| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৩. ইন্দ্রিযসুত্তং
3. Indriyasuttaṃ
৬২. ৰুত্তঞ্হেতং ভগৰতা, ৰুত্তমরহতাতি মে সুতং –
62. Vuttañhetaṃ bhagavatā, vuttamarahatāti me sutaṃ –
‘‘তীণিমানি, ভিক্খৰে, ইন্দ্রিযানি। কতমানি তীণি? অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি খো, ভিক্খৰে, তীণি ইন্দ্রিযানী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Tīṇimāni, bhikkhave, indriyāni. Katamāni tīṇi? Anaññātaññassāmītindriyaṃ, aññindriyaṃ, aññātāvindriyaṃ – imāni kho, bhikkhave, tīṇi indriyānī’’ti. Etamatthaṃ bhagavā avoca. Tatthetaṃ iti vuccati –
‘‘সেখস্স সিক্খমানস্স, উজুমগ্গানুসারিনো।
‘‘Sekhassa sikkhamānassa, ujumaggānusārino;
খযস্মিং পঠমং ঞাণং, ততো অঞ্ঞা অনন্তরা॥
Khayasmiṃ paṭhamaṃ ñāṇaṃ, tato aññā anantarā.
‘‘ততো অঞ্ঞা ৰিমুত্তস্স, ঞাণং ৰে হোতি তাদিনো।
‘‘Tato aññā vimuttassa, ñāṇaṃ ve hoti tādino;
অকুপ্পা মে ৰিমুত্তীতি, ভৰসংযোজনক্খযা॥
Akuppā me vimuttīti, bhavasaṃyojanakkhayā.
ধারেতি অন্তিমং দেহং, জেত্ৰা মারং সৰাহিনি’’ন্তি॥
Dhāreti antimaṃ dehaṃ, jetvā māraṃ savāhini’’nti.
অযম্পি অত্থো ৰুত্তো ভগৰতা, ইতি মে সুতন্তি। ততিযং।
Ayampi attho vutto bhagavatā, iti me sutanti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৩. ইন্দ্রিযসুত্তৰণ্ণনা • 3. Indriyasuttavaṇṇanā
