| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
២. កាឡាយសង្គបញ្ហោ
2. Kāḷāyasaṅgapañho
២. ‘‘ភន្តេ នាគសេន, ‘កាឡាយសស្ស 1 ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ ? ‘‘យថា, មហារាជ, កាឡាយសោ សុបីតោ 2 វមតិ 3, ឯវមេវ ខោ, មហារាជ, យោគិនោ យោគាវចរស្ស មានសំ យោនិសោ មនសិការេន 4 អបីតំ វមតិ។ ឥទំ, មហារាជ, កាឡាយសស្ស បឋមំ អង្គំ គហេតព្ពំ។
2. ‘‘Bhante nāgasena, ‘kāḷāyasassa 5 dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti ? ‘‘Yathā, mahārāja, kāḷāyaso supīto 6 vamati 7, evameva kho, mahārāja, yogino yogāvacarassa mānasaṃ yoniso manasikārena 8 apītaṃ vamati. Idaṃ, mahārāja, kāḷāyasassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, កាឡាយសោ សកិំ បីតំ ឧទកំ ន វមតិ, ឯវមេវ ខោ, មហារាជ , យោគិនា យោគាវចរេន យោ សកិំ ឧប្បន្នោ បសាទោ, ន បុន សោ វមិតព្ពោ ‘ឧឡារោ សោ ភគវា សម្មាសម្ពុទ្ធោ, ស្វាក្ខាតោ ធម្មោ, សុប្បដិបន្នោ សង្ឃោ’តិ។ ‘រូបំ អនិច្ចំ, វេទនា អនិច្ចា, សញ្ញា អនិច្ចា, សង្ខារា អនិច្ចា, វិញ្ញាណំ អនិច្ចន្តិ យំ សកិំ ឧប្បន្នំ ញាណំ, ន បុន តំ វមិតព្ពំ។ ឥទំ , មហារាជ, កាឡាយសស្ស ទុតិយំ អង្គំ គហេតព្ពំ។ ភាសិតម្បេតំ, មហារាជ, ភគវតា ទេវាតិទេវេន –
‘‘Puna caparaṃ, mahārāja, kāḷāyaso sakiṃ pītaṃ udakaṃ na vamati, evameva kho, mahārāja , yoginā yogāvacarena yo sakiṃ uppanno pasādo, na puna so vamitabbo ‘uḷāro so bhagavā sammāsambuddho, svākkhāto dhammo, suppaṭipanno saṅgho’ti. ‘Rūpaṃ aniccaṃ, vedanā aniccā, saññā aniccā, saṅkhārā aniccā, viññāṇaṃ aniccanti yaṃ sakiṃ uppannaṃ ñāṇaṃ, na puna taṃ vamitabbaṃ. Idaṃ , mahārāja, kāḷāyasassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘ទស្សនម្ហិ បរិសោធិតោ 9 នរោ, អរិយធម្មេ និយតោ វិសេសគូ;
‘‘‘Dassanamhi parisodhito 10 naro, ariyadhamme niyato visesagū;
នប្បវេធតិ អនេកភាគសោ, សព្ពសោ ច មុខភាវមេវ សោ’’’តិ។
Nappavedhati anekabhāgaso, sabbaso ca mukhabhāvameva so’’’ti.
កាឡាយសង្គបញ្ហោ ទុតិយោ។
Kāḷāyasaṅgapañho dutiyo.
Footnotes:
