| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៧. គិរិមានន្ទត្ថេរអបទានវណ្ណនា
7. Girimānandattheraapadānavaṇṇanā
សត្តមាបទានេ ភរិយា មេ កាលង្កតាតិអាទិកំ អាយស្មតោ គិរិមានន្ទត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សុមេធស្ស ភគវតោ កាលេ កុលគេហេ និព្ពត្តោ វយប្បត្តោ ឃរាវាសំ សណ្ឋបេត្វា វសន្តោ អត្តនោ ភរិយាយ ច បុត្តេ ច កាលង្កតេ សោកសល្លសមប្បិតោ អរញ្ញំ បវិសិត្វា បវត្តផលភោជនោ រុក្ខមូលេ វិហាសិ។ តទា សុមេធោ ភគវា តស្សានុកម្បាយ តត្ថ គន្ត្វា ធម្មំ ទេសេត្វា សោកសល្លំ អព្ពូឡ្ហេសិ ។ សោ ធម្មំ សុត្វា បសន្នមានសោ សុគន្ធបុប្ផេហិ ភគវន្តំ បូជេត្វា បញ្ចបតិដ្ឋិតេន វន្ទិត្វា សិរសិ អញ្ជលិំ កត្វា អភិត្ថវិ។
Sattamāpadāne bhariyā me kālaṅkatātiādikaṃ āyasmato girimānandattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle kulagehe nibbatto vayappatto gharāvāsaṃ saṇṭhapetvā vasanto attano bhariyāya ca putte ca kālaṅkate sokasallasamappito araññaṃ pavisitvā pavattaphalabhojano rukkhamūle vihāsi. Tadā sumedho bhagavā tassānukampāya tattha gantvā dhammaṃ desetvā sokasallaṃ abbūḷhesi . So dhammaṃ sutvā pasannamānaso sugandhapupphehi bhagavantaṃ pūjetvā pañcapatiṭṭhitena vanditvā sirasi añjaliṃ katvā abhitthavi.
សោ តេន បុញ្ញេន ទេវមនុស្សេសុ សំសរន្តោ ឧភយត្ថ សុខំ អនុភវិត្វា ឥមស្មិំ ពុទ្ធុប្បាទេ រាជគហេ ពិម្ពិសាររញ្ញោ បុរោហិតស្ស បុត្តោ ហុត្វា និព្ពត្តិ, គិរិមានន្ទោតិស្ស នាមំ អហោសិ។ សោ វិញ្ញុតំ បត្វា សត្ថុ រាជគហាគមនេ ពុទ្ធានុភាវំ ទិស្វា បដិលទ្ធសទ្ធោ បព្ពជិត្វា សមណធម្មំ ករោន្តោ កតិបយំ ទិវសំ គាមកាវាសេ វសិត្វា សត្ថារំ វន្ទិតុំ រាជគហំ អគមាសិ។ ពិម្ពិសារមហារាជា តស្ស អាគមនំ សុត្វា តំ ឧបសង្កមិត្វា ‘‘ឥធេវ, ភន្តេ, វសថ, អហំ ចតូហិ បច្ចយេហិ ឧបដ្ឋហាមី’’តិ សម្បវារេត្វា គតោបិ ពហុកិច្ចត្តា តំ ន សរិ។ ‘‘ថេរោ អព្ភោកាសេយេវ វសតី’’តិ។ ទេវតា ថេរស្ស តេមនភយេន វស្សធារំ វារេសុំ។ រាជា អវស្សនការណំ ឧបធារេត្វា ញត្វា ថេរស្ស កុដិកំ ការាបេសិ។ ថេរោ កុដិកាយំ វសន្តោ សេនាសនសប្បាយលាភេន ចិត្តសមាធានំ លភិត្វា វីរិយសមតំ យោជេត្វា វិបស្សនំ ឧស្សុក្កាបេត្វា អរហត្តំ បាបុណិ។
So tena puññena devamanussesu saṃsaranto ubhayattha sukhaṃ anubhavitvā imasmiṃ buddhuppāde rājagahe bimbisārarañño purohitassa putto hutvā nibbatti, girimānandotissa nāmaṃ ahosi. So viññutaṃ patvā satthu rājagahāgamane buddhānubhāvaṃ disvā paṭiladdhasaddho pabbajitvā samaṇadhammaṃ karonto katipayaṃ divasaṃ gāmakāvāse vasitvā satthāraṃ vandituṃ rājagahaṃ agamāsi. Bimbisāramahārājā tassa āgamanaṃ sutvā taṃ upasaṅkamitvā ‘‘idheva, bhante, vasatha, ahaṃ catūhi paccayehi upaṭṭhahāmī’’ti sampavāretvā gatopi bahukiccattā taṃ na sari. ‘‘Thero abbhokāseyeva vasatī’’ti. Devatā therassa temanabhayena vassadhāraṃ vāresuṃ. Rājā avassanakāraṇaṃ upadhāretvā ñatvā therassa kuṭikaṃ kārāpesi. Thero kuṭikāyaṃ vasanto senāsanasappāyalābhena cittasamādhānaṃ labhitvā vīriyasamataṃ yojetvā vipassanaṃ ussukkāpetvā arahattaṃ pāpuṇi.
៤១៩. សោ អរហត្តំ បត្វា អត្តនោ បុព្ពកម្មំ សរិត្វា សញ្ជាតសោមនស្សោ បុព្ពចរិតាបទានំ បកាសេន្តោ ភរិយា មេ កាលង្កតាតិអាទិមាហ។ តំ ភគវតោ និវេទនញ្ច ភគវតា កតានុសាសនញ្ច មគ្គំ ផលាធិគមាបទានញ្ច បាឋានុសារេន សុវិញ្ញេយ្យមេវាតិ។
419. So arahattaṃ patvā attano pubbakammaṃ saritvā sañjātasomanasso pubbacaritāpadānaṃ pakāsento bhariyā me kālaṅkatātiādimāha. Taṃ bhagavato nivedanañca bhagavatā katānusāsanañca maggaṃ phalādhigamāpadānañca pāṭhānusārena suviññeyyamevāti.
គិរិមានន្ទត្ថេរអបទានវណ្ណនា សមត្តា។
Girimānandattheraapadānavaṇṇanā samattā.
អដ្ឋមនវមទសមាបទានានិ ឧត្តានត្ថានេវាតិ។
Aṭṭhamanavamadasamāpadānāni uttānatthānevāti.
ចត្តាលីសមវគ្គវណ្ណនា សមត្តា។
Cattālīsamavaggavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៧. គិរិមានន្ទត្ថេរអបទានំ • 7. Girimānandattheraapadānaṃ
