| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೨೬. ಕಸ್ಸಪಬುದ್ಧವಂಸೋ
26. Kassapabuddhavaṃso
೧.
1.
ಕೋಣಾಗಮನಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ।
Koṇāgamanassa aparena, sambuddho dvipaduttamo;
ಕಸ್ಸಪೋ ನಾಮ ಗೋತ್ತೇನ, ಧಮ್ಮರಾಜಾ ಪಭಙ್ಕರೋ॥
Kassapo nāma gottena, dhammarājā pabhaṅkaro.
೨.
2.
ಸಞ್ಛಡ್ಡಿತಂ ಕುಲಮೂಲಂ, ಬಹ್ವನ್ನಪಾನಭೋಜನಂ।
Sañchaḍḍitaṃ kulamūlaṃ, bahvannapānabhojanaṃ;
ದತ್ವಾನ ಯಾಚಕೇ ದಾನಂ, ಪೂರಯಿತ್ವಾನ ಮಾನಸಂ।
Datvāna yācake dānaṃ, pūrayitvāna mānasaṃ;
ಉಸಭೋವ ಆಳಕಂ ಭೇತ್ವಾ, ಪತ್ತೋ ಸಮ್ಬೋಧಿಮುತ್ತಮಂ॥
Usabhova āḷakaṃ bhetvā, patto sambodhimuttamaṃ.
೩.
3.
ಧಮ್ಮಚಕ್ಕಂ ಪವತ್ತೇನ್ತೇ, ಕಸ್ಸಪೇ ಲೋಕನಾಯಕೇ।
Dhammacakkaṃ pavattente, kassape lokanāyake;
ವೀಸಕೋಟಿಸಹಸ್ಸಾನಂ, ಪಠಮಾಭಿಸಮಯೋ ಅಹು॥
Vīsakoṭisahassānaṃ, paṭhamābhisamayo ahu.
೪.
4.
ಚತುಮಾಸಂ ಯದಾ ಬುದ್ಧೋ, ಲೋಕೇ ಚರತಿ ಚಾರಿಕಂ।
Catumāsaṃ yadā buddho, loke carati cārikaṃ;
ದಸಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು॥
Dasakoṭisahassānaṃ, dutiyābhisamayo ahu.
೫.
5.
ಯಮಕಂ ವಿಕುಬ್ಬನಂ ಕತ್ವಾ, ಞಾಣಧಾತುಂ ಪಕಿತ್ತಯಿ।
Yamakaṃ vikubbanaṃ katvā, ñāṇadhātuṃ pakittayi;
ಪಞ್ಚಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು॥
Pañcakoṭisahassānaṃ, tatiyābhisamayo ahu.
೬.
6.
ಸುಧಮ್ಮಾ ದೇವಪುರೇ ರಮ್ಮೇ, ತತ್ಥ ಧಮ್ಮಂ ಪಕಿತ್ತಯಿ।
Sudhammā devapure ramme, tattha dhammaṃ pakittayi;
ತೀಣಿಕೋಟಿಸಹಸ್ಸಾನಂ, ದೇವಾನಂ ಬೋಧಯೀ ಜಿನೋ॥
Tīṇikoṭisahassānaṃ, devānaṃ bodhayī jino.
೭.
7.
ನರದೇವಸ್ಸ ಯಕ್ಖಸ್ಸ, ಅಪರೇ ಧಮ್ಮದೇಸನೇ।
Naradevassa yakkhassa, apare dhammadesane;
ಏತೇಸಾನಂ ಅಭಿಸಮಯಾ, ಗಣನಾತೋ ಅಸಙ್ಖಿಯಾ॥
Etesānaṃ abhisamayā, gaṇanāto asaṅkhiyā.
೮.
8.
ತಸ್ಸಾಪಿ ದೇವದೇವಸ್ಸ, ಏಕೋ ಆಸಿ ಸಮಾಗಮೋ।
Tassāpi devadevassa, eko āsi samāgamo;
ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ॥
Khīṇāsavānaṃ vimalānaṃ, santacittāna tādinaṃ.
೯.
9.
ವೀಸಭಿಕ್ಖುಸಹಸ್ಸಾನಂ, ತದಾ ಆಸಿ ಸಮಾಗಮೋ।
Vīsabhikkhusahassānaṃ, tadā āsi samāgamo;
ಅತಿಕ್ಕನ್ತಭವನ್ತಾನಂ, ಹಿರಿಸೀಲೇನ ತಾದಿನಂ॥
Atikkantabhavantānaṃ, hirisīlena tādinaṃ.
೧೦.
10.
ಅಹಂ ತದಾ ಮಾಣವಕೋ, ಜೋತಿಪಾಲೋತಿ ವಿಸ್ಸುತೋ।
Ahaṃ tadā māṇavako, jotipāloti vissuto;
ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ॥
Ajjhāyako mantadharo, tiṇṇaṃ vedāna pāragū.
೧೧.
11.
ಲಕ್ಖಣೇ ಇತಿಹಾಸೇ ಚ, ಸಧಮ್ಮೇ ಪಾರಮಿಂ ಗತೋ।
Lakkhaṇe itihāse ca, sadhamme pāramiṃ gato;
ಭೂಮನ್ತಲಿಕ್ಖಕುಸಲೋ, ಕತವಿಜ್ಜೋ ಅನಾವಯೋ॥
Bhūmantalikkhakusalo, katavijjo anāvayo.
೧೨.
12.
ಕಸ್ಸಪಸ್ಸ ಭಗವತೋ, ಘಟಿಕಾರೋ ನಾಮುಪಟ್ಠಾಕೋ।
Kassapassa bhagavato, ghaṭikāro nāmupaṭṭhāko;
ಸಗಾರವೋ ಸಪ್ಪತಿಸ್ಸೋ, ನಿಬ್ಬುತೋ ತತಿಯೇ ಫಲೇ॥
Sagāravo sappatisso, nibbuto tatiye phale.
೧೩.
13.
ಆದಾಯ ಮಂ ಘಟೀಕಾರೋ, ಉಪಗಞ್ಛಿ ಕಸ್ಸಪಂ ಜಿನಂ।
Ādāya maṃ ghaṭīkāro, upagañchi kassapaṃ jinaṃ;
ತಸ್ಸ ಧಮ್ಮಂ ಸುಣಿತ್ವಾನ, ಪಬ್ಬಜಿಂ ತಸ್ಸ ಸನ್ತಿಕೇ॥
Tassa dhammaṃ suṇitvāna, pabbajiṃ tassa santike.
೧೪.
14.
ಆರದ್ಧವೀರಿಯೋ ಹುತ್ವಾ, ವತ್ತಾವತ್ತೇಸು ಕೋವಿದೋ।
Āraddhavīriyo hutvā, vattāvattesu kovido;
ನ ಕ್ವಚಿ ಪರಿಹಾಯಾಮಿ, ಪೂರೇಸಿಂ ಜಿನಸಾಸನಂ॥
Na kvaci parihāyāmi, pūresiṃ jinasāsanaṃ.
೧೫.
15.
ಯಾವತಾ ಬುದ್ಧಭಣಿತಂ, ನವಙ್ಗಂ ಜಿನಸಾಸನಂ।
Yāvatā buddhabhaṇitaṃ, navaṅgaṃ jinasāsanaṃ;
ಸಬ್ಬಂ ಪರಿಯಾಪುಣಿತ್ವಾನ, ಸೋಭಯಿಂ ಜಿನಸಾಸನಂ॥
Sabbaṃ pariyāpuṇitvāna, sobhayiṃ jinasāsanaṃ.
೧೬.
16.
ಮಮ ಅಚ್ಛರಿಯಂ ದಿಸ್ವಾ, ಸೋಪಿ ಬುದ್ಧೋ ವಿಯಾಕರಿ।
Mama acchariyaṃ disvā, sopi buddho viyākari;
‘‘ಇಮಮ್ಹಿ ಭದ್ದಕೇ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Imamhi bhaddake kappe, ayaṃ buddho bhavissati.
೧೭.
17.
‘‘ಅಹು ಕಪಿಲವ್ಹಯಾ ರಮ್ಮಾ, ನಿಕ್ಖಮಿತ್ವಾ ತಥಾಗತೋ।
‘‘Ahu kapilavhayā rammā, nikkhamitvā tathāgato;
ಪಧಾನಂ ಪದಹಿತ್ವಾನ, ಕತ್ವಾ ದುಕ್ಕರಕಾರಿಕಂ॥
Padhānaṃ padahitvāna, katvā dukkarakārikaṃ.
೧೮.
18.
‘‘ಅಜಪಾಲರುಕ್ಖಮೂಲೇ, ನಿಸೀದಿತ್ವಾ ತಥಾಗತೋ।
‘‘Ajapālarukkhamūle, nisīditvā tathāgato;
ತತ್ಥ ಪಾಯಾಸಂ ಪಗ್ಗಯ್ಹ, ನೇರಞ್ಜರಮುಪೇಹಿತಿ॥
Tattha pāyāsaṃ paggayha, nerañjaramupehiti.
೧೯.
19.
‘‘ನೇರಞ್ಜರಾಯ ತೀರಮ್ಹಿ, ಪಾಯಾಸಂ ಪರಿಭುಞ್ಜಿಯ।
‘‘Nerañjarāya tīramhi, pāyāsaṃ paribhuñjiya;
ಪಟಿಯತ್ತವರಮಗ್ಗೇನ, ಬೋಧಿಮೂಲಮುಪೇಹಿತಿ॥
Paṭiyattavaramaggena, bodhimūlamupehiti.
೨೦.
20.
‘‘ತತೋ ಪದಕ್ಖಿಣಂ ಕತ್ವಾ, ಬೋಧಿಮಣ್ಡಂ ಅನುತ್ತರೋ।
‘‘Tato padakkhiṇaṃ katvā, bodhimaṇḍaṃ anuttaro;
ಪಲ್ಲಙ್ಕೇನ ನಿಸೀದಿತ್ವಾ, ಬುಜ್ಝಿಸ್ಸತಿ ಮಹಾಯಸೋ॥
Pallaṅkena nisīditvā, bujjhissati mahāyaso.
೨೧.
21.
‘‘ಇಮಸ್ಸ ಜನಿಕಾ ಮಾತಾ, ಮಾಯಾ ನಾಮ ಭವಿಸ್ಸತಿ।
‘‘Imassa janikā mātā, māyā nāma bhavissati;
ಪಿತಾ ಸುದ್ಧೋದನೋ ನಾಮ, ಅಯಂ ಹೇಸ್ಸತಿ ಗೋತಮೋ॥
Pitā suddhodano nāma, ayaṃ hessati gotamo.
೨೨.
22.
‘‘ಅನಾಸವಾ ವೀತರಾಗಾ, ಸನ್ತಚಿತ್ತಾ ಸಮಾಹಿತಾ।
‘‘Anāsavā vītarāgā, santacittā samāhitā;
ಕೋಲಿತೋ ಉಪತಿಸ್ಸೋ ಚ, ಅಗ್ಗಾ ಹೇಸ್ಸನ್ತಿ ಸಾವಕಾ।
Kolito upatisso ca, aggā hessanti sāvakā;
ಆನನ್ದೋ ನಾಮುಪಟ್ಠಾಕೋ, ಉಪಟ್ಠಿಸ್ಸತಿಮಂ ಜಿನಂ॥
Ānando nāmupaṭṭhāko, upaṭṭhissatimaṃ jinaṃ.
೨೩.
23.
‘‘ಖೇಮಾ ಉಪ್ಪಲವಣ್ಣಾ ಚ, ಅಗ್ಗಾ ಹೇಸ್ಸನ್ತಿ ಸಾವಿಕಾ।
‘‘Khemā uppalavaṇṇā ca, aggā hessanti sāvikā;
ಅನಾಸವಾ ಸನ್ತಚಿತ್ತಾ, ವೀತರಾಗಾ ಸಮಾಹಿತಾ।
Anāsavā santacittā, vītarāgā samāhitā;
ಬೋಧಿ ತಸ್ಸ ಭಗವತೋ, ಅಸ್ಸತ್ಥೋತಿ ಪವುಚ್ಚತಿ॥
Bodhi tassa bhagavato, assatthoti pavuccati.
೨೪.
24.
‘‘ಚಿತ್ತೋ ಹತ್ಥಾಳವಕೋ ಚ, ಅಗ್ಗಾ ಹೇಸ್ಸನ್ತುಪಟ್ಠಕಾ।
‘‘Citto hatthāḷavako ca, aggā hessantupaṭṭhakā;
ನನ್ದಮಾತಾ ಚ ಉತ್ತರಾ, ಅಗ್ಗಾ ಹೇಸ್ಸನ್ತುಪಟ್ಠಿಕಾ’’॥
Nandamātā ca uttarā, aggā hessantupaṭṭhikā’’.
೨೫.
25.
ಇದಂ ಸುತ್ವಾನ ವಚನಂ, ಅಸ್ಸಮಸ್ಸ ಮಹೇಸಿನೋ।
Idaṃ sutvāna vacanaṃ, assamassa mahesino;
ಆಮೋದಿತಾ ನರಮರೂ, ಬುದ್ಧಬೀಜಂ ಕಿರ ಅಯಂ॥
Āmoditā naramarū, buddhabījaṃ kira ayaṃ.
೨೬.
26.
ಉಕ್ಕುಟ್ಠಿಸದ್ದಾ ಪವತ್ತನ್ತಿ, ಅಪ್ಫೋಟೇನ್ತಿ ಹಸನ್ತಿ ಚ।
Ukkuṭṭhisaddā pavattanti, apphoṭenti hasanti ca;
ಕತಞ್ಜಲೀ ನಮಸ್ಸನ್ತಿ, ದಸಸಹಸ್ಸೀ ಸದೇವಕಾ॥
Katañjalī namassanti, dasasahassī sadevakā.
೨೭.
27.
‘‘ಯದಿಮಸ್ಸ ಲೋಕನಾಥಸ್ಸ, ವಿರಜ್ಝಿಸ್ಸಾಮ ಸಾಸನಂ।
‘‘Yadimassa lokanāthassa, virajjhissāma sāsanaṃ;
ಅನಾಗತಮ್ಹಿ ಅದ್ಧಾನೇ, ಹೇಸ್ಸಾಮ ಸಮ್ಮುಖಾ ಇಮಂ॥
Anāgatamhi addhāne, hessāma sammukhā imaṃ.
೨೮.
28.
‘‘ಯಥಾ ಮನುಸ್ಸಾ ನದಿಂ ತರನ್ತಾ, ಪಟಿತಿತ್ಥಂ ವಿರಜ್ಝಿಯ।
‘‘Yathā manussā nadiṃ tarantā, paṭititthaṃ virajjhiya;
ಹೇಟ್ಠಾ ತಿತ್ಥೇ ಗಹೇತ್ವಾನ, ಉತ್ತರನ್ತಿ ಮಹಾನದಿಂ॥
Heṭṭhā titthe gahetvāna, uttaranti mahānadiṃ.
೨೯.
29.
‘‘ಏವಮೇವ ಮಯಂ ಸಬ್ಬೇ, ಯದಿ ಮುಞ್ಚಾಮಿಮಂ ಜಿನಂ।
‘‘Evameva mayaṃ sabbe, yadi muñcāmimaṃ jinaṃ;
ಅನಾಗತಮ್ಹಿ ಅದ್ಧಾನೇ, ಹೇಸ್ಸಾಮ ಸಮ್ಮುಖಾ ಇಮಂ’’॥
Anāgatamhi addhāne, hessāma sammukhā imaṃ’’.
೩೦.
30.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೩೧.
31.
ಏವಮಹಂ ಸಂಸರಿತ್ವಾ, ಪರಿವಜ್ಜೇನ್ತೋ ಅನಾಚರಂ।
Evamahaṃ saṃsaritvā, parivajjento anācaraṃ;
ದುಕ್ಕರಞ್ಚ ಕತಂ ಮಯ್ಹಂ, ಬೋಧಿಯಾಯೇವ ಕಾರಣಾ॥
Dukkarañca kataṃ mayhaṃ, bodhiyāyeva kāraṇā.
೩೨.
32.
ನಗರಂ ಬಾರಾಣಸೀ ನಾಮ, ಕಿಕೀ ನಾಮಾಸಿ ಖತ್ತಿಯೋ।
Nagaraṃ bārāṇasī nāma, kikī nāmāsi khattiyo;
ವಸತೇ ತತ್ಥ ನಗರೇ, ಸಮ್ಬುದ್ಧಸ್ಸ ಮಹಾಕುಲಂ॥
Vasate tattha nagare, sambuddhassa mahākulaṃ.
೩೩.
33.
ಬ್ರಾಹ್ಮಣೋ ಬ್ರಹ್ಮದತ್ತೋವ, ಆಸಿ ಬುದ್ಧಸ್ಸ ಸೋ ಪಿತಾ।
Brāhmaṇo brahmadattova, āsi buddhassa so pitā;
ಧನವತೀ ನಾಮ ಜನಿಕಾ, ಕಸ್ಸಪಸ್ಸ ಮಹೇಸಿನೋ॥
Dhanavatī nāma janikā, kassapassa mahesino.
೩೪.
34.
ದುವೇ ವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।
Duve vassasahassāni, agāraṃ ajjha so vasi;
ಹಂಸೋ ಯಸೋ ಸಿರಿನನ್ದೋ, ತಯೋ ಪಾಸಾದಮುತ್ತಮಾ॥
Haṃso yaso sirinando, tayo pāsādamuttamā.
೩೫.
35.
ತಿಸೋಳಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Tisoḷasasahassāni, nāriyo samalaṅkatā;
ಸುನನ್ದಾ ನಾಮ ಸಾ ನಾರೀ, ವಿಜಿತಸೇನೋ ನಾಮ ಅತ್ರಜೋ॥
Sunandā nāma sā nārī, vijitaseno nāma atrajo.
೩೬.
36.
ನಿಮಿತ್ತೇ ಚತುರೋ ದಿಸ್ವಾ, ಪಾಸಾದೇನಾಭಿನಿಕ್ಖಮಿ।
Nimitte caturo disvā, pāsādenābhinikkhami;
ಸತ್ತಾಹಂ ಪಧಾನಚಾರಂ, ಅಚರೀ ಪುರಿಸುತ್ತಮೋ॥
Sattāhaṃ padhānacāraṃ, acarī purisuttamo.
೩೭.
37.
ಬ್ರಹ್ಮುನಾ ಯಾಚಿತೋ ಸನ್ತೋ, ಕಸ್ಸಪೋ ಲೋಕನಾಯಕೋ।
Brahmunā yācito santo, kassapo lokanāyako;
ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ॥
Vatti cakkaṃ mahāvīro, migadāye naruttamo.
೩೮.
38.
ತಿಸ್ಸೋ ಚ ಭಾರದ್ವಾಜೋ ಚ, ಅಹೇಸುಂ ಅಗ್ಗಸಾವಕಾ।
Tisso ca bhāradvājo ca, ahesuṃ aggasāvakā;
ಸಬ್ಬಮಿತ್ತೋ ನಾಮುಪಟ್ಠಾಕೋ, ಕಸ್ಸಪಸ್ಸ ಮಹೇಸಿನೋ॥
Sabbamitto nāmupaṭṭhāko, kassapassa mahesino.
೩೯.
39.
ಅನುಳಾ ಉರುವೇಳಾ ಚ, ಅಹೇಸುಂ ಅಗ್ಗಸಾವಿಕಾ।
Anuḷā uruveḷā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ನಿಗ್ರೋಧೋತಿ ಪವುಚ್ಚತಿ॥
Bodhi tassa bhagavato, nigrodhoti pavuccati.
೪೦.
40.
ಸುಮಙ್ಗಲೋ ಘಟಿಕಾರೋ ಚ, ಅಹೇಸುಂ ಅಗ್ಗುಪಟ್ಠಕಾ।
Sumaṅgalo ghaṭikāro ca, ahesuṃ aggupaṭṭhakā;
೪೧.
41.
ಉಚ್ಚತ್ತನೇನ ಸೋ ಬುದ್ಧೋ, ವೀಸತಿರತನುಗ್ಗತೋ।
Uccattanena so buddho, vīsatiratanuggato;
ವಿಜ್ಜುಲಟ್ಠೀವ ಆಕಾಸೇ, ಚನ್ದೋವ ಗಹಪೂರಿತೋ॥
Vijjulaṭṭhīva ākāse, candova gahapūrito.
೪೨.
42.
ವೀಸತಿವಸ್ಸಸಹಸ್ಸಾನಿ , ಆಯು ತಸ್ಸ ಮಹೇಸಿನೋ।
Vīsativassasahassāni , āyu tassa mahesino;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೪೩.
43.
ಧಮ್ಮತಳಾಕಂ ಮಾಪಯಿತ್ವಾ, ಸೀಲಂ ದತ್ವಾ ವಿಲೇಪನಂ।
Dhammataḷākaṃ māpayitvā, sīlaṃ datvā vilepanaṃ;
ಧಮ್ಮದುಸ್ಸಂ ನಿವಾಸೇತ್ವಾ, ಧಮ್ಮಮಾಲಂ ವಿಭಜ್ಜಿಯ॥
Dhammadussaṃ nivāsetvā, dhammamālaṃ vibhajjiya.
೪೪.
44.
ಧಮ್ಮವಿಮಲಮಾದಾಸಂ, ಠಪಯಿತ್ವಾ ಮಹಾಜನೇ।
Dhammavimalamādāsaṃ, ṭhapayitvā mahājane;
ಕೇಚಿ ನಿಬ್ಬಾನಂ ಪತ್ಥೇನ್ತಾ, ಪಸ್ಸನ್ತು ಮೇ ಅಲಙ್ಕರಂ॥
Keci nibbānaṃ patthentā, passantu me alaṅkaraṃ.
೪೫.
45.
ಸೀಲಕಞ್ಚುಕಂ ದತ್ವಾನ, ಝಾನಕವಚವಮ್ಮಿತಂ।
Sīlakañcukaṃ datvāna, jhānakavacavammitaṃ;
ಧಮ್ಮಚಮ್ಮಂ ಪಾರುಪಿತ್ವಾ, ದತ್ವಾ ಸನ್ನಾಹಮುತ್ತಮಂ॥
Dhammacammaṃ pārupitvā, datvā sannāhamuttamaṃ.
೪೬.
46.
ಸತಿಫಲಕಂ ದತ್ವಾನ, ತಿಖಿಣಞಾಣಕುನ್ತಿಮಂ।
Satiphalakaṃ datvāna, tikhiṇañāṇakuntimaṃ;
ಧಮ್ಮಖಗ್ಗವರಂ ದತ್ವಾ, ಸೀಲಸಂಸಗ್ಗಮದ್ದನಂ॥
Dhammakhaggavaraṃ datvā, sīlasaṃsaggamaddanaṃ.
೪೭.
47.
ತೇವಿಜ್ಜಾಭೂಸನಂ ದತ್ವಾನ, ಆವೇಳಂ ಚತುರೋ ಫಲೇ।
Tevijjābhūsanaṃ datvāna, āveḷaṃ caturo phale;
ಛಳಭಿಞ್ಞಾಭರಣಂ ದತ್ವಾ, ಧಮ್ಮಪುಪ್ಫಪಿಳನ್ಧನಂ॥
Chaḷabhiññābharaṇaṃ datvā, dhammapupphapiḷandhanaṃ.
೪೮.
48.
ಸದ್ಧಮ್ಮಪಣ್ಡರಚ್ಛತ್ತಂ, ದತ್ವಾ ಪಾಪನಿವಾರಣಂ।
Saddhammapaṇḍaracchattaṃ, datvā pāpanivāraṇaṃ;
ಮಾಪಯಿತ್ವಾಭಯಂ ಪುಪ್ಫಂ, ನಿಬ್ಬುತೋ ಸೋ ಸಸಾವಕೋ॥
Māpayitvābhayaṃ pupphaṃ, nibbuto so sasāvako.
೪೯.
49.
ಏಸೋ ಹಿ ಸಮ್ಮಾಸಮ್ಬುದ್ಧೋ, ಅಪ್ಪಮೇಯ್ಯೋ ದುರಾಸದೋ।
Eso hi sammāsambuddho, appameyyo durāsado;
ಏಸೋ ಹಿ ಧಮ್ಮರತನೋ, ಸ್ವಾಕ್ಖಾತೋ ಏಹಿಪಸ್ಸಿಕೋ॥
Eso hi dhammaratano, svākkhāto ehipassiko.
೫೦.
50.
ಏಸೋ ಹಿ ಸಙ್ಘರತನೋ, ಸುಪ್ಪಟಿಪನ್ನೋ ಅನುತ್ತರೋ।
Eso hi saṅgharatano, suppaṭipanno anuttaro;
ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ॥
Sabbaṃ tamantarahitaṃ, nanu rittā sabbasaṅkhārā.
೫೧.
51.
ಮಹಾಕಸ್ಸಪೋ ಜಿನೋ ಸತ್ಥಾ, ಸೇತಬ್ಯಾರಾಮಮ್ಹಿ ನಿಬ್ಬುತೋ।
Mahākassapo jino satthā, setabyārāmamhi nibbuto;
ತತ್ಥೇವಸ್ಸ ಜಿನಥೂಪೋ, ಯೋಜನುಬ್ಬೇಧಮುಗ್ಗತೋತಿ॥
Tatthevassa jinathūpo, yojanubbedhamuggatoti.
ಕಸ್ಸಪಸ್ಸ ಭಗವತೋ ವಂಸೋ ಚತುವೀಸತಿಮೋ।
Kassapassa bhagavato vaṃso catuvīsatimo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೨೬. ಕಸ್ಸಪಬುದ್ಧವಂಸವಣ್ಣನಾ • 26. Kassapabuddhavaṃsavaṇṇanā
