| Library / Tipiṭaka / திபிடக • Tipiṭaka / பு³த்³த⁴வங்ஸபாளி • Buddhavaṃsapāḷi |
24. ககுஸந்த⁴பு³த்³த⁴வங்ஸோ
24. Kakusandhabuddhavaṃso
1.
1.
வெஸ்ஸபு⁴ஸ்ஸ அபரேன, ஸம்பு³த்³தோ⁴ த்³விபது³த்தமோ;
Vessabhussa aparena, sambuddho dvipaduttamo;
ககுஸந்தோ⁴ நாம நாமேன, அப்பமெய்யோ து³ராஸதோ³.
Kakusandho nāma nāmena, appameyyo durāsado.
2.
2.
உக்³கா⁴டெத்வா ஸப்³ப³ப⁴வங், சரியாய பாரமிங் க³தோ;
Ugghāṭetvā sabbabhavaṃ, cariyāya pāramiṃ gato;
ஸீஹோவ பஞ்ஜரங் பெ⁴த்வா, பத்தோ ஸம்போ³தி⁴முத்தமங்.
Sīhova pañjaraṃ bhetvā, patto sambodhimuttamaṃ.
3.
3.
த⁴ம்மசக்கங் பவத்தெந்தே, ககுஸந்தே⁴ லோகனாயகே;
Dhammacakkaṃ pavattente, kakusandhe lokanāyake;
சத்தாரீஸகோடிஸஹஸ்ஸானங், த⁴ம்மாபி⁴ஸமயோ அஹு.
Cattārīsakoṭisahassānaṃ, dhammābhisamayo ahu.
4.
4.
அந்தலிக்க²ம்ஹி ஆகாஸே, யமகங் கத்வா விகுப்³ப³னங்;
Antalikkhamhi ākāse, yamakaṃ katvā vikubbanaṃ;
திங்ஸகோடிஸஹஸ்ஸானங், போ³தே⁴ஸி தே³வமானுஸே.
Tiṃsakoṭisahassānaṃ, bodhesi devamānuse.
5.
5.
நரதே³வஸ்ஸ யக்க²ஸ்ஸ, சதுஸச்சப்பகாஸனே;
Naradevassa yakkhassa, catusaccappakāsane;
த⁴ம்மாபி⁴ஸமயோ தஸ்ஸ, க³ணனாதோ அஸங்கி²யோ.
Dhammābhisamayo tassa, gaṇanāto asaṅkhiyo.
6.
6.
ககுஸந்த⁴ஸ்ஸ ப⁴க³வதோ, ஏகோ ஆஸி ஸமாக³மோ;
Kakusandhassa bhagavato, eko āsi samāgamo;
கீ²ணாஸவானங் விமலானங், ஸந்தசித்தான தாதி³னங்.
Khīṇāsavānaṃ vimalānaṃ, santacittāna tādinaṃ.
7.
7.
சத்தாலீஸஸஹஸ்ஸானங், ததா³ ஆஸி ஸமாக³மோ;
Cattālīsasahassānaṃ, tadā āsi samāgamo;
த³ந்தபூ⁴மிமனுப்பத்தானங், ஆஸவாரிக³ணக்க²யா.
Dantabhūmimanuppattānaṃ, āsavārigaṇakkhayā.
8.
8.
அஹங் தேன ஸமயேன, கே²மோ நாமாஸி க²த்தியோ;
Ahaṃ tena samayena, khemo nāmāsi khattiyo;
ததா²க³தே ஜினபுத்தே, தா³னங் த³த்வா அனப்பகங்.
Tathāgate jinaputte, dānaṃ datvā anappakaṃ.
9.
9.
பத்தஞ்ச சீவரங் த³த்வா, அஞ்ஜனங் மது⁴லட்டி²கங்;
Pattañca cīvaraṃ datvā, añjanaṃ madhulaṭṭhikaṃ;
இமேதங் பத்தி²தங் ஸப்³ப³ங், படியாதே³மி வரங் வரங்.
Imetaṃ patthitaṃ sabbaṃ, paṭiyādemi varaṃ varaṃ.
10.
10.
ஸோபி மங் பு³த்³தோ⁴ ப்³யாகாஸி, ககுஸந்தோ⁴ வினாயகோ;
Sopi maṃ buddho byākāsi, kakusandho vināyako;
‘‘இமம்ஹி ப⁴த்³த³கே கப்பே, அயங் பு³த்³தோ⁴ ப⁴விஸ்ஸதி.
‘‘Imamhi bhaddake kappe, ayaṃ buddho bhavissati.
11.
11.
‘‘அஹு கபிலவ்ஹயா ரம்மா…பே॰… ஹெஸ்ஸாம ஸம்முகா² இமங்’’.
‘‘Ahu kapilavhayā rammā…pe… hessāma sammukhā imaṃ’’.
12.
12.
தஸ்ஸாபி வசனங் ஸுத்வா, பி⁴ய்யோ சித்தங் பஸாத³யிங்;
Tassāpi vacanaṃ sutvā, bhiyyo cittaṃ pasādayiṃ;
உத்தரிங் வதமதி⁴ட்டா²ஸிங், த³ஸபாரமிபூரியா.
Uttariṃ vatamadhiṭṭhāsiṃ, dasapāramipūriyā.
13.
13.
நக³ரங் கே²மாவதீ நாம, கே²மோ நாமாஸஹங் ததா³;
Nagaraṃ khemāvatī nāma, khemo nāmāsahaṃ tadā;
ஸப்³ப³ஞ்ஞுதங் க³வேஸந்தோ, பப்³ப³ஜிங் தஸ்ஸ ஸந்திகே.
Sabbaññutaṃ gavesanto, pabbajiṃ tassa santike.
14.
14.
ப்³ராஹ்மணோ அக்³கி³த³த்தோ ச, ஆஸி பு³த்³த⁴ஸ்ஸ ஸோ பிதா;
Brāhmaṇo aggidatto ca, āsi buddhassa so pitā;
விஸாகா² நாம ஜனிகா, ககுஸந்த⁴ஸ்ஸ ஸத்து²னோ.
Visākhā nāma janikā, kakusandhassa satthuno.
15.
15.
வஸதே தத்த² கே²மே புரே, ஸம்பு³த்³த⁴ஸ்ஸ மஹாகுலங்;
Vasate tattha kheme pure, sambuddhassa mahākulaṃ;
நரானங் பவரங் ஸெட்ட²ங், ஜாதிமந்தங் மஹாயஸங்.
Narānaṃ pavaraṃ seṭṭhaṃ, jātimantaṃ mahāyasaṃ.
16.
16.
சதுவஸ்ஸஸஹஸ்ஸானி, அகா³ரங் அஜ்ஜ² ஸோ வஸி;
Catuvassasahassāni, agāraṃ ajjha so vasi;
காம -காமவண்ண-காமஸுத்³தி⁴னாமா 1, தயோ பாஸாத³முத்தமா.
Kāma -kāmavaṇṇa-kāmasuddhināmā 2, tayo pāsādamuttamā.
17.
17.
ஸமதிங்ஸஸஹஸ்ஸானி , நாரியோ ஸமலங்கதா;
Samatiṃsasahassāni , nāriyo samalaṅkatā;
ரோசினீ நாம ஸா நாரீ, உத்தரோ நாம அத்ரஜோ.
Rocinī nāma sā nārī, uttaro nāma atrajo.
18.
18.
நிமித்தே சதுரோ தி³ஸ்வா, ரத²யானேன நிக்க²மி;
Nimitte caturo disvā, rathayānena nikkhami;
அனூனஅட்ட²மாஸானி, பதா⁴னங் பத³ஹீ ஜினோ.
Anūnaaṭṭhamāsāni, padhānaṃ padahī jino.
19.
19.
ப்³ரஹ்முனா யாசிதோ ஸந்தோ, ககுஸந்தோ⁴ வினாயகோ;
Brahmunā yācito santo, kakusandho vināyako;
வத்தி சக்கங் மஹாவீரோ, மிக³தா³யே நருத்தமோ.
Vatti cakkaṃ mahāvīro, migadāye naruttamo.
20.
20.
விது⁴ரோ ச ஸஞ்ஜீவோ ச, அஹேஸுங் அக்³க³ஸாவகா;
Vidhuro ca sañjīvo ca, ahesuṃ aggasāvakā;
பு³த்³தி⁴ஜோ நாமுபட்டா²கோ, ககுஸந்த⁴ஸ்ஸ ஸத்து²னோ.
Buddhijo nāmupaṭṭhāko, kakusandhassa satthuno.
21.
21.
ஸாமா ச சம்பானாமா ச, அஹேஸுங் அக்³க³ஸாவிகா;
Sāmā ca campānāmā ca, ahesuṃ aggasāvikā;
போ³தி⁴ தஸ்ஸ ப⁴க³வதோ, ஸிரீஸோதி பவுச்சதி.
Bodhi tassa bhagavato, sirīsoti pavuccati.
22.
22.
அச்சுதோ ச ஸுமனோ ச, அஹேஸுங் அக்³கு³பட்ட²கா;
Accuto ca sumano ca, ahesuṃ aggupaṭṭhakā;
நந்தா³ சேவ ஸுனந்தா³ ச, அஹேஸுங் அக்³கு³பட்டி²கா.
Nandā ceva sunandā ca, ahesuṃ aggupaṭṭhikā.
23.
23.
சத்தாலீஸரதனானி , அச்சுக்³க³தோ மஹாமுனி;
Cattālīsaratanāni , accuggato mahāmuni;
கனகப்பபா⁴ நிச்ச²ரதி, ஸமந்தா த³ஸயோஜனங்.
Kanakappabhā niccharati, samantā dasayojanaṃ.
24.
24.
சத்தாலீஸவஸ்ஸஸஹஸ்ஸானி, ஆயு தஸ்ஸ மஹேஸினோ;
Cattālīsavassasahassāni, āyu tassa mahesino;
தாவதா திட்ட²மானோ ஸோ, தாரேஸி ஜனதங் ப³ஹுங்.
Tāvatā tiṭṭhamāno so, tāresi janataṃ bahuṃ.
25.
25.
த⁴ம்மாபணங் பஸாரெத்வா, நரனாரீனங் ஸதே³வகே;
Dhammāpaṇaṃ pasāretvā, naranārīnaṃ sadevake;
நதி³த்வா ஸீஹனாத³ங்வ, நிப்³பு³தோ ஸோ ஸஸாவகோ.
Naditvā sīhanādaṃva, nibbuto so sasāvako.
26.
26.
அட்ட²ங்க³வசனஸம்பன்னோ, அச்சி²த்³தா³னி நிரந்தரங்;
Aṭṭhaṅgavacanasampanno, acchiddāni nirantaraṃ;
ஸப்³ப³ங் தமந்தரஹிதங், நனு ரித்தா ஸப்³ப³ஸங்கா²ரா.
Sabbaṃ tamantarahitaṃ, nanu rittā sabbasaṅkhārā.
27.
27.
ககுஸந்தோ⁴ ஜினவரோ, கே²மாராமம்ஹி நிப்³பு³தோ;
Kakusandho jinavaro, khemārāmamhi nibbuto;
தத்தே²வஸ்ஸ தூ²பவரோ, கா³வுதங் நப⁴முக்³க³தோதி.
Tatthevassa thūpavaro, gāvutaṃ nabhamuggatoti.
ககுஸந்த⁴ஸ்ஸ ப⁴க³வதோ வங்ஸோ த்³வாவீஸதிமோ.
Kakusandhassa bhagavato vaṃso dvāvīsatimo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / பு³த்³த⁴வங்ஸ-அட்ட²கதா² • Buddhavaṃsa-aṭṭhakathā / 24. ககுஸந்த⁴பு³த்³த⁴வங்ஸவண்ணனா • 24. Kakusandhabuddhavaṃsavaṇṇanā
