| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೨೭. ಗೋತಮಬುದ್ಧವಂಸೋ
27. Gotamabuddhavaṃso
೧.
1.
ಪಧಾನಂ ಪದಹಿತ್ವಾನ, ಪತ್ತೋ ಸಮ್ಬೋಧಿಮುತ್ತಮಂ॥
Padhānaṃ padahitvāna, patto sambodhimuttamaṃ.
೨.
2.
ಬ್ರಹ್ಮುನಾ ಯಾಚಿತೋ ಸನ್ತೋ, ಧಮ್ಮಚಕ್ಕಂ ಪವತ್ತಯಿಂ।
Brahmunā yācito santo, dhammacakkaṃ pavattayiṃ;
ಅಟ್ಠಾರಸನ್ನಂ ಕೋಟೀನಂ, ಪಠಮಾಭಿಸಮಯೋ ಅಹು॥
Aṭṭhārasannaṃ koṭīnaṃ, paṭhamābhisamayo ahu.
೩.
3.
ತತೋ ಪರಞ್ಚ ದೇಸೇನ್ತೇ, ನರದೇವಸಮಾಗಮೇ।
Tato parañca desente, naradevasamāgame;
ಗಣನಾಯ ನ ವತ್ತಬ್ಬೋ, ದುತಿಯಾಭಿಸಮಯೋ ಅಹು॥
Gaṇanāya na vattabbo, dutiyābhisamayo ahu.
೪.
4.
ಇಧೇವಾಹಂ ಏತರಹಿ, ಓವದಿಂ ಮಮ ಅತ್ರಜಂ।
Idhevāhaṃ etarahi, ovadiṃ mama atrajaṃ;
ಗಣನಾಯ ನ ವತ್ತಬ್ಬೋ, ತತಿಯಾಭಿಸಮಯೋ ಅಹು॥
Gaṇanāya na vattabbo, tatiyābhisamayo ahu.
೫.
5.
ಏಕೋಸಿ ಸನ್ನಿಪಾತೋ ಮೇ, ಸಾವಕಾನಂ ಮಹೇಸಿನಂ।
Ekosi sannipāto me, sāvakānaṃ mahesinaṃ;
ಅಡ್ಢತೇಳಸಸತಾನಂ, ಭಿಕ್ಖೂನಾಸಿ ಸಮಾಗಮೋ॥
Aḍḍhateḷasasatānaṃ, bhikkhūnāsi samāgamo.
೬.
6.
ವಿರೋಚಮಾನೋ ವಿಮಲೋ, ಭಿಕ್ಖುಸಙ್ಘಸ್ಸ ಮಜ್ಝಗೋ।
Virocamāno vimalo, bhikkhusaṅghassa majjhago;
ದದಾಮಿ ಪತ್ಥಿತಂ ಸಬ್ಬಂ, ಮಣೀವ ಸಬ್ಬಕಾಮದೋ॥
Dadāmi patthitaṃ sabbaṃ, maṇīva sabbakāmado.
೭.
7.
ಫಲಮಾಕಙ್ಖಮಾನಾನಂ , ಭವಚ್ಛನ್ದಜಹೇಸಿನಂ।
Phalamākaṅkhamānānaṃ , bhavacchandajahesinaṃ;
ಚತುಸಚ್ಚಂ ಪಕಾಸೇಮಿ, ಅನುಕಮ್ಪಾಯ ಪಾಣಿನಂ॥
Catusaccaṃ pakāsemi, anukampāya pāṇinaṃ.
೮.
8.
ದಸವೀಸಸಹಸ್ಸಾನಂ, ಧಮ್ಮಾಭಿಸಮಯೋ ಅಹು।
Dasavīsasahassānaṃ, dhammābhisamayo ahu;
ಏಕದ್ವಿನ್ನಂ ಅಭಿಸಮಯೋ, ಗಣನಾತೋ ಅಸಙ್ಖಿಯೋ॥
Ekadvinnaṃ abhisamayo, gaṇanāto asaṅkhiyo.
೯.
9.
ವಿತ್ಥಾರಿಕಂ ಬಾಹುಜಞ್ಞಂ, ಇದ್ಧಂ ಫೀತಂ ಸುಫುಲ್ಲಿತಂ।
Vitthārikaṃ bāhujaññaṃ, iddhaṃ phītaṃ suphullitaṃ;
ಇಧ ಮಯ್ಹಂ ಸಕ್ಯಮುನಿನೋ, ಸಾಸನಂ ಸುವಿಸೋಧಿತಂ॥
Idha mayhaṃ sakyamunino, sāsanaṃ suvisodhitaṃ.
೧೦.
10.
ಅನಾಸವಾ ವೀತರಾಗಾ, ಸನ್ತಚಿತ್ತಾ ಸಮಾಹಿತಾ।
Anāsavā vītarāgā, santacittā samāhitā;
ಭಿಕ್ಖೂನೇಕಸತಾ ಸಬ್ಬೇ, ಪರಿವಾರೇನ್ತಿ ಮಂ ಸದಾ॥
Bhikkhūnekasatā sabbe, parivārenti maṃ sadā.
೧೧.
11.
ಇದಾನಿ ಯೇ ಏತರಹಿ, ಜಹನ್ತಿ ಮಾನುಸಂ ಭವಂ।
Idāni ye etarahi, jahanti mānusaṃ bhavaṃ;
ಅಪ್ಪತ್ತಮಾನಸಾ ಸೇಖಾ, ತೇ ಭಿಕ್ಖೂ ವಿಞ್ಞುಗರಹಿತಾ॥
Appattamānasā sekhā, te bhikkhū viññugarahitā.
೧೨.
12.
ಅರಿಯಞ್ಚ ಸಂಥೋಮಯನ್ತಾ, ಸದಾ ಧಮ್ಮರತಾ ಜನಾ।
Ariyañca saṃthomayantā, sadā dhammaratā janā;
ಬುಜ್ಝಿಸ್ಸನ್ತಿ ಸತಿಮನ್ತೋ, ಸಂಸಾರಸರಿತಂ ಗತಾ॥
Bujjhissanti satimanto, saṃsārasaritaṃ gatā.
೧೩.
13.
ನಗರಂ ಕಪಿಲವತ್ಥು ಮೇ, ರಾಜಾ ಸುದ್ಧೋದನೋ ಪಿತಾ।
Nagaraṃ kapilavatthu me, rājā suddhodano pitā;
ಮಯ್ಹಂ ಜನೇತ್ತಿಕಾ ಮಾತಾ, ಮಾಯಾದೇವೀತಿ ವುಚ್ಚತಿ॥
Mayhaṃ janettikā mātā, māyādevīti vuccati.
೧೪.
14.
ಏಕೂನತಿಂಸವಸ್ಸಾನಿ , ಅಗಾರಂ ಅಜ್ಝಹಂ ವಸಿಂ।
Ekūnatiṃsavassāni , agāraṃ ajjhahaṃ vasiṃ;
ರಮ್ಮೋ ಸುರಮ್ಮೋ ಸುಭಕೋ, ತಯೋ ಪಾಸಾದಮುತ್ತಮಾ॥
Rammo surammo subhako, tayo pāsādamuttamā.
೧೫.
15.
ಚತ್ತಾರೀಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Cattārīsasahassāni, nāriyo samalaṅkatā;
ಭದ್ದಕಞ್ಚನಾ ನಾಮ ನಾರೀ, ರಾಹುಲೋ ನಾಮ ಅತ್ರಜೋ॥
Bhaddakañcanā nāma nārī, rāhulo nāma atrajo.
೧೬.
16.
ನಿಮಿತ್ತೇ ಚತುರೋ ದಿಸ್ವಾ, ಅಸ್ಸಯಾನೇನ ನಿಕ್ಖಮಿಂ।
Nimitte caturo disvā, assayānena nikkhamiṃ;
ಛಬ್ಬಸ್ಸಂ ಪಧಾನಚಾರಂ, ಅಚರಿಂ ದುಕ್ಕರಂ ಅಹಂ॥
Chabbassaṃ padhānacāraṃ, acariṃ dukkaraṃ ahaṃ.
೧೭.
17.
ಬಾರಾಣಸಿಯಂ ಇಸಿಪತನೇ, ಚಕ್ಕಂ ಪವತ್ತಿತಂ ಮಯಾ।
Bārāṇasiyaṃ isipatane, cakkaṃ pavattitaṃ mayā;
ಅಹಂ ಗೋತಮಸಮ್ಬುದ್ಧೋ, ಸರಣಂ ಸಬ್ಬಪಾಣಿನಂ॥
Ahaṃ gotamasambuddho, saraṇaṃ sabbapāṇinaṃ.
೧೮.
18.
ಕೋಲಿತೋ ಉಪತಿಸ್ಸೋ ಚ, ದ್ವೇ ಭಿಕ್ಖೂ ಅಗ್ಗಸಾವಕಾ।
Kolito upatisso ca, dve bhikkhū aggasāvakā;
ಆನನ್ದೋ ನಾಮುಪಟ್ಠಾಕೋ, ಸನ್ತಿಕಾವಚರೋ ಮಮ।
Ānando nāmupaṭṭhāko, santikāvacaro mama;
ಖೇಮಾ ಉಪ್ಪಲವಣ್ಣಾ ಚ, ಭಿಕ್ಖುನೀ ಅಗ್ಗಸಾವಿಕಾ॥
Khemā uppalavaṇṇā ca, bhikkhunī aggasāvikā.
೧೯.
19.
ಚಿತ್ತೋ ಹತ್ಥಾಳವಕೋ ಚ, ಅಗ್ಗುಪಟ್ಠಾಕುಪಾಸಕಾ।
Citto hatthāḷavako ca, aggupaṭṭhākupāsakā;
ನನ್ದಮಾತಾ ಚ ಉತ್ತರಾ, ಅಗ್ಗುಪಟ್ಠಿಕುಪಾಸಿಕಾ॥
Nandamātā ca uttarā, aggupaṭṭhikupāsikā.
೨೦.
20.
ಅಹಂ ಅಸ್ಸತ್ಥಮೂಲಮ್ಹಿ, ಪತ್ತೋ ಸಮ್ಬೋಧಿಮುತ್ತಮಂ।
Ahaṃ assatthamūlamhi, patto sambodhimuttamaṃ;
ಬ್ಯಾಮಪ್ಪಭಾ ಸದಾ ಮಯ್ಹಂ, ಸೋಳಸಹತ್ಥಮುಗ್ಗತಾ॥
Byāmappabhā sadā mayhaṃ, soḷasahatthamuggatā.
೨೧.
21.
ಅಪ್ಪಂ ವಸ್ಸಸತಂ ಆಯು, ಇದಾನೇತರಹಿ ವಿಜ್ಜತಿ।
Appaṃ vassasataṃ āyu, idānetarahi vijjati;
ತಾವತಾ ತಿಟ್ಠಮಾನೋಹಂ, ತಾರೇಮಿ ಜನತಂ ಬಹುಂ॥
Tāvatā tiṭṭhamānohaṃ, tāremi janataṃ bahuṃ.
೨೨.
22.
ಠಪಯಿತ್ವಾನ ಧಮ್ಮುಕ್ಕಂ, ಪಚ್ಛಿಮಂ ಜನಬೋಧನಂ।
Ṭhapayitvāna dhammukkaṃ, pacchimaṃ janabodhanaṃ;
ಅಹಮ್ಪಿ ನಚಿರಸ್ಸೇವ, ಸದ್ಧಿಂ ಸಾವಕಸಙ್ಘತೋ।
Ahampi nacirasseva, saddhiṃ sāvakasaṅghato;
ಇಧೇವ ಪರಿನಿಬ್ಬಿಸ್ಸಂ, ಅಗ್ಗೀ ವಾಹಾರಸಙ್ಖಯಾ॥
Idheva parinibbissaṃ, aggī vāhārasaṅkhayā.
೨೩.
23.
ಅಯಞ್ಚ ಗುಣಧಾರಣೋ ದೇಹೋ, ದ್ವತ್ತಿಂಸವರಲಕ್ಖಣವಿಚಿತ್ತೋ॥
Ayañca guṇadhāraṇo deho, dvattiṃsavaralakkhaṇavicitto.
೨೪.
24.
ದಸ ದಿಸಾ ಪಭಾಸೇತ್ವಾ, ಸತರಂಸೀವ ಛಪ್ಪಭಾ।
Dasa disā pabhāsetvā, sataraṃsīva chappabhā;
ಸಬ್ಬಂ ತಮನ್ತರಹಿಸ್ಸನ್ತಿ, ನನು ರಿತ್ತಾ ಸಬ್ಬಸಙ್ಖಾರಾತಿ॥
Sabbaṃ tamantarahissanti, nanu rittā sabbasaṅkhārāti.
ಗೋತಮಸ್ಸ ಭಗವತೋ ವಂಸೋ ಪಞ್ಚವೀಸತಿಮೋ।
Gotamassa bhagavato vaṃso pañcavīsatimo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೨೭. ಗೋತಮಬುದ್ಧವಂಸವಣ್ಣನಾ • 27. Gotamabuddhavaṃsavaṇṇanā
