| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
अन्तरपेय्यालं
Antarapeyyālaṃ
कतिपुच्छावारवण्णना
Katipucchāvāravaṇṇanā
२७१. कति आपत्तियोति पाराजिकादीसु पञ्चसु आपत्तीसु मेथुनादिन्नादानादिअन्तोगधभेदं अपेक्खित्वा जातिवसेन एकत्तं आरोपेत्वा पुच्छा कता। कति आपत्तिक्खन्धाति अन्तोगधभेदं अपेक्खित्वा पच्चेकं रासट्ठेनाति एत्तकमेवेत्थ भेदो। विनीतानियेव विनीतवत्थूनीति आपत्तितो विरमणानि एव अविप्पटिसारपामोज्जादिधम्मानं कारणत्ता वत्थूनीति विनीतवत्थूनि, तानि एत्थ अत्थतो विरतिआदिअनवज्जधम्मा एव। वेरं मणतीति वेरहेतुत्ता ‘‘वेर’’न्ति लद्धनामं रागादिअकुसलपक्खं विनासेति।
271.Katiāpattiyoti pārājikādīsu pañcasu āpattīsu methunādinnādānādiantogadhabhedaṃ apekkhitvā jātivasena ekattaṃ āropetvā pucchā katā. Kati āpattikkhandhāti antogadhabhedaṃ apekkhitvā paccekaṃ rāsaṭṭhenāti ettakamevettha bhedo. Vinītāniyevavinītavatthūnīti āpattito viramaṇāni eva avippaṭisārapāmojjādidhammānaṃ kāraṇattā vatthūnīti vinītavatthūni, tāni ettha atthato viratiādianavajjadhammā eva. Veraṃ maṇatīti verahetuttā ‘‘vera’’nti laddhanāmaṃ rāgādiakusalapakkhaṃ vināseti.
धम्मस्सवनग्गं भिन्दित्वा गच्छतीति बहूसु एकतो निसीदित्वा धम्मं सुणन्तेसु तं धम्मस्सवनसमागमं कोपेत्वा उट्ठाय गच्छति। अनादरोवाति तुस्सितब्बट्ठाने तुट्ठिं, संविजितब्बट्ठाने संवेगञ्च अपवेदेन्तो एव। कायपागब्भियन्ति उन्नतिवसेन पवत्तनकायानाचारं।
Dhammassavanaggaṃ bhinditvā gacchatīti bahūsu ekato nisīditvā dhammaṃ suṇantesu taṃ dhammassavanasamāgamaṃ kopetvā uṭṭhāya gacchati. Anādarovāti tussitabbaṭṭhāne tuṭṭhiṃ, saṃvijitabbaṭṭhāne saṃvegañca apavedento eva. Kāyapāgabbhiyanti unnativasena pavattanakāyānācāraṃ.
२७४. मेत्ताय सम्भूतं मेत्तं, कायकम्मं। उभयेहिपीति नवकेहि, थेरेहि च। पियं करोतीति तं पुग्गलं पेमट्ठानं करोति, केसन्ति आह ‘‘सब्रह्मचारीन’’न्ति।
274. Mettāya sambhūtaṃ mettaṃ, kāyakammaṃ. Ubhayehipīti navakehi, therehi ca. Piyaṃ karotīti taṃ puggalaṃ pemaṭṭhānaṃ karoti, kesanti āha ‘‘sabrahmacārīna’’nti.
पुग्गलं पटिविभजित्वा भुञ्जतीति पकतेन सम्बन्धो। तमेव पुग्गलपटिविभागं दस्सेतुं ‘‘असुकस्सा’’तिआदि वुत्तं।
Puggalaṃ paṭivibhajitvā bhuñjatīti pakatena sambandho. Tameva puggalapaṭivibhāgaṃ dassetuṃ ‘‘asukassā’’tiādi vuttaṃ.
भुजिस्सभावकरणतोति तण्हादासब्यतो मोचेत्वा समथविपस्सनासु सेरिविहारिताकरणतोति अत्थो। निय्यातीति पवत्तति। सम्मादुक्खक्खयाय संवत्ततीति अत्थो।
Bhujissabhāvakaraṇatoti taṇhādāsabyato mocetvā samathavipassanāsu serivihāritākaraṇatoti attho. Niyyātīti pavattati. Sammādukkhakkhayāya saṃvattatīti attho.
कतिपुच्छावारवण्णना निट्ठिता।
Katipucchāvāravaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / कतिपुच्छावारो • Katipucchāvāro
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / कतिपुच्छावारवण्णना • Katipucchāvāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / कतिपुच्छावारवण्णना • Katipucchāvāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / कतिपुच्छावारवण्णना • Katipucchāvāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / अन्तरपेय्याल कतिपुच्छावारवण्णना • Antarapeyyāla katipucchāvāravaṇṇanā
