| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
8. කාලිකනිද්දෙසො
8. Kālikaniddeso
කාලිකා චාති –
Kālikācāti –
84.
84.
පටිග්ගහිතා චත්තාරො, කාලිකා යාවකාලිකං;
Paṭiggahitā cattāro, kālikā yāvakālikaṃ;
යාමකාලිකං සත්තාහ-කාලිකං යාවජීවිකං.
Yāmakālikaṃ sattāha-kālikaṃ yāvajīvikaṃ.
85.
85.
පිට්ඨං මූලං ඵලං ඛජ්ජං, ගොරසො ධඤ්ඤභොජනං;
Piṭṭhaṃ mūlaṃ phalaṃ khajjaṃ, goraso dhaññabhojanaṃ;
යාගුසූපප්පභුතයො, හොන්තෙතෙ යාවකාලිකා.
Yāgusūpappabhutayo, hontete yāvakālikā.
86.
86.
මධුමුද්දිකසාලූක-චොචමොචම්බජම්බුජං;
Madhumuddikasālūka-cocamocambajambujaṃ;
ඵාරුසං නග්ගිසන්තත්තං, පානකං යාමකාලිකං.
Phārusaṃ naggisantattaṃ, pānakaṃ yāmakālikaṃ.
87.
87.
සානුලොමානි ධඤ්ඤානි, ඨපෙත්වා ඵලජො රසො;
Sānulomāni dhaññāni, ṭhapetvā phalajo raso;
මධූකපුප්ඵමඤ්ඤත්ර, සබ්බො පුප්ඵරසොපි ච.
Madhūkapupphamaññatra, sabbo puppharasopi ca.
88.
88.
සබ්බපත්තරසො චෙව, ඨපෙත්වා පක්කඩාකජං;
Sabbapattaraso ceva, ṭhapetvā pakkaḍākajaṃ;
සීතොදමද්දිතොදිච්ච-පාකො වා යාමකාලිකො.
Sītodamadditodicca-pāko vā yāmakāliko.
89.
89.
සප්පිනොනීතතෙලානි , මධුඵාණිතමෙව ච;
Sappinonītatelāni , madhuphāṇitameva ca;
සත්තාහකාලිකා සප්පි, යෙසං මංසමවාරිතං.
Sattāhakālikā sappi, yesaṃ maṃsamavāritaṃ.
90.
90.
තෙලං තිලවසෙරණ්ඩ-මධුසාසපසම්භවං;
Telaṃ tilavaseraṇḍa-madhusāsapasambhavaṃ;
ඛුද්දාභමරමධුකරි-මක්ඛිකාහි කතං මධු;
Khuddābhamaramadhukari-makkhikāhi kataṃ madhu;
රසාදිඋච්ඡුවිකති, පක්කාපක්කා ච ඵාණිතං.
Rasādiucchuvikati, pakkāpakkā ca phāṇitaṃ.
91.
91.
සවත්ථුපක්කා සාමං වා, වසා කාලෙ අමානුසා;
Savatthupakkā sāmaṃ vā, vasā kāle amānusā;
අඤ්ඤෙසං න පචෙ වත්ථුං, යාවකාලිකවත්ථුනං.
Aññesaṃ na pace vatthuṃ, yāvakālikavatthunaṃ.
92.
92.
හලිද්දිං සිඞ්ගිවෙරඤ්ච, වචත්තං ලසුණං වචා;
Haliddiṃ siṅgiverañca, vacattaṃ lasuṇaṃ vacā;
උසීරං භද්දමුත්තඤ්චාතිවිසා කටුරොහිණී;
Usīraṃ bhaddamuttañcātivisā kaṭurohiṇī;
පඤ්චමූලාදිකඤ්චාපි, මූලං තං යාවජීවිකං.
Pañcamūlādikañcāpi, mūlaṃ taṃ yāvajīvikaṃ.
93.
93.
බිළඞ්ගං මරිචං ගොට්ඨ-ඵලං පිප්ඵලි රාජිකා;
Biḷaṅgaṃ maricaṃ goṭṭha-phalaṃ pipphali rājikā;
තිඵලෙරණ්ඩකාදීනං, ඵලං තං යාවජීවිකං.
Tiphaleraṇḍakādīnaṃ, phalaṃ taṃ yāvajīvikaṃ.
94.
94.
කප්පාසනිම්බකුටජපටොලසුලසාදිනං;
Kappāsanimbakuṭajapaṭolasulasādinaṃ;
සූපෙය්යපණ්ණං වජ්ජෙත්වා, පණ්ණං තං යාවජීවිකං.
Sūpeyyapaṇṇaṃ vajjetvā, paṇṇaṃ taṃ yāvajīvikaṃ.
95.
95.
ඨපෙත්වා උච්ඡුනිය්යාසං,
Ṭhapetvā ucchuniyyāsaṃ,
සරසං උච්ඡුජං තචං;
Sarasaṃ ucchujaṃ tacaṃ;
නිය්යාසො ච තචො සබ්බො,
Niyyāso ca taco sabbo,
ලොණං ලොහං සිලා තථා.
Loṇaṃ lohaṃ silā tathā.
96.
96.
සුද්ධසිත්ථඤ්ච සෙවාලො, යඤ්ච කිඤ්චි සුඣාපිතං;
Suddhasitthañca sevālo, yañca kiñci sujhāpitaṃ;
විකටාදිප්පභෙදඤ්ච, ඤාතබ්බං යාවජීවිකං.
Vikaṭādippabhedañca, ñātabbaṃ yāvajīvikaṃ.
97.
97.
මූලං සාරං තචො ඵෙග්ගු, පණ්ණං පුප්ඵං ඵලං ලතා;
Mūlaṃ sāraṃ taco pheggu, paṇṇaṃ pupphaṃ phalaṃ latā;
ආහාරත්ථ මසාධෙන්තං, සබ්බං තං යාවජීවිකං.
Āhārattha masādhentaṃ, sabbaṃ taṃ yāvajīvikaṃ.
98.
98.
සබ්බකාලිකසම්භොගො, කාලෙ සබ්බස්ස කප්පති;
Sabbakālikasambhogo, kāle sabbassa kappati;
සති පච්චයෙ විකාලෙ, කප්පතෙ කාලිකත්තයං.
Sati paccaye vikāle, kappate kālikattayaṃ.
99.
99.
කාලයාමමතික්කන්තා , පාචිත්තිං ජනයන්තුභො;
Kālayāmamatikkantā , pācittiṃ janayantubho;
ජනයන්ති උභොපෙතෙ, අන්තොවුත්ථඤ්ච සන්නිධිං.
Janayanti ubhopete, antovutthañca sannidhiṃ.
100.
100.
සත්තාහකාලිකෙ සත්ත, අහානි අතිනාමිතෙ;
Sattāhakālike satta, ahāni atināmite;
පාචිත්ති පාළිනාරුළ්හෙ, සප්පිආදිම්හි දුක්කටං.
Pācitti pāḷināruḷhe, sappiādimhi dukkaṭaṃ.
101.
101.
නිස්සට්ඨලද්ධං මක්ඛෙය්ය, නඞ්ගං නජ්ඣොහරෙය්ය ච;
Nissaṭṭhaladdhaṃ makkheyya, naṅgaṃ najjhohareyya ca;
විකප්පෙන්තස්ස සත්තාහෙ, සාමණෙරස්සධිට්ඨතො;
Vikappentassa sattāhe, sāmaṇerassadhiṭṭhato;
මක්ඛනාදිඤ්ච නාපත්ති, අඤ්ඤස්ස දදතොපි ච.
Makkhanādiñca nāpatti, aññassa dadatopi ca.
102.
102.
යාවකාලිකආදීනි, සංසට්ඨානි සහත්තනා;
Yāvakālikaādīni, saṃsaṭṭhāni sahattanā;
ගාහාපයන්ති සබ්භාවං, තස්මා එවමුදීරිතං.
Gāhāpayanti sabbhāvaṃ, tasmā evamudīritaṃ.
103.
103.
පුරෙ පටිග්ගහිතඤ්ච, සත්තාහං යාවජීවිකං;
Pure paṭiggahitañca, sattāhaṃ yāvajīvikaṃ;
සෙසකාලිකසම්මිස්සං, පාචිත්ති පරිභුඤ්ජතො.
Sesakālikasammissaṃ, pācitti paribhuñjato.
104.
104.
යාවකාලිකසම්මිස්සං, ඉතරං කාලිකත්තයං;
Yāvakālikasammissaṃ, itaraṃ kālikattayaṃ;
පටිග්ගහිතං තදහු, තදහෙව ච භුඤ්ජයෙ.
Paṭiggahitaṃ tadahu, tadaheva ca bhuñjaye.
105.
105.
යාමකාලිකසම්මිස්සං, සෙසමෙවං විජානියං;
Yāmakālikasammissaṃ, sesamevaṃ vijāniyaṃ;
සත්තාහකාලිකමිස්සඤ්ච, සත්තාහං කප්පතෙතරන්ති.
Sattāhakālikamissañca, sattāhaṃ kappatetaranti.
