| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
३. कस्सपगोत्तसुत्तं
3. Kassapagottasuttaṃ
२२३. एकं समयं आयस्मा कस्सपगोत्तो कोसलेसु विहरति अञ्ञतरस्मिं वनसण्डे। तेन खो पन समयेन आयस्मा कस्सपगोत्तो दिवाविहारगतो अञ्ञतरं छेतं ओवदति। अथ खो या तस्मिं वनसण्डे अधिवत्था देवता आयस्मन्तं कस्सपगोत्तं संवेजेतुकामा येनायस्मा कस्सपगोत्तो तेनुपसङ्कमि; उपसङ्कमित्वा आयस्मन्तं कस्सपगोत्तं गाथाहि अज्झभासि –
223. Ekaṃ samayaṃ āyasmā kassapagotto kosalesu viharati aññatarasmiṃ vanasaṇḍe. Tena kho pana samayena āyasmā kassapagotto divāvihāragato aññataraṃ chetaṃ ovadati. Atha kho yā tasmiṃ vanasaṇḍe adhivatthā devatā āyasmantaṃ kassapagottaṃ saṃvejetukāmā yenāyasmā kassapagotto tenupasaṅkami; upasaṅkamitvā āyasmantaṃ kassapagottaṃ gāthāhi ajjhabhāsi –
‘‘गिरिदुग्गचरं छेतं, अप्पपञ्ञं अचेतसं।
‘‘Giriduggacaraṃ chetaṃ, appapaññaṃ acetasaṃ;
अकाले ओवदं भिक्खु, मन्दोव पटिभाति मं॥
Akāle ovadaṃ bhikkhu, mandova paṭibhāti maṃ.
‘‘सुणाति न विजानाति, आलोकेति न पस्सति।
‘‘Suṇāti na vijānāti, āloketi na passati;
धम्मस्मिं भञ्ञमानस्मिं, अत्थं बालो न बुज्झति॥
Dhammasmiṃ bhaññamānasmiṃ, atthaṃ bālo na bujjhati.
‘‘सचेपि दस पज्जोते, धारयिस्ससि कस्सप।
‘‘Sacepi dasa pajjote, dhārayissasi kassapa;
नेव दक्खति रूपानि, चक्खु हिस्स न विज्जती’’ति॥
Neva dakkhati rūpāni, cakkhu hissa na vijjatī’’ti.
अथ खो आयस्मा कस्सपगोत्तो ताय देवताय संवेजितो संवेगमापादीति।
Atha kho āyasmā kassapagotto tāya devatāya saṃvejito saṃvegamāpādīti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ३. कस्सपगोत्तसुत्तवण्णना • 3. Kassapagottasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ३. कस्सपगोत्तसुत्तवण्णना • 3. Kassapagottasuttavaṇṇanā
