| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. হিরীগারৰসুত্তং
2. Hirīgāravasuttaṃ
৩৩. ‘‘ইমং, ভিক্খৰে, রত্তিং অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেনাহং তেনুপসঙ্কমি; উপসঙ্কমিত্ৰা মং অভিৰাদেত্ৰা একমন্তং অট্ঠাসি। একমন্তং ঠিতা খো, ভিক্খৰে, সা দেৰতা মং এতদৰোচ – ‘সত্তিমে, ভন্তে, ধম্মা ভিক্খুনো অপরিহানায সংৰত্তন্তি। কতমে সত্ত? সত্থুগারৰতা, ধম্মগারৰতা, সঙ্ঘগারৰতা, সিক্খাগারৰতা, সমাধিগারৰতা, হিরিগারৰতা, ওত্তপ্পগারৰতা। ইমে খো, ভন্তে, সত্ত ধম্মা ভিক্খুনো অপরিহানায সংৰত্তন্তী’তি। ইদমৰোচ, ভিক্খৰে, সা দেৰতা। ইদং ৰত্ৰা মং অভিৰাদেত্ৰা পদক্খিণং কত্ৰা তত্থেৰন্তরধাযী’’তি।
33. ‘‘Imaṃ, bhikkhave, rattiṃ aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhitā kho, bhikkhave, sā devatā maṃ etadavoca – ‘sattime, bhante, dhammā bhikkhuno aparihānāya saṃvattanti. Katame satta? Satthugāravatā, dhammagāravatā, saṅghagāravatā, sikkhāgāravatā, samādhigāravatā, hirigāravatā, ottappagāravatā. Ime kho, bhante, satta dhammā bhikkhuno aparihānāya saṃvattantī’ti. Idamavoca, bhikkhave, sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyī’’ti.
‘‘সত্থুগরু ধম্মগরু, সঙ্ঘে চ তিব্বগারৰো।
‘‘Satthugaru dhammagaru, saṅghe ca tibbagāravo;
সমাধিগরু আতাপী, সিক্খায তিব্বগারৰো॥
Samādhigaru ātāpī, sikkhāya tibbagāravo.
‘‘হিরি ওত্তপ্পসম্পন্নো, সপ্পতিস্সো সগারৰো।
‘‘Hiri ottappasampanno, sappatisso sagāravo;
অভব্বো পরিহানায, নিব্বানস্সেৰ সন্তিকে’’তি॥ দুতিযং।
Abhabbo parihānāya, nibbānasseva santike’’ti. dutiyaṃ;
