| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. कासुमारिफलदायकत्थेरअपदानं
10. Kāsumāriphaladāyakattheraapadānaṃ
५३.
53.
‘‘कणिकारंव जोतन्तं, निसिन्नं पब्बतन्तरे।
‘‘Kaṇikāraṃva jotantaṃ, nisinnaṃ pabbatantare;
अद्दसं विरजं बुद्धं, लोकजेट्ठं नरासभं॥
Addasaṃ virajaṃ buddhaṃ, lokajeṭṭhaṃ narāsabhaṃ.
५४.
54.
‘‘पसन्नचित्तो सुमनो, सिरे कत्वान अञ्जलिं।
‘‘Pasannacitto sumano, sire katvāna añjaliṃ;
कासुमारिफलं गय्ह, बुद्धसेट्ठस्सदासहं॥
Kāsumāriphalaṃ gayha, buddhaseṭṭhassadāsahaṃ.
५५.
55.
‘‘एकत्तिंसे इतो कप्पे, यं फलमददिं अहं।
‘‘Ekattiṃse ito kappe, yaṃ phalamadadiṃ ahaṃ;
दुग्गतिं नाभिजानामि, फलदानस्सिदं फलं॥
Duggatiṃ nābhijānāmi, phaladānassidaṃ phalaṃ.
५६.
56.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
५७.
57.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
५८.
58.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा कासुमारिफलदायको थेरो इमा गाथायो अभासित्थाति।
Itthaṃ sudaṃ āyasmā kāsumāriphaladāyako thero imā gāthāyo abhāsitthāti.
कासुमारिफलदायकत्थेरस्सापदानं दसमं।
Kāsumāriphaladāyakattherassāpadānaṃ dasamaṃ.
बोधिवन्दनवग्गो अट्ठतिंसतिमो।
Bodhivandanavaggo aṭṭhatiṃsatimo.
तस्सुद्दानं –
Tassuddānaṃ –
बोधि पाटलि उप्पली, पट्टि च सत्तपण्णियो।
Bodhi pāṭali uppalī, paṭṭi ca sattapaṇṇiyo;
गन्धमुट्ठि च चितको, तालं सुमनदामको।
Gandhamuṭṭhi ca citako, tālaṃ sumanadāmako;
कासुमारिफली चेव, गाथा एकूनसट्ठिका॥
Kāsumāriphalī ceva, gāthā ekūnasaṭṭhikā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ३. सीवलित्थेरअपदानवण्णना • 3. Sīvalittheraapadānavaṇṇanā
