| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๑๑. กณฺหทีปายนจริยา
11. Kaṇhadīpāyanacariyā
๙๒.
92.
‘‘ปุนาปรํ ยทา โหมิ, กณฺหทีปายโน อิสิ;
‘‘Punāparaṃ yadā homi, kaṇhadīpāyano isi;
ปโรปญฺญาสวสฺสานิ, อนภิรโตจริํ อหํฯ
Paropaññāsavassāni, anabhiratocariṃ ahaṃ.
๙๓.
93.
‘‘น โกจิ เอตํ ชานาติ, อนภิรติมนํ มม;
‘‘Na koci etaṃ jānāti, anabhiratimanaṃ mama;
อหญฺหิ กสฺสจิ นาจิกฺขิํ, อรติ เม จรติ มานเสฯ
Ahañhi kassaci nācikkhiṃ, arati me carati mānase.
๙๔.
94.
‘‘สพฺรหฺมจารี มณฺฑโพฺย, สหาโย เม มหาอิสิ;
‘‘Sabrahmacārī maṇḍabyo, sahāyo me mahāisi;
ปุพฺพกมฺมสมายุโตฺต, สูลมาโรปนํ ลภิฯ
Pubbakammasamāyutto, sūlamāropanaṃ labhi.
๙๕.
95.
‘‘ตมหํ อุปฎฺฐหิตฺวาน, อาโรคฺยมนุปาปยิํ;
‘‘Tamahaṃ upaṭṭhahitvāna, ārogyamanupāpayiṃ;
อาปุจฺฉิตฺวาน อาคญฺฉิํ, ยํ มยฺหํ สกมสฺสมํฯ
Āpucchitvāna āgañchiṃ, yaṃ mayhaṃ sakamassamaṃ.
๙๖.
96.
‘‘สหาโย พฺราหฺมโณ มยฺหํ, ภริยํ อาทาย ปุตฺตกํ;
‘‘Sahāyo brāhmaṇo mayhaṃ, bhariyaṃ ādāya puttakaṃ;
ตโย ชนา สมาคนฺตฺวา, อาคญฺฉุํ ปาหุนาคตํฯ
Tayo janā samāgantvā, āgañchuṃ pāhunāgataṃ.
๙๗.
97.
‘‘สโมฺมทมาโน เตหิ สห, นิสิโนฺน สกมสฺสเม;
‘‘Sammodamāno tehi saha, nisinno sakamassame;
ทารโก วฎฺฎมนุกฺขิปํ, อาสีวิสมโกปยิฯ
Dārako vaṭṭamanukkhipaṃ, āsīvisamakopayi.
๙๘.
98.
‘‘ตโต โส วฎฺฎคตํ มคฺคํ, อเนฺวสโนฺต กุมารโก;
‘‘Tato so vaṭṭagataṃ maggaṃ, anvesanto kumārako;
อาสีวิสสฺส หเตฺถน, อุตฺตมงฺคํ ปรามสิฯ
Āsīvisassa hatthena, uttamaṅgaṃ parāmasi.
๙๙.
99.
‘‘ตสฺส อามสเน กุโทฺธ, สโปฺป วิสพลสฺสิโต;
‘‘Tassa āmasane kuddho, sappo visabalassito;
กุปิโต ปรมโกเปน, อฑํสิ ทารกํ ขเณฯ
Kupito paramakopena, aḍaṃsi dārakaṃ khaṇe.
๑๐๐.
100.
เตนาหํ ทุกฺขิโต อาสิํ, มม วาหสิ ตํ ทุกฺขํฯ
Tenāhaṃ dukkhito āsiṃ, mama vāhasi taṃ dukkhaṃ.
๑๐๑.
101.
‘‘ตฺยาหํ อสฺสาสยิตฺวาน, ทุกฺขิเต โสกสลฺลิเต;
‘‘Tyāhaṃ assāsayitvāna, dukkhite sokasallite;
ปฐมํ อกาสิํ กิริยํ, อคฺคํ สจฺจํ วรุตฺตมํฯ
Paṭhamaṃ akāsiṃ kiriyaṃ, aggaṃ saccaṃ varuttamaṃ.
๑๐๒.
102.
‘‘‘สตฺตาหเมวาหํ ปสนฺนจิโตฺต, ปุญฺญตฺถิโก อจริํ พฺรหฺมจริยํ;
‘‘‘Sattāhamevāhaṃ pasannacitto, puññatthiko acariṃ brahmacariyaṃ;
อถาปรํ ยํ จริตํ มเมทํ, วสฺสานิ ปญฺญาสสมาธิกานิฯ
Athāparaṃ yaṃ caritaṃ mamedaṃ, vassāni paññāsasamādhikāni.
๑๐๓.
103.
‘‘‘อกามโก วาหิ อหํ จรามิ, เอเตน สเจฺจน สุวตฺถิ โหตุ;
‘‘‘Akāmako vāhi ahaṃ carāmi, etena saccena suvatthi hotu;
หตํ วิสํ ชีวตุ ยญฺญทโตฺต’ฯ
Hataṃ visaṃ jīvatu yaññadatto’.
๑๐๔.
104.
‘‘สห สเจฺจ กเต มยฺหํ, วิสเวเคน เวธิโต;
‘‘Saha sacce kate mayhaṃ, visavegena vedhito;
อพุชฺฌิตฺวาน วุฎฺฐาสิ, อโรโค จาสิ มาณโว;
Abujjhitvāna vuṭṭhāsi, arogo cāsi māṇavo;
สเจฺจน เม สโม นตฺถิ, เอสา เม สจฺจปารมี’’ติฯ
Saccena me samo natthi, esā me saccapāramī’’ti.
กณฺหทีปายนจริยํ เอกาทสมํฯ
Kaṇhadīpāyanacariyaṃ ekādasamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๑๑. กณฺหทีปายนจริยาวณฺณนา • 11. Kaṇhadīpāyanacariyāvaṇṇanā
