| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. যক্খসংযুত্তং
10. Yakkhasaṃyuttaṃ
১. ইন্দকসুত্তং
1. Indakasuttaṃ
২৩৫. এৰং মে সুতং – একং সমযং ভগৰা রাজগহে ৰিহরতি ইন্দকূটে পব্বতে, ইন্দকস্স যক্খস্স ভৰনে। অথ খো ইন্দকো যক্খো যেন ভগৰা তেনুপসঙ্কমি; উপসঙ্কমিত্ৰা ভগৰন্তং গাথায অজ্ঝভাসি –
235. Evaṃ me sutaṃ – ekaṃ samayaṃ bhagavā rājagahe viharati indakūṭe pabbate, indakassa yakkhassa bhavane. Atha kho indako yakkho yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘রূপং ন জীৰন্তি ৰদন্তি বুদ্ধা, কথং ন্ৰযং ৰিন্দতিমং সরীরং।
‘‘Rūpaṃ na jīvanti vadanti buddhā, kathaṃ nvayaṃ vindatimaṃ sarīraṃ;
কুতস্স অট্ঠীযকপিণ্ডমেতি, কথং ন্ৰযং সজ্জতি গব্ভরস্মি’’ন্তি॥
Kutassa aṭṭhīyakapiṇḍameti, kathaṃ nvayaṃ sajjati gabbharasmi’’nti.
‘‘পঠমং কললং হোতি, কললা হোতি অব্বুদং।
‘‘Paṭhamaṃ kalalaṃ hoti, kalalā hoti abbudaṃ;
অব্বুদা জাযতে পেসি, পেসি নিব্বত্ততী ঘনো।
Abbudā jāyate pesi, pesi nibbattatī ghano;
ঘনা পসাখা জাযন্তি, কেসা লোমা নখাপি চ॥
Ghanā pasākhā jāyanti, kesā lomā nakhāpi ca.
‘‘যঞ্চস্স ভুঞ্জতী মাতা, অন্নং পানঞ্চ ভোজনং।
‘‘Yañcassa bhuñjatī mātā, annaṃ pānañca bhojanaṃ;
তেন সো তত্থ যাপেতি, মাতুকুচ্ছিগতো নরো’’তি॥
Tena so tattha yāpeti, mātukucchigato naro’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. ইন্দকসুত্তৰণ্ণনা • 1. Indakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. ইন্দকসুত্তৰণ্ণনা • 1. Indakasuttavaṇṇanā
