| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
২. গুহট্ঠকসুত্তং
2. Guhaṭṭhakasuttaṃ
৭৭৮.
778.
সত্তো গুহাযং বহুনাভিছন্নো, তিট্ঠং নরো মোহনস্মিং পগাল়্হো।
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
দূরে ৰিৰেকা হি তথাৰিধো সো, কামা হি লোকে ন হি সুপ্পহাযা॥
Dūre vivekā hi tathāvidho so, kāmā hi loke na hi suppahāyā.
৭৭৯.
779.
ইচ্ছানিদানা ভৰসাতবদ্ধা, তে দুপ্পমুঞ্চা ন হি অঞ্ঞমোক্খা।
Icchānidānā bhavasātabaddhā, te duppamuñcā na hi aññamokkhā;
পচ্ছা পুরে ৰাপি অপেক্খমানা, ইমেৰ কামে পুরিমেৰ জপ্পং॥
Pacchā pure vāpi apekkhamānā, imeva kāme purimeva jappaṃ.
৭৮০.
780.
কামেসু গিদ্ধা পসুতা পমূল়্হা, অৰদানিযা তে ৰিসমে নিৰিট্ঠা।
Kāmesu giddhā pasutā pamūḷhā, avadāniyā te visame niviṭṭhā;
দুক্খূপনীতা পরিদেৰযন্তি, কিংসূ ভৰিস্সাম ইতো চুতাসে॥
Dukkhūpanītā paridevayanti, kiṃsū bhavissāma ito cutāse.
৭৮১.
781.
তস্মা হি সিক্খেথ ইধেৰ জন্তু, যং কিঞ্চি জঞ্ঞা ৰিসমন্তি লোকে।
Tasmā hi sikkhetha idheva jantu, yaṃ kiñci jaññā visamanti loke;
ন তস্স হেতূ ৰিসমং চরেয্য, অপ্পঞ্হিদং জীৰিতমাহু ধীরা॥
Na tassa hetū visamaṃ careyya, appañhidaṃ jīvitamāhu dhīrā.
৭৮২.
782.
পস্সামি লোকে পরিফন্দমানং, পজং ইমং তণ্হগতং ভৰেসু।
Passāmi loke pariphandamānaṃ, pajaṃ imaṃ taṇhagataṃ bhavesu;
হীনা নরা মচ্চুমুখে লপন্তি, অৰীততণ্হাসে ভৰাভৰেসু॥
Hīnā narā maccumukhe lapanti, avītataṇhāse bhavābhavesu.
৭৮৩.
783.
মমাযিতে পস্সথ ফন্দমানে, মচ্ছেৰ অপ্পোদকে খীণসোতে।
Mamāyite passatha phandamāne, maccheva appodake khīṇasote;
এতম্পি দিস্ৰা অমমো চরেয্য, ভৰেসু আসত্তিমকুব্বমানো॥
Etampi disvā amamo careyya, bhavesu āsattimakubbamāno.
৭৮৪.
784.
উভোসু অন্তেসু ৰিনেয্য ছন্দং, ফস্সং পরিঞ্ঞায অনানুগিদ্ধো।
Ubhosu antesu vineyya chandaṃ, phassaṃ pariññāya anānugiddho;
যদত্তগরহী তদকুব্বমানো, ন লিপ্পতী 1 দিট্ঠসুতেসু ধীরো॥
Yadattagarahī tadakubbamāno, na lippatī 2 diṭṭhasutesu dhīro.
৭৮৫.
785.
সঞ্ঞং পরিঞ্ঞা ৰিতরেয্য ওঘং, পরিগ্গহেসু মুনি নোপলিত্তো।
Saññaṃ pariññā vitareyya oghaṃ, pariggahesu muni nopalitto;
অব্বূল়্হসল্লো চরমপ্পমত্তো, নাসীসতী 3 লোকমিমং পরঞ্চাতি॥
Abbūḷhasallo caramappamatto, nāsīsatī 4 lokamimaṃ parañcāti.
গুহট্ঠকসুত্তং দুতিযং নিট্ঠিতং।
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ২. গুহট্ঠকসুত্তৰণ্ণনা • 2. Guhaṭṭhakasuttavaṇṇanā
