| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. ஹீனாயாவத்தனபஞ்ஹோ
5. Hīnāyāvattanapañho
5. ‘‘ப⁴ந்தே நாக³ஸேன, மஹந்தங் இத³ங் ததா²க³தஸாஸனங் ஸாரங் வரங் ஸெட்ட²ங் பவரங் அனுபமங் பரிஸுத்³த⁴ங் விமலங் பண்ட³ரங் அனவஜ்ஜங், ந யுத்தங் கி³ஹிங் தாவதகங் பப்³ப³ஜேதுங், கி³ஹீ யேவ 1 ஏகஸ்மிங் ப²லே வினெத்வா யதா³ அபுனராவத்தீ ஹோதி ததா³ ஸோ பப்³பா³ஜேதப்³போ³. கிங் காரணா? இமே து³ஜ்ஜனா தாவ தத்த² ஸாஸனே விஸுத்³தே⁴ பப்³ப³ஜித்வா படினிவத்தித்வா ஹீனாயாவத்தந்தி, தேஸங் பச்சாக³மனேன அயங் மஹாஜனோ ஏவங் விசிந்தேதி ‘துச்ச²கங் வத போ⁴ ஏதங் ஸமணஸ்ஸ கோ³தமஸ்ஸ ஸாஸனங் ப⁴விஸ்ஸதி, யங் இமே படினிவத்தந்தீ’தி, இத³மெத்த² காரண’’ந்தி.
5. ‘‘Bhante nāgasena, mahantaṃ idaṃ tathāgatasāsanaṃ sāraṃ varaṃ seṭṭhaṃ pavaraṃ anupamaṃ parisuddhaṃ vimalaṃ paṇḍaraṃ anavajjaṃ, na yuttaṃ gihiṃ tāvatakaṃ pabbajetuṃ, gihī yeva 2 ekasmiṃ phale vinetvā yadā apunarāvattī hoti tadā so pabbājetabbo. Kiṃ kāraṇā? Ime dujjanā tāva tattha sāsane visuddhe pabbajitvā paṭinivattitvā hīnāyāvattanti, tesaṃ paccāgamanena ayaṃ mahājano evaṃ vicinteti ‘tucchakaṃ vata bho etaṃ samaṇassa gotamassa sāsanaṃ bhavissati, yaṃ ime paṭinivattantī’ti, idamettha kāraṇa’’nti.
‘‘யதா², மஹாராஜ, தளாகோ ப⁴வெய்ய ஸம்புண்ணஸுசிவிமலஸீதலஸலிலோ, அத² யோ கோசி கிலிட்டோ² மலகத்³த³மக³தோ தங் தளாகங் க³ந்த்வா அனஹாயித்வா கிலிட்டோ²வ படினிவத்தெய்ய, தத்த², மஹாராஜ, கதமங் ஜனோ க³ரஹெய்ய கிலிட்ட²ங் வா தளாகங் வா’’தி? ‘‘கிலிட்ட²ங், ப⁴ந்தே, ஜனோ க³ரஹெய்ய ‘அயங் தளாகங் க³ந்த்வா அனஹாயித்வா கிலிட்டோ²வ படினிவத்தோ, கிங் இமங் அனஹாயிதுகாமங் தளாகோ ஸயங் நஹாபெஸ்ஸதி, கோ தோ³ஸோ தளாகஸ்ஸா’தி. ஏவமேவ கோ², மஹாராஜ , ததா²க³தோ விமுத்திவரஸலிலஸம்புண்ணங் ஸத்³த⁴ம்மவரதளாகங் மாபேஸி ‘யே கேசி கிலேஸமலகிலிட்டா² ஸசேதனா பு³தா⁴, தே இத⁴ நஹாயித்வா ஸப்³ப³கிலேஸே பவாஹயிஸ்ஸந்தீ’தி. யதி³ கோசி தங் ஸத்³த⁴ம்மவரதளாகங் க³ந்த்வா அனஹாயித்வா ஸகிலேஸோவ படினிவத்தித்வா ஹீனாயாவத்ததி தங் யேவ ஜனோ க³ரஹிஸ்ஸதி ‘அயங் ஜினஸாஸனே பப்³ப³ஜித்வா தத்த² பதிட்ட²ங் அலபி⁴த்வா ஹீனாயாவத்தோ, கிங் இமங் அப்படிபஜ்ஜந்தங் ஜினஸாஸனங் ஸயங் போ³தெ⁴ஸ்ஸதி, கோ தோ³ஸோ ஜினஸாஸனஸ்ஸா’தி?
‘‘Yathā, mahārāja, taḷāko bhaveyya sampuṇṇasucivimalasītalasalilo, atha yo koci kiliṭṭho malakaddamagato taṃ taḷākaṃ gantvā anahāyitvā kiliṭṭhova paṭinivatteyya, tattha, mahārāja, katamaṃ jano garaheyya kiliṭṭhaṃ vā taḷākaṃ vā’’ti? ‘‘Kiliṭṭhaṃ, bhante, jano garaheyya ‘ayaṃ taḷākaṃ gantvā anahāyitvā kiliṭṭhova paṭinivatto, kiṃ imaṃ anahāyitukāmaṃ taḷāko sayaṃ nahāpessati, ko doso taḷākassā’ti. Evameva kho, mahārāja , tathāgato vimuttivarasalilasampuṇṇaṃ saddhammavarataḷākaṃ māpesi ‘ye keci kilesamalakiliṭṭhā sacetanā budhā, te idha nahāyitvā sabbakilese pavāhayissantī’ti. Yadi koci taṃ saddhammavarataḷākaṃ gantvā anahāyitvā sakilesova paṭinivattitvā hīnāyāvattati taṃ yeva jano garahissati ‘ayaṃ jinasāsane pabbajitvā tattha patiṭṭhaṃ alabhitvā hīnāyāvatto, kiṃ imaṃ appaṭipajjantaṃ jinasāsanaṃ sayaṃ bodhessati, ko doso jinasāsanassā’ti?
‘‘யதா² வா பன, மஹாராஜ, புரிஸோ பரமப்³யாதி⁴தோ ரோகு³ப்பத்திகுஸலங் அமோக⁴து⁴வஸித்³த⁴கம்மங் பி⁴ஸக்கங் ஸல்லகத்தங் தி³ஸ்வா அதிகிச்சா²பெத்வா ஸப்³யாதி⁴கோவ படினிவத்தெய்ய, தத்த² கதமங் ஜனோ க³ரஹெய்ய ஆதுரங் வா பி⁴ஸக்கங் வா’’தி? ‘‘ஆதுரங், ப⁴ந்தே, ஜனோ க³ரஹெய்ய ‘அயங் ரோகு³ப்பத்திகுஸலங் அமோக⁴து⁴வஸித்³த⁴கம்மங் பி⁴ஸக்கங் ஸல்லகத்தங் தி³ஸ்வா அதிகிச்சா²பெத்வா ஸப்³யாதி⁴கோவ படினிவத்தோ, கிங் இமங் அதிகிச்சா²பெந்தங் பி⁴ஸக்கோ ஸயங் திகிச்சி²ஸ்ஸதி, கோ தோ³ஸோ பி⁴ஸக்கஸ்ஸா’’’தி? ‘‘ஏவமேவ கோ², மஹாராஜ, ததா²க³தோ அந்தோஸாஸனஸமுக்³கே³ கேவலங் ஸகலகிலேஸப்³யாதி⁴வூபஸமனஸமத்த²ங் அமதோஸத⁴ங் பக்கி²பி, ‘யே கேசி கிலேஸப்³யாதி⁴பீளிதா ஸசேதனா பு³தா⁴, தே இமங் அமதோஸத⁴ங் பிவித்வா ஸப்³ப³கிலேஸப்³யாதி⁴ங் வூபஸமெஸ்ஸந்தீ’தி. யதி³ கோசி யங் அமதோஸத⁴ங் அபிவித்வா ஸகிலேஸோவ படினிவத்தித்வா ஹீனாயாவத்ததி, தங் யேவ ஜனோ க³ரஹிஸ்ஸதி ‘அயங் ஜினஸாஸனே பப்³ப³ஜித்வா தத்த² பதிட்ட²ங் அலபி⁴த்வா ஹீனாயாவத்தோ, கிங் இமங் அப்படிபஜ்ஜந்தங் ஜினஸாஸனங் ஸயங் போ³தெ⁴ஸ்ஸதி, கோ தோ³ஸோ ஜினஸாஸனஸ்ஸா’தி?
‘‘Yathā vā pana, mahārāja, puriso paramabyādhito roguppattikusalaṃ amoghadhuvasiddhakammaṃ bhisakkaṃ sallakattaṃ disvā atikicchāpetvā sabyādhikova paṭinivatteyya, tattha katamaṃ jano garaheyya āturaṃ vā bhisakkaṃ vā’’ti? ‘‘Āturaṃ, bhante, jano garaheyya ‘ayaṃ roguppattikusalaṃ amoghadhuvasiddhakammaṃ bhisakkaṃ sallakattaṃ disvā atikicchāpetvā sabyādhikova paṭinivatto, kiṃ imaṃ atikicchāpentaṃ bhisakko sayaṃ tikicchissati, ko doso bhisakkassā’’’ti? ‘‘Evameva kho, mahārāja, tathāgato antosāsanasamugge kevalaṃ sakalakilesabyādhivūpasamanasamatthaṃ amatosadhaṃ pakkhipi, ‘ye keci kilesabyādhipīḷitā sacetanā budhā, te imaṃ amatosadhaṃ pivitvā sabbakilesabyādhiṃ vūpasamessantī’ti. Yadi koci yaṃ amatosadhaṃ apivitvā sakilesova paṭinivattitvā hīnāyāvattati, taṃ yeva jano garahissati ‘ayaṃ jinasāsane pabbajitvā tattha patiṭṭhaṃ alabhitvā hīnāyāvatto, kiṃ imaṃ appaṭipajjantaṃ jinasāsanaṃ sayaṃ bodhessati, ko doso jinasāsanassā’ti?
‘‘யதா² வா பன, மஹாராஜ, சா²தோ புரிஸோ மஹதிமஹாபுஞ்ஞப⁴த்தபரிவேஸனங் க³ந்த்வா தங் ப⁴த்தங் அபு⁴ஞ்ஜித்வா சா²தோவ படினிவத்தெய்ய, தத்த² கதமங் ஜனோ க³ரஹெய்ய சா²தங் வா புஞ்ஞப⁴த்தங் வா’’தி? ‘‘சா²தங், ப⁴ந்தே, ஜனோ க³ரஹெய்ய ‘அயங் கு²தா³பீளிதோ புஞ்ஞப⁴த்தங் படிலபி⁴த்வா அபு⁴ஞ்ஜித்வா சா²தோவ படினிவத்தோ, கிங் இமஸ்ஸ அபு⁴ஞ்ஜந்தஸ்ஸ போ⁴ஜனங் ஸயங் முக²ங் பவிஸிஸ்ஸதி, கோ தோ³ஸோ போ⁴ஜனஸ்ஸா’’’தி? ‘‘ஏவமேவ கோ², மஹாராஜ, ததா²க³தோ அந்தோஸாஸனஸமுக்³கே³ பரமபவரங் ஸந்தங் ஸிவங் பணீதங் அமதங் பரமமது⁴ரங் காயக³தாஸதிபோ⁴ஜனங் ட²பேஸி ‘யே கேசி கிலேஸசா²தஜ்ஜ²த்தா தண்ஹாபரேதமானஸா ஸசேதனா பு³தா⁴, தே இமங் போ⁴ஜனங் பு⁴ஞ்ஜித்வா காமரூபாரூபப⁴வேஸு ஸப்³ப³ங் தண்ஹமபனெஸ்ஸந்தீ’தி. யதி³ கோசி தங் போ⁴ஜனங் அபு⁴ஞ்ஜித்வா தண்ஹாஸிதோவ படினிவத்தித்வா ஹீனாயாவத்ததி, தஞ்ஞேவ ஜனோ க³ரஹிஸ்ஸதி ‘அயங் ஜினஸாஸனே பப்³ப³ஜித்வா தத்த² பதிட்ட²ங் அலபி⁴த்வா ஹீனாயாவத்தோ, கிங் இமங் அப்படிபஜ்ஜந்தங் ஜினஸாஸனங் ஸயங் போ³தெ⁴ஸ்ஸஸி, கோ தோ³ஸோ ஜினஸாஸனஸ்ஸா’தி.
‘‘Yathā vā pana, mahārāja, chāto puriso mahatimahāpuññabhattaparivesanaṃ gantvā taṃ bhattaṃ abhuñjitvā chātova paṭinivatteyya, tattha katamaṃ jano garaheyya chātaṃ vā puññabhattaṃ vā’’ti? ‘‘Chātaṃ, bhante, jano garaheyya ‘ayaṃ khudāpīḷito puññabhattaṃ paṭilabhitvā abhuñjitvā chātova paṭinivatto, kiṃ imassa abhuñjantassa bhojanaṃ sayaṃ mukhaṃ pavisissati, ko doso bhojanassā’’’ti? ‘‘Evameva kho, mahārāja, tathāgato antosāsanasamugge paramapavaraṃ santaṃ sivaṃ paṇītaṃ amataṃ paramamadhuraṃ kāyagatāsatibhojanaṃ ṭhapesi ‘ye keci kilesachātajjhattā taṇhāparetamānasā sacetanā budhā, te imaṃ bhojanaṃ bhuñjitvā kāmarūpārūpabhavesu sabbaṃ taṇhamapanessantī’ti. Yadi koci taṃ bhojanaṃ abhuñjitvā taṇhāsitova paṭinivattitvā hīnāyāvattati, taññeva jano garahissati ‘ayaṃ jinasāsane pabbajitvā tattha patiṭṭhaṃ alabhitvā hīnāyāvatto, kiṃ imaṃ appaṭipajjantaṃ jinasāsanaṃ sayaṃ bodhessasi, ko doso jinasāsanassā’ti.
‘‘யதி³, மஹாராஜ, ததா²க³தோ கி³ஹிங் யேவ ஏகஸ்மிங் ப²லே வினீதங் பப்³பா³ஜெய்ய, ந நாமாயங் பப்³ப³ஜ்ஜா கிலேஸப்பஹானாய விஸுத்³தி⁴யா வா, நத்தி² பப்³ப³ஜ்ஜாய கரணீயங். யதா², மஹாராஜ, புரிஸோ அனேகஸதேன கம்மேன தளாகங் க²ணாபெத்வா பரிஸாய ஏவமனுஸ்ஸாவெய்ய ‘மா மே, பொ⁴ந்தோ, கேசி ஸங்கிலிட்டா² இமங் தளாகங் ஓதரத², பவாஹிதரஜோஜல்லா பரிஸுத்³தா⁴ விமலமட்டா² இமங் தளாகங் ஓதரதா²’தி. அபி நு கோ², மஹாராஜ, தேஸங் பவாஹிதரஜோஜல்லானங் பரிஸுத்³தா⁴னங் விமலமட்டா²னங் தேன தளாகேன கரணீயங் ப⁴வெய்யா’’தி? ‘‘ந ஹி, ப⁴ந்தே, யஸ்ஸத்தா²ய தே தங் தளாகங் உபக³ச்செ²ய்யுங், தங் அஞ்ஞத்ரேவ தேஸங் கதங் கரணீயங், கிங் தேஸங் தேன தளாகேனா’’தி? ‘‘ஏவமேவ கோ², மஹாராஜ, யதி³ ததா²க³தோ கி³ஹிங் யேவ ஏகஸ்மிங் ப²லே வினீதங் பப்³பா³ஜெய்ய, தத்தே²வ தேஸங் கதங் கரணீயங், கிங் தேஸங் பப்³ப³ஜ்ஜாய.
‘‘Yadi, mahārāja, tathāgato gihiṃ yeva ekasmiṃ phale vinītaṃ pabbājeyya, na nāmāyaṃ pabbajjā kilesappahānāya visuddhiyā vā, natthi pabbajjāya karaṇīyaṃ. Yathā, mahārāja, puriso anekasatena kammena taḷākaṃ khaṇāpetvā parisāya evamanussāveyya ‘mā me, bhonto, keci saṃkiliṭṭhā imaṃ taḷākaṃ otaratha, pavāhitarajojallā parisuddhā vimalamaṭṭhā imaṃ taḷākaṃ otarathā’ti. Api nu kho, mahārāja, tesaṃ pavāhitarajojallānaṃ parisuddhānaṃ vimalamaṭṭhānaṃ tena taḷākena karaṇīyaṃ bhaveyyā’’ti? ‘‘Na hi, bhante, yassatthāya te taṃ taḷākaṃ upagaccheyyuṃ, taṃ aññatreva tesaṃ kataṃ karaṇīyaṃ, kiṃ tesaṃ tena taḷākenā’’ti? ‘‘Evameva kho, mahārāja, yadi tathāgato gihiṃ yeva ekasmiṃ phale vinītaṃ pabbājeyya, tattheva tesaṃ kataṃ karaṇīyaṃ, kiṃ tesaṃ pabbajjāya.
‘‘யதா² வா பன, மஹாராஜ, ஸபா⁴வஇஸிப⁴த்திகோ ஸுதமந்தபத³த⁴ரோ அதக்கிகோ ரோகு³ப்பத்திகுஸலோ அமோக⁴து⁴வஸித்³த⁴கம்மோ பி⁴ஸக்கோ ஸல்லகத்தோ ஸப்³ப³ரோகூ³பஸமபே⁴ஸஜ்ஜங் ஸன்னிபாதெத்வா பரிஸாய ஏவமனுஸ்ஸாவெய்ய ‘மா கோ², பொ⁴ந்தோ , கேசி ஸப்³யாதி⁴கா மம ஸந்திகே உபக³ச்ச²த², அப்³யாதி⁴கா அரோகா³ மம ஸந்திகே உபக³ச்ச²தா²’தி. அபி நு கோ², மஹாராஜ, தேஸங் அப்³யாதி⁴கானங் அரோகா³னங் பரிபுண்ணானங் உத³க்³கா³னங் தேன பி⁴ஸக்கேன கரணீயங் ப⁴வெய்யா’’தி? ‘‘ந ஹி, ப⁴ந்தே, யஸ்ஸத்தா²ய தே தங் பி⁴ஸக்கங் ஸல்லகத்தங் உபக³ச்செ²ய்யுங், தங் அஞ்ஞத்ரேவ தேஸங் கதங் கரணீயங், கிங் தேஸங் தேன பி⁴ஸக்கேனா’’தி? ‘‘ஏவமேவ கோ², மஹாராஜ, யதி³ ததா²க³தோ கி³ஹிங் யேவ ஏகஸ்மிங் ப²லே வினீதங் பப்³பா³ஜெய்ய, தத்தே²வ தேஸங் கதங் கரணீயங், கிங் தேஸங் பப்³ப³ஜ்ஜாய?
‘‘Yathā vā pana, mahārāja, sabhāvaisibhattiko sutamantapadadharo atakkiko roguppattikusalo amoghadhuvasiddhakammo bhisakko sallakatto sabbarogūpasamabhesajjaṃ sannipātetvā parisāya evamanussāveyya ‘mā kho, bhonto , keci sabyādhikā mama santike upagacchatha, abyādhikā arogā mama santike upagacchathā’ti. Api nu kho, mahārāja, tesaṃ abyādhikānaṃ arogānaṃ paripuṇṇānaṃ udaggānaṃ tena bhisakkena karaṇīyaṃ bhaveyyā’’ti? ‘‘Na hi, bhante, yassatthāya te taṃ bhisakkaṃ sallakattaṃ upagaccheyyuṃ, taṃ aññatreva tesaṃ kataṃ karaṇīyaṃ, kiṃ tesaṃ tena bhisakkenā’’ti? ‘‘Evameva kho, mahārāja, yadi tathāgato gihiṃ yeva ekasmiṃ phale vinītaṃ pabbājeyya, tattheva tesaṃ kataṃ karaṇīyaṃ, kiṃ tesaṃ pabbajjāya?
‘‘யதா² வா பன, மஹாராஜ, கோசி புரிஸோ அனேகதா²லிபாகஸதங் போ⁴ஜனங் படியாதா³பெத்வா பரிஸாய ஏவமனுஸ்ஸாவெய்ய ‘மா மே, பொ⁴ந்தோ, கேசி சா²தா இமங் பரிவேஸனங் உபக³ச்ச²த², ஸுபு⁴த்தா தித்தா ஸுஹிதா தா⁴தா பீணிதா பரிபுண்ணா இமங் பரிவேஸனங் உபக³ச்ச²தா²’’தி. அபி நு கோ² மஹாராஜ, தேஸங் பு⁴த்தாவீனங் தித்தானங் ஸுஹிதானங் தா⁴தானங் பீணிதானங் பரிபுண்ணானங் தேன போ⁴ஜனேன கரணீயங் ப⁴வெய்யா’’தி? ‘‘ந ஹி, ப⁴ந்தே, யஸ்ஸத்தா²ய தே தங் பரிவேஸனங் உபக³ச்செ²ய்யுங், தங் அஞ்ஞத்ரேவ தேஸங் கதங் கரணீயங், கிங் தேஸங் தாய பரிவேஸனாயா’’தி? ‘‘ஏவமேவ கோ², மஹாராஜ, யதி³ ததா²க³தோ கி³ஹிங் யேவ ஏகஸ்மிங் ப²லே வினீதங் பப்³பா³ஜெய்ய, தத்தே²வ தேஸங் கதங் கரணீயங், கிங் தேஸங் பப்³ப³ஜ்ஜாய?
‘‘Yathā vā pana, mahārāja, koci puriso anekathālipākasataṃ bhojanaṃ paṭiyādāpetvā parisāya evamanussāveyya ‘mā me, bhonto, keci chātā imaṃ parivesanaṃ upagacchatha, subhuttā tittā suhitā dhātā pīṇitā paripuṇṇā imaṃ parivesanaṃ upagacchathā’’ti. Api nu kho mahārāja, tesaṃ bhuttāvīnaṃ tittānaṃ suhitānaṃ dhātānaṃ pīṇitānaṃ paripuṇṇānaṃ tena bhojanena karaṇīyaṃ bhaveyyā’’ti? ‘‘Na hi, bhante, yassatthāya te taṃ parivesanaṃ upagaccheyyuṃ, taṃ aññatreva tesaṃ kataṃ karaṇīyaṃ, kiṃ tesaṃ tāya parivesanāyā’’ti? ‘‘Evameva kho, mahārāja, yadi tathāgato gihiṃ yeva ekasmiṃ phale vinītaṃ pabbājeyya, tattheva tesaṃ kataṃ karaṇīyaṃ, kiṃ tesaṃ pabbajjāya?
‘‘அபி ச, மஹாராஜ, யே ஹீனாயாவத்தந்தி, தே ஜினஸாஸனஸ்ஸ பஞ்ச அதுலியே கு³ணே த³ஸ்ஸெந்தி. கதமே பஞ்ச? பூ⁴மிமஹந்தபா⁴வங் த³ஸ்ஸெந்தி, பரிஸுத்³த⁴விமலபா⁴வங் த³ஸ்ஸெந்தி, பாபேஹி அஸங்வாஸியபா⁴வங் த³ஸ்ஸெந்தி, து³ப்படிவேத⁴பா⁴வங் த³ஸ்ஸெந்தி, ப³ஹுஸங்வரரக்கி²யபா⁴வங் த³ஸ்ஸெந்தி.
‘‘Api ca, mahārāja, ye hīnāyāvattanti, te jinasāsanassa pañca atuliye guṇe dassenti. Katame pañca? Bhūmimahantabhāvaṃ dassenti, parisuddhavimalabhāvaṃ dassenti, pāpehi asaṃvāsiyabhāvaṃ dassenti, duppaṭivedhabhāvaṃ dassenti, bahusaṃvararakkhiyabhāvaṃ dassenti.
‘‘கத²ங் பூ⁴மிமஹந்தபா⁴வங் த³ஸ்ஸெந்தி? யதா², மஹாராஜ, புரிஸோ அத⁴னோ ஹீனஜச்சோ நிப்³பி³ஸேஸோ பு³த்³தி⁴பரிஹீனோ மஹாரஜ்ஜங் படிலபி⁴த்வா ந சிரஸ்ஸேவ பரிபததி பரித⁴ங்ஸதி பரிஹாயதி யஸதோ, ந ஸக்கோதி இஸ்ஸரியங் ஸந்தா⁴ரேதுங். கிங் காரணங் ? மஹந்தத்தா இஸ்ஸரியஸ்ஸ. ஏவமேவ கோ², மஹாராஜ, யே கேசி நிப்³பி³ஸேஸா அகதபுஞ்ஞா பு³த்³தி⁴பரிஹீனா ஜினஸாஸனே பப்³ப³ஜந்தி, தே தங் பப்³ப³ஜ்ஜங் பவருத்தமங் ஸந்தா⁴ரேதுங் அவிஸஹந்தா ந சிரஸ்ஸேவ ஜினஸாஸனா பரிபதித்வா பரித⁴ங்ஸித்வா பரிஹாயித்வா ஹீனாயாவத்தந்தி, ந ஸக்கொந்தி ஜினஸாஸனங் ஸந்தா⁴ரேதுங். கிங் காரணங்? மஹந்தத்தா ஜினஸாஸனபூ⁴மியா. ஏவங் பூ⁴மிமஹந்தபா⁴வங் த³ஸ்ஸெந்தி.
‘‘Kathaṃ bhūmimahantabhāvaṃ dassenti? Yathā, mahārāja, puriso adhano hīnajacco nibbiseso buddhiparihīno mahārajjaṃ paṭilabhitvā na cirasseva paripatati paridhaṃsati parihāyati yasato, na sakkoti issariyaṃ sandhāretuṃ. Kiṃ kāraṇaṃ ? Mahantattā issariyassa. Evameva kho, mahārāja, ye keci nibbisesā akatapuññā buddhiparihīnā jinasāsane pabbajanti, te taṃ pabbajjaṃ pavaruttamaṃ sandhāretuṃ avisahantā na cirasseva jinasāsanā paripatitvā paridhaṃsitvā parihāyitvā hīnāyāvattanti, na sakkonti jinasāsanaṃ sandhāretuṃ. Kiṃ kāraṇaṃ? Mahantattā jinasāsanabhūmiyā. Evaṃ bhūmimahantabhāvaṃ dassenti.
‘‘கத²ங் பரிஸுத்³த⁴விமலபா⁴வங் த³ஸ்ஸெந்தி? யதா², மஹாராஜ, வாரி பொக்க²ரபத்தே விகிரதி வித⁴மதி வித⁴ங்ஸேதி, ந டா²னமுபக³ச்ச²தி நூபலிம்பதி. கிங் காரணங்? பரிஸுத்³த⁴விமலத்தா பது³மஸ்ஸ. ஏவமேவ கோ², மஹாராஜ, யே கேசி ஸடா² கூடா வங்கா குடிலா விஸமதி³ட்டி²னோ ஜினஸாஸனே பப்³ப³ஜந்தி, தே பரிஸுத்³த⁴விமலனிக்கண்டகபண்ட³ரவரப்பவரஸாஸனதோ ந சிரஸ்ஸேவ விகிரித்வா வித⁴மித்வா வித⁴ங்ஸெத்வா அஸண்ட²ஹித்வா அனுபலிம்பித்வா ஹீனாயாவத்தந்தி. கிங் காரணங்? பரிஸுத்³த⁴விமலத்தா ஜினஸாஸனஸ்ஸ. ஏவங் பரிஸுத்³த⁴விமலபா⁴வங் த³ஸ்ஸெந்தி.
‘‘Kathaṃ parisuddhavimalabhāvaṃ dassenti? Yathā, mahārāja, vāri pokkharapatte vikirati vidhamati vidhaṃseti, na ṭhānamupagacchati nūpalimpati. Kiṃ kāraṇaṃ? Parisuddhavimalattā padumassa. Evameva kho, mahārāja, ye keci saṭhā kūṭā vaṅkā kuṭilā visamadiṭṭhino jinasāsane pabbajanti, te parisuddhavimalanikkaṇṭakapaṇḍaravarappavarasāsanato na cirasseva vikiritvā vidhamitvā vidhaṃsetvā asaṇṭhahitvā anupalimpitvā hīnāyāvattanti. Kiṃ kāraṇaṃ? Parisuddhavimalattā jinasāsanassa. Evaṃ parisuddhavimalabhāvaṃ dassenti.
‘‘கத²ங் பாபேஹி அஸங்வாஸியபா⁴வங் த³ஸ்ஸெந்தி? யதா², மஹாராஜ, மஹாஸமுத்³தோ³ ந மதேன குணபேன ஸங்வஸதி, யங் ஹோதி மஹாஸமுத்³தே³ மதங் குணபங், தங் கி²ப்பமேவ தீரங் உபனேதி த²லங் வா உஸ்ஸாரேதி. கிங் காரணங்? மஹாபூ⁴தானங் ப⁴வனத்தா மஹாஸமுத்³த³ஸ்ஸ. ஏவமேவ கோ², மஹாராஜ, யே கேசி பாபகா அஸங்வுதா அஹிரிகா அகிரியா ஓஸன்னவீரியா குஸீதா கிலிட்டா² து³ஜ்ஜனா மனுஸ்ஸா ஜினஸாஸனே பப்³ப³ஜந்தி, தே ந சிரஸ்ஸேவ ஜினஸாஸனதோ அரஹந்தவிமலகீ²ணாஸவமஹாபூ⁴தப⁴வனதோ நிக்க²மித்வா அஸங்வஸித்வா ஹீனாயாவத்தந்தி. கிங் காரணங்? பாபேஹி அஸங்வாஸியத்தா ஜினஸாஸனஸ்ஸ. ஏவங் பாபேஹி அஸங்வாஸியபா⁴வங் த³ஸ்ஸெந்தி.
‘‘Kathaṃ pāpehi asaṃvāsiyabhāvaṃ dassenti? Yathā, mahārāja, mahāsamuddo na matena kuṇapena saṃvasati, yaṃ hoti mahāsamudde mataṃ kuṇapaṃ, taṃ khippameva tīraṃ upaneti thalaṃ vā ussāreti. Kiṃ kāraṇaṃ? Mahābhūtānaṃ bhavanattā mahāsamuddassa. Evameva kho, mahārāja, ye keci pāpakā asaṃvutā ahirikā akiriyā osannavīriyā kusītā kiliṭṭhā dujjanā manussā jinasāsane pabbajanti, te na cirasseva jinasāsanato arahantavimalakhīṇāsavamahābhūtabhavanato nikkhamitvā asaṃvasitvā hīnāyāvattanti. Kiṃ kāraṇaṃ? Pāpehi asaṃvāsiyattā jinasāsanassa. Evaṃ pāpehi asaṃvāsiyabhāvaṃ dassenti.
‘‘கத²ங் து³ப்படிவேத⁴பா⁴வங் த³ஸ்ஸெந்தி? யதா², மஹாராஜ, யே கேசி அசே²கா அஸிக்கி²தா அஸிப்பினோ மதிவிப்பஹீனா இஸ்ஸாஸா 3 வாலக்³க³வேத⁴ங் அவிஸஹந்தா விக³ளந்தி பக்கமந்தி. கிங் காரணங்? ஸண்ஹஸுகு²மது³ப்படிவேத⁴த்தா வாலக்³க³ஸ்ஸ . ஏவமேவ கோ², மஹாராஜ, யே கேசி து³ப்பஞ்ஞா ஜளா ஏளமூகா³ மூள்ஹா த³ந்த⁴க³திகா ஜனா ஜினஸாஸனே பப்³ப³ஜந்தி, தே தங் பரமஸண்ஹஸுகு²மசதுஸச்சப்படிவேத⁴ங் படிவிஜ்ஜி²துங் அவிஸஹந்தா ஜினஸாஸனா விக³ளித்வா பக்கமித்வா ந சிரஸ்ஸேவ ஹீனாயாவத்தந்தி. கிங் காரணங்? பரமஸண்ஹஸுகு²மது³ப்படிவேத⁴தாய ஸச்சானங். ஏவங் து³ப்படிவேத⁴பா⁴வங் த³ஸ்ஸெந்தி.
‘‘Kathaṃ duppaṭivedhabhāvaṃ dassenti? Yathā, mahārāja, ye keci achekā asikkhitā asippino mativippahīnā issāsā 4 vālaggavedhaṃ avisahantā vigaḷanti pakkamanti. Kiṃ kāraṇaṃ? Saṇhasukhumaduppaṭivedhattā vālaggassa . Evameva kho, mahārāja, ye keci duppaññā jaḷā eḷamūgā mūḷhā dandhagatikā janā jinasāsane pabbajanti, te taṃ paramasaṇhasukhumacatusaccappaṭivedhaṃ paṭivijjhituṃ avisahantā jinasāsanā vigaḷitvā pakkamitvā na cirasseva hīnāyāvattanti. Kiṃ kāraṇaṃ? Paramasaṇhasukhumaduppaṭivedhatāya saccānaṃ. Evaṃ duppaṭivedhabhāvaṃ dassenti.
‘‘கத²ங் ப³ஹுஸங்வரரக்கி²யபா⁴வங் த³ஸ்ஸெந்தி? யதா², மஹாராஜ, கோசிதே³வ புரிஸோ மஹதிமஹாயுத்³த⁴பூ⁴மிமுபக³தோ பரஸேனாய தி³ஸாவிதி³ஸாஹி ஸமந்தா பரிவாரிதோ ஸத்திஹத்த²ங் ஜனமுபெந்தங் தி³ஸ்வா பீ⁴தோ ஓஸக்கதி படினிவத்ததி பலாயதி. கிங் காரணங்? ப³ஹுவித⁴யுத்³த⁴முக²ரக்க²ணப⁴யா. ஏவமேவ கோ², மஹாராஜ, யே கேசி பாபகா அஸங்வுதா அஹிரிகா அகிரியா அக்க²ந்தீ சபலா சலிதா இத்தரா பா³லஜனா ஜினஸாஸனே பப்³ப³ஜந்தி, தே ப³ஹுவித⁴ங் ஸிக்கா²பத³ங் பரிரக்கி²துங் அவிஸஹந்தா ஓஸக்கித்வா படினிவத்தித்வா பலாயித்வா ந சிரஸ்ஸேவ ஹீனாயாவத்தந்தி. கிங் காரணங்? ப³ஹுவித⁴ஸங்வரரக்கி²யபா⁴வத்தா ஜினஸாஸனஸ்ஸ. ஏவங் ப³ஹுவித⁴ஸங்வரரக்கி²யபா⁴வங் த³ஸ்ஸெந்தி.
‘‘Kathaṃ bahusaṃvararakkhiyabhāvaṃ dassenti? Yathā, mahārāja, kocideva puriso mahatimahāyuddhabhūmimupagato parasenāya disāvidisāhi samantā parivārito sattihatthaṃ janamupentaṃ disvā bhīto osakkati paṭinivattati palāyati. Kiṃ kāraṇaṃ? Bahuvidhayuddhamukharakkhaṇabhayā. Evameva kho, mahārāja, ye keci pāpakā asaṃvutā ahirikā akiriyā akkhantī capalā calitā ittarā bālajanā jinasāsane pabbajanti, te bahuvidhaṃ sikkhāpadaṃ parirakkhituṃ avisahantā osakkitvā paṭinivattitvā palāyitvā na cirasseva hīnāyāvattanti. Kiṃ kāraṇaṃ? Bahuvidhasaṃvararakkhiyabhāvattā jinasāsanassa. Evaṃ bahuvidhasaṃvararakkhiyabhāvaṃ dassenti.
‘‘த²லஜுத்தமேபி, மஹாராஜ, வஸ்ஸிகாகு³ம்பே³ கிமிவித்³தா⁴னி புப்பா²னி ஹொந்தி, தானி அங்குரானி ஸங்குடிதானி அந்தரா யேவ பரிபதந்தி, ந ச தேஸு பரிபதிதேஸு வஸ்ஸிகாகு³ம்போ³ ஹீளிதோ நாம ஹோதி. யானி தத்த² டி²தானி புப்பா²னி, தானி ஸம்மா க³ந்தே⁴ன தி³ஸாவிதி³ஸங் அபி⁴ப்³யாபெந்தி. ஏவமேவ கோ², மஹாராஜ, யே தே ஜினஸாஸனே பப்³ப³ஜித்வா ஹீனாயாவத்தந்தி, தே ஜினஸாஸனே கிமிவித்³தா⁴னி வஸ்ஸிகாபுப்பா²னி விய வண்ணக³ந்த⁴ரஹிதா நிப்³ப³ண்ணாகாரஸீலா அப⁴ப்³பா³ வேபுல்லாய, ந ச தேஸங் ஹீனாயாவத்தனேன ஜினஸாஸனங் ஹீளிதங் நாம ஹோதி. யே தத்த² டி²தா பி⁴க்கூ², தே ஸதே³வகங் லோகங் ஸீலவரக³ந்தே⁴ன அபி⁴ப்³யாபெந்தி.
‘‘Thalajuttamepi, mahārāja, vassikāgumbe kimividdhāni pupphāni honti, tāni aṅkurāni saṅkuṭitāni antarā yeva paripatanti, na ca tesu paripatitesu vassikāgumbo hīḷito nāma hoti. Yāni tattha ṭhitāni pupphāni, tāni sammā gandhena disāvidisaṃ abhibyāpenti. Evameva kho, mahārāja, ye te jinasāsane pabbajitvā hīnāyāvattanti, te jinasāsane kimividdhāni vassikāpupphāni viya vaṇṇagandharahitā nibbaṇṇākārasīlā abhabbā vepullāya, na ca tesaṃ hīnāyāvattanena jinasāsanaṃ hīḷitaṃ nāma hoti. Ye tattha ṭhitā bhikkhū, te sadevakaṃ lokaṃ sīlavaragandhena abhibyāpenti.
‘‘ஸாலீனம்பி, மஹாராஜ, நிராதங்கானங் லோஹிதகானங் அந்தரே கரும்ப⁴கங் நாம ஸாலிஜாதி உப்பஜ்ஜித்வா அந்தரா யேவ வினஸ்ஸதி, ந ச தஸ்ஸா வினட்ட²த்தா லோஹிதகஸாலீ ஹீளிதா நாம ஹொந்தி. யே தத்த² டி²தா ஸாலீ, தே ராஜூபபோ⁴கா³ ஹொந்தி. ஏவமேவ கோ², மஹாராஜ, யே தே ஜினஸாஸனே பப்³ப³ஜித்வா ஹீனாயாவத்தந்தி, தே லோஹிதகஸாலீனமந்தரே கரும்ப⁴கா விய ஜினஸாஸனே ந வட்³டி⁴த்வா வேபுல்லதங் ந பாபுணித்வா 5 அந்தரா யேவ ஹீனாயாவத்தந்தி, ந ச தேஸங் ஹீனாயாவத்தனேன ஜினஸாஸனங் ஹீளிதங் நாம ஹோதி. யே தத்த² டி²தா பி⁴க்கூ² தே அரஹத்தஸ்ஸ அனுச்ச²விகா ஹொந்தி.
‘‘Sālīnampi, mahārāja, nirātaṅkānaṃ lohitakānaṃ antare karumbhakaṃ nāma sālijāti uppajjitvā antarā yeva vinassati, na ca tassā vinaṭṭhattā lohitakasālī hīḷitā nāma honti. Ye tattha ṭhitā sālī, te rājūpabhogā honti. Evameva kho, mahārāja, ye te jinasāsane pabbajitvā hīnāyāvattanti, te lohitakasālīnamantare karumbhakā viya jinasāsane na vaḍḍhitvā vepullataṃ na pāpuṇitvā 6 antarā yeva hīnāyāvattanti, na ca tesaṃ hīnāyāvattanena jinasāsanaṃ hīḷitaṃ nāma hoti. Ye tattha ṭhitā bhikkhū te arahattassa anucchavikā honti.
‘‘காமத³த³ஸ்ஸாபி , மஹாராஜ, மணிரதனஸ்ஸ ஏகதே³ஸங் 7 கக்கஸங் உப்பஜ்ஜதி, ந ச தத்த² கக்கஸுப்பன்னத்தா மணிரதனங் ஹீளிதங் நாம ஹோதி. யங் தத்த² பரிஸுத்³த⁴ங் மணிரதனஸ்ஸ, தங் ஜனஸ்ஸ ஹாஸகரங் ஹோதி. ஏவமேவ கோ², மஹாராஜ, யே தே ஜினஸாஸனே பப்³ப³ஜித்வா ஹீனாயாவத்தந்தி, கக்கஸா தே ஜினஸாஸனே பபடிகா, ந ச தேஸங் ஹீனாயாவத்தனேன ஜினஸாஸனங் ஹீளிதங் நாம ஹோதி. யே தத்த² டி²தா பி⁴க்கூ², தே தே³வமனுஸ்ஸானங் ஹாஸஜனகா ஹொந்தி.
‘‘Kāmadadassāpi , mahārāja, maṇiratanassa ekadesaṃ 8 kakkasaṃ uppajjati, na ca tattha kakkasuppannattā maṇiratanaṃ hīḷitaṃ nāma hoti. Yaṃ tattha parisuddhaṃ maṇiratanassa, taṃ janassa hāsakaraṃ hoti. Evameva kho, mahārāja, ye te jinasāsane pabbajitvā hīnāyāvattanti, kakkasā te jinasāsane papaṭikā, na ca tesaṃ hīnāyāvattanena jinasāsanaṃ hīḷitaṃ nāma hoti. Ye tattha ṭhitā bhikkhū, te devamanussānaṃ hāsajanakā honti.
‘‘ஜாதிஸம்பன்னஸ்ஸபி, மஹாராஜ, லோஹிதசந்த³னஸ்ஸ ஏகதே³ஸங் பூதிகங் ஹோதி அப்பக³ந்த⁴ங். ந தேன லோஹிதசந்த³னங் ஹீளிதங் நாம ஹோதி. யங் தத்த² அபூதிகங் ஸுக³ந்த⁴ங், தங் ஸமந்தா விதூ⁴பேதி அபி⁴ப்³யாபேதி. ஏவமேவ கோ², மஹாராஜ, யே தே ஜினஸாஸனே பப்³ப³ஜித்வா ஹீனாயாவத்தந்தி, தே லோஹிதசந்த³னஸாரந்தரே பூதிகதே³ஸமிவ ச²ட்³ட³னீயா ஜினஸாஸனே, ந ச தேஸங் ஹீனாயாவத்தனேன ஜினஸாஸனங் ஹீளிதங் நாம ஹோதி. யே தத்த² டி²தா பி⁴க்கூ², தே ஸதே³வகங் லோகங் ஸீலவரசந்த³னக³ந்தே⁴ன அனுலிம்பயந்தீ’’தி.
‘‘Jātisampannassapi, mahārāja, lohitacandanassa ekadesaṃ pūtikaṃ hoti appagandhaṃ. Na tena lohitacandanaṃ hīḷitaṃ nāma hoti. Yaṃ tattha apūtikaṃ sugandhaṃ, taṃ samantā vidhūpeti abhibyāpeti. Evameva kho, mahārāja, ye te jinasāsane pabbajitvā hīnāyāvattanti, te lohitacandanasārantare pūtikadesamiva chaḍḍanīyā jinasāsane, na ca tesaṃ hīnāyāvattanena jinasāsanaṃ hīḷitaṃ nāma hoti. Ye tattha ṭhitā bhikkhū, te sadevakaṃ lokaṃ sīlavaracandanagandhena anulimpayantī’’ti.
‘‘ஸாது⁴, ப⁴ந்தே நாக³ஸேன, தேன தேன அனுச்ச²விகேன தேன தேன ஸதி³ஸேன காரணேன நிரவஜ்ஜமனுபாபிதங் ஜினஸாஸனங் ஸெட்ட²பா⁴வேன பரிதீ³பிதங், ஹீனாயாவத்தமானாபி தே ஜினஸாஸனஸ்ஸ ஸெட்ட²பா⁴வங் யேவ பரிதீ³பெந்தீ’’தி.
‘‘Sādhu, bhante nāgasena, tena tena anucchavikena tena tena sadisena kāraṇena niravajjamanupāpitaṃ jinasāsanaṃ seṭṭhabhāvena paridīpitaṃ, hīnāyāvattamānāpi te jinasāsanassa seṭṭhabhāvaṃ yeva paridīpentī’’ti.
ஹீனாயாவத்தனபஞ்ஹோ பஞ்சமோ.
Hīnāyāvattanapañho pañcamo.
Footnotes:
