| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৮. কম্মফলঅত্থিভাৰপঞ্হো
8. Kammaphalaatthibhāvapañho
৮. রাজা আহ ‘‘ভন্তে নাগসেন, ইমিনা নামরূপেন কম্মং কতং কুসলং ৰা অকুসলং ৰা, কুহিং তানি কম্মানি তিট্ঠন্তী’’তি? ‘‘অনুবন্ধেয্যুং খো, মহারাজ, তানি কম্মানি ছাযাৰ অনপাযিনী’’তি 1। ‘‘সক্কা পন, ভন্তে, তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’’’তি? ‘‘ন সক্কা, মহারাজ, তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’’’তি।
8. Rājā āha ‘‘bhante nāgasena, iminā nāmarūpena kammaṃ kataṃ kusalaṃ vā akusalaṃ vā, kuhiṃ tāni kammāni tiṭṭhantī’’ti? ‘‘Anubandheyyuṃ kho, mahārāja, tāni kammāni chāyāva anapāyinī’’ti 2. ‘‘Sakkā pana, bhante, tāni kammāni dassetuṃ ‘idha vā idha vā tāni kammāni tiṭṭhantī’’’ti? ‘‘Na sakkā, mahārāja, tāni kammāni dassetuṃ ‘idha vā idha vā tāni kammāni tiṭṭhantī’’’ti.
‘‘ওপম্মং করোহী’’তি। ‘‘তং কিং মঞ্ঞসি, মহারাজ, যানিমানি রুক্খানি অনিব্বত্তফলানি, সক্কা তেসং ফলানি দস্সেতুং ‘ইধ ৰা ইধ ৰা তানি ফলানি তিট্ঠন্তী’’’তি। ‘‘ন হি, ভন্তে’’তি। ‘‘এৰমেৰ খো, মহারাজ, অব্বোচ্ছিন্নায সন্ততিযা ন সক্কা তানি কম্মানি দস্সেতুং ‘ইধ ৰা ইধ ৰা তানি কম্মানি তিট্ঠন্তী’তি।
‘‘Opammaṃ karohī’’ti. ‘‘Taṃ kiṃ maññasi, mahārāja, yānimāni rukkhāni anibbattaphalāni, sakkā tesaṃ phalāni dassetuṃ ‘idha vā idha vā tāni phalāni tiṭṭhantī’’’ti. ‘‘Na hi, bhante’’ti. ‘‘Evameva kho, mahārāja, abbocchinnāya santatiyā na sakkā tāni kammāni dassetuṃ ‘idha vā idha vā tāni kammāni tiṭṭhantī’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
কম্মফলঅত্থিভাৰপঞ্হো অট্ঠমো।
Kammaphalaatthibhāvapañho aṭṭhamo.
Footnotes:
