| Library / Tipiṭaka / তিপিটক • Tipiṭaka / চূল়নিদ্দেস-অট্ঠকথা • Cūḷaniddesa-aṭṭhakathā |
৮. হেমকমাণৰসুত্তনিদ্দেসৰণ্ণনা
8. Hemakamāṇavasuttaniddesavaṇṇanā
৫৩. অট্ঠমে হেমকসুত্তে – যে মে পুব্বে ৰিযাকংসূতি যে বাৰরিআদযো পুব্বে ময্হং সকং লদ্ধিং ৰিযাকংসু। হুরং গোতমসাসনাতি গোতমসাসনতো পুব্বতরং। সব্বং তং তক্কৰড্ঢনন্তি সব্বং তং কামৰিতক্কাদিৰড্ঢনং।
53. Aṭṭhame hemakasutte – ye me pubbe viyākaṃsūti ye bāvariādayo pubbe mayhaṃ sakaṃ laddhiṃ viyākaṃsu. Huraṃ gotamasāsanāti gotamasāsanato pubbataraṃ. Sabbaṃ taṃ takkavaḍḍhananti sabbaṃ taṃ kāmavitakkādivaḍḍhanaṃ.
যে চঞ্ঞে তস্স আচরিযাতি যে চ অঞ্ঞে তস্স বাৰরিযস্স আচারে সিক্খাপকা আচরিযা। তে সকং দিট্ঠিন্তি তে আচরিযা অত্তনো দিট্ঠিং। সকং খন্তিন্তি অত্তনো খমনং। সকং রুচিন্তি অত্তনো রোচনং। ৰিতক্কৰড্ঢনন্তি কামৰিতক্কাদিৰিতক্কানং উপ্পাদনং পুনপ্পুনং পৰত্তনং। সঙ্কপ্পৰড্ঢনন্তি কামসঙ্কপ্পাদীনং ৰড্ঢনং। ইমানি দ্ৰে পদানি সব্বসঙ্গাহিকৰসেন ৰুত্তানি। ইদানি কামৰিতক্কাদিকে সরূপতো দস্সেতুং ‘‘কামৰিতক্কৰড্ঢন’’ন্তিআদিনা নযেন নৰৰিতক্কে দস্সেসি।
Ye caññe tassa ācariyāti ye ca aññe tassa bāvariyassa ācāre sikkhāpakā ācariyā. Te sakaṃ diṭṭhinti te ācariyā attano diṭṭhiṃ. Sakaṃ khantinti attano khamanaṃ. Sakaṃ rucinti attano rocanaṃ. Vitakkavaḍḍhananti kāmavitakkādivitakkānaṃ uppādanaṃ punappunaṃ pavattanaṃ. Saṅkappavaḍḍhananti kāmasaṅkappādīnaṃ vaḍḍhanaṃ. Imāni dve padāni sabbasaṅgāhikavasena vuttāni. Idāni kāmavitakkādike sarūpato dassetuṃ ‘‘kāmavitakkavaḍḍhana’’ntiādinā nayena navavitakke dassesi.
৫৪. তণ্হানিগ্ঘাতনন্তি তণ্হাৰিনাসনং।
54.Taṇhānigghātananti taṇhāvināsanaṃ.
৫৫-৬. অথস্স ভগৰা তং ধম্মং আচিক্খন্তো ‘‘ইধা’’তি গাথাদ্ৰযমাহ। তত্থ এতদঞ্ঞায যে সতাতি এতং নিব্বানং পদমচ্চুতং ‘‘সব্বে সঙ্খারা অনিচ্চা’’তিআদিনা (ধ॰ প॰ ২৭৭; থেরগা॰ ৬৭৬; কথা॰ ৭৫৩) নযেন ৰিপস্সন্তা অনুপুব্বেন জানিত্ৰা যে কাযানুপস্সনাসতিআদীহি সতা। দিট্ঠধম্মাভিনিব্বুতাতি ৰিদিতধম্মত্তা দিট্ঠধম্মা চ রাগাদিনিব্বানেন চ অভিনিব্বুতা। সেসং সব্বত্থ পাকটমেৰ।
55-6. Athassa bhagavā taṃ dhammaṃ ācikkhanto ‘‘idhā’’ti gāthādvayamāha. Tattha etadaññāya ye satāti etaṃ nibbānaṃ padamaccutaṃ ‘‘sabbe saṅkhārā aniccā’’tiādinā (dha. pa. 277; theragā. 676; kathā. 753) nayena vipassantā anupubbena jānitvā ye kāyānupassanāsatiādīhi satā. Diṭṭhadhammābhinibbutāti viditadhammattā diṭṭhadhammā ca rāgādinibbānena ca abhinibbutā. Sesaṃ sabbattha pākaṭameva.
এৰং ভগৰা ইদম্পি সুত্তং অরহত্তনিকূটেনেৰ দেসেসি, দেসনাপরিযোসানে চ পুব্বসদিসো এৰ ধম্মাভিসমযো অহোসীতি।
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
সদ্ধম্মপ্পজ্জোতিকায চূল়নিদ্দেস-অট্ঠকথায
Saddhammappajjotikāya cūḷaniddesa-aṭṭhakathāya
হেমকমাণৰসুত্তনিদ্দেসৰণ্ণনা নিট্ঠিতা।
Hemakamāṇavasuttaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চূল়নিদ্দেসপাল়ি • Cūḷaniddesapāḷi
৮. হেমকমাণৰপুচ্ছা • 8. Hemakamāṇavapucchā
৮. হেমকমাণৰপুচ্ছানিদ্দেসো • 8. Hemakamāṇavapucchāniddeso
