| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೭. ಘಟಿಕಾರಪಞ್ಹೋ
7. Ghaṭikārapañho
೭. ‘‘ಭನ್ತೇ ನಾಗಸೇನ, ಭಾಸಿತಮ್ಪೇತಂ ಭಗವತಾ ‘ಘಟಿಕಾರಸ್ಸ ಕುಮ್ಭಕಾರಸ್ಸ ಆವೇಸನಂ ಸಬ್ಬಂ ತೇಮಾಸಂ ಆಕಾಸಚ್ಛದನಂ ಅಟ್ಠಾಸಿ, ನ ದೇವೋತಿವಸ್ಸೀ’ತಿ। ಪುನ ಚ ಭಣಿತಂ ‘ಕಸ್ಸಪಸ್ಸ ತಥಾಗತಸ್ಸ 1 ಕುಟಿ ಓವಸ್ಸತೀ’ತಿ। ಕಿಸ್ಸ ಪನ, ಭನ್ತೇ ನಾಗಸೇನ, ತಥಾಗತಸ್ಸ ಏವಮುಸ್ಸನ್ನಕುಸಲಮೂಲಸ್ಸ 2 ಕುಟಿ ಓವಸ್ಸತಿ, ತಥಾಗತಸ್ಸ ನಾಮ ಸೋ ಆನುಭಾವೋ ಇಚ್ಛಿತಬ್ಬೋ? ಯದಿ, ಭನ್ತೇ ನಾಗಸೇನ, ಘಟಿಕಾರಸ್ಸ ಕುಮ್ಭಕಾರಸ್ಸ ಆವೇಸನಂ ಅನೋವಸ್ಸಂ ಆಕಾಸಚ್ಛದನಂ ಅಹೋಸಿ, ತೇನ ಹಿ ‘ತಥಾಗತಸ್ಸ ಕುಟಿ ಓವಸ್ಸತೀ’ತಿ ಯಂ ವಚನಂ, ತಂ ಮಿಚ್ಛಾ। ಯದಿ ತಥಾಗತಸ್ಸ ಕುಟಿ ಓವಸ್ಸತಿ, ತೇನ ಹಿ ‘ಘಟಿಕಾರಸ್ಸ ಕುಮ್ಭಕಾರಸ್ಸ ಆವೇಸನಂ ಅನೋವಸ್ಸಕಂ ಅಹೋಸಿ ಆಕಾಸಚ್ಛದನ’ನ್ತಿ ತಮ್ಪಿ ವಚನಂ ಮಿಚ್ಛಾ। ಅಯಮ್ಪಿ ಉಭತೋ ಕೋಟಿಕೋ ಪಞ್ಹೋ ತವಾನುಪ್ಪತ್ತೋ, ಸೋ ತಯಾ ನಿಬ್ಬಾಹಿತಬ್ಬೋ’’ತಿ।
7. ‘‘Bhante nāgasena, bhāsitampetaṃ bhagavatā ‘ghaṭikārassa kumbhakārassa āvesanaṃ sabbaṃ temāsaṃ ākāsacchadanaṃ aṭṭhāsi, na devotivassī’ti. Puna ca bhaṇitaṃ ‘kassapassa tathāgatassa 3 kuṭi ovassatī’ti. Kissa pana, bhante nāgasena, tathāgatassa evamussannakusalamūlassa 4 kuṭi ovassati, tathāgatassa nāma so ānubhāvo icchitabbo? Yadi, bhante nāgasena, ghaṭikārassa kumbhakārassa āvesanaṃ anovassaṃ ākāsacchadanaṃ ahosi, tena hi ‘tathāgatassa kuṭi ovassatī’ti yaṃ vacanaṃ, taṃ micchā. Yadi tathāgatassa kuṭi ovassati, tena hi ‘ghaṭikārassa kumbhakārassa āvesanaṃ anovassakaṃ ahosi ākāsacchadana’nti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘ಭಾಸಿತಮ್ಪೇತಂ, ಮಹಾರಾಜ, ಭಗವತಾ ‘ಘಟಿಕಾರಸ್ಸ ಕುಮ್ಭಕಾರಸ್ಸ ಆವೇಸನಂ ಸಬ್ಬಂ ತೇಮಾಸಂ ಆಕಾಸಚ್ಛದನಂ ಅಟ್ಠಾಸಿ, ನ ದೇವೋತಿವಸ್ಸೀ’ತಿ। ಭಣಿತಞ್ಚ ‘ಕಸ್ಸಪಸ್ಸ ತಥಾಗತಸ್ಸ ಕುಟಿ ಓವಸ್ಸತೀ’ತಿ। ಘಟಿಕಾರೋ, ಮಹಾರಾಜ, ಕುಮ್ಭಕಾರೋ ಸೀಲವಾ ಕಲ್ಯಾಣಧಮ್ಮೋ ಉಸ್ಸನ್ನಕುಸಲಮೂಲೋ ಅನ್ಧೇ ಜಿಣ್ಣೇ ಮಾತಾಪಿತರೋ ಪೋಸೇತಿ, ತಸ್ಸ ಅಸಮ್ಮುಖಾ ಅನಾಪುಚ್ಛಾಯೇವಸ್ಸ ಘರೇ ತಿಣಂ ಹರಿತ್ವಾ ಭಗವತೋ ಕುಟಿಂ ಛಾದೇಸುಂ, ಸೋ ತೇನ ತಿಣಹರಣೇನ ಅಕಮ್ಪಿತಂ ಅಸಞ್ಚಲಿತಂ ಸುಸಣ್ಠಿತಂ ವಿಪುಲಮಸಮಂ ಪೀತಿಂ ಪಟಿಲಭತಿ, ಭಿಯ್ಯೋ ಸೋಮನಸ್ಸಞ್ಚ ಅತುಲಂ ಉಪ್ಪಾದೇಸಿ ‘ಅಹೋ ವತ ಮೇ ಭಗವಾ ಲೋಕುತ್ತಮೋ ಸುವಿಸ್ಸತ್ಥೋ’ತಿ, ತೇನ ತಸ್ಸ ದಿಟ್ಠಧಮ್ಮಿಕೋ ವಿಪಾಕೋ ನಿಬ್ಬತ್ತೋ। ನ ಹಿ, ಮಹಾರಾಜ, ತಥಾಗತೋ ತಾವತಕೇನ ವಿಕಾರೇನ ಚಲತಿ।
‘‘Bhāsitampetaṃ, mahārāja, bhagavatā ‘ghaṭikārassa kumbhakārassa āvesanaṃ sabbaṃ temāsaṃ ākāsacchadanaṃ aṭṭhāsi, na devotivassī’ti. Bhaṇitañca ‘kassapassa tathāgatassa kuṭi ovassatī’ti. Ghaṭikāro, mahārāja, kumbhakāro sīlavā kalyāṇadhammo ussannakusalamūlo andhe jiṇṇe mātāpitaro poseti, tassa asammukhā anāpucchāyevassa ghare tiṇaṃ haritvā bhagavato kuṭiṃ chādesuṃ, so tena tiṇaharaṇena akampitaṃ asañcalitaṃ susaṇṭhitaṃ vipulamasamaṃ pītiṃ paṭilabhati, bhiyyo somanassañca atulaṃ uppādesi ‘aho vata me bhagavā lokuttamo suvissattho’ti, tena tassa diṭṭhadhammiko vipāko nibbatto. Na hi, mahārāja, tathāgato tāvatakena vikārena calati.
‘‘ಯಥಾ, ಮಹಾರಾಜ, ಸಿನೇರು ಗಿರಿರಾಜಾ ಅನೇಕಸತಸಹಸ್ಸವಾತಸಮ್ಪಹಾರೇನಪಿ ನ ಕಮ್ಪತಿ ನ ಚಲತಿ, ಮಹೋದಧಿ ವರಪ್ಪವರಸಾಗರೋ ಅನೇಕಸತನಹುತಮಹಾಗಙ್ಗಾಸತಸಹಸ್ಸೇಹಿಪಿ ನ ಪೂರತಿ ನ ವಿಕಾರಮಾಪಜ್ಜತಿ, ಏವಮೇವ ಖೋ, ಮಹಾರಾಜ, ತಥಾಗತೋ ನ ತಾವತಕೇನ ವಿಕಾರೇನ ಚಲತಿ।
‘‘Yathā, mahārāja, sineru girirājā anekasatasahassavātasampahārenapi na kampati na calati, mahodadhi varappavarasāgaro anekasatanahutamahāgaṅgāsatasahassehipi na pūrati na vikāramāpajjati, evameva kho, mahārāja, tathāgato na tāvatakena vikārena calati.
‘‘ಯಂ ಪನ, ಮಹಾರಾಜ, ತಥಾಗತಸ್ಸ ಕುಟಿ ಓವಸ್ಸತಿ, ತಂ ಮಹತೋ ಜನಕಾಯಸ್ಸ ಅನುಕಮ್ಪಾಯ। ದ್ವೇಮೇ, ಮಹಾರಾಜ, ಅತ್ಥವಸೇ ಸಮ್ಪಸ್ಸಮಾನಾ ತಥಾಗತಾ ಸಯಂ ನಿಮ್ಮಿತಂ ಪಚ್ಚಯಂ ನಪ್ಪಟಿಸೇವನ್ತಿ, ‘ಅಯಂ ಅಗ್ಗದಕ್ಖಿಣೇಯ್ಯೋ ಸತ್ಥಾ’ತಿ ಭಗವತೋ ಪಚ್ಚಯಂ ದತ್ವಾ ದೇವಮನುಸ್ಸಾ ಸಬ್ಬದುಗ್ಗತಿತೋ ಪರಿಮುಚ್ಚಿಸ್ಸನ್ತೀತಿ, ದಸ್ಸೇತ್ವಾ ವುತ್ತಿಂ ಪರಿಯೇಸನ್ತೀತಿ ‘ಮಾ ಅಞ್ಞೇ ಉಪವದೇಯ್ಯು’ನ್ತಿ। ಇಮೇ ದ್ವೇ ಅತ್ಥವಸೇ ಸಮ್ಪಸ್ಸಮಾನಾ ತಥಾಗತಾ ಸಯಂ ನಿಮ್ಮಿತಂ ಪಚ್ಚಯಂ ನಪ್ಪಟಿಸೇವನ್ತಿ। ಯದಿ, ಮಹಾರಾಜ, ಸಕ್ಕೋ ವಾ ತಂ ಕುಟಿಂ ಅನೋವಸ್ಸಂ ಕರೇಯ್ಯ ಬ್ರಹ್ಮಾ ವಾ ಸಯಂ ವಾ, ಸಾವಜ್ಜಂ ಭವೇಯ್ಯ ತಂ ಯೇವ ಕರಣಂ 5 ಸದೋಸಂ ಸನಿಗ್ಗಹಂ, ಇಮೇ ವಿಭೂತಂ 6 ಕತ್ವಾ ಲೋಕಂ ಸಮ್ಮೋಹೇನ್ತಿ ಅಧಿಕತಂ ಕರೋನ್ತೀತಿ, ತಸ್ಮಾ ತಂ ಕರಣಂ ವಜ್ಜನೀಯಂ। ನ, ಮಹಾರಾಜ, ತಥಾಗತಾ ವತ್ಥುಂ ಯಾಚನ್ತಿ, ತಾಯ ಅವತ್ಥುಯಾಚನಾಯ ಅಪರಿಭಾಸಿಯಾ ಭವನ್ತೀ’’ತಿ। ‘‘ಸಾಧು, ಭನ್ತೇ ನಾಗಸೇನ, ಏವಮೇತಂ ತಥಾ ಸಮ್ಪಟಿಚ್ಛಾಮೀ’’ತಿ।
‘‘Yaṃ pana, mahārāja, tathāgatassa kuṭi ovassati, taṃ mahato janakāyassa anukampāya. Dveme, mahārāja, atthavase sampassamānā tathāgatā sayaṃ nimmitaṃ paccayaṃ nappaṭisevanti, ‘ayaṃ aggadakkhiṇeyyo satthā’ti bhagavato paccayaṃ datvā devamanussā sabbaduggatito parimuccissantīti, dassetvā vuttiṃ pariyesantīti ‘mā aññe upavadeyyu’nti. Ime dve atthavase sampassamānā tathāgatā sayaṃ nimmitaṃ paccayaṃ nappaṭisevanti. Yadi, mahārāja, sakko vā taṃ kuṭiṃ anovassaṃ kareyya brahmā vā sayaṃ vā, sāvajjaṃ bhaveyya taṃ yeva karaṇaṃ 7 sadosaṃ saniggahaṃ, ime vibhūtaṃ 8 katvā lokaṃ sammohenti adhikataṃ karontīti, tasmā taṃ karaṇaṃ vajjanīyaṃ. Na, mahārāja, tathāgatā vatthuṃ yācanti, tāya avatthuyācanāya aparibhāsiyā bhavantī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ಘಟಿಕಾರಪಞ್ಹೋ ಸತ್ತಮೋ।
Ghaṭikārapañho sattamo.
Footnotes:
