| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೬. ಜರಸಿಙ್ಗಾಲಙ್ಗಪಞ್ಹೋ
6. Jarasiṅgālaṅgapañho
೬. ‘‘ಭನ್ತೇ ನಾಗಸೇನ, ‘ಜರಸಿಙ್ಗಾಲಸ್ಸ ದ್ವೇ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ದ್ವೇ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಜರಸಿಙ್ಗಾಲೋ ಭೋಜನಂ ಪಟಿಲಭಿತ್ವಾ ಅಜಿಗುಚ್ಛಮಾನೋ ಯಾವದತ್ಥಂ ಆಹರಯತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಭೋಜನಂ ಪಟಿಲಭಿತ್ವಾ ಅಜಿಗುಚ್ಛಮಾನೇನ ಸರೀರಯಾಪನಮತ್ತಮೇವ ಪರಿಭುಞ್ಜಿತಬ್ಬಂ। ಇದಂ, ಮಹಾರಾಜ, ಜರಸಿಙ್ಗಾಲಸ್ಸ ಪಠಮಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಮಹಾಕಸ್ಸಪೇನ –
6. ‘‘Bhante nāgasena, ‘jarasiṅgālassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, jarasiṅgālo bhojanaṃ paṭilabhitvā ajigucchamāno yāvadatthaṃ āharayati, evameva kho, mahārāja, yoginā yogāvacarena bhojanaṃ paṭilabhitvā ajigucchamānena sarīrayāpanamattameva paribhuñjitabbaṃ. Idaṃ, mahārāja, jarasiṅgālassa paṭhamaṃ aṅgaṃ gahetabbaṃ. Bhāsitampetaṃ, mahārāja, therena mahākassapena –
‘‘‘ಸೇನಾಸನಮ್ಹಾ ಓರುಯ್ಹ, ಗಾಮಂ ಪಿಣ್ಡಾಯ ಪಾವಿಸಿಂ।
‘‘‘Senāsanamhā oruyha, gāmaṃ piṇḍāya pāvisiṃ;
ಭುಞ್ಜನ್ತಂ ಪುರಿಸಂ ಕುಟ್ಠಿಂ, ಸಕ್ಕಚ್ಚ ನಂ ಉಪಟ್ಠಹಿಂ॥
Bhuñjantaṃ purisaṃ kuṭṭhiṃ, sakkacca naṃ upaṭṭhahiṃ.
‘‘‘ಸೋ ಮೇ ಪಕ್ಕೇನ ಹತ್ಥೇನ, ಆಲೋಪಂ ಉಪನಾಮಯಿ।
‘‘‘So me pakkena hatthena, ālopaṃ upanāmayi;
ಆಲೋಪಂ ಪಕ್ಖಿಪನ್ತಸ್ಸ, ಅಙ್ಗುಲಿಪೇತ್ಥ ಛಿಜ್ಜಥ॥
Ālopaṃ pakkhipantassa, aṅgulipettha chijjatha.
‘‘‘ಕುಟ್ಟಮೂಲಞ್ಚ ನಿಸ್ಸಾಯ, ಆಲೋಪಂ ತಂ ಅಭುಞ್ಜಿಸಂ।
‘‘‘Kuṭṭamūlañca nissāya, ālopaṃ taṃ abhuñjisaṃ;
ಭುಞ್ಜಮಾನೇ ವಾ ಭುತ್ತೇ ವಾ, ಜೇಗುಚ್ಛಂ ಮೇ ನ ವಿಜ್ಜತೀ’ತಿ॥
Bhuñjamāne vā bhutte vā, jegucchaṃ me na vijjatī’ti.
‘‘ಪುನ ಚಪರಂ, ಮಹಾರಾಜ, ಜರಸಿಙ್ಗಾಲೋ ಭೋಜನಂ ಪಟಿಲಭಿತ್ವಾ ನ ವಿಚಿನಾತಿ ಲೂಖಂ ವಾ ಪಣೀತಂ ವಾತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಭೋಜನಂ ಪಟಿಲಭಿತ್ವಾ ನ ವಿಚಿನಿತಬ್ಬಂ ‘ಲೂಖಂ ವಾ ಪಣೀತಂ ವಾ ಸಮ್ಪನ್ನಂ ವಾ ಅಸಮ್ಪನ್ನಂ ವಾ’ತಿ, ಯಥಾಲದ್ಧೇನ ಸನ್ತುಸ್ಸಿತಬ್ಬಂ। ಇದಂ, ಮಹಾರಾಜ, ಜರಸಿಙ್ಗಾಲಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಉಪಸೇನೇನ ವಙ್ಗನ್ತಪುತ್ತೇನ –
‘‘Puna caparaṃ, mahārāja, jarasiṅgālo bhojanaṃ paṭilabhitvā na vicināti lūkhaṃ vā paṇītaṃ vāti, evameva kho, mahārāja, yoginā yogāvacarena bhojanaṃ paṭilabhitvā na vicinitabbaṃ ‘lūkhaṃ vā paṇītaṃ vā sampannaṃ vā asampannaṃ vā’ti, yathāladdhena santussitabbaṃ. Idaṃ, mahārāja, jarasiṅgālassa dutiyaṃ aṅgaṃ gahetabbaṃ. Bhāsitampetaṃ, mahārāja, therena upasenena vaṅgantaputtena –
‘‘‘ಲೂಖೇನಪಿ ಚ ಸನ್ತುಸ್ಸೇ, ನಾಞ್ಞಂ ಪತ್ಥೇ ರಸಂ ಬಹುಂ।
‘‘‘Lūkhenapi ca santusse, nāññaṃ patthe rasaṃ bahuṃ;
ಜರಸಿಙ್ಗಾಲಙ್ಗಪಞ್ಹೋ ಛಟ್ಠೋ।
Jarasiṅgālaṅgapañho chaṭṭho.
Footnotes:
