| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
28. கம்மனித்³தே³ஸவண்ணனா
28. Kammaniddesavaṇṇanā
199. வக்³கே³ன அத⁴ம்மகம்மஞ்ச ஸமக்³கே³ன அத⁴ம்மகம்மஞ்ச வக்³கே³ன த⁴ம்மகம்மஞ்ச ஸமக்³கே³ன த⁴ம்மகம்மஞ்சாதி சத்தாரி கம்மானி ஹொந்தீதி ஸேஸோ. தத்த² வக்³கே³ன அத⁴ம்மகம்மந்தி வக்³கே³ன ஸங்கே⁴ன கரணீயங் அத⁴ம்மகம்மங். ஏஸ நயோ ஸப்³ப³த்த². வக்³கோ³தி ச ஸமூஹோ வுச்சதி, ஸோ ச சதுவக்³கா³தி³கரணீயாதீ³ஸு யாவதிகானங் கம்மப்பத்தானங் அஸம்முகீ²பா⁴வேன, ச²ந்தா³ரஹானங் ச²ந்தா³னாஹரணேன, ஸம்முகீ²பூ⁴தானஞ்ச படிக்கோஸனேன, தேஸு ஏகேனாபி வா இத⁴ அதி⁴ப்பேதோ. அத⁴ம்மகம்மந்தி எத்த² பன த⁴ம்மோ நாம ‘‘உத்திது³தியே சே, பி⁴க்க²வே, கம்மே ஏகாய உத்தியா கம்மங் கரோதி, ந ச கம்மவாசங் அனுஸ்ஸாவேதி, அத⁴ம்மகம்ம’’ந்திஆதி³னா (மஹாவ॰ 387) ஏகாயேவ ஞத்தியா , ததா² த்³வீஹி ஞத்தீஹி ஏகாயேவ வா கம்மவாசாய, ததா² த்³வீஹி கம்மவாசாஹீதி ஆக³தாய ச ததா² ஹாபனஅஞ்ஞதா²கரணபா⁴வேன ஞத்திகம்மங் ட²பெத்வா ஞத்திசதுத்தே² ச கம்மே ஆக³தாய ச அகம்மாரஹஸ்ஸ தஜ்ஜனீயபப்³பா³ஜனீயபடிஸாரணீயனியஸ்ஸதிவித⁴உக்கே²பனீயானங் ஸத்தன்னங் கம்மானங் கரணவஸேன, கம்மாரஹஸ்ஸ ச விராதெ⁴த்வா கரணவஸேன ஆக³தாய ச பாளியா விபரீதா ச பாளி, உபஸம்பதா³தி³கம்மவஸேன ஆக³தா ச பாளி, ஸம்முகா²வினயஸதிவினயஅமூள்ஹவினயபடிஞ்ஞாகரணயேபு⁴ய்யஸிகாதஸ்ஸபாபி- யஸிகாதிணவத்தா²ரகஸங்கா²தானங் ஸத்தன்னங் கம்மானங் யதா²லாப⁴கரணவஸேன ஆக³தா ச பாளி, தேன கரணீயங் அபலோகனஞத்திஞத்திது³தியஞத்திசதுத்த²ஸங்கா²தங் சதுப்³பி³த⁴ங் கம்மங் த⁴ம்மகம்மங், தப்படிபக்க²ங் அத⁴ம்மகம்மங். தப்³பி³பரியாயேன ஸமக்³கோ³ த⁴ம்மகம்மஞ்ச வேதி³தப்³ப³ங். த⁴ம்மோ யதா²வுத்தா பாளி அஸ்ஸ அத்தி², த⁴ம்மேன கதங் வாதி த⁴ம்மிகங். தப்³பி³பரீதங் அத⁴ம்மிகங். சதுத்த²ங்யேவாதி தேஸு சதூஸு கம்மேஸு சதுன்னங் பூரணங் ஸமக்³கே³ன த⁴ம்மிகங். ஸேஸகம்மானங் பா⁴வேன பி⁴க்கு²னா து³க்கடஸ்ஸ ப⁴வனங் லக்கீ²யதீதி ஸேஸகம்மேஸூதி பா⁴வலக்க²ணே ஸத்தமீ. து³க்கடந்தி குப்பானங் அத⁴ம்மகம்மவக்³க³கம்மானங் கதத்தா து³க்கடங்.
199. Vaggena adhammakammañca samaggena adhammakammañca vaggena dhammakammañca samaggena dhammakammañcāti cattāri kammāni hontīti seso. Tattha vaggena adhammakammanti vaggena saṅghena karaṇīyaṃ adhammakammaṃ. Esa nayo sabbattha. Vaggoti ca samūho vuccati, so ca catuvaggādikaraṇīyādīsu yāvatikānaṃ kammappattānaṃ asammukhībhāvena, chandārahānaṃ chandānāharaṇena, sammukhībhūtānañca paṭikkosanena, tesu ekenāpi vā idha adhippeto. Adhammakammanti ettha pana dhammo nāma ‘‘uttidutiye ce, bhikkhave, kamme ekāya uttiyā kammaṃ karoti, na ca kammavācaṃ anussāveti, adhammakamma’’ntiādinā (mahāva. 387) ekāyeva ñattiyā , tathā dvīhi ñattīhi ekāyeva vā kammavācāya, tathā dvīhi kammavācāhīti āgatāya ca tathā hāpanaaññathākaraṇabhāvena ñattikammaṃ ṭhapetvā ñatticatutthe ca kamme āgatāya ca akammārahassa tajjanīyapabbājanīyapaṭisāraṇīyaniyassatividhaukkhepanīyānaṃ sattannaṃ kammānaṃ karaṇavasena, kammārahassa ca virādhetvā karaṇavasena āgatāya ca pāḷiyā viparītā ca pāḷi, upasampadādikammavasena āgatā ca pāḷi, sammukhāvinayasativinayaamūḷhavinayapaṭiññākaraṇayebhuyyasikātassapāpi- yasikātiṇavatthārakasaṅkhātānaṃ sattannaṃ kammānaṃ yathālābhakaraṇavasena āgatā ca pāḷi, tena karaṇīyaṃ apalokanañattiñattidutiyañatticatutthasaṅkhātaṃ catubbidhaṃ kammaṃ dhammakammaṃ, tappaṭipakkhaṃ adhammakammaṃ. Tabbipariyāyena samaggo dhammakammañca veditabbaṃ. Dhammo yathāvuttā pāḷi assa atthi, dhammena kataṃ vāti dhammikaṃ. Tabbiparītaṃ adhammikaṃ. Catutthaṃyevāti tesu catūsu kammesu catunnaṃ pūraṇaṃ samaggena dhammikaṃ. Sesakammānaṃ bhāvena bhikkhunā dukkaṭassa bhavanaṃ lakkhīyatīti sesakammesūti bhāvalakkhaṇe sattamī. Dukkaṭanti kuppānaṃ adhammakammavaggakammānaṃ katattā dukkaṭaṃ.
200. இதா³னி யதி³த³ங் ஸமக்³கே³ன த⁴ம்மிகங் நாம, தங் யேஹி ஸங்கே⁴ஹி காதப்³ப³ங், தேஸங் பபே⁴த³ங் த³ஸ்ஸேதுங் ‘‘சதுவக்³கோ³’’திஆதி³மாஹ. சத்வாதீ³னங் ஸங்க்²யேயவுத்தித்தா சதுன்னங் வக்³கோ³திஆதி³னா விக்³க³ஹோ. த³ஸவீஸதிவக்³கி³கோதி த³ஸன்னங் வீஸதியா ச வக்³க³பே⁴த³வஸேன த³ஸவீஸதீனங் வக்³கோ³தி விக்³க³ஹோ, ணிகோ ஸகத்தே². வீஸதியா வக்³கோ³, அதிரேகேன ஸஹிதோ வீஸதிவக்³கோ³தி விக்³க³ஹோ.
200. Idāni yadidaṃ samaggena dhammikaṃ nāma, taṃ yehi saṅghehi kātabbaṃ, tesaṃ pabhedaṃ dassetuṃ ‘‘catuvaggo’’tiādimāha. Catvādīnaṃ saṅkhyeyavuttittā catunnaṃ vaggotiādinā viggaho. Dasavīsativaggikoti dasannaṃ vīsatiyā ca vaggabhedavasena dasavīsatīnaṃ vaggoti viggaho, ṇiko sakatthe. Vīsatiyā vaggo, atirekena sahito vīsativaggoti viggaho.
201-2. பஞ்சன்னங் கம்மானங் நியமேதி ‘‘சதூ’’திஆதி³னா. அப்³பா⁴னங் உபஸம்பத³ங் பவாரணங் ட²பெத்வா சதுவக்³கோ³ சாதிஆதி³னா யோஜெத்வா ஸப்³ப³கம்மேஸு கம்மப்பத்தோதி தீ³பிதோதி யோஜேதப்³ப³ங். தத்த² தத்த² ச-ஸத்³தோ³ சதுவக்³கா³த³யோ கம்மபத்திகிரியாயங் ஸமுச்சினோதி. இத⁴ பன ஸப்³ப³-ஸத்³தோ³ அப்³பா⁴னாதீ³னங் கேஸஞ்சி ட²பிதத்தா பதே³ஸஸப்³பே³ க³ய்ஹதி. கம்மபத்தோதி கம்மஸ்ஸ பத்தோ யுத்தோ அனுரூபோ. இதரோதி வீஸதிவக்³கோ³ அதிரேகவீஸதிவக்³கோ³. ஸப்³ப³கம்மேஸூதி எத்த² பன ஸப்³ப³-ஸத்³தோ³ ஸப்³ப³ஸப்³பே³. நனு ச வீஸதிவக்³க³ஸ்ஸ கம்மப்பத்தபா⁴வேஸதி அதிரேகவீஸதிவக்³க³ஸ்ஸ பகே³வாதி விஞ்ஞாயதி. ததா² ஸதி ஸோ கஸ்மா வுத்தோதி? ஸச்சங், ததா²பி ஸோ சதுவக்³கா³தி³னா ஸங்கே⁴ன கத்தப்³ப³கம்மங் ஊனகதரேன ந வட்டதி, அதிரேகேன பன வட்டதீதி ஞாபனத்த²ங் வுத்தோ.
201-2. Pañcannaṃ kammānaṃ niyameti ‘‘catū’’tiādinā. Abbhānaṃ upasampadaṃ pavāraṇaṃ ṭhapetvā catuvaggo cātiādinā yojetvā sabbakammesu kammappattoti dīpitoti yojetabbaṃ. Tattha tattha ca-saddo catuvaggādayo kammapattikiriyāyaṃ samuccinoti. Idha pana sabba-saddo abbhānādīnaṃ kesañci ṭhapitattā padesasabbe gayhati. Kammapattoti kammassa patto yutto anurūpo. Itaroti vīsativaggo atirekavīsativaggo. Sabbakammesūti ettha pana sabba-saddo sabbasabbe. Nanu ca vīsativaggassa kammappattabhāvesati atirekavīsativaggassa pagevāti viññāyati. Tathā sati so kasmā vuttoti? Saccaṃ, tathāpi so catuvaggādinā saṅghena kattabbakammaṃ ūnakatarena na vaṭṭati, atirekena pana vaṭṭatīti ñāpanatthaṃ vutto.
203. இதா³னி சதுவக்³கா³தி³கேன ச²ந்தா³ஹரணேன பூரேதப்³போ³தி த³ஸ்ஸேதி ‘‘சதூ’’திஆதி³னா. பாராஜிகாதி³பா⁴வமனாபன்னத்தா பகதியா ஸபா⁴வேனேவ டி²தோ அத்தா யேஸங், பகதோ வா ததோயேவ கம்மேஸு அவிக³தோ அத்தா யேஸங் தேதி பகதத்தகா, பாராஜிகஉக்கி²த்தகலத்³தி⁴னானாஸங்வாஸகேஹி அஞ்ஞே. பரேதி ஏகஸீமட்டா² தாதி³ஸாயேவ அஞ்ஞே. ஸேஸேபீதி அவஸேஸே பஞ்சவக்³கா³தி³கரணீயேபி.
203. Idāni catuvaggādikena chandāharaṇena pūretabboti dasseti ‘‘catū’’tiādinā. Pārājikādibhāvamanāpannattā pakatiyā sabhāveneva ṭhito attā yesaṃ, pakato vā tatoyeva kammesu avigato attā yesaṃ teti pakatattakā, pārājikaukkhittakaladdhinānāsaṃvāsakehi aññe. Pareti ekasīmaṭṭhā tādisāyeva aññe. Sesepīti avasese pañcavaggādikaraṇīyepi.
204. இதா³னி வத்து²ஞத்திஅனுஸ்ஸாவனஸீமாதி³விபத்திதோ, கம்மவிபத்தீஸு பரிஸதோ ச படிக்கோஸதோ ச கம்மஸ்ஸ குப்பாகுப்பபா⁴வங் தத்த² ச ஆபத்திஆதி³ங் த³ஸ்ஸேதுங் ‘‘சதூ’’திஆதி³ மாஹ. சதுவக்³கா³தி³கத்தப்³ப³ங் அஸங்வாஸக³ணபூரங் வா கம்மாரஹக³ணபூரங் வா கம்மஞ்ச க³ருகட்ட²க³ணபூரங் வா பரிவாஸாதி³கம்மஞ்சாதி யோஜனா. எத்த² ச கம்மாரஹோ க³ருகட்ட²தோ அஞ்ஞோ, நிக்கி²த்தவத்தோ பன க³ருகட்டோ² க³ணபூரகோ ஹோதியேவ. கதந்தி சதுவக்³கா³தி³னா கதங்.
204. Idāni vatthuñattianussāvanasīmādivipattito, kammavipattīsu parisato ca paṭikkosato ca kammassa kuppākuppabhāvaṃ tattha ca āpattiādiṃ dassetuṃ ‘‘catū’’tiādi māha. Catuvaggādikattabbaṃ asaṃvāsagaṇapūraṃ vā kammārahagaṇapūraṃ vā kammañca garukaṭṭhagaṇapūraṃ vā parivāsādikammañcāti yojanā. Ettha ca kammāraho garukaṭṭhato añño, nikkhittavatto pana garukaṭṭho gaṇapūrako hotiyeva. Katanti catuvaggādinā kataṃ.
205. வாரெய்யாதி அந்தராயே அஸதி அந்தமஸோ ஏகோபி வாரெய்யாதி அத்தோ². அந்தராயேதி பாபேஹி கரியமானே ஜீவிதப்³ரஹ்மசரியந்தராயே ஸதி. அனந்தராயிகா சே ந வாரெந்தி, து³க்கடங். தி³ட்டா²விந்தி அத்தனோ அத்தனோ தி³ட்டி²ங் லத்³தி⁴ங் ‘‘அத⁴ம்மகம்மங் இத³ங், ந மேதங் க²மதீ’’தி அஞ்ஞமஞ்ஞங் ஆவி கரெய்யுந்தி ஸேஸோ. ஏகோதி⁴ட்டா²னந்தி ஏகோ பி⁴க்கு² ‘‘ந மேதங் க²மதீ’’தி அதி⁴ட்டா²னங் கரெய்யாதி ஸேஸோ. ததோதி⁴காதி தீஹி அதி⁴கா. தே பன ஸங்க⁴த்தா பஹொந்தி அத்தனோ கம்மங் நித்த²ரிதுங்.
205.Vāreyyāti antarāye asati antamaso ekopi vāreyyāti attho. Antarāyeti pāpehi kariyamāne jīvitabrahmacariyantarāye sati. Anantarāyikā ce na vārenti, dukkaṭaṃ. Diṭṭhāvinti attano attano diṭṭhiṃ laddhiṃ ‘‘adhammakammaṃ idaṃ, na metaṃ khamatī’’ti aññamaññaṃ āvi kareyyunti seso. Ekodhiṭṭhānanti eko bhikkhu ‘‘na metaṃ khamatī’’ti adhiṭṭhānaṃ kareyyāti seso. Tatodhikāti tīhi adhikā. Te pana saṅghattā pahonti attano kammaṃ nittharituṃ.
206. கி²த்தசித்தோ நாம உம்மத்தகோ. து³க²ட்டிதோதி வேத³னட்டோ. ந ரூஹதீதி க³ய்ஹத்தங் ந ரோஹதீதி அத்தோ².
206.Khittacitto nāma ummattako. Dukhaṭṭitoti vedanaṭṭo. Na rūhatīti gayhattaṃ na rohatīti attho.
207. அந்தமஸோ அனந்தரஸ்ஸாபி ஆரோசெந்தஸ்ஸ பகத…பே॰… பி⁴க்கு²னோதி ஸம்ப³ந்தோ⁴. ஏகஸீமாயங் திட்ட²தீதி ஏகஸீமட்டோ². ஸமோ ஸங்வாஸோ அஸ்ஸாதி ஸமஸங்வாஸோ. ஏகஸீமட்டோ² ச ஸோ ஸமஸங்வாஸோ ச, பகதத்தோ ச ஸோ ஏகஸீமட்ட²ஸமஸங்வாஸோ ச, ஸோ சாயங் பி⁴க்கு² சாதி ஸப்³ப³த்த² கம்மதா⁴ரயோ, தஸ்ஸ. எத்த² பன அவிபன்னஸீலோ பகதத்தோதி அதி⁴ப்பேதோ. ஆரோசெந்தஸ்ஸாதி அத்தனோ லத்³தி⁴ங் பகாஸெந்தஸ்ஸ. ரூஹதீதி படிக்கே²போ ருஹதி.
207. Antamaso anantarassāpi ārocentassa pakata…pe… bhikkhunoti sambandho. Ekasīmāyaṃ tiṭṭhatīti ekasīmaṭṭho. Samo saṃvāso assāti samasaṃvāso. Ekasīmaṭṭho ca so samasaṃvāso ca, pakatatto ca so ekasīmaṭṭhasamasaṃvāso ca, so cāyaṃ bhikkhu cāti sabbattha kammadhārayo, tassa. Ettha pana avipannasīlo pakatattoti adhippeto. Ārocentassāti attano laddhiṃ pakāsentassa. Rūhatīti paṭikkhepo ruhati.
208. த⁴ம்மிகங் கம்மந்தி த⁴ம்மேன கத்தப்³ப³ங் அபலோகனாதி³கம்மங். படிக்கோஸெய்யாதி நிவாரெய்ய. திரொக்கா² காயஸாமக்³கி³ங் வா ச²ந்த³ங் வாதி வா-ஸத்³த³ங் நெத்வா அத்தோ² நேதப்³போ³. திரொக்கா²தி பரம்முகா². ஸோ ஸம்முகா²-ஸத்³தோ³ விய நிபாதோ, அத² வா அக்கா² இந்த்³ரியவிஸயதோ திரோ ப³ஹீதி அத்தோ²தி.
208.Dhammikaṃ kammanti dhammena kattabbaṃ apalokanādikammaṃ. Paṭikkoseyyāti nivāreyya. Tirokkhā kāyasāmaggiṃ vā chandaṃ vāti vā-saddaṃ netvā attho netabbo. Tirokkhāti parammukhā. So sammukhā-saddo viya nipāto, atha vā akkhā indriyavisayato tiro bahīti atthoti.
கம்மனித்³தே³ஸவண்ணனா நிட்டி²தா.
Kammaniddesavaṇṇanā niṭṭhitā.
