiṭaka / তিপিটক • Tipiṭaka / দীঘনিকায • Dīghanikāya |
১১. কেৰট্টসুত্তং
11. Kevaṭṭasuttaṃ
কেৰট্টগহপতিপুত্তৰত্থু
Kevaṭṭagahapatiputtavatthu
৪৮১. এৰং মে সুতং – একং সমযং ভগৰা নাল়ন্দাযং ৰিহরতি পাৰারিকম্বৰনে। অথ খো কেৰট্টো গহপতিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো কেৰট্টো গহপতিপুত্তো ভগৰন্তং এতদৰোচ – ‘‘অযং, ভন্তে, নাল়ন্দা ইদ্ধা চেৰ ফীতা চ বহুজনা আকিণ্ণমনুস্সা ভগৰতি অভিপ্পসন্না। সাধু, ভন্তে, ভগৰা একং ভিক্খুং সমাদিসতু, যো উত্তরিমনুস্সধম্মা, ইদ্ধিপাটিহারিযং করিস্সতি; এৰাযং নাল়ন্দা ভিয্যোসো মত্তায ভগৰতি অভিপ্পসীদিস্সতী’’তি। এৰং ৰুত্তে, ভগৰা কেৰট্টং গহপতিপুত্তং এতদৰোচ – ‘‘ন খো অহং, কেৰট্ট, ভিক্খূনং এৰং ধম্মং দেসেমি – এথ তুম্হে, ভিক্খৰে, গিহীনং ওদাতৰসনানং উত্তরিমনুস্সধম্মা ইদ্ধিপাটিহারিযং করোথা’’তি।
481. Evaṃ me sutaṃ – ekaṃ samayaṃ bhagavā nāḷandāyaṃ viharati pāvārikambavane. Atha kho kevaṭṭo gahapatiputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho kevaṭṭo gahapatiputto bhagavantaṃ etadavoca – ‘‘ayaṃ, bhante, nāḷandā iddhā ceva phītā ca bahujanā ākiṇṇamanussā bhagavati abhippasannā. Sādhu, bhante, bhagavā ekaṃ bhikkhuṃ samādisatu, yo uttarimanussadhammā, iddhipāṭihāriyaṃ karissati; evāyaṃ nāḷandā bhiyyoso mattāya bhagavati abhippasīdissatī’’ti. Evaṃ vutte, bhagavā kevaṭṭaṃ gahapatiputtaṃ etadavoca – ‘‘na kho ahaṃ, kevaṭṭa, bhikkhūnaṃ evaṃ dhammaṃ desemi – etha tumhe, bhikkhave, gihīnaṃ odātavasanānaṃ uttarimanussadhammā iddhipāṭihāriyaṃ karothā’’ti.
৪৮২. দুতিযম্পি খো কেৰট্টো গহপতিপুত্তো ভগৰন্তং এতদৰোচ – ‘‘নাহং, ভন্তে, ভগৰন্তং ধংসেমি; অপি চ, এৰং ৰদামি – ‘অযং, ভন্তে, নাল়ন্দা ইদ্ধা চেৰ ফীতা চ বহুজনা আকিণ্ণমনুস্সা ভগৰতি অভিপ্পসন্না। সাধু, ভন্তে, ভগৰা একং ভিক্খুং সমাদিসতু, যো উত্তরিমনুস্সধম্মা ইদ্ধিপাটিহারিযং করিস্সতি; এৰাযং নাল়ন্দা ভিয্যোসো মত্তায ভগৰতি অভিপ্পসীদিস্সতী’’’তি। দুতিযম্পি খো ভগৰা কেৰট্টং গহপতিপুত্তং এতদৰোচ – ‘‘ন খো অহং, কেৰট্ট, ভিক্খূনং এৰং ধম্মং দেসেমি – এথ তুম্হে, ভিক্খৰে, গিহীনং ওদাতৰসনানং উত্তরিমনুস্সধম্মা ইদ্ধিপাটিহারিযং করোথা’’’তি।
482. Dutiyampi kho kevaṭṭo gahapatiputto bhagavantaṃ etadavoca – ‘‘nāhaṃ, bhante, bhagavantaṃ dhaṃsemi; api ca, evaṃ vadāmi – ‘ayaṃ, bhante, nāḷandā iddhā ceva phītā ca bahujanā ākiṇṇamanussā bhagavati abhippasannā. Sādhu, bhante, bhagavā ekaṃ bhikkhuṃ samādisatu, yo uttarimanussadhammā iddhipāṭihāriyaṃ karissati; evāyaṃ nāḷandā bhiyyoso mattāya bhagavati abhippasīdissatī’’’ti. Dutiyampi kho bhagavā kevaṭṭaṃ gahapatiputtaṃ etadavoca – ‘‘na kho ahaṃ, kevaṭṭa, bhikkhūnaṃ evaṃ dhammaṃ desemi – etha tumhe, bhikkhave, gihīnaṃ odātavasanānaṃ uttarimanussadhammā iddhipāṭihāriyaṃ karothā’’’ti.
ততিযম্পি খো কেৰট্টো গহপতিপুত্তো ভগৰন্তং এতদৰোচ – ‘‘নাহং, ভন্তে, ভগৰন্তং ধংসেমি; অপি চ, এৰং ৰদামি – ‘অযং, ভন্তে, নাল়ন্দা ইদ্ধা চেৰ ফীতা চ বহুজনা আকিণ্ণমনুস্সা ভগৰতি অভিপ্পসন্না। সাধু, ভন্তে, ভগৰা একং ভিক্খুং সমাদিসতু, যো উত্তরিমনুস্সধম্মা ইদ্ধিপাটিহারিযং করিস্সতি। এৰাযং নাল়ন্দা ভিয্যোসো মত্তায ভগৰতি অভিপ্পসীদিস্সতী’তি।
Tatiyampi kho kevaṭṭo gahapatiputto bhagavantaṃ etadavoca – ‘‘nāhaṃ, bhante, bhagavantaṃ dhaṃsemi; api ca, evaṃ vadāmi – ‘ayaṃ, bhante, nāḷandā iddhā ceva phītā ca bahujanā ākiṇṇamanussā bhagavati abhippasannā. Sādhu, bhante, bhagavā ekaṃ bhikkhuṃ samādisatu, yo uttarimanussadhammā iddhipāṭihāriyaṃ karissati. Evāyaṃ nāḷandā bhiyyoso mattāya bhagavati abhippasīdissatī’ti.
ইদ্ধিপাটিহারিযং
Iddhipāṭihāriyaṃ
৪৮৩. ‘‘তীণি খো ইমানি, কেৰট্ট, পাটিহারিযানি মযা সযং অভিঞ্ঞা সচ্ছিকত্ৰা পৰেদিতানি। কতমানি তীণি? ইদ্ধিপাটিহারিযং, আদেসনাপাটিহারিযং , অনুসাসনীপাটিহারিযং।
483. ‘‘Tīṇi kho imāni, kevaṭṭa, pāṭihāriyāni mayā sayaṃ abhiññā sacchikatvā paveditāni. Katamāni tīṇi? Iddhipāṭihāriyaṃ, ādesanāpāṭihāriyaṃ , anusāsanīpāṭihāriyaṃ.
৪৮৪. ‘‘কতমঞ্চ, কেৰট্ট, ইদ্ধিপাটিহারিযং? ইধ, কেৰট্ট, ভিক্খু অনেকৰিহিতং ইদ্ধিৰিধং পচ্চনুভোতি। একোপি হুত্ৰা বহুধা হোতি, বহুধাপি হুত্ৰা একো হোতি; আৰিভাৰং তিরোভাৰং তিরোকুট্টং তিরোপাকারং তিরোপব্বতং অসজ্জমানো গচ্ছতি সেয্যথাপি আকাসে; পথৰিযাপি উম্মুজ্জনিমুজ্জং করোতি সেয্যথাপি উদকে; উদকেপি অভিজ্জমানে গচ্ছতি সেয্যথাপি পথৰিযং; আকাসেপি পল্লঙ্কেন কমতি সেয্যথাপি পক্খী সকুণো; ইমেপি চন্দিমসূরিযে এৰং মহিদ্ধিকে এৰং মহানুভাৰে পাণিনা পরামসতি পরিমজ্জতি; যাৰ ব্রহ্মলোকাপি কাযেন ৰসং ৰত্তেতি।
484. ‘‘Katamañca, kevaṭṭa, iddhipāṭihāriyaṃ? Idha, kevaṭṭa, bhikkhu anekavihitaṃ iddhividhaṃ paccanubhoti. Ekopi hutvā bahudhā hoti, bahudhāpi hutvā eko hoti; āvibhāvaṃ tirobhāvaṃ tirokuṭṭaṃ tiropākāraṃ tiropabbataṃ asajjamāno gacchati seyyathāpi ākāse; pathaviyāpi ummujjanimujjaṃ karoti seyyathāpi udake; udakepi abhijjamāne gacchati seyyathāpi pathaviyaṃ; ākāsepi pallaṅkena kamati seyyathāpi pakkhī sakuṇo; imepi candimasūriye evaṃ mahiddhike evaṃ mahānubhāve pāṇinā parāmasati parimajjati; yāva brahmalokāpi kāyena vasaṃ vatteti.
‘‘তমেনং অঞ্ঞতরো সদ্ধো পসন্নো পস্সতি তং ভিক্খুং অনেকৰিহিতং ইদ্ধিৰিধং পচ্চনুভোন্তং – একোপি হুত্ৰা বহুধা হোন্তং, বহুধাপি হুত্ৰা একো হোন্তং; আৰিভাৰং তিরোভাৰং; তিরোকুট্টং তিরোপাকারং তিরোপব্বতং অসজ্জমানং গচ্ছন্তং সেয্যথাপি আকাসে; পথৰিযাপি উম্মুজ্জনিমুজ্জং করোন্তং সেয্যথাপি উদকে; উদকেপি অভিজ্জমানে গচ্ছন্তং সেয্যথাপি পথৰিযং; আকাসেপি পল্লঙ্কেন কমন্তং সেয্যথাপি পক্খী সকুণো; ইমেপি চন্দিমসূরিযে এৰং মহিদ্ধিকে এৰং মহানুভাৰে পাণিনা পরামসন্তং পরিমজ্জন্তং যাৰ ব্রহ্মলোকাপি কাযেন ৰসং ৰত্তেন্তং।
‘‘Tamenaṃ aññataro saddho pasanno passati taṃ bhikkhuṃ anekavihitaṃ iddhividhaṃ paccanubhontaṃ – ekopi hutvā bahudhā hontaṃ, bahudhāpi hutvā eko hontaṃ; āvibhāvaṃ tirobhāvaṃ; tirokuṭṭaṃ tiropākāraṃ tiropabbataṃ asajjamānaṃ gacchantaṃ seyyathāpi ākāse; pathaviyāpi ummujjanimujjaṃ karontaṃ seyyathāpi udake; udakepi abhijjamāne gacchantaṃ seyyathāpi pathaviyaṃ; ākāsepi pallaṅkena kamantaṃ seyyathāpi pakkhī sakuṇo; imepi candimasūriye evaṃ mahiddhike evaṃ mahānubhāve pāṇinā parāmasantaṃ parimajjantaṃ yāva brahmalokāpi kāyena vasaṃ vattentaṃ.
‘‘তমেনং সো সদ্ধো পসন্নো অঞ্ঞতরস্স অস্সদ্ধস্স অপ্পসন্নস্স আরোচেতি – ‘অচ্ছরিযং ৰত, ভো, অব্ভুতং ৰত, ভো, সমণস্স মহিদ্ধিকতা মহানুভাৰতা। অমাহং ভিক্খুং অদ্দসং অনেকৰিহিতং ইদ্ধিৰিধং পচ্চনুভোন্তং – একোপি হুত্ৰা বহুধা হোন্তং, বহুধাপি হুত্ৰা একো হোন্তং…পে॰… যাৰ ব্রহ্মলোকাপি কাযেন ৰসং ৰত্তেন্ত’ন্তি।
‘‘Tamenaṃ so saddho pasanno aññatarassa assaddhassa appasannassa āroceti – ‘acchariyaṃ vata, bho, abbhutaṃ vata, bho, samaṇassa mahiddhikatā mahānubhāvatā. Amāhaṃ bhikkhuṃ addasaṃ anekavihitaṃ iddhividhaṃ paccanubhontaṃ – ekopi hutvā bahudhā hontaṃ, bahudhāpi hutvā eko hontaṃ…pe… yāva brahmalokāpi kāyena vasaṃ vattenta’nti.
‘‘তমেনং সো অস্সদ্ধো অপ্পসন্নো তং সদ্ধং পসন্নং এৰং ৰদেয্য – ‘অত্থি খো, ভো, গন্ধারী নাম ৰিজ্জা। তায সো ভিক্খু অনেকৰিহিতং ইদ্ধিৰিধং পচ্চনুভোতি – একোপি হুত্ৰা বহুধা হোতি, বহুধাপি হুত্ৰা একো হোতি…পে॰… যাৰ ব্রহ্মলোকাপি কাযেন ৰসং ৰত্তেতী’তি।
‘‘Tamenaṃ so assaddho appasanno taṃ saddhaṃ pasannaṃ evaṃ vadeyya – ‘atthi kho, bho, gandhārī nāma vijjā. Tāya so bhikkhu anekavihitaṃ iddhividhaṃ paccanubhoti – ekopi hutvā bahudhā hoti, bahudhāpi hutvā eko hoti…pe… yāva brahmalokāpi kāyena vasaṃ vattetī’ti.
‘‘তং কিং মঞ্ঞসি, কেৰট্ট, অপি নু সো অস্সদ্ধো অপ্পসন্নো তং সদ্ধং পসন্নং এৰং ৰদেয্যা’’তি? ‘‘ৰদেয্য, ভন্তে’’তি। ‘‘ইমং খো অহং, কেৰট্ট, ইদ্ধিপাটিহারিযে আদীনৰং সম্পস্সমানো ইদ্ধিপাটিহারিযেন অট্টীযামি হরাযামি জিগুচ্ছামি’’।
‘‘Taṃ kiṃ maññasi, kevaṭṭa, api nu so assaddho appasanno taṃ saddhaṃ pasannaṃ evaṃ vadeyyā’’ti? ‘‘Vadeyya, bhante’’ti. ‘‘Imaṃ kho ahaṃ, kevaṭṭa, iddhipāṭihāriye ādīnavaṃ sampassamāno iddhipāṭihāriyena aṭṭīyāmi harāyāmi jigucchāmi’’.
আদেসনাপাটিহারিযং
Ādesanāpāṭihāriyaṃ
৪৮৫. ‘‘কতমঞ্চ, কেৰট্ট, আদেসনাপাটিহারিযং? ইধ, কেৰট্ট, ভিক্খু পরসত্তানং পরপুগ্গলানং চিত্তম্পি আদিসতি, চেতসিকম্পি আদিসতি, ৰিতক্কিতম্পি আদিসতি, ৰিচারিতম্পি আদিসতি – ‘এৰম্পি তে মনো, ইত্থম্পি তে মনো, ইতিপি তে চিত্ত’ন্তি।
485. ‘‘Katamañca, kevaṭṭa, ādesanāpāṭihāriyaṃ? Idha, kevaṭṭa, bhikkhu parasattānaṃ parapuggalānaṃ cittampi ādisati, cetasikampi ādisati, vitakkitampi ādisati, vicāritampi ādisati – ‘evampi te mano, itthampi te mano, itipi te citta’nti.
‘‘তমেনং অঞ্ঞতরো সদ্ধো পসন্নো পস্সতি তং ভিক্খুং পরসত্তানং পরপুগ্গলানং চিত্তম্পি আদিসন্তং, চেতসিকম্পি আদিসন্তং, ৰিতক্কিতম্পি আদিসন্তং, ৰিচারিতম্পি আদিসন্তং – ‘এৰম্পি তে মনো, ইত্থম্পি তে মনো, ইতিপি তে চিত্ত’ন্তি। তমেনং সো সদ্ধো পসন্নো অঞ্ঞতরস্স অস্সদ্ধস্স অপ্পসন্নস্স আরোচেতি – ‘অচ্ছরিযং ৰত, ভো, অব্ভুতং ৰত, ভো, সমণস্স মহিদ্ধিকতা মহানুভাৰতা। অমাহং ভিক্খুং অদ্দসং পরসত্তানং পরপুগ্গলানং চিত্তম্পি আদিসন্তং, চেতসিকম্পি আদিসন্তং, ৰিতক্কিতম্পি আদিসন্তং, ৰিচারিতম্পি আদিসন্তং – ‘‘এৰম্পি তে মনো, ইত্থম্পি তে মনো, ইতিপি তে চিত্ত’’’ন্তি।
‘‘Tamenaṃ aññataro saddho pasanno passati taṃ bhikkhuṃ parasattānaṃ parapuggalānaṃ cittampi ādisantaṃ, cetasikampi ādisantaṃ, vitakkitampi ādisantaṃ, vicāritampi ādisantaṃ – ‘evampi te mano, itthampi te mano, itipi te citta’nti. Tamenaṃ so saddho pasanno aññatarassa assaddhassa appasannassa āroceti – ‘acchariyaṃ vata, bho, abbhutaṃ vata, bho, samaṇassa mahiddhikatā mahānubhāvatā. Amāhaṃ bhikkhuṃ addasaṃ parasattānaṃ parapuggalānaṃ cittampi ādisantaṃ, cetasikampi ādisantaṃ, vitakkitampi ādisantaṃ, vicāritampi ādisantaṃ – ‘‘evampi te mano, itthampi te mano, itipi te citta’’’nti.
‘‘তমেনং সো অস্সদ্ধো অপ্পসন্নো তং সদ্ধং পসন্নং এৰং ৰদেয্য – ‘অত্থি খো, ভো, মণিকা নাম ৰিজ্জা; তায সো ভিক্খু পরসত্তানং পরপুগ্গলানং চিত্তম্পি আদিসতি, চেতসিকম্পি আদিসতি, ৰিতক্কিতম্পি আদিসতি, ৰিচারিতম্পি আদিসতি – ‘এৰম্পি তে মনো, ইত্থম্পি তে মনো, ইতিপি তে চিত্ত’’’ন্তি।
‘‘Tamenaṃ so assaddho appasanno taṃ saddhaṃ pasannaṃ evaṃ vadeyya – ‘atthi kho, bho, maṇikā nāma vijjā; tāya so bhikkhu parasattānaṃ parapuggalānaṃ cittampi ādisati, cetasikampi ādisati, vitakkitampi ādisati, vicāritampi ādisati – ‘evampi te mano, itthampi te mano, itipi te citta’’’nti.
‘‘তং কিং মঞ্ঞসি, কেৰট্ট, অপি নু সো অস্সদ্ধো অপ্পসন্নো তং সদ্ধং পসন্নং এৰং ৰদেয্যা’’তি ? ‘‘ৰদেয্য, ভন্তে’’তি। ‘‘ইমং খো অহং, কেৰট্ট, আদেসনাপাটিহারিযে আদীনৰং সম্পস্সমানো আদেসনাপাটিহারিযেন অট্টীযামি হরাযামি জিগুচ্ছামি’’।
‘‘Taṃ kiṃ maññasi, kevaṭṭa, api nu so assaddho appasanno taṃ saddhaṃ pasannaṃ evaṃ vadeyyā’’ti ? ‘‘Vadeyya, bhante’’ti. ‘‘Imaṃ kho ahaṃ, kevaṭṭa, ādesanāpāṭihāriye ādīnavaṃ sampassamāno ādesanāpāṭihāriyena aṭṭīyāmi harāyāmi jigucchāmi’’.
অনুসাসনীপাটিহারিযং
Anusāsanīpāṭihāriyaṃ
৪৮৬. ‘‘কতমঞ্চ, কেৰট্ট, অনুসাসনীপাটিহারিযং? ইধ, কেৰট্ট, ভিক্খু এৰমনুসাসতি – ‘এৰং ৰিতক্কেথ, মা এৰং ৰিতক্কযিত্থ, এৰং মনসিকরোথ, মা এৰং মনসাকত্থ, ইদং পজহথ, ইদং উপসম্পজ্জ ৰিহরথা’তি। ইদং ৰুচ্চতি, কেৰট্ট, অনুসাসনীপাটিহারিযং।
486. ‘‘Katamañca, kevaṭṭa, anusāsanīpāṭihāriyaṃ? Idha, kevaṭṭa, bhikkhu evamanusāsati – ‘evaṃ vitakketha, mā evaṃ vitakkayittha, evaṃ manasikarotha, mā evaṃ manasākattha, idaṃ pajahatha, idaṃ upasampajja viharathā’ti. Idaṃ vuccati, kevaṭṭa, anusāsanīpāṭihāriyaṃ.
‘‘পুন চপরং, কেৰট্ট, ইধ তথাগতো লোকে উপ্পজ্জতি অরহং সম্মাসম্বুদ্ধো …পে॰… (যথা ১৯০-২১২ অনুচ্ছেদেসু এৰং ৰিত্থারেতব্বং)। এৰং খো, কেৰট্ট, ভিক্খু সীলসম্পন্নো হোতি…পে॰… পঠমং ঝানং উপসম্পজ্জ ৰিহরতি। ইদম্পি ৰুচ্চতি, কেৰট্ট, অনুসাসনীপাটিহারিযং…পে॰… দুতিযং ঝানং…পে॰… ততিযং ঝানং…পে॰… চতুত্থং ঝানং উপসম্পজ্জ ৰিহরতি। ইদম্পি ৰুচ্চতি, কেৰট্ট, অনুসাসনীপাটিহারিযং…পে॰… ঞাণদস্সনায চিত্তং অভিনীহরতি অভিনিন্নামেতি…পে॰… ইদম্পি ৰুচ্চতি, কেৰট্ট, অনুসাসনীপাটিহারিযং…পে॰… নাপরং ইত্থত্তাযাতি পজানাতি…পে॰… ইদম্পি ৰুচ্চতি, কেৰট্ট, অনুসাসনীপাটিহারিযং।
‘‘Puna caparaṃ, kevaṭṭa, idha tathāgato loke uppajjati arahaṃ sammāsambuddho …pe… (yathā 190-212 anucchedesu evaṃ vitthāretabbaṃ). Evaṃ kho, kevaṭṭa, bhikkhu sīlasampanno hoti…pe… paṭhamaṃ jhānaṃ upasampajja viharati. Idampi vuccati, kevaṭṭa, anusāsanīpāṭihāriyaṃ…pe… dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati. Idampi vuccati, kevaṭṭa, anusāsanīpāṭihāriyaṃ…pe… ñāṇadassanāya cittaṃ abhinīharati abhininnāmeti…pe… idampi vuccati, kevaṭṭa, anusāsanīpāṭihāriyaṃ…pe… nāparaṃ itthattāyāti pajānāti…pe… idampi vuccati, kevaṭṭa, anusāsanīpāṭihāriyaṃ.
‘‘ইমানি খো, কেৰট্ট, তীণি পাটিহারিযানি মযা সযং অভিঞ্ঞা সচ্ছিকত্ৰা পৰেদিতানি’’।
‘‘Imāni kho, kevaṭṭa, tīṇi pāṭihāriyāni mayā sayaṃ abhiññā sacchikatvā paveditāni’’.
ভূতনিরোধেসকভিক্খুৰত্থু
Bhūtanirodhesakabhikkhuvatthu
৪৮৭. ‘‘ভূতপুব্বং, কেৰট্ট, ইমস্মিঞ্ঞেৰ ভিক্খুসঙ্ঘে অঞ্ঞতরস্স ভিক্খুনো এৰং চেতসো পরিৰিতক্কো উদপাদি – ‘কত্থ নু খো ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি?
487. ‘‘Bhūtapubbaṃ, kevaṭṭa, imasmiññeva bhikkhusaṅghe aññatarassa bhikkhuno evaṃ cetaso parivitakko udapādi – ‘kattha nu kho ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti?
৪৮৮. ‘‘অথ খো সো, কেৰট্ট, ভিক্খু তথারূপং সমাধিং সমাপজ্জি, যথাসমাহিতে চিত্তে দেৰযানিযো মগ্গো পাতুরহোসি। অথ খো সো, কেৰট্ট, ভিক্খু যেন চাতুমহারাজিকা দেৰা তেনুপসঙ্কমি; উপসঙ্কমিত্ৰা চাতুমহারাজিকে দেৰে এতদৰোচ – ‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি?
488. ‘‘Atha kho so, kevaṭṭa, bhikkhu tathārūpaṃ samādhiṃ samāpajji, yathāsamāhite citte devayāniyo maggo pāturahosi. Atha kho so, kevaṭṭa, bhikkhu yena cātumahārājikā devā tenupasaṅkami; upasaṅkamitvā cātumahārājike deve etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti?
‘‘এৰং ৰুত্তে, কেৰট্ট, চাতুমহারাজিকা দেৰা তং ভিক্খুং এতদৰোচুং – ‘মযম্পি খো, ভিক্খু, ন জানাম, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূতি 1। অত্থি খো 2, ভিক্খু, চত্তারো মহারাজানো অম্হেহি অভিক্কন্ততরা চ পণীততরা চ। তে খো এতং জানেয্যুং, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি।
‘‘Evaṃ vutte, kevaṭṭa, cātumahārājikā devā taṃ bhikkhuṃ etadavocuṃ – ‘mayampi kho, bhikkhu, na jānāma, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti 3. Atthi kho 4, bhikkhu, cattāro mahārājāno amhehi abhikkantatarā ca paṇītatarā ca. Te kho etaṃ jāneyyuṃ, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
৪৮৯. ‘‘অথ খো সো, কেৰট্ট, ভিক্খু যেন চত্তারো মহারাজানো তেনুপসঙ্কমি; উপসঙ্কমিত্ৰা চত্তারো মহারাজে এতদৰোচ – ‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি? এৰং ৰুত্তে, কেৰট্ট, চত্তারো মহারাজানো তং ভিক্খুং এতদৰোচুং – ‘মযম্পি খো, ভিক্খু, ন জানাম, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু, আপোধাতু তেজোধাতু ৰাযোধাতূতি। অত্থি খো, ভিক্খু, তাৰতিংসা নাম দেৰা অম্হেহি অভিক্কন্ততরা চ পণীততরা চ। তে খো এতং জানেয্যুং, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি।
489. ‘‘Atha kho so, kevaṭṭa, bhikkhu yena cattāro mahārājāno tenupasaṅkami; upasaṅkamitvā cattāro mahārāje etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte, kevaṭṭa, cattāro mahārājāno taṃ bhikkhuṃ etadavocuṃ – ‘mayampi kho, bhikkhu, na jānāma, yatthime cattāro mahābhūtā aparisesā nirujjhanti, seyyathidaṃ – pathavīdhātu, āpodhātu tejodhātu vāyodhātūti. Atthi kho, bhikkhu, tāvatiṃsā nāma devā amhehi abhikkantatarā ca paṇītatarā ca. Te kho etaṃ jāneyyuṃ, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
৪৯০. ‘‘অথ খো সো, কেৰট্ট, ভিক্খু যেন তাৰতিংসা দেৰা তেনুপসঙ্কমি; উপসঙ্কমিত্ৰা তাৰতিংসে দেৰে এতদৰোচ – ‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি? এৰং ৰুত্তে, কেৰট্ট, তাৰতিংসা দেৰা তং ভিক্খুং এতদৰোচুং – ‘মযম্পি খো, ভিক্খু, ন জানাম, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূতি। অত্থি খো, ভিক্খু, সক্কো নাম দেৰানমিন্দো অম্হেহি অভিক্কন্ততরো চ পণীততরো চ। সো খো এতং জানেয্য, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি।
490. ‘‘Atha kho so, kevaṭṭa, bhikkhu yena tāvatiṃsā devā tenupasaṅkami; upasaṅkamitvā tāvatiṃse deve etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte, kevaṭṭa, tāvatiṃsā devā taṃ bhikkhuṃ etadavocuṃ – ‘mayampi kho, bhikkhu, na jānāma, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Atthi kho, bhikkhu, sakko nāma devānamindo amhehi abhikkantataro ca paṇītataro ca. So kho etaṃ jāneyya, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
৪৯১. ‘‘অথ খো সো, কেৰট্ট, ভিক্খু যেন সক্কো দেৰানমিন্দো তেনুপসঙ্কমি; উপসঙ্কমিত্ৰা সক্কং দেৰানমিন্দং এতদৰোচ – ‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি? এৰং ৰুত্তে, কেৰট্ট, সক্কো দেৰানমিন্দো তং ভিক্খুং এতদৰোচ – ‘অহম্পি খো, ভিক্খু, ন জানামি, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূতি। অত্থি খো, ভিক্খু, যামা নাম দেৰা…পে॰… সুযামো নাম দেৰপুত্তো… তুসিতা নাম দেৰা… সন্তুস্সিতো নাম দেৰপুত্তো… নিম্মানরতী নাম দেৰা … সুনিম্মিতো নাম দেৰপুত্তো… পরনিম্মিতৰসৰত্তী নাম দেৰা… ৰসৰত্তী নাম দেৰপুত্তো অম্হেহি অভিক্কন্ততরো চ পণীততরো চ। সো খো এতং জানেয্য, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি।
491. ‘‘Atha kho so, kevaṭṭa, bhikkhu yena sakko devānamindo tenupasaṅkami; upasaṅkamitvā sakkaṃ devānamindaṃ etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte, kevaṭṭa, sakko devānamindo taṃ bhikkhuṃ etadavoca – ‘ahampi kho, bhikkhu, na jānāmi, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Atthi kho, bhikkhu, yāmā nāma devā…pe… suyāmo nāma devaputto… tusitā nāma devā… santussito nāma devaputto… nimmānaratī nāma devā … sunimmito nāma devaputto… paranimmitavasavattī nāma devā… vasavattī nāma devaputto amhehi abhikkantataro ca paṇītataro ca. So kho etaṃ jāneyya, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
৪৯২. ‘‘অথ খো সো, কেৰট্ট, ভিক্খু যেন ৰসৰত্তী দেৰপুত্তো তেনুপসঙ্কমি; উপসঙ্কমিত্ৰা ৰসৰত্তিং দেৰপুত্তং এতদৰোচ – ‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি? এৰং ৰুত্তে , কেৰট্ট, ৰসৰত্তী দেৰপুত্তো তং ভিক্খুং এতদৰোচ – ‘অহম্পি খো, ভিক্খু, ন জানামি যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূতি। অত্থি খো, ভিক্খু, ব্রহ্মকাযিকা নাম দেৰা অম্হেহি অভিক্কন্ততরা চ পণীততরা চ। তে খো এতং জানেয্যুং, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি।
492. ‘‘Atha kho so, kevaṭṭa, bhikkhu yena vasavattī devaputto tenupasaṅkami; upasaṅkamitvā vasavattiṃ devaputtaṃ etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte , kevaṭṭa, vasavattī devaputto taṃ bhikkhuṃ etadavoca – ‘ahampi kho, bhikkhu, na jānāmi yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Atthi kho, bhikkhu, brahmakāyikā nāma devā amhehi abhikkantatarā ca paṇītatarā ca. Te kho etaṃ jāneyyuṃ, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
৪৯৩. ‘‘অথ খো সো, কেৰট্ট, ভিক্খু তথারূপং সমাধিং সমাপজ্জি, যথাসমাহিতে চিত্তে ব্রহ্মযানিযো মগ্গো পাতুরহোসি। অথ খো সো, কেৰট্ট, ভিক্খু যেন ব্রহ্মকাযিকা দেৰা তেনুপসঙ্কমি; উপসঙ্কমিত্ৰা ব্রহ্মকাযিকে দেৰে এতদৰোচ – ‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি? এৰং ৰুত্তে, কেৰট্ট, ব্রহ্মকাযিকা দেৰা তং ভিক্খুং এতদৰোচুং – ‘মযম্পি খো, ভিক্খু, ন জানাম, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূতি। অত্থি খো, ভিক্খু, ব্রহ্মা মহাব্রহ্মা অভিভূ অনভিভূতো অঞ্ঞদত্থুদসো ৰসৰত্তী ইস্সরো কত্তা নিম্মাতা সেট্ঠো সজিতা ৰসী পিতা ভূতভব্যানং অম্হেহি অভিক্কন্ততরো চ পণীততরো চ। সো খো এতং জানেয্য, যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’’তি।
493. ‘‘Atha kho so, kevaṭṭa, bhikkhu tathārūpaṃ samādhiṃ samāpajji, yathāsamāhite citte brahmayāniyo maggo pāturahosi. Atha kho so, kevaṭṭa, bhikkhu yena brahmakāyikā devā tenupasaṅkami; upasaṅkamitvā brahmakāyike deve etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte, kevaṭṭa, brahmakāyikā devā taṃ bhikkhuṃ etadavocuṃ – ‘mayampi kho, bhikkhu, na jānāma, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Atthi kho, bhikkhu, brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṃ amhehi abhikkantataro ca paṇītataro ca. So kho etaṃ jāneyya, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’’ti.
‘‘‘কহং পনাৰুসো, এতরহি সো মহাব্রহ্মা’তি? ‘মযম্পি খো, ভিক্খু, ন জানাম, যত্থ ৰা ব্রহ্মা যেন ৰা ব্রহ্মা যহিং ৰা ব্রহ্মা; অপি চ, ভিক্খু, যথা নিমিত্তা দিস্সন্তি, আলোকো সঞ্জাযতি, ওভাসো পাতুভৰতি, ব্রহ্মা পাতুভৰিস্সতি, ব্রহ্মুনো হেতং পুব্বনিমিত্তং পাতুভাৰায, যদিদং আলোকো সঞ্জাযতি, ওভাসো পাতুভৰতী’তি। অথ খো সো, কেৰট্ট, মহাব্রহ্মা নচিরস্সেৰ পাতুরহোসি ।
‘‘‘Kahaṃ panāvuso, etarahi so mahābrahmā’ti? ‘Mayampi kho, bhikkhu, na jānāma, yattha vā brahmā yena vā brahmā yahiṃ vā brahmā; api ca, bhikkhu, yathā nimittā dissanti, āloko sañjāyati, obhāso pātubhavati, brahmā pātubhavissati, brahmuno hetaṃ pubbanimittaṃ pātubhāvāya, yadidaṃ āloko sañjāyati, obhāso pātubhavatī’ti. Atha kho so, kevaṭṭa, mahābrahmā nacirasseva pāturahosi .
৪৯৪. ‘‘অথ খো সো, কেৰট্ট, ভিক্খু যেন সো মহাব্রহ্মা তেনুপসঙ্কমি; উপসঙ্কমিত্ৰা তং মহাব্রহ্মানং এতদৰোচ – ‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’’তি? এৰং ৰুত্তে, কেৰট্ট, সো মহাব্রহ্মা তং ভিক্খুং এতদৰোচ – ‘অহমস্মি, ভিক্খু, ব্রহ্মা মহাব্রহ্মা অভিভূ অনভিভূতো অঞ্ঞদত্থুদসো ৰসৰত্তী ইস্সরো কত্তা নিম্মাতা সেট্ঠো সজিতা ৰসী পিতা ভূতভব্যান’ন্তি।
494. ‘‘Atha kho so, kevaṭṭa, bhikkhu yena so mahābrahmā tenupasaṅkami; upasaṅkamitvā taṃ mahābrahmānaṃ etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’’ti? Evaṃ vutte, kevaṭṭa, so mahābrahmā taṃ bhikkhuṃ etadavoca – ‘ahamasmi, bhikkhu, brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyāna’nti.
‘‘দুতিযম্পি খো সো, কেৰট্ট, ভিক্খু তং মহাব্রহ্মানং এতদৰোচ – ‘ন খোহং তং, আৰুসো, এৰং পুচ্ছামি – ‘‘ত্ৰমসি ব্রহ্মা মহাব্রহ্মা অভিভূ অনভিভূতো অঞ্ঞদত্থুদসো ৰসৰত্তী ইস্সরো কত্তা নিম্মাতা সেট্ঠো সজিতা ৰসী পিতা ভূতভব্যান’’ন্তি। এৰঞ্চ খো অহং তং, আৰুসো, পুচ্ছামি – ‘‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’’’তি?
‘‘Dutiyampi kho so, kevaṭṭa, bhikkhu taṃ mahābrahmānaṃ etadavoca – ‘na khohaṃ taṃ, āvuso, evaṃ pucchāmi – ‘‘tvamasi brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyāna’’nti. Evañca kho ahaṃ taṃ, āvuso, pucchāmi – ‘‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’’’ti?
‘‘দুতিযম্পি খো সো, কেৰট্ট, মহাব্রহ্মা তং ভিক্খুং এতদৰোচ – ‘অহমস্মি, ভিক্খু, ব্রহ্মা মহাব্রহ্মা অভিভূ অনভিভূতো অঞ্ঞদত্থুদসো ৰসৰত্তী ইস্সরো কত্তা নিম্মাতা সেট্ঠো সজিতা ৰসী পিতা ভূতভব্যান’ন্তি। ততিযম্পি খো সো, কেৰট্ট, ভিক্খু তং মহাব্রহ্মানং এতদৰোচ – ‘ন খোহং তং, আৰুসো, এৰং পুচ্ছামি – ‘‘ত্ৰমসি ব্রহ্মা মহাব্রহ্মা অভিভূ অনভিভূতো অঞ্ঞদত্থুদসো ৰসৰত্তী ইস্সরো কত্তা নিম্মাতা সেট্ঠো সজিতা ৰসী পিতা ভূতভব্যান’’ন্তি। এৰঞ্চ খো অহং তং, আৰুসো, পুচ্ছামি – ‘‘কত্থ নু খো, আৰুসো, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’’’তি?
‘‘Dutiyampi kho so, kevaṭṭa, mahābrahmā taṃ bhikkhuṃ etadavoca – ‘ahamasmi, bhikkhu, brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyāna’nti. Tatiyampi kho so, kevaṭṭa, bhikkhu taṃ mahābrahmānaṃ etadavoca – ‘na khohaṃ taṃ, āvuso, evaṃ pucchāmi – ‘‘tvamasi brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyāna’’nti. Evañca kho ahaṃ taṃ, āvuso, pucchāmi – ‘‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’’’ti?
৪৯৫. ‘‘অথ খো সো, কেৰট্ট, মহাব্রহ্মা তং ভিক্খুং বাহাযং গহেত্ৰা একমন্তং অপনেত্ৰা তং ভিক্খুং এতদৰোচ – ‘ইমে খো মং, ভিক্খু, ব্রহ্মকাযিকা দেৰা এৰং জানন্তি, ‘‘নত্থি কিঞ্চি ব্রহ্মুনো অঞ্ঞাতং, নত্থি কিঞ্চি ব্রহ্মুনো অদিট্ঠং, নত্থি কিঞ্চি ব্রহ্মুনো অৰিদিতং, নত্থি কিঞ্চি ব্রহ্মুনো অসচ্ছিকত’’ন্তি। তস্মাহং তেসং সম্মুখা ন ব্যাকাসিং। অহম্পি খো, ভিক্খু, ন জানামি যত্থিমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূতি। তস্মাতিহ, ভিক্খু, তুয্হেৰেতং দুক্কটং, তুয্হেৰেতং অপরদ্ধং, যং ত্ৰং তং ভগৰন্তং অতিধাৰিত্ৰা বহিদ্ধা পরিযেট্ঠিং আপজ্জসি ইমস্স পঞ্হস্স ৰেয্যাকরণায। গচ্ছ ত্ৰং, ভিক্খু, তমেৰ ভগৰন্তং উপসঙ্কমিত্ৰা ইমং পঞ্হং পুচ্ছ, যথা চ তে ভগৰা ব্যাকরোতি, তথা নং ধারেয্যাসী’তি।
495. ‘‘Atha kho so, kevaṭṭa, mahābrahmā taṃ bhikkhuṃ bāhāyaṃ gahetvā ekamantaṃ apanetvā taṃ bhikkhuṃ etadavoca – ‘ime kho maṃ, bhikkhu, brahmakāyikā devā evaṃ jānanti, ‘‘natthi kiñci brahmuno aññātaṃ, natthi kiñci brahmuno adiṭṭhaṃ, natthi kiñci brahmuno aviditaṃ, natthi kiñci brahmuno asacchikata’’nti. Tasmāhaṃ tesaṃ sammukhā na byākāsiṃ. Ahampi kho, bhikkhu, na jānāmi yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Tasmātiha, bhikkhu, tuyhevetaṃ dukkaṭaṃ, tuyhevetaṃ aparaddhaṃ, yaṃ tvaṃ taṃ bhagavantaṃ atidhāvitvā bahiddhā pariyeṭṭhiṃ āpajjasi imassa pañhassa veyyākaraṇāya. Gaccha tvaṃ, bhikkhu, tameva bhagavantaṃ upasaṅkamitvā imaṃ pañhaṃ puccha, yathā ca te bhagavā byākaroti, tathā naṃ dhāreyyāsī’ti.
৪৯৬. ‘‘অথ খো সো, কেৰট্ট, ভিক্খু – সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য এৰমেৰ ব্রহ্মলোকে অন্তরহিতো মম পুরতো পাতুরহোসি। অথ খো সো, কেৰট্ট, ভিক্খু মং অভিৰাদেত্ৰা একমন্তং নিসীদি, একমন্তং নিসিন্নো খো, কেৰট্ট, সো ভিক্খু মং এতদৰোচ – ‘কত্থ নু খো, ভন্তে, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি?
496. ‘‘Atha kho so, kevaṭṭa, bhikkhu – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya evameva brahmaloke antarahito mama purato pāturahosi. Atha kho so, kevaṭṭa, bhikkhu maṃ abhivādetvā ekamantaṃ nisīdi, ekamantaṃ nisinno kho, kevaṭṭa, so bhikkhu maṃ etadavoca – ‘kattha nu kho, bhante, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti?
তীরদস্সিসকুণুপমা
Tīradassisakuṇupamā
৪৯৭. ‘‘এৰং ৰুত্তে, অহং, কেৰট্ট, তং ভিক্খুং এতদৰোচং – ‘ভূতপুব্বং, ভিক্খু, সামুদ্দিকা ৰাণিজা তীরদস্সিং সকুণং গহেত্ৰা নাৰায সমুদ্দং অজ্ঝোগাহন্তি। তে অতীরদক্খিনিযা নাৰায তীরদস্সিং সকুণং মুঞ্চন্তি। সো গচ্ছতেৰ পুরত্থিমং দিসং, গচ্ছতি দক্খিণং দিসং, গচ্ছতি পচ্ছিমং দিসং, গচ্ছতি উত্তরং দিসং, গচ্ছতি উদ্ধং দিসং, গচ্ছতি অনুদিসং। সচে সো সমন্তা তীরং পস্সতি, তথাগতকোৰ 5 হোতি। সচে পন সো সমন্তা তীরং ন পস্সতি, তমেৰ নাৰং পচ্চাগচ্ছতি। এৰমেৰ খো ত্ৰং, ভিক্খু, যতো যাৰ ব্রহ্মলোকা পরিযেসমানো ইমস্স পঞ্হস্স ৰেয্যাকরণং নাজ্ঝগা, অথ মমঞ্ঞেৰ সন্তিকে পচ্চাগতো। ন খো এসো, ভিক্খু, পঞ্হো এৰং পুচ্ছিতব্বো – ‘কত্থ নু খো, ভন্তে, ইমে চত্তারো মহাভূতা অপরিসেসা নিরুজ্ঝন্তি, সেয্যথিদং – পথৰীধাতু আপোধাতু তেজোধাতু ৰাযোধাতূ’তি?
497. ‘‘Evaṃ vutte, ahaṃ, kevaṭṭa, taṃ bhikkhuṃ etadavocaṃ – ‘bhūtapubbaṃ, bhikkhu, sāmuddikā vāṇijā tīradassiṃ sakuṇaṃ gahetvā nāvāya samuddaṃ ajjhogāhanti. Te atīradakkhiniyā nāvāya tīradassiṃ sakuṇaṃ muñcanti. So gacchateva puratthimaṃ disaṃ, gacchati dakkhiṇaṃ disaṃ, gacchati pacchimaṃ disaṃ, gacchati uttaraṃ disaṃ, gacchati uddhaṃ disaṃ, gacchati anudisaṃ. Sace so samantā tīraṃ passati, tathāgatakova 6 hoti. Sace pana so samantā tīraṃ na passati, tameva nāvaṃ paccāgacchati. Evameva kho tvaṃ, bhikkhu, yato yāva brahmalokā pariyesamāno imassa pañhassa veyyākaraṇaṃ nājjhagā, atha mamaññeva santike paccāgato. Na kho eso, bhikkhu, pañho evaṃ pucchitabbo – ‘kattha nu kho, bhante, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti?
৪৯৮. ‘‘এৰঞ্চ খো এসো, ভিক্খু, পঞ্হো পুচ্ছিতব্বো –
498. ‘‘Evañca kho eso, bhikkhu, pañho pucchitabbo –
‘কত্থ আপো চ পথৰী, তেজো ৰাযো ন গাধতি।
‘Kattha āpo ca pathavī, tejo vāyo na gādhati;
কত্থ দীঘঞ্চ রস্সঞ্চ, অণুং থূলং সুভাসুভং।
Kattha dīghañca rassañca, aṇuṃ thūlaṃ subhāsubhaṃ;
কত্থ নামঞ্চ রূপঞ্চ, অসেসং উপরুজ্ঝতী’তি॥
Kattha nāmañca rūpañca, asesaṃ uparujjhatī’ti.
৪৯৯. ‘‘তত্র ৰেয্যাকরণং ভৰতি –
499. ‘‘Tatra veyyākaraṇaṃ bhavati –
‘ৰিঞ্ঞাণং অনিদস্সনং, অনন্তং সব্বতোপভং।
‘Viññāṇaṃ anidassanaṃ, anantaṃ sabbatopabhaṃ;
এত্থ আপো চ পথৰী, তেজো ৰাযো ন গাধতি॥
Ettha āpo ca pathavī, tejo vāyo na gādhati.
এত্থ দীঘঞ্চ রস্সঞ্চ, অণুং থূলং সুভাসুভং।
Ettha dīghañca rassañca, aṇuṃ thūlaṃ subhāsubhaṃ;
এত্থ নামঞ্চ রূপঞ্চ, অসেসং উপরুজ্ঝতি।
Ettha nāmañca rūpañca, asesaṃ uparujjhati;
ৰিঞ্ঞাণস্স নিরোধেন, এত্থেতং উপরুজ্ঝতী’তি॥
Viññāṇassa nirodhena, etthetaṃ uparujjhatī’ti.
৫০০. ইদমৰোচ ভগৰা। অত্তমনো কেৰট্টো গহপতিপুত্তো ভগৰতো ভাসিতং অভিনন্দীতি।
500. Idamavoca bhagavā. Attamano kevaṭṭo gahapatiputto bhagavato bhāsitaṃ abhinandīti.
কেৰট্টসুত্তং নিট্ঠিতং একাদসমং।
Kevaṭṭasuttaṃ niṭṭhitaṃ ekādasamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / দীঘ নিকায (অট্ঠকথা) • Dīgha nikāya (aṭṭhakathā) / ১১. কেৰট্টসুত্তৰণ্ণনা • 11. Kevaṭṭasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / দীঘনিকায (টীকা) • Dīghanikāya (ṭīkā) / ১১. কেৰট্টসুত্তৰণ্ণনা • 11. Kevaṭṭasuttavaṇṇanā
