| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
១១. ជតុកណ្ណិមាណវបុច្ឆា
11. Jatukaṇṇimāṇavapucchā
១១០២.
1102.
‘‘សុត្វានហំ វីរមកាមកាមិំ, (ឥច្ចាយស្មា ជតុកណ្ណិ)
‘‘Sutvānahaṃ vīramakāmakāmiṃ, (iccāyasmā jatukaṇṇi)
ឱឃាតិគំ បុដ្ឋុមកាមមាគមំ;
Oghātigaṃ puṭṭhumakāmamāgamaṃ;
សន្តិបទំ ព្រូហិ សហជនេត្ត, យថាតច្ឆំ ភគវា ព្រូហិ មេ តំ។
Santipadaṃ brūhi sahajanetta, yathātacchaṃ bhagavā brūhi me taṃ.
១១០៣.
1103.
‘‘ភគវា ហិ កាមេ អភិភុយ្យ ឥរិយតិ, អាទិច្ចោវ បថវិំ តេជី តេជសា;
‘‘Bhagavā hi kāme abhibhuyya iriyati, ādiccova pathaviṃ tejī tejasā;
បរិត្តបញ្ញស្ស មេ ភូរិបញ្ញ, អាចិក្ខ ធម្មំ យមហំ វិជញ្ញំ;
Parittapaññassa me bhūripañña, ācikkha dhammaṃ yamahaṃ vijaññaṃ;
ជាតិជរាយ ឥធ វិប្បហានំ’’។
Jātijarāya idha vippahānaṃ’’.
១១០៤.
1104.
‘‘កាមេសុ វិនយ គេធំ, (ជតុកណ្ណីតិ ភគវា) នេក្ខម្មំ ទដ្ឋុ ខេមតោ;
‘‘Kāmesu vinaya gedhaṃ, (jatukaṇṇīti bhagavā) nekkhammaṃ daṭṭhu khemato;
ឧគ្គហីតំ និរត្តំ វា, មា តេ វិជ្ជិត្ថ កិញ្ចនំ។
Uggahītaṃ nirattaṃ vā, mā te vijjittha kiñcanaṃ.
១១០៥.
1105.
‘‘យំ បុព្ពេ តំ វិសោសេហិ, បច្ឆា តេ មាហុ កិញ្ចនំ;
‘‘Yaṃ pubbe taṃ visosehi, pacchā te māhu kiñcanaṃ;
មជ្ឈេ ចេ នោ គហេស្សសិ, ឧបសន្តោ ចរិស្សសិ។
Majjhe ce no gahessasi, upasanto carissasi.
១១០៦.
1106.
‘‘សព្ពសោ នាមរូបស្មិំ, វីតគេធស្ស ព្រាហ្មណ;
‘‘Sabbaso nāmarūpasmiṃ, vītagedhassa brāhmaṇa;
អាសវាស្ស ន វិជ្ជន្តិ, យេហិ មច្ចុវសំ វជេ’’តិ។
Āsavāssa na vijjanti, yehi maccuvasaṃ vaje’’ti.
ជតុកណ្ណិមាណវបុច្ឆា ឯកាទសមា និដ្ឋិតា។
Jatukaṇṇimāṇavapucchā ekādasamā niṭṭhitā.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ១១. ជតុកណ្ណិសុត្តវណ្ណនា • 11. Jatukaṇṇisuttavaṇṇanā
