| Library / Tipiṭaka / তিপিটক • Tipiṭaka / জাতকপাল়ি • Jātakapāḷi |
৫১৩. জযদ্দিসজাতকং (৩)
513. Jayaddisajātakaṃ (3)
৬৪.
64.
চিরস্সং ৰত মে উদপাদি অজ্জ, ভক্খো মহা সত্তমিভত্তকালে।
Cirassaṃ vata me udapādi ajja, bhakkho mahā sattamibhattakāle;
কুতোসি কো ৰাসি তদিঙ্ঘ ব্রূহি, আচিক্খ জাতিং ৰিদিতো যথাসি॥
Kutosi ko vāsi tadiṅgha brūhi, ācikkha jātiṃ vidito yathāsi.
৬৫.
65.
পঞ্চালরাজা মিগৰং পৰিট্ঠো, জযদ্দিসো নাম যদিস্সুতো তে।
Pañcālarājā migavaṃ paviṭṭho, jayaddiso nāma yadissuto te;
চরামি কচ্ছানি ৰনানি চাহং, পসদং ইমং খাদ মমজ্জ মুঞ্চ॥
Carāmi kacchāni vanāni cāhaṃ, pasadaṃ imaṃ khāda mamajja muñca.
৬৬.
66.
সেনেৰ ত্ৰং পণসি সস্সমানো 1, মমেস ভক্খো পসদো যং ৰদেসি।
Seneva tvaṃ paṇasi sassamāno 2, mamesa bhakkho pasado yaṃ vadesi;
তং খাদিযান পসদং জিঘঞ্ঞং 3, খাদিস্সং পচ্ছা ন ৰিলাপকালো॥
Taṃ khādiyāna pasadaṃ jighaññaṃ 4, khādissaṃ pacchā na vilāpakālo.
৬৭.
67.
ন চত্থি মোক্খো মম নিক্কযেন 5, গন্ত্ৰান পচ্চাগমনায পণ্হে।
Na catthi mokkho mama nikkayena 6, gantvāna paccāgamanāya paṇhe;
তং সঙ্করং 7 ব্রাহ্মণস্সপ্পদায, সচ্চানুরক্খী পুনরাৰজিস্সং॥
Taṃ saṅkaraṃ 8 brāhmaṇassappadāya, saccānurakkhī punarāvajissaṃ.
৬৮.
68.
কিং কম্মজাতং অনুতপ্পতে ত্ৰং 9, পত্তং সমীপং মরণস্স রাজ।
Kiṃ kammajātaṃ anutappate tvaṃ 10, pattaṃ samīpaṃ maraṇassa rāja;
আচিক্খ মে তং অপি সক্কুণেমু, অনুজানিতুং আগমনায পণ্হে॥
Ācikkha me taṃ api sakkuṇemu, anujānituṃ āgamanāya paṇhe.
৬৯.
69.
কতা মযা ব্রাহ্মণস্স ধনাসা, তং সঙ্করং পটিমুক্কং ন মুত্তং।
Katā mayā brāhmaṇassa dhanāsā, taṃ saṅkaraṃ paṭimukkaṃ na muttaṃ;
তং সঙ্করং ব্রাহ্মণস্সপ্পদায, সচ্চানুরক্খী পুনরাৰজিস্সং॥
Taṃ saṅkaraṃ brāhmaṇassappadāya, saccānurakkhī punarāvajissaṃ.
৭০.
70.
যা তে কতা ব্রাহ্মণস্স ধনাসা, তং সঙ্করং পটিমুক্কং ন মুত্তং।
Yā te katā brāhmaṇassa dhanāsā, taṃ saṅkaraṃ paṭimukkaṃ na muttaṃ;
তং সঙ্করং ব্রাহ্মণস্সপ্পদায, সচ্চানুরক্খী পুনরাৰজস্সু॥
Taṃ saṅkaraṃ brāhmaṇassappadāya, saccānurakkhī punarāvajassu.
৭১.
71.
মুত্তো চ সো পোরিসাদস্স 11 হত্থা, গন্ত্ৰা সকং মন্দিরং কামকামী।
Mutto ca so porisādassa 12 hatthā, gantvā sakaṃ mandiraṃ kāmakāmī;
তং সঙ্করং ব্রাহ্মণস্সপ্পদায, আমন্তযী পুত্তমলীনসত্তং 13॥
Taṃ saṅkaraṃ brāhmaṇassappadāya, āmantayī puttamalīnasattaṃ 14.
৭২.
72.
অজ্জেৰ রজ্জং অভিসিঞ্চযস্সু, ধম্মং চর সেসু পরেসু চাপি।
Ajjeva rajjaṃ abhisiñcayassu, dhammaṃ cara sesu paresu cāpi;
অধম্মকারো চ তে মাহু রট্ঠে, গচ্ছামহং পোরিসাদস্স ঞত্তে 15॥
Adhammakāro ca te māhu raṭṭhe, gacchāmahaṃ porisādassa ñatte 16.
৭৩.
73.
কিং কম্ম কুব্বং তৰ দেৰ পাৰ 17, নারাধযী তং তদিচ্ছামি সোতুং।
Kiṃ kamma kubbaṃ tava deva pāva 18, nārādhayī taṃ tadicchāmi sotuṃ;
যমজ্জ রজ্জম্হি উদস্সযে তুৰং, রজ্জম্পি নিচ্ছেয্যং তযা ৰিনাহং॥
Yamajja rajjamhi udassaye tuvaṃ, rajjampi niccheyyaṃ tayā vināhaṃ.
৭৪.
74.
ন কম্মুনা ৰা ৰচসা ৰ তাত, অপরাধিতোহং তুৰিযং সরামি।
Na kammunā vā vacasā va tāta, aparādhitohaṃ tuviyaṃ sarāmi;
সন্ধিঞ্চ 19 কত্ৰা পুরিসাদকেন, সচ্চানুরক্খী পুনাহং গমিস্সং॥
Sandhiñca 20 katvā purisādakena, saccānurakkhī punāhaṃ gamissaṃ.
৭৫.
75.
অহং গমিস্সামি ইধেৰ হোহি, নত্থি ততো জীৰতো ৰিপ্পমোক্খো।
Ahaṃ gamissāmi idheva hohi, natthi tato jīvato vippamokkho;
সচে তুৰং গচ্ছসিযেৰ রাজ, অহম্পি গচ্ছামি উভো ন হোম॥
Sace tuvaṃ gacchasiyeva rāja, ahampi gacchāmi ubho na homa.
৭৬.
76.
অদ্ধা হি তাত সতানেস ধম্মো, মরণা চ মে দুক্খতরং তদস্স।
Addhā hi tāta satānesa dhammo, maraṇā ca me dukkhataraṃ tadassa;
কম্মাসপাদো তং যদা পচিত্ৰা, পসয্হ খাদে ভিদা রুক্খসূলে॥
Kammāsapādo taṃ yadā pacitvā, pasayha khāde bhidā rukkhasūle.
৭৭.
77.
পাণেন তে পাণমহং নিমিস্সং, মা ত্ৰং অগা পোরিসাদস্স ঞত্তে।
Pāṇena te pāṇamahaṃ nimissaṃ, mā tvaṃ agā porisādassa ñatte;
এতঞ্চ তে পাণমহং নিমিস্সং, তস্মা মতং জীৰিতস্স ৰণ্ণেমি 21॥
Etañca te pāṇamahaṃ nimissaṃ, tasmā mataṃ jīvitassa vaṇṇemi 22.
৭৮.
78.
ততো হৰে ধিতিমা রাজপুত্তো, ৰন্দিত্ৰা মাতু চ পিতু চ 23 পাদে।
Tato have dhitimā rājaputto, vanditvā mātu ca pitu ca 24 pāde;
দুখিনিস্স মাতা নিপতা 25 পথব্যা, পিতাস্স পগ্গয্হ ভুজানি কন্দতি॥
Dukhinissa mātā nipatā 26 pathabyā, pitāssa paggayha bhujāni kandati.
৭৯.
79.
তং গচ্ছন্তং তাৰ পিতা ৰিদিত্ৰা, পরম্মুখো ৰন্দতি পঞ্জলীকো।
Taṃ gacchantaṃ tāva pitā viditvā, parammukho vandati pañjalīko;
সোমো চ রাজা ৰরুণো চ রাজা, পজাপতী চন্দিমা সূরিযো চ।
Somo ca rājā varuṇo ca rājā, pajāpatī candimā sūriyo ca;
এতেহি গুত্তো পুরিসাদকম্হা, অনুঞ্ঞাতো সোত্থি পচ্চেহি তাত॥
Etehi gutto purisādakamhā, anuññāto sotthi paccehi tāta.
৮০.
80.
যং দণ্ডকিরঞ্ঞো গতস্স 27 মাতা, রামস্সকাসি সোত্থানং সুগুত্তা।
Yaṃ daṇḍakirañño gatassa 28 mātā, rāmassakāsi sotthānaṃ suguttā;
তং তে অহং সোত্থানং করোমি, এতেন সচ্চেন সরন্তু দেৰা।
Taṃ te ahaṃ sotthānaṃ karomi, etena saccena sarantu devā;
অনুঞ্ঞাতো সোত্থি পচ্চেহি পুত্ত॥
Anuññāto sotthi paccehi putta.
৮১.
81.
আৰী রহো ৰাপী মনোপদোসং, নাহং সরে জাতু মলীনসত্তে।
Āvī raho vāpī manopadosaṃ, nāhaṃ sare jātu malīnasatte;
এতেন সচ্চেন সরন্তু দেৰা, অনুঞ্ঞাতো সোত্থি পচ্চেহি ভাতিক 29॥
Etena saccena sarantu devā, anuññāto sotthi paccehi bhātika 30.
৮২.
82.
যস্মা চ মে অনধিমনোসি সামি, ন চাপি মে মনসা অপ্পিযোসি।
Yasmā ca me anadhimanosi sāmi, na cāpi me manasā appiyosi;
এতেন সচ্চেন সরন্তু দেৰা, অনুঞ্ঞাতো সোত্থি পচ্চেহি সামি॥
Etena saccena sarantu devā, anuññāto sotthi paccehi sāmi.
৮৩.
83.
ব্রহা উজূ চারুমুখো কুতোসি, ন মং পজানাসি ৰনে ৰসন্তং।
Brahā ujū cārumukho kutosi, na maṃ pajānāsi vane vasantaṃ;
লুদ্দং মং ঞত্ৰা ‘‘পুরিসাদকো’’তি, কো সোত্থি মাজানমিধা’ৰজেয্য॥
Luddaṃ maṃ ñatvā ‘‘purisādako’’ti, ko sotthi mājānamidhā’vajeyya.
৮৪.
84.
জানামি লুদ্দ পুরিসাদকো ত্ৰং, ন তং ন জানামি ৰনে ৰসন্তং।
Jānāmi ludda purisādako tvaṃ, na taṃ na jānāmi vane vasantaṃ;
অহঞ্চ পুত্তোস্মি জযদ্দিসস্স, মমজ্জ খাদ পিতুনো পমোক্খা॥
Ahañca puttosmi jayaddisassa, mamajja khāda pituno pamokkhā.
৮৫.
85.
জানামি পুত্তোতি 31 জযদ্দিসস্স, তথা হি ৰো মুখৰণ্ণো উভিন্নং।
Jānāmi puttoti 32 jayaddisassa, tathā hi vo mukhavaṇṇo ubhinnaṃ;
সুদুক্করঞ্ঞেৰ 33 কতং তৰেদং, যো মত্তুমিচ্ছে পিতুনো পমোক্খা॥
Sudukkaraññeva 34 kataṃ tavedaṃ, yo mattumicche pituno pamokkhā.
৮৬.
86.
ন দুক্করং কিঞ্চি মহেত্থ মঞ্ঞে, যো মত্তুমিচ্ছে পিতুনো পমোক্খা।
Na dukkaraṃ kiñci mahettha maññe, yo mattumicche pituno pamokkhā;
৮৭.
87.
অহঞ্চ খো অত্তনো পাপকিরিযং, আৰী রহো ৰাপি সরে ন জাতু।
Ahañca kho attano pāpakiriyaṃ, āvī raho vāpi sare na jātu;
সঙ্খাতজাতীমরণোহমস্মি, যথেৰ মে ইধ তথা পরত্থ॥
Saṅkhātajātīmaraṇohamasmi, yatheva me idha tathā parattha.
৮৮.
88.
খাদজ্জ মং দানি মহানুভাৰ, করস্সু কিচ্চানি ইমং সরীরং।
Khādajja maṃ dāni mahānubhāva, karassu kiccāni imaṃ sarīraṃ;
রুক্খস্স ৰা তে পপতামি অগ্গা, ছাদযমানো ময্হং ত্ৰমদেসি মংসং॥
Rukkhassa vā te papatāmi aggā, chādayamāno mayhaṃ tvamadesi maṃsaṃ.
৮৯.
89.
ইদঞ্চ তে রুচ্চতি রাজপুত্ত, চজেসি 39 পাণং পিতুনো পমোক্খা।
Idañca te ruccati rājaputta, cajesi 40 pāṇaṃ pituno pamokkhā;
তস্মা হি সো 41 ত্ৰং তরমানরূপো, সম্ভঞ্জ কট্ঠানি জলেহি অগ্গিং॥
Tasmā hi so 42 tvaṃ taramānarūpo, sambhañja kaṭṭhāni jalehi aggiṃ.
৯০.
90.
ততো হৰে ধিতিমা রাজপুত্তো, দারুং সমাহত্ৰা মহন্তমগ্গিং।
Tato have dhitimā rājaputto, dāruṃ samāhatvā mahantamaggiṃ;
সন্দীপযিত্ৰা পটিৰেদযিত্থ, আদীপিতো দানি মহাযমগ্গি 43॥
Sandīpayitvā paṭivedayittha, ādīpito dāni mahāyamaggi 44.
৯১.
91.
খাদজ্জ মং দানি পসয্হকারী, কিং মং মুহুং পেক্খসি হট্ঠলোমো।
Khādajja maṃ dāni pasayhakārī, kiṃ maṃ muhuṃ pekkhasi haṭṭhalomo;
তথা তথা তুয্হমহং করোমি, যথা যথা মং ছাদযমানো অদেসি॥
Tathā tathā tuyhamahaṃ karomi, yathā yathā maṃ chādayamāno adesi.
৯২.
92.
কো তাদিসং অরহতি খাদিতাযে, ধম্মে ঠিতং সচ্চৰাদিং ৰদঞ্ঞুং।
Ko tādisaṃ arahati khāditāye, dhamme ṭhitaṃ saccavādiṃ vadaññuṃ;
মুদ্ধাপি তস্স ৰিফলেয্য সত্তধা, যো তাদিসং সচ্চৰাদিং অদেয্য॥
Muddhāpi tassa viphaleyya sattadhā, yo tādisaṃ saccavādiṃ adeyya.
৯৩.
93.
ইদঞ্হি সো ব্রাহ্মণং মঞ্ঞমানো, সসো অৰাসেসি সকে সরীরে।
Idañhi so brāhmaṇaṃ maññamāno, saso avāsesi sake sarīre;
৯৪.
94.
চন্দো যথা রাহুমুখা পমুত্তো, ৰিরোচতে পন্নরসেৰ ভাণুমা 49।
Cando yathā rāhumukhā pamutto, virocate pannaraseva bhāṇumā 50;
এৰং তুৰং পোরিসাদা পমুত্তো, ৰিরোচ কপিলে 51 মহানুভাৰ।
Evaṃ tuvaṃ porisādā pamutto, viroca kapile 52 mahānubhāva;
আমোদযং পিতরং মাতরঞ্চ, সব্বো চ তে নন্দতু ঞাতিপক্খো॥
Āmodayaṃ pitaraṃ mātarañca, sabbo ca te nandatu ñātipakkho.
৯৫.
95.
ততো হৰে ধিতিমা রাজপুত্তো, কতঞ্জলী পরিযায 53 পোরিসাদং।
Tato have dhitimā rājaputto, katañjalī pariyāya 54 porisādaṃ;
৯৬.
96.
তং নেগমা জানপদা চ সব্বে, হত্থারোহা রথিকা পত্তিকা চ।
Taṃ negamā jānapadā ca sabbe, hatthārohā rathikā pattikā ca;
নমস্সমানা পঞ্জলিকা উপাগমুং, নমত্থু তে দুক্করকারকোসীতি॥
Namassamānā pañjalikā upāgamuṃ, namatthu te dukkarakārakosīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / জাতক-অট্ঠকথা • Jātaka-aṭṭhakathā / [৫১৩] ৩. জযদ্দিসজাতকৰণ্ণনা • [513] 3. Jayaddisajātakavaṇṇanā
