| Library / Tipiṭaka / திபிடக • Tipiṭaka / பு³த்³த⁴வங்ஸபாளி • Buddhavaṃsapāḷi |
27. கோ³தமபு³த்³த⁴வங்ஸோ
27. Gotamabuddhavaṃso
1.
1.
பதா⁴னங் பத³ஹித்வான, பத்தோ ஸம்போ³தி⁴முத்தமங்.
Padhānaṃ padahitvāna, patto sambodhimuttamaṃ.
2.
2.
ப்³ரஹ்முனா யாசிதோ ஸந்தோ, த⁴ம்மசக்கங் பவத்தயிங்;
Brahmunā yācito santo, dhammacakkaṃ pavattayiṃ;
அட்டா²ரஸன்னங் கோடீனங், பட²மாபி⁴ஸமயோ அஹு.
Aṭṭhārasannaṃ koṭīnaṃ, paṭhamābhisamayo ahu.
3.
3.
ததோ பரஞ்ச தே³ஸெந்தே, நரதே³வஸமாக³மே;
Tato parañca desente, naradevasamāgame;
க³ணனாய ந வத்தப்³போ³, து³தியாபி⁴ஸமயோ அஹு.
Gaṇanāya na vattabbo, dutiyābhisamayo ahu.
4.
4.
இதே⁴வாஹங் ஏதரஹி, ஓவதி³ங் மம அத்ரஜங்;
Idhevāhaṃ etarahi, ovadiṃ mama atrajaṃ;
க³ணனாய ந வத்தப்³போ³, ததியாபி⁴ஸமயோ அஹு.
Gaṇanāya na vattabbo, tatiyābhisamayo ahu.
5.
5.
ஏகோஸி ஸன்னிபாதோ மே, ஸாவகானங் மஹேஸினங்;
Ekosi sannipāto me, sāvakānaṃ mahesinaṃ;
அட்³ட⁴தேளஸஸதானங், பி⁴க்கூ²னாஸி ஸமாக³மோ.
Aḍḍhateḷasasatānaṃ, bhikkhūnāsi samāgamo.
6.
6.
விரோசமானோ விமலோ, பி⁴க்கு²ஸங்க⁴ஸ்ஸ மஜ்ஜ²கோ³;
Virocamāno vimalo, bhikkhusaṅghassa majjhago;
த³தா³மி பத்தி²தங் ஸப்³ப³ங், மணீவ ஸப்³ப³காமதோ³.
Dadāmi patthitaṃ sabbaṃ, maṇīva sabbakāmado.
7.
7.
ப²லமாகங்க²மானானங் , ப⁴வச்ச²ந்த³ஜஹேஸினங்;
Phalamākaṅkhamānānaṃ , bhavacchandajahesinaṃ;
சதுஸச்சங் பகாஸேமி, அனுகம்பாய பாணினங்.
Catusaccaṃ pakāsemi, anukampāya pāṇinaṃ.
8.
8.
த³ஸவீஸஸஹஸ்ஸானங், த⁴ம்மாபி⁴ஸமயோ அஹு;
Dasavīsasahassānaṃ, dhammābhisamayo ahu;
ஏகத்³வின்னங் அபி⁴ஸமயோ, க³ணனாதோ அஸங்கி²யோ.
Ekadvinnaṃ abhisamayo, gaṇanāto asaṅkhiyo.
9.
9.
வித்தா²ரிகங் பா³ஹுஜஞ்ஞங், இத்³த⁴ங் பீ²தங் ஸுபு²ல்லிதங்;
Vitthārikaṃ bāhujaññaṃ, iddhaṃ phītaṃ suphullitaṃ;
இத⁴ மய்ஹங் ஸக்யமுனினோ, ஸாஸனங் ஸுவிஸோதி⁴தங்.
Idha mayhaṃ sakyamunino, sāsanaṃ suvisodhitaṃ.
10.
10.
அனாஸவா வீதராகா³, ஸந்தசித்தா ஸமாஹிதா;
Anāsavā vītarāgā, santacittā samāhitā;
பி⁴க்கூ²னேகஸதா ஸப்³பே³, பரிவாரெந்தி மங் ஸதா³.
Bhikkhūnekasatā sabbe, parivārenti maṃ sadā.
11.
11.
இதா³னி யே ஏதரஹி, ஜஹந்தி மானுஸங் ப⁴வங்;
Idāni ye etarahi, jahanti mānusaṃ bhavaṃ;
அப்பத்தமானஸா ஸேகா², தே பி⁴க்கூ² விஞ்ஞுக³ரஹிதா.
Appattamānasā sekhā, te bhikkhū viññugarahitā.
12.
12.
அரியஞ்ச ஸங்தோ²மயந்தா, ஸதா³ த⁴ம்மரதா ஜனா;
Ariyañca saṃthomayantā, sadā dhammaratā janā;
பு³ஜ்ஜி²ஸ்ஸந்தி ஸதிமந்தோ, ஸங்ஸாரஸரிதங் க³தா.
Bujjhissanti satimanto, saṃsārasaritaṃ gatā.
13.
13.
நக³ரங் கபிலவத்து² மே, ராஜா ஸுத்³தோ⁴த³னோ பிதா;
Nagaraṃ kapilavatthu me, rājā suddhodano pitā;
மய்ஹங் ஜனெத்திகா மாதா, மாயாதே³வீதி வுச்சதி.
Mayhaṃ janettikā mātā, māyādevīti vuccati.
14.
14.
ஏகூனதிங்ஸவஸ்ஸானி , அகா³ரங் அஜ்ஜ²ஹங் வஸிங்;
Ekūnatiṃsavassāni , agāraṃ ajjhahaṃ vasiṃ;
ரம்மோ ஸுரம்மோ ஸுப⁴கோ, தயோ பாஸாத³முத்தமா.
Rammo surammo subhako, tayo pāsādamuttamā.
15.
15.
சத்தாரீஸஸஹஸ்ஸானி, நாரியோ ஸமலங்கதா;
Cattārīsasahassāni, nāriyo samalaṅkatā;
ப⁴த்³த³கஞ்சனா நாம நாரீ, ராஹுலோ நாம அத்ரஜோ.
Bhaddakañcanā nāma nārī, rāhulo nāma atrajo.
16.
16.
நிமித்தே சதுரோ தி³ஸ்வா, அஸ்ஸயானேன நிக்க²மிங்;
Nimitte caturo disvā, assayānena nikkhamiṃ;
ச²ப்³ப³ஸ்ஸங் பதா⁴னசாரங், அசரிங் து³க்கரங் அஹங்.
Chabbassaṃ padhānacāraṃ, acariṃ dukkaraṃ ahaṃ.
17.
17.
பா³ராணஸியங் இஸிபதனே, சக்கங் பவத்திதங் மயா;
Bārāṇasiyaṃ isipatane, cakkaṃ pavattitaṃ mayā;
அஹங் கோ³தமஸம்பு³த்³தோ⁴, ஸரணங் ஸப்³ப³பாணினங்.
Ahaṃ gotamasambuddho, saraṇaṃ sabbapāṇinaṃ.
18.
18.
கோலிதோ உபதிஸ்ஸோ ச, த்³வே பி⁴க்கூ² அக்³க³ஸாவகா;
Kolito upatisso ca, dve bhikkhū aggasāvakā;
ஆனந்தோ³ நாமுபட்டா²கோ, ஸந்திகாவசரோ மம;
Ānando nāmupaṭṭhāko, santikāvacaro mama;
கே²மா உப்பலவண்ணா ச, பி⁴க்கு²னீ அக்³க³ஸாவிகா.
Khemā uppalavaṇṇā ca, bhikkhunī aggasāvikā.
19.
19.
சித்தோ ஹத்தா²ளவகோ ச, அக்³கு³பட்டா²குபாஸகா;
Citto hatthāḷavako ca, aggupaṭṭhākupāsakā;
நந்த³மாதா ச உத்தரா, அக்³கு³பட்டி²குபாஸிகா.
Nandamātā ca uttarā, aggupaṭṭhikupāsikā.
20.
20.
அஹங் அஸ்ஸத்த²மூலம்ஹி, பத்தோ ஸம்போ³தி⁴முத்தமங்;
Ahaṃ assatthamūlamhi, patto sambodhimuttamaṃ;
ப்³யாமப்பபா⁴ ஸதா³ மய்ஹங், ஸோளஸஹத்த²முக்³க³தா.
Byāmappabhā sadā mayhaṃ, soḷasahatthamuggatā.
21.
21.
அப்பங் வஸ்ஸஸதங் ஆயு, இதா³னேதரஹி விஜ்ஜதி;
Appaṃ vassasataṃ āyu, idānetarahi vijjati;
தாவதா திட்ட²மானோஹங், தாரேமி ஜனதங் ப³ஹுங்.
Tāvatā tiṭṭhamānohaṃ, tāremi janataṃ bahuṃ.
22.
22.
ட²பயித்வான த⁴ம்முக்கங், பச்சி²மங் ஜனபோ³த⁴னங்;
Ṭhapayitvāna dhammukkaṃ, pacchimaṃ janabodhanaṃ;
அஹம்பி நசிரஸ்ஸேவ, ஸத்³தி⁴ங் ஸாவகஸங்க⁴தோ;
Ahampi nacirasseva, saddhiṃ sāvakasaṅghato;
இதே⁴வ பரினிப்³பி³ஸ்ஸங், அக்³கீ³ வாஹாரஸங்க²யா.
Idheva parinibbissaṃ, aggī vāhārasaṅkhayā.
23.
23.
அயஞ்ச கு³ணதா⁴ரணோ தே³ஹோ, த்³வத்திங்ஸவரலக்க²ணவிசித்தோ.
Ayañca guṇadhāraṇo deho, dvattiṃsavaralakkhaṇavicitto.
24.
24.
த³ஸ தி³ஸா பபா⁴ஸெத்வா, ஸதரங்ஸீவ ச²ப்பபா⁴;
Dasa disā pabhāsetvā, sataraṃsīva chappabhā;
ஸப்³ப³ங் தமந்தரஹிஸ்ஸந்தி, நனு ரித்தா ஸப்³ப³ஸங்கா²ராதி.
Sabbaṃ tamantarahissanti, nanu rittā sabbasaṅkhārāti.
கோ³தமஸ்ஸ ப⁴க³வதோ வங்ஸோ பஞ்சவீஸதிமோ.
Gotamassa bhagavato vaṃso pañcavīsatimo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / பு³த்³த⁴வங்ஸ-அட்ட²கதா² • Buddhavaṃsa-aṭṭhakathā / 27. கோ³தமபு³த்³த⁴வங்ஸவண்ணனா • 27. Gotamabuddhavaṃsavaṇṇanā
