| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
9. පටිග්ගාහනිද්දෙසො
9. Paṭiggāhaniddeso
පටිග්ගාහොති –
Paṭiggāhoti –
106.
106.
දාතුකාමාභිහාරො ච, හත්ථපාසෙරණක්ඛමං;
Dātukāmābhihāro ca, hatthapāseraṇakkhamaṃ;
තිධා දෙන්තෙ ද්විධා ගාහො, පඤ්චඞ්ගෙවං පටිග්ගහො.
Tidhā dente dvidhā gāho, pañcaṅgevaṃ paṭiggaho.
107.
107.
අසංහාරියෙ තත්ථජාතෙ, සුඛුමෙ චිඤ්චආදිනං;
Asaṃhāriye tatthajāte, sukhume ciñcaādinaṃ;
පණ්ණෙ වාසය්හභාරෙ ච, පටිග්ගාහො න රූහති.
Paṇṇe vāsayhabhāre ca, paṭiggāho na rūhati.
108.
108.
සික්ඛාමරණලිඞ්ගෙහි, අනපෙක්ඛවිසග්ගතො;
Sikkhāmaraṇaliṅgehi, anapekkhavisaggato;
අච්ඡෙදානුපසම්පන්න-දානා ගාහොපසම්මති.
Acchedānupasampanna-dānā gāhopasammati.
109.
109.
අප්පටිග්ගහිතං සබ්බං, පාචිත්ති පරිභුඤ්ජතො;
Appaṭiggahitaṃ sabbaṃ, pācitti paribhuñjato;
සුද්ධඤ්ච නාතිබහලං, කප්පතෙ උදකං තථා.
Suddhañca nātibahalaṃ, kappate udakaṃ tathā.
110.
110.
අඞ්ගලග්ගමවිච්ඡින්නං, දන්තක්ඛිකණ්ණගූථකං;
Aṅgalaggamavicchinnaṃ, dantakkhikaṇṇagūthakaṃ;
ලොණස්සුඛෙළසිඞ්ඝාණි-සෙම්හමුත්තකරීසකං.
Loṇassukheḷasiṅghāṇi-semhamuttakarīsakaṃ.
111.
111.
ගූථමත්තිකමුත්තානි, ඡාරිකඤ්ච තථාවිධෙ;
Gūthamattikamuttāni, chārikañca tathāvidhe;
සාමං ගහෙත්වා සෙවෙය්ය, අසන්තෙ කප්පකාරකෙ.
Sāmaṃ gahetvā seveyya, asante kappakārake.
112.
112.
දුරූපචිණ්ණෙ රජොකිණ්ණෙ, අථුග්ගහප්පටිග්ගහෙ;
Durūpaciṇṇe rajokiṇṇe, athuggahappaṭiggahe;
අන්තොවුත්ථෙ සයංපක්කෙ, අන්තොපක්කෙ ච දුක්කටන්ති.
Antovutthe sayaṃpakke, antopakke ca dukkaṭanti.
