| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៣. ឆត្តង្គបញ្ហោ
3. Chattaṅgapañho
៣. ‘‘ភន្តេ នាគសេន, ‘ឆត្តស្ស តីណិ អង្គានិ គហេតព្ពានី’តិ យំ វទេសិ, កតមានិ តានិ តីណិ អង្គានិ គហេតព្ពានី’’តិ? ‘‘យថា, មហារាជ, ឆត្តំ ឧបរិ មុទ្ធនិ ចរតិ, ឯវមេវ ខោ, មហារាជ, យោគិនា យោគាវចរេន កិលេសានំ ឧបរិ មុទ្ធនិ ចរេន ភវិតព្ពំ។ ឥទំ, មហារាជ, ឆត្តស្ស បឋមំ អង្គំ គហេតព្ពំ។
3. ‘‘Bhante nāgasena, ‘chattassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, chattaṃ upari muddhani carati, evameva kho, mahārāja, yoginā yogāvacarena kilesānaṃ upari muddhani carena bhavitabbaṃ. Idaṃ, mahārāja, chattassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, ឆត្តំ មុទ្ធនុបត្ថម្ភំ ហោតិ, ឯវមេវ ខោ, មហារាជ, យោគិនា យោគាវចរេន យោនិសោ មនសិការុបត្ថម្ភេន ភវិតព្ពំ។ ឥទំ, មហារាជ, ឆត្តស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, chattaṃ muddhanupatthambhaṃ hoti, evameva kho, mahārāja, yoginā yogāvacarena yoniso manasikārupatthambhena bhavitabbaṃ. Idaṃ, mahārāja, chattassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, ឆត្តំ វាតាតបមេឃវុដ្ឋិយោ បដិហនតិ, ឯវមេវ ខោ, មហារាជ, យោគិនា យោគាវចរេន នានាវិធទិដ្ឋិបុថុសមណព្រាហ្មណានំ 1 មតវាតតិវិធគ្គិសន្តាបកិលេសវុដ្ឋិយោ បដិហន្តព្ពា ។ ឥទំ, មហារាជ, ឆត្តស្ស តតិយំ អង្គំ គហេតព្ពំ។ ភាសិតម្បេតំ, មហារាជ, ថេរេន សារិបុត្តេន ធម្មសេនាបតិនា –
‘‘Puna caparaṃ, mahārāja, chattaṃ vātātapameghavuṭṭhiyo paṭihanati, evameva kho, mahārāja, yoginā yogāvacarena nānāvidhadiṭṭhiputhusamaṇabrāhmaṇānaṃ 2 matavātatividhaggisantāpakilesavuṭṭhiyo paṭihantabbā . Idaṃ, mahārāja, chattassa tatiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘យថាបិ ឆត្តំ វិបុលំ, អច្ឆិទ្ទំ ថិរសំហិតំ;
‘‘‘Yathāpi chattaṃ vipulaṃ, acchiddaṃ thirasaṃhitaṃ;
វាតាតបំ និវារេតិ, មហតី មេឃវុដ្ឋិយោ។
Vātātapaṃ nivāreti, mahatī meghavuṭṭhiyo.
‘‘‘តថេវ ពុទ្ធបុត្តោបិ, សីលឆត្តធរោ សុចិ;
‘‘‘Tatheva buddhaputtopi, sīlachattadharo suci;
កិលេសវុដ្ឋិំ វារេតិ, សន្តាបតិវិធគ្គយោ’’’តិ។
Kilesavuṭṭhiṃ vāreti, santāpatividhaggayo’’’ti.
ឆត្តង្គបញ្ហោ តតិយោ។
Chattaṅgapañho tatiyo.
Footnotes:
