| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၂. ဟတ္ထိရာဇဝဏ္ဏသုတ္တဝဏ္ဏနာ
2. Hatthirājavaṇṇasuttavaṇṇanā
၁၃၈. ဒုတိယေ ရတ္တန္ဓကာရတိမိသာယန္တိ ရတ္တိံ အန္ဓဘာဝကာရကေ မဟာတမေ စတုရင္ဂေ တမသိ။ အဗ္ဘောကာသေ နိသိန္နော ဟောတီတိ ဂန္ဓကုဋိတော နိက္ခမိတ္ဝာ စင္ကမနကောဋိယံ ပာသာဏဖလကေ မဟာစီဝရံ သီသေ ဌပေတ္ဝာ ပဓာနံ ပရိဂ္ဂဏ္ဟမာနော နိသိန္နော ဟောတိ။
138. Dutiye rattandhakāratimisāyanti rattiṃ andhabhāvakārake mahātame caturaṅge tamasi. Abbhokāse nisinno hotīti gandhakuṭito nikkhamitvā caṅkamanakoṭiyaṃ pāsāṇaphalake mahācīvaraṃ sīse ṭhapetvā padhānaṃ pariggaṇhamāno nisinno hoti.
နနု စ တထာဂတသ္သ အဘာဝိတော ဝာ မဂ္ဂော, အပ္ပဟီနာ ဝာ ကိလေသာ, အပ္ပဋိဝိဒ္ဓံ ဝာ အကုပ္ပံ, အသစ္ဆိကတော ဝာ နိရောဓော နတ္ထိ, ကသ္မာ ဧဝမကာသီတိ? အနာဂတေ ကုလပုတ္တာနံ အင္ကုသတ္ထံ။ ‘‘အနာဂတေ ဟိ ကုလပုတ္တာ မယာ ဂတမဂ္ဂံ အာဝဇ္ဇိတ္ဝာ အဗ္ဘောကာသဝာသံ ဝသိတဗ္ဗံ မညမာနာ ပဓာနကမ္မံ ကရိသ္သန္တီ’’တိ သမ္ပသ္သမာနော သတ္ထာ ဧဝမကာသိ။ မဟာတိ မဟန္တော။ အရိဋ္ဌကောတိ ကာဠကော။ မဏီတိ ပာသာဏော။ ဧဝမသ္သ သီသံ ဟောတီတိ ဧဝရူပံ တသ္သ ကာဠဝဏ္ဏံ ကူဋာဂာရပ္ပမာဏံ မဟာပာသာဏသဒိသံ သီသံ ဟောတိ။
Nanu ca tathāgatassa abhāvito vā maggo, appahīnā vā kilesā, appaṭividdhaṃ vā akuppaṃ, asacchikato vā nirodho natthi, kasmā evamakāsīti? Anāgate kulaputtānaṃ aṅkusatthaṃ. ‘‘Anāgate hi kulaputtā mayā gatamaggaṃ āvajjitvā abbhokāsavāsaṃ vasitabbaṃ maññamānā padhānakammaṃ karissantī’’ti sampassamāno satthā evamakāsi. Mahāti mahanto. Ariṭṭhakoti kāḷako. Maṇīti pāsāṇo. Evamassa sīsaṃ hotīti evarūpaṃ tassa kāḷavaṇṇaṃ kūṭāgārappamāṇaṃ mahāpāsāṇasadisaṃ sīsaṃ hoti.
သုဘာသုဘန္တိ ဒီဃမဒ္ဓာနံ သံသရန္တော သုန္ဒရာသုန္ဒရံ ဝဏ္ဏံ ကတ္ဝာ အာဂတောသီတိ ဝဒတိ။ အထ ဝာ သံသရန္တိ သံသရန္တော အာဂစ္ဆန္တော။ ဒီဃမဒ္ဓာနန္တိ ဝသဝတ္တိဋ္ဌာနတော ယာဝ ဥရုဝေလာယ ဒီဃမဂ္ဂံ, ပုရေ ဗောဓာယ ဝာ ဆဗ္ဗသ္သာနိ ဒုက္ကရကာရိကသမယသင္ခာတံ ဒီဃကာလံ။ ဝဏ္ဏံ ကတ္ဝာ သုဘာသုဘန္တိ သုန္ဒရဉ္စ အသုန္ဒရဉ္စ နာနပ္ပကာရံ ဝဏ္ဏံ ကတ္ဝာ အနေကဝာရံ မမ သန္တိကံ အာဂတောသီတိ အတ္ထော။ သော ကိရ ဝဏ္ဏော နာမ နတ္ထိ, ယေန ဝဏ္ဏေန မာရော ဝိဘိံသကတ္ထာယ ဘဂဝတော သန္တိကံ န အာဂတပုဗ္ဗော။ တေန တံ ဘဂဝာ ဧဝမာဟ။ အလံ တေ တေနာတိ အလံ တုယ္ဟံ ဧတေန မာရဝိဘိံသာကာရဒသ္သနဗ္ယာပာရေန။ ဒုတိယံ။
Subhāsubhanti dīghamaddhānaṃ saṃsaranto sundarāsundaraṃ vaṇṇaṃ katvā āgatosīti vadati. Atha vā saṃsaranti saṃsaranto āgacchanto. Dīghamaddhānanti vasavattiṭṭhānato yāva uruvelāya dīghamaggaṃ, pure bodhāya vā chabbassāni dukkarakārikasamayasaṅkhātaṃ dīghakālaṃ. Vaṇṇaṃ katvā subhāsubhanti sundarañca asundarañca nānappakāraṃ vaṇṇaṃ katvā anekavāraṃ mama santikaṃ āgatosīti attho. So kira vaṇṇo nāma natthi, yena vaṇṇena māro vibhiṃsakatthāya bhagavato santikaṃ na āgatapubbo. Tena taṃ bhagavā evamāha. Alaṃ te tenāti alaṃ tuyhaṃ etena māravibhiṃsākāradassanabyāpārena. Dutiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. ဟတ္ထိရာဇဝဏ္ဏသုတ္တံ • 2. Hatthirājavaṇṇasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ဟတ္ထိရာဇဝဏ္ဏသုတ္တဝဏ္ဏနာ • 2. Hatthirājavaṇṇasuttavaṇṇanā
