| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[১৩৫] ৫. চন্দাভজাতকৰণ্ণনা
[135] 5. Candābhajātakavaṇṇanā
চন্দাভন্তি ইদং সত্থা জেতৰনে ৰিহরন্তো সঙ্কস্সনগরদ্ৰারে থেরস্সেৰ পঞ্হব্যাকরণং আরব্ভ কথেসি। অতীতে কির বারাণসিযং ব্রহ্মদত্তে রজ্জং কারেন্তে বোধিসত্তো অরঞ্ঞাযতনে কালং করোন্তো অন্তেৰাসিকেহি পুচ্ছিতো ‘‘চন্দাভং সূরিযাভ’’ন্তি ৰত্ৰা আভস্সরে নিব্বত্তো। তাপসা জেট্ঠন্তেৰাসিকস্স ন সদ্দহিংসু। বোধিসত্তো আভস্সরতো আগন্ত্ৰা আকাসে ঠিতো ইমং গাথমাহ –
Candābhanti idaṃ satthā jetavane viharanto saṅkassanagaradvāre therasseva pañhabyākaraṇaṃ ārabbha kathesi. Atīte kira bārāṇasiyaṃ brahmadatte rajjaṃ kārente bodhisatto araññāyatane kālaṃ karonto antevāsikehi pucchito ‘‘candābhaṃ sūriyābha’’nti vatvā ābhassare nibbatto. Tāpasā jeṭṭhantevāsikassa na saddahiṃsu. Bodhisatto ābhassarato āgantvā ākāse ṭhito imaṃ gāthamāha –
১৩৫.
135.
‘‘চন্দাভং সূরিযাভঞ্চ, যোধ পঞ্ঞায গাধতি।
‘‘Candābhaṃ sūriyābhañca, yodha paññāya gādhati;
অৰিতক্কেন ঝানেন, হোতি আভস্সরূপগো’’তি॥
Avitakkena jhānena, hoti ābhassarūpago’’ti.
তত্থ চন্দাভন্তি ওদাতকসিণং দস্সেতি। সূরিযাভন্তি পীতকসিণং। যোধ পঞ্ঞায গাধতীতি যো পুগ্গলো ইধ সত্তলোকে ইদং কসিণদ্ৰযং পঞ্ঞায গাধতি, আরম্মণং কত্ৰা অনুপৰিসতি, তত্থেৰ পতিট্ঠহতি । অথ ৰা চন্দাভং সূরিযাভঞ্চ, যোধ পঞ্ঞায গাধতীতি যত্তকং ঠানং চন্দাভা চ সূরিযাভা চ পত্থটা, তত্থকে ঠানে পটিভাগকসিণং ৰড্ঢেত্ৰা তং আরম্মণং কত্ৰা ঝানং নিব্বত্তেন্তো উভযম্পেতং আভং পঞ্ঞায গাধতি নাম। তস্মা অযম্পেত্থ অত্থোযেৰ। অৰিতক্কেন ঝানেন, হোতি আভস্সরূপগোতি সো পুগ্গলো তথা কত্ৰা পটিলদ্ধেন দুতিযেন ঝানেন আভস্সরব্রহ্মলোকূপগো হোতীতি।
Tattha candābhanti odātakasiṇaṃ dasseti. Sūriyābhanti pītakasiṇaṃ. Yodha paññāya gādhatīti yo puggalo idha sattaloke idaṃ kasiṇadvayaṃ paññāya gādhati, ārammaṇaṃ katvā anupavisati, tattheva patiṭṭhahati . Atha vā candābhaṃ sūriyābhañca, yodha paññāya gādhatīti yattakaṃ ṭhānaṃ candābhā ca sūriyābhā ca patthaṭā, tatthake ṭhāne paṭibhāgakasiṇaṃ vaḍḍhetvā taṃ ārammaṇaṃ katvā jhānaṃ nibbattento ubhayampetaṃ ābhaṃ paññāya gādhati nāma. Tasmā ayampettha atthoyeva. Avitakkena jhānena, hoti ābhassarūpagoti so puggalo tathā katvā paṭiladdhena dutiyena jhānena ābhassarabrahmalokūpago hotīti.
এৰং বোধিসত্তো তাপসে বোধেত্ৰা জেট্ঠন্তেৰাসিকস্স গুণং কথেত্ৰা ব্রহ্মলোকমেৰ গতো।
Evaṃ bodhisatto tāpase bodhetvā jeṭṭhantevāsikassa guṇaṃ kathetvā brahmalokameva gato.
সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা জেট্ঠন্তেৰাসিকো সারিপুত্তো, মহাব্রহ্মা পন অহমেৰ অহোসি’’ন্তি।
Satthā imaṃ dhammadesanaṃ āharitvā jātakaṃ samodhānesi – ‘‘tadā jeṭṭhantevāsiko sāriputto, mahābrahmā pana ahameva ahosi’’nti.
চন্দাভজাতকৰণ্ণনা পঞ্চমা।
Candābhajātakavaṇṇanā pañcamā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ১৩৫. চন্দাভজাতকং • 135. Candābhajātakaṃ
