| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৮. হেমকমাণৰপুচ্ছা
8. Hemakamāṇavapucchā
১০৯০.
1090.
‘‘যে মে পুব্বে ৰিযাকংসু, (ইচ্চাযস্মা হেমকো)
‘‘Ye me pubbe viyākaṃsu, (iccāyasmā hemako)
হুরং গোতমসাসনা।
Huraṃ gotamasāsanā;
ইচ্চাসি ইতি ভৰিস্সতি, সব্বং তং ইতিহীতিহং।
Iccāsi iti bhavissati, sabbaṃ taṃ itihītihaṃ;
সব্বং তং তক্কৰড্ঢনং, নাহং তত্থ অভিরমিং॥
Sabbaṃ taṃ takkavaḍḍhanaṃ, nāhaṃ tattha abhiramiṃ.
১০৯১.
1091.
‘‘ত্ৰঞ্চ মে ধম্মমক্খাহি, তণ্হানিগ্ঘাতনং মুনি।
‘‘Tvañca me dhammamakkhāhi, taṇhānigghātanaṃ muni;
যং ৰিদিত্ৰা সতো চরং, তরে লোকে ৰিসত্তিকং’’॥
Yaṃ viditvā sato caraṃ, tare loke visattikaṃ’’.
১০৯২.
1092.
‘‘ইধ দিট্ঠসুতমুতৰিঞ্ঞাতেসু, পিযরূপেসু হেমক।
‘‘Idha diṭṭhasutamutaviññātesu, piyarūpesu hemaka;
ছন্দরাগৰিনোদনং, নিব্বানপদমচ্চুতং॥
Chandarāgavinodanaṃ, nibbānapadamaccutaṃ.
১০৯৩.
1093.
‘‘এতদঞ্ঞায যে সতা, দিট্ঠধম্মাভিনিব্বুতা।
‘‘Etadaññāya ye satā, diṭṭhadhammābhinibbutā;
উপসন্তা চ তে সদা, তিণ্ণা লোকে ৰিসত্তিক’’ন্তি॥
Upasantā ca te sadā, tiṇṇā loke visattika’’nti.
হেমকমাণৰপুচ্ছা অট্ঠমা নিট্ঠিতা।
Hemakamāṇavapucchā aṭṭhamā niṭṭhitā.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ৮. হেমকসুত্তৰণ্ণনা • 8. Hemakasuttavaṇṇanā
