| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
១២. ភទ្រាវុធមាណវបុច្ឆា
12. Bhadrāvudhamāṇavapucchā
១១០៧.
1107.
‘‘ឱកញ្ជហំ តណ្ហច្ឆិទំ អនេជំ, (ឥច្ចាយស្មា ភទ្រាវុធោ)
‘‘Okañjahaṃ taṇhacchidaṃ anejaṃ, (iccāyasmā bhadrāvudho)
នន្ទិញ្ជហំ ឱឃតិណ្ណំ វិមុត្តំ;
Nandiñjahaṃ oghatiṇṇaṃ vimuttaṃ;
កប្បញ្ជហំ អភិយាចេ សុមេធំ, សុត្វាន នាគស្ស អបនមិស្សន្តិ ឥតោ។
Kappañjahaṃ abhiyāce sumedhaṃ, sutvāna nāgassa apanamissanti ito.
១១០៨.
1108.
‘‘នានាជនា ជនបទេហិ សង្គតា, តវ វីរ វាក្យំ អភិកង្ខមានា;
‘‘Nānājanā janapadehi saṅgatā, tava vīra vākyaṃ abhikaṅkhamānā;
តេសំ តុវំ សាធុ វិយាករោហិ, តថា ហិ តេ វិទិតោ ឯស ធម្មោ’’។
Tesaṃ tuvaṃ sādhu viyākarohi, tathā hi te vidito esa dhammo’’.
១១០៩.
1109.
‘‘អាទានតណ្ហំ វិនយេថ សព្ពំ, (ភទ្រាវុធាតិ ភគវា)
‘‘Ādānataṇhaṃ vinayetha sabbaṃ, (bhadrāvudhāti bhagavā)
ឧទ្ធំ អធោ តិរិយញ្ចាបិ មជ្ឈេ;
Uddhaṃ adho tiriyañcāpi majjhe;
យំ យញ្ហិ លោកស្មិមុបាទិយន្តិ, តេនេវ មារោ អន្វេតិ ជន្តុំ។
Yaṃ yañhi lokasmimupādiyanti, teneva māro anveti jantuṃ.
១១១០.
1110.
‘‘តស្មា បជានំ ន ឧបាទិយេថ, ភិក្ខុ សតោ កិញ្ចនំ សព្ពលោកេ;
‘‘Tasmā pajānaṃ na upādiyetha, bhikkhu sato kiñcanaṃ sabbaloke;
អាទានសត្តេ ឥតិ បេក្ខមានោ, បជំ ឥមំ មច្ចុធេយ្យេ វិសត្ត’’ន្តិ។
Ādānasatte iti pekkhamāno, pajaṃ imaṃ maccudheyye visatta’’nti.
ភទ្រាវុធមាណវបុច្ឆា ទ្វាទសមា និដ្ឋិតា។
Bhadrāvudhamāṇavapucchā dvādasamā niṭṭhitā.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ១២. ភទ្រាវុធសុត្តវណ្ណនា • 12. Bhadrāvudhasuttavaṇṇanā
