| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៧.កាតិយានត្ថេរគាថា
7.Kātiyānattheragāthā
៤១១.
411.
‘‘ឧដ្ឋេហិ និសីទ កាតិយាន, មា និទ្ទាពហុលោ អហុ ជាគរស្សុ;
‘‘Uṭṭhehi nisīda kātiyāna, mā niddābahulo ahu jāgarassu;
មា តំ អលសំ បមត្តពន្ធុ, កូដេនេវ ជិនាតុ មច្ចុរាជា។
Mā taṃ alasaṃ pamattabandhu, kūṭeneva jinātu maccurājā.
៤១២.
412.
‘‘សេយ្យថាបិ 1 មហាសមុទ្ទវេគោ, ឯវំ ជាតិជរាតិវត្តតេ តំ;
‘‘Seyyathāpi 2 mahāsamuddavego, evaṃ jātijarātivattate taṃ;
សោ ករោហិ សុទីបមត្តនោ ត្វំ, ន ហិ តាណំ តវ វិជ្ជតេវ អញ្ញំ។
So karohi sudīpamattano tvaṃ, na hi tāṇaṃ tava vijjateva aññaṃ.
៤១៣.
413.
‘‘សត្ថា ហិ វិជេសិ មគ្គមេតំ, សង្គា ជាតិជរាភយា អតីតំ;
‘‘Satthā hi vijesi maggametaṃ, saṅgā jātijarābhayā atītaṃ;
បុព្ពាបររត្តមប្បមត្តោ, អនុយុញ្ជស្សុ ទឡ្ហំ ករោហិ យោគំ។
Pubbāpararattamappamatto, anuyuñjassu daḷhaṃ karohi yogaṃ.
៤១៤.
414.
‘‘បុរិមានិ បមុញ្ច ពន្ធនានិ, សង្ឃាដិខុរមុណ្ឌភិក្ខភោជី;
‘‘Purimāni pamuñca bandhanāni, saṅghāṭikhuramuṇḍabhikkhabhojī;
មា ខិឌ្ឌារតិញ្ច មា និទ្ទំ, អនុយុញ្ជិត្ថ ឈាយ កាតិយាន។
Mā khiḍḍāratiñca mā niddaṃ, anuyuñjittha jhāya kātiyāna.
៤១៥.
415.
‘‘ឈាយាហិ ជិនាហិ កាតិយាន, យោគក្ខេមបថេសុ កោវិទោសិ;
‘‘Jhāyāhi jināhi kātiyāna, yogakkhemapathesu kovidosi;
បប្បុយ្យ អនុត្តរំ វិសុទ្ធិំ, បរិនិព្ពាហិសិ វារិនាវ ជោតិ។
Pappuyya anuttaraṃ visuddhiṃ, parinibbāhisi vārināva joti.
៤១៦.
416.
‘‘បជ្ជោតករោ បរិត្តរំសោ, វាតេន វិនម្យតេ លតាវ;
‘‘Pajjotakaro parittaraṃso, vātena vinamyate latāva;
ឯវម្បិ តុវំ អនាទិយានោ, មារំ ឥន្ទសគោត្ត និទ្ធុនាហិ;
Evampi tuvaṃ anādiyāno, māraṃ indasagotta niddhunāhi;
សោ វេទយិតាសុ វីតរាគោ, កាលំ កង្ខ ឥធេវ សីតិភូតោ’’តិ។
So vedayitāsu vītarāgo, kālaṃ kaṅkha idheva sītibhūto’’ti.
… កាតិយានោ ថេរោ…។
… Kātiyāno thero….
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ៧. កាតិយានត្ថេរគាថាវណ្ណនា • 7. Kātiyānattheragāthāvaṇṇanā
