| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३९. अवटफलवग्गो
39. Avaṭaphalavaggo
१. अवटफलदायकत्थेरअपदानं
1. Avaṭaphaladāyakattheraapadānaṃ
१.
1.
‘‘सतरंसि नाम भगवा, सयम्भू अपराजितो।
‘‘Sataraṃsi nāma bhagavā, sayambhū aparājito;
विवेककामो सम्बुद्धो, गोचरायाभिनिक्खमि॥
Vivekakāmo sambuddho, gocarāyābhinikkhami.
२.
2.
‘‘फलहत्थो अहं दिस्वा, उपगच्छिं नरासभं।
‘‘Phalahattho ahaṃ disvā, upagacchiṃ narāsabhaṃ;
३.
3.
‘‘चतुन्नवुतितो कप्पे, यं फलमददिं अहं।
‘‘Catunnavutito kappe, yaṃ phalamadadiṃ ahaṃ;
दुग्गतिं नाभिजानामि, फलदानस्सिदं फलं॥
Duggatiṃ nābhijānāmi, phaladānassidaṃ phalaṃ.
४.
4.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
नागोव बन्धनं छेत्वा, विहरामि अनासवो॥
Nāgova bandhanaṃ chetvā, viharāmi anāsavo.
५.
5.
‘‘स्वागतं वत मे आसि, मम बुद्धस्स सन्तिके।
‘‘Svāgataṃ vata me āsi, mama buddhassa santike;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
६.
6.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा अवटफलदायको थेरो इमा गाथायो अभासित्थाति।
Itthaṃ sudaṃ āyasmā avaṭaphaladāyako thero imā gāthāyo abhāsitthāti.
अवटफलदायकत्थेरस्सापदानं पठमं।
Avaṭaphaladāyakattherassāpadānaṃ paṭhamaṃ.
Footnotes:
