| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
29. மிச்சா²ஜீவவிவஜ்ஜனானித்³தே³ஸவண்ணனா
29. Micchājīvavivajjanāniddesavaṇṇanā
209. ஆக³ம்ம ஜீவந்தி ஏதேனாதி ஆஜீவோ, கோ ஸோ? பச்சயபரியேஸனவாயாமோ. மிச்சா²ய ஆஜீவோ, தஸ்ஸ விவஜ்ஜனா மிச்சா²ஜீவவிவஜ்ஜனா. ஸா பனாயங் அத்த²தோ ‘‘இத⁴ பி⁴க்கு² பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ’’தி (விப⁴॰ 508) ஏவங் பாதிமொக்க²ஸங்வரஸம்பத்தியா படிபத்தித³ஸ்ஸனவஸேன ஆக³தோ ஆசாரோ சேவ யதா²க்கமேன பாராஜிகஸங்கா⁴தி³ஸேஸது²ல்லச்சயபாசித்தியபாடிதே³ஸனீயது³ப்³பா⁴ஸிதது³க்கடானங் காரணபூ⁴தஸ்ஸ ஆஜீவஹேதுபஞ்ஞத்தானங் அபூ⁴தாரோசனஸஞ்சரித்தஅஞ்ஞாபதே³ஸபூ⁴தாரோசனபணீதபோ⁴ஜனவிஞ்ஞத்தி பி⁴க்கு²னிபோ⁴ஜனவிஞ்ஞத்திஸூபோத³னவிஞ்ஞத்திஸிக்கா²பதா³னங் வீதிக்கமஸ்ஸ ச குஹனலபனநேமித்திகதா நிப்பேஸிகதா லாபே⁴ன லாப⁴ங் நிஜிகீ³ஸனதாதி ஏவமாதீ³னஞ்ச பாபத⁴ம்மானங் வஸேன பவத்தங் மிச்சா²ஜீவவிரதிஸங்கா²தங் ஆஜீவபாரிஸுத்³தி⁴ஸீலஞ்ச. தஸ்ஸா பன கஸ்ஸசி இத⁴ த³ஸ்ஸனங் யதா² த³ஸ்ஸேதுமாரத்³த⁴ங் பாதிமொக்க²ஸங்வரஸங்கா²தாய அதி⁴ஸீலஸிக்கா²ய, சதுராரக்க²விபஸ்ஸனாவஸேன ஆக³தானங் அதி⁴சித்தஅதி⁴பஞ்ஞாஸங்கா²தானங் த்³வின்னங் ஸிக்கா²னஞ்ச உபகாரகத⁴ம்மபரிதீ³பனத்த²ந்தி த³ட்ட²ப்³ப³ங், ஏவமீதி³ஸங் விஞ்ஞெய்யங், தங் த³ஸ்ஸேதி ‘‘தா³ரு’’ந்திஆதி³னா. தத்த² ‘‘தா³ரு’’ந்திஆதீ³னி ‘‘த³தே³’’தி ஏதஸ்ஸ பத்திகம்மங். சுண்ணங் ஸிரீஸசுண்ணாதி³னஹானியசுண்ணங். ந்ஹானமுகோ²த³கந்தி ந்ஹானஞ்ச முக²ஞ்ச, தஸ்ஸ உத³கந்தி ஸமாஸோ. ஆதி³-ஸத்³தே³ன பண்ணாதி³ங் ஸங்க³ண்ஹாதி. குலஸங்க³ஹாதி குலஸங்க³ஹகரணேன.
209. Āgamma jīvanti etenāti ājīvo, ko so? Paccayapariyesanavāyāmo. Micchāya ājīvo, tassa vivajjanā micchājīvavivajjanā. Sā panāyaṃ atthato ‘‘idha bhikkhu pātimokkhasaṃvarasaṃvuto viharati ācāragocarasampanno’’ti (vibha. 508) evaṃ pātimokkhasaṃvarasampattiyā paṭipattidassanavasena āgato ācāro ceva yathākkamena pārājikasaṅghādisesathullaccayapācittiyapāṭidesanīyadubbhāsitadukkaṭānaṃ kāraṇabhūtassa ājīvahetupaññattānaṃ abhūtārocanasañcarittaaññāpadesabhūtārocanapaṇītabhojanaviññatti bhikkhunibhojanaviññattisūpodanaviññattisikkhāpadānaṃ vītikkamassa ca kuhanalapananemittikatā nippesikatā lābhena lābhaṃ nijigīsanatāti evamādīnañca pāpadhammānaṃ vasena pavattaṃ micchājīvaviratisaṅkhātaṃ ājīvapārisuddhisīlañca. Tassā pana kassaci idha dassanaṃ yathā dassetumāraddhaṃ pātimokkhasaṃvarasaṅkhātāya adhisīlasikkhāya, caturārakkhavipassanāvasena āgatānaṃ adhicittaadhipaññāsaṅkhātānaṃ dvinnaṃ sikkhānañca upakārakadhammaparidīpanatthanti daṭṭhabbaṃ, evamīdisaṃ viññeyyaṃ, taṃ dasseti ‘‘dāru’’ntiādinā. Tattha ‘‘dāru’’ntiādīni ‘‘dade’’ti etassa pattikammaṃ. Cuṇṇaṃ sirīsacuṇṇādinahāniyacuṇṇaṃ. Nhānamukhodakanti nhānañca mukhañca, tassa udakanti samāso. Ādi-saddena paṇṇādiṃ saṅgaṇhāti. Kulasaṅgahāti kulasaṅgahakaraṇena.
210. பரிப⁴டதி பரேஸங் தா³ரகே பரிஹரதீதி பரிப⁴டோ, பரிப⁴டஸ்ஸ கம்மங் பாரிப⁴டகோ, ஸகத்தே² தமேவ பாரிப⁴டகதா. அலங்கரணாதி³னா குலதா³ரகபரிஹரணஸ்ஸேதங் நாமங். முக்³க³ஸ்ஸ ஸூபோ முக்³க³ஸூபோ, ஸோயேவ முக்³க³ஸுப்போ. யதா² முக்³க³ஸூபே பச்சமானே கோசிதே³வ முக்³கோ³ ந பச்சதி, அவஸேஸா பச்சந்தி, ஏவங் யஸ்ஸ புக்³க³லஸ்ஸ வசனே கிஞ்சிதே³வ ஸச்சங் ஹோதி, ஸேஸங் அலிகங், அயங் புக்³க³லோ முக்³க³ஸூபஸதி³ஸதாய உபசாரேன ‘‘முக்³க³ஸுப்போ’’தி வுச்சதி, தஸ்ஸ பா⁴வோ முக்³க³ஸுப்பதா . ஸச்சாலிகேன ஜீவிதகப்பனஸ்ஸேதங் அதி⁴வசனங். க⁴ரவத்து²ஆதி³ஸம்ப³ந்தி⁴னீ விஜ்ஜா வத்து²விஜ்ஜா. பாரிப⁴டகதா சாதிஆதி³னா த்³வந்தோ³ நபுங்ஸகத்தாபா⁴வே பாரி…பே॰… விஜ்ஜா, தாய. ரஸ்ஸோ பன கா³தா²ப³ந்த⁴வஸேன, ததா² தீ³கோ⁴. பஹிணானங் தஸ்மிங் தஸ்மிங் கம்மே தேஸங் தேஸங் நியுஞ்ஜனங் பஹேணங். ஆத³ரேன தூ³தேன காரேதப்³ப³ங் யங் கிஞ்சி கம்மங் தூ³தகம்மங். பிஸனங் பேஸனங், ஜங்கா⁴ய பாதே³ன பேஸனங் ஜங்க⁴பேஸனங், தமஸ்ஸ அத்தீ²தி ஜங்க⁴பேஸனியங். தேஸங் தேஸங் கி³ஹீனங் கா³மந்தரதே³ஸந்தராதீ³ஸு ஸாஸனபடிஸாஸனஹரணஸ்ஸேதமதி⁴வசனங்.
210. Paribhaṭati paresaṃ dārake pariharatīti paribhaṭo, paribhaṭassa kammaṃ pāribhaṭako, sakatthe tameva pāribhaṭakatā. Alaṅkaraṇādinā kuladārakapariharaṇassetaṃ nāmaṃ. Muggassa sūpo muggasūpo, soyeva muggasuppo. Yathā muggasūpe paccamāne kocideva muggo na paccati, avasesā paccanti, evaṃ yassa puggalassa vacane kiñcideva saccaṃ hoti, sesaṃ alikaṃ, ayaṃ puggalo muggasūpasadisatāya upacārena ‘‘muggasuppo’’ti vuccati, tassa bhāvo muggasuppatā . Saccālikena jīvitakappanassetaṃ adhivacanaṃ. Gharavatthuādisambandhinī vijjā vatthuvijjā. Pāribhaṭakatā cātiādinā dvando napuṃsakattābhāve pāri…pe… vijjā, tāya. Rasso pana gāthābandhavasena, tathā dīgho. Pahiṇānaṃ tasmiṃ tasmiṃ kamme tesaṃ tesaṃ niyuñjanaṃ paheṇaṃ. Ādarena dūtena kāretabbaṃ yaṃ kiñci kammaṃ dūtakammaṃ. Pisanaṃ pesanaṃ, jaṅghāya pādena pesanaṃ jaṅghapesanaṃ, tamassa atthīti jaṅghapesaniyaṃ. Tesaṃ tesaṃ gihīnaṃ gāmantaradesantarādīsu sāsanapaṭisāsanaharaṇassetamadhivacanaṃ.
211. லாபா⁴ஸாய லஞ்ஜதா³னங் அனுப்பதா³னங். ஸம்பு³த்³த⁴ப்படிகுட்டே²ன பு³த்³த⁴க³ரஹிதேன அங்க³விஜ்ஜானக்க²த்தவிஜ்ஜாஸுபினவிஜ்ஜாபூ⁴தவிஜ்ஜாதி³னா அஞ்ஞேன வா.
211. Lābhāsāya lañjadānaṃ anuppadānaṃ. Sambuddhappaṭikuṭṭhena buddhagarahitena aṅgavijjānakkhattavijjāsupinavijjābhūtavijjādinā aññena vā.
212. அஞ்ஞாதகானங் அப்பவாரிதானங் விஞ்ஞாபனங் விஞ்ஞத்தி, யாசனவஸேன பவத்தோ காயவசீபயோகோ³. பு³த்³த⁴ப்படிகுட்டே²ன மிச்சா²ஜீவேன பச்சயபரியேஸனா அனேஸனா. அபூ⁴தஸ்ஸ அத்தனி அவிஜ்ஜமானஸ்ஸ உத்தரிமனுஸ்ஸத⁴ம்மஸ்ஸ உல்லபனங் கத²னங் அபூ⁴துல்லபனா. குஹனாதீ³ஹீதி குஹனாலபனாதீ³ஹி. தத்த² லாப⁴ஸக்காரஸிலோகஸன்னிஸ்ஸிதஸ்ஸ பச்சயப்படிஸேவனஸாமந்தஜப்பனஇரியாபத²ஸண்டா²பனவஸேன ஜனவிம்ஹாபனா குஹனா. விஹாரங் ஆக³தே மனுஸ்ஸே தி³ஸ்வா ‘‘கிமத்தா²ய பொ⁴ந்தோ ஆக³தா, கிங் பி⁴க்கூ² நிமந்தேது’’ந்தி வா ‘‘மயி ராஜா பஸன்னோ, அஸுகோ ச அஸுகோ ச ராஜமஹாமத்தோ பஸன்னோ’’தி வா ஆதி³னா நயேன ஆலபனா லபனா. கா²த³னீயங் க³ஹெத்வா க³ச்ச²ந்தே தி³ஸ்வா ‘‘கிங் கா²த³னீயங் லபி⁴த்தா²’’திஆதி³னா நயேன நிமித்தகரணாதி³ நேமித்தகதா. ‘‘அஸ்ஸத்³தோ⁴ அப்பஸன்னோ’’திஆதி³னா நயேன க³ரஹணானி ச ‘‘ஏதங் எத்த² கதே²தா²’’திஆதி³னா நயேன வாசாய உக்கி²பனாதி³ ச நிப்பேஸிகதா. அப்பேன லாபே⁴ன ப³ஹுகங் வஞ்செத்வா க³ஹேதுங் இச்ச²னங் லாபே⁴ன லாப⁴ங் நிஜிகீ³ஸனதா. குலதூ³ஸாதீ³தி எத்த² ஆதி³-ஸத்³தே³ன ரூபியப்படிக்³க³ஹணரூபியஸங்வோஹாரா ஸங்க³ய்ஹந்தீதி.
212. Aññātakānaṃ appavāritānaṃ viññāpanaṃ viññatti, yācanavasena pavatto kāyavacīpayogo. Buddhappaṭikuṭṭhena micchājīvena paccayapariyesanā anesanā. Abhūtassa attani avijjamānassa uttarimanussadhammassa ullapanaṃ kathanaṃ abhūtullapanā. Kuhanādīhīti kuhanālapanādīhi. Tattha lābhasakkārasilokasannissitassa paccayappaṭisevanasāmantajappanairiyāpathasaṇṭhāpanavasena janavimhāpanā kuhanā. Vihāraṃ āgate manusse disvā ‘‘kimatthāya bhonto āgatā, kiṃ bhikkhū nimantetu’’nti vā ‘‘mayi rājā pasanno, asuko ca asuko ca rājamahāmatto pasanno’’ti vā ādinā nayena ālapanā lapanā. Khādanīyaṃ gahetvā gacchante disvā ‘‘kiṃ khādanīyaṃ labhitthā’’tiādinā nayena nimittakaraṇādi nemittakatā. ‘‘Assaddho appasanno’’tiādinā nayena garahaṇāni ca ‘‘etaṃ ettha kathethā’’tiādinā nayena vācāya ukkhipanādi ca nippesikatā. Appena lābhena bahukaṃ vañcetvā gahetuṃ icchanaṃ lābhena lābhaṃ nijigīsanatā. Kuladūsādīti ettha ādi-saddena rūpiyappaṭiggahaṇarūpiyasaṃvohārā saṅgayhantīti.
மிச்சா²ஜீவவிவஜ்ஜனானித்³தே³ஸவண்ணனா நிட்டி²தா.
Micchājīvavivajjanāniddesavaṇṇanā niṭṭhitā.
