| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[১৩৪] ৪. ঝানসোধনজাতকৰণ্ণনা
[134] 4. Jhānasodhanajātakavaṇṇanā
যে সঞ্ঞিনোতি ইদং সত্থা জেতৰনে ৰিহরন্তো সঙ্কস্সনগরদ্ৰারে অত্তনা সংখিত্তেন পুচ্ছিতপঞ্হস্স ধম্মসেনাপতিনো ৰিত্থারব্যাকরণং আরব্ভ কথেসি। তত্রিদং অতীতৰত্থু – অতীতে কির বারাণসিযং ব্রহ্মদত্তে রজ্জং কারেন্তে বোধিসত্তো অরঞ্ঞাযতনে কালং করোন্তো অন্তেৰাসিকেহি পুচ্ছিতো ‘‘নেৰসঞ্ঞীনাসঞ্ঞী’’তি আহ…পে॰… তাপসা জেট্ঠন্তেৰাসিকস্স কথং ন গণ্হিংসু। বোধিসত্তো আভস্সরতো আগন্ত্ৰা আকাসে ঠত্ৰা ইমং গাথমাহ –
Yesaññinoti idaṃ satthā jetavane viharanto saṅkassanagaradvāre attanā saṃkhittena pucchitapañhassa dhammasenāpatino vitthārabyākaraṇaṃ ārabbha kathesi. Tatridaṃ atītavatthu – atīte kira bārāṇasiyaṃ brahmadatte rajjaṃ kārente bodhisatto araññāyatane kālaṃ karonto antevāsikehi pucchito ‘‘nevasaññīnāsaññī’’ti āha…pe… tāpasā jeṭṭhantevāsikassa kathaṃ na gaṇhiṃsu. Bodhisatto ābhassarato āgantvā ākāse ṭhatvā imaṃ gāthamāha –
১৩৪.
134.
‘‘যে সঞ্ঞিনো তেপি দুগ্গতা, যেপি অসঞ্ঞিনো তেপি দুগ্গতা।
‘‘Ye saññino tepi duggatā, yepi asaññino tepi duggatā;
এতং উভযং ৰিৰজ্জয, তং সমাপত্তিসুখং অনঙ্গণ’’ন্তি॥
Etaṃ ubhayaṃ vivajjaya, taṃ samāpattisukhaṃ anaṅgaṇa’’nti.
তত্থ যে সঞ্ঞিনোতি ঠপেত্ৰা নেৰসঞ্ঞানাসঞ্ঞাযতনলাভিনো অৰসেসে সচিত্তকসত্তে দস্সেতি। তেপি দুগ্গতাতি তস্সা সমাপত্তিযা অলাভতো তেপি দুগ্গতা নাম। যেপি অসঞ্ঞিনোতি অসঞ্ঞভৰে নিব্বত্তে অচিত্তকসত্তে দস্সেতি। তেপি দুগ্গতাতি তেপি ইমিস্সাযেৰ সমাপত্তিযা অলাভতো দুগ্গতাযেৰ নাম। এতং উভযং ৰিৰজ্জযাতি এতং উভযম্পি সঞ্ঞিভৰঞ্চ অসঞ্ঞিভৰঞ্চ ৰিৰজ্জয পজহাতি অন্তেৰাসিকং ওৰদতি। তং সমাপত্তিসুখং অনঙ্গণন্তি তং নেৰসঞ্ঞানাসঞ্ঞাযতনসমাপত্তিলাভিনো সন্তট্ঠেন ‘‘সুখ’’ন্তি সঙ্খং গতং ঝানসুখং অনঙ্গণং নিদ্দোসং বলৰচিত্তেকগ্গতাসভাৰেনপি তং অনঙ্গণং নাম জাতং।
Tattha ye saññinoti ṭhapetvā nevasaññānāsaññāyatanalābhino avasese sacittakasatte dasseti. Tepi duggatāti tassā samāpattiyā alābhato tepi duggatā nāma. Yepi asaññinoti asaññabhave nibbatte acittakasatte dasseti. Tepi duggatāti tepi imissāyeva samāpattiyā alābhato duggatāyeva nāma. Etaṃ ubhayaṃ vivajjayāti etaṃ ubhayampi saññibhavañca asaññibhavañca vivajjaya pajahāti antevāsikaṃ ovadati. Taṃ samāpattisukhaṃ anaṅgaṇanti taṃ nevasaññānāsaññāyatanasamāpattilābhino santaṭṭhena ‘‘sukha’’nti saṅkhaṃ gataṃ jhānasukhaṃ anaṅgaṇaṃ niddosaṃ balavacittekaggatāsabhāvenapi taṃ anaṅgaṇaṃ nāma jātaṃ.
এৰং বোধিসত্তো ধম্মং দেসেত্ৰা অন্তেৰাসিকস্স গুণং কথেত্ৰা ব্রহ্মলোকমেৰ অগমাসি। তদা সেসতাপসা জেট্ঠন্তেৰাসিকস্স সদ্দহিংসু।
Evaṃ bodhisatto dhammaṃ desetvā antevāsikassa guṇaṃ kathetvā brahmalokameva agamāsi. Tadā sesatāpasā jeṭṭhantevāsikassa saddahiṃsu.
সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা জেট্ঠন্তেৰাসিকো সারিপুত্তো, মহাব্রহ্মা পন অহমেৰ অহোসি’’ন্তি।
Satthā imaṃ dhammadesanaṃ āharitvā jātakaṃ samodhānesi – ‘‘tadā jeṭṭhantevāsiko sāriputto, mahābrahmā pana ahameva ahosi’’nti.
ঝানসোধনজাতকৰণ্ণনা চতুত্থা।
Jhānasodhanajātakavaṇṇanā catutthā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ১৩৪. ঝানসোধনজাতকং • 134. Jhānasodhanajātakaṃ
