| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೮. ಜಲೂಕಙ್ಗಪಞ್ಹೋ
8. Jalūkaṅgapañho
೮. ‘‘ಭನ್ತೇ ನಾಗಸೇನ, ‘ಜಲೂಕಾಯ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಜಲೂಕಾ ಯತ್ಥ ಅಲ್ಲೀಯತಿ, ತತ್ಥೇವ ದಳ್ಹಂ ಅಲ್ಲೀಯಿತ್ವಾ ರುಹಿರಂ ಪಿವತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯಸ್ಮಿಂ ಆರಮ್ಮಣೇ ಚಿತ್ತಂ ಅಲ್ಲೀಯತಿ, ತಂ ಆರಮ್ಮಣಂ ವಣ್ಣತೋ ಚ ಸಣ್ಠಾನತೋ ಚ ದಿಸತೋ ಚ ಓಕಾಸತೋ ಚ ಪರಿಚ್ಛೇದತೋ ಚ ಲಿಙ್ಗತೋ ಚ ನಿಮಿತ್ತತೋ ಚ ದಳ್ಹಂ ಪತಿಟ್ಠಾಪೇತ್ವಾ ತೇನೇವಾರಮ್ಮಣೇನ ವಿಮುತ್ತಿರಸಮಸೇಚನಕಂ ಪಾತಬ್ಬಂ। ಇದಂ, ಮಹಾರಾಜ, ಜಲೂಕಾಯ ಏಕಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಅನುರುದ್ಧೇನ –
8. ‘‘Bhante nāgasena, ‘jalūkāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, jalūkā yattha allīyati, tattheva daḷhaṃ allīyitvā ruhiraṃ pivati, evameva kho, mahārāja, yoginā yogāvacarena yasmiṃ ārammaṇe cittaṃ allīyati, taṃ ārammaṇaṃ vaṇṇato ca saṇṭhānato ca disato ca okāsato ca paricchedato ca liṅgato ca nimittato ca daḷhaṃ patiṭṭhāpetvā tenevārammaṇena vimuttirasamasecanakaṃ pātabbaṃ. Idaṃ, mahārāja, jalūkāya ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘ಪರಿಸುದ್ಧೇನ ಚಿತ್ತೇನ, ಆರಮ್ಮಣೇ ಪತಿಟ್ಠಾಯ।
‘‘‘Parisuddhena cittena, ārammaṇe patiṭṭhāya;
ತೇನ ಚಿತ್ತೇನ ಪಾತಬ್ಬಂ, ವಿಮುತ್ತಿರಸಮಸೇಚನ’’’ನ್ತಿ॥
Tena cittena pātabbaṃ, vimuttirasamasecana’’’nti.
ಜಲೂಕಙ್ಗಪಞ್ಹೋ ಅಟ್ಠಮೋ।
Jalūkaṅgapañho aṭṭhamo.
