| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
2. க³ருகாபத்தினித்³தே³ஸவண்ணனா
2. Garukāpattiniddesavaṇṇanā
10. இதா³னி ஸங்கா⁴தி³ஸேஸங் பகாஸேதுங் ‘‘மோசேதுகாமசித்தேனா’’திஆதி³மாரத்³த⁴ங். தத்த² மோசேதுங் காமேதீதி மோசேதுகாமங், மோசேதுகாமஞ்ச தங் சித்தஞ்சாதி மோசேதுகாமசித்தங் , தேன, மோசனஸ்ஸாத³சித்தேனாதி அத்தோ². ஏகாத³ஸன்னஞ்ஹி ராகா³னங் ஏகேன மோசனஸ்ஸாதே³ன ஆபத்தி ஹோதீதி வுத்தங் ஹோதி.
10. Idāni saṅghādisesaṃ pakāsetuṃ ‘‘mocetukāmacittenā’’tiādimāraddhaṃ. Tattha mocetuṃ kāmetīti mocetukāmaṃ, mocetukāmañca taṃ cittañcāti mocetukāmacittaṃ, tena, mocanassādacittenāti attho. Ekādasannañhi rāgānaṃ ekena mocanassādena āpatti hotīti vuttaṃ hoti.
தத்ரிமே ஏகாத³ஸ அஸ்ஸாதா³ மோசனஸ்ஸாதோ³ முச்சனஸ்ஸாதோ³ முத்தஸ்ஸாதோ³ மேது²னஸ்ஸாதோ³ ப²ஸ்ஸஸ்ஸாதோ³ கண்டூ³வனஸ்ஸாதோ³ த³ஸ்ஸனஸ்ஸாதோ³ நிஸஜ்ஜஸ்ஸாதோ³ வாசஸ்ஸாதோ³ கே³ஹஸிதபேமங் வனப⁴ங்கி³யந்தி. தத்த² மோசனஸ்ஸாத³சேதனாய சேதெந்தோ சேவ அஸ்ஸாதெ³ந்தோ ச உபக்கமதி, முச்சதி, ஸங்கா⁴தி³ஸேஸோ , ந முச்சதி சே, து²ல்லச்சயங். ஸசே பன ஸயனகாலே ராக³பரியுட்டி²தோ ஹுத்வா ஊருனா வா முட்டி²னா வா அங்க³ஜாதங் கா³ள்ஹங் பீளெத்வா மோசனத்தா²ய ஸஉஸ்ஸாஹோ ஸுபதி, ஸுபந்தஸ்ஸ சஸ்ஸ அஸுசி முச்சதி, ஸங்கா⁴தி³ஸேஸோ. முச்சனஸ்ஸாதே³ அத்தனோ த⁴ம்மதாய முச்சமானங் அஸ்ஸாதே³தி, ந உபக்கமதி, முச்சதி, அனாபத்தி. முத்தஸ்ஸாதே³ அத்தனோ த⁴ம்மதாய முத்தே டா²னா சுதே அஸுசிம்ஹி பச்சா² அஸ்ஸாதெ³ந்தஸ்ஸ வினா உபக்கமேன முச்சதி, அனாபத்தி. மேது²னஸ்ஸாதே³ மேது²னராகே³ன மாதுகா³மங் க³ண்ஹாதி, தேன அஸுசி முச்சதி, அனாபத்தி, து³க்கடங் பன ஆபஜ்ஜதி. ப²ஸ்ஸஸ்ஸாதோ³ து³விதோ⁴ அஜ்ஜ²த்திகோ பா³ஹிரோ சாதி. தத்த² அத்தனோ நிமித்தங் ‘‘த²த்³த⁴ங், முது³கந்தி ஜானிஸ்ஸாமீ’’தி வா லோலபா⁴வேன வா கீளாபயதோ அஸுசி முச்சதி, அனாபத்தி. பா³ஹிரப²ஸ்ஸஸ்ஸாதே³ பன காயஸங்ஸக்³க³ராகே³ன இத்தி²ங் பு²ஸதோ, ஆலிங்க³தோ ச அஸுசி முச்சதி, அனாபத்தி, காயஸங்ஸக்³க³ஸங்கா⁴தி³ஸேஸங் பன ஆபஜ்ஜதி.
Tatrime ekādasa assādā mocanassādo muccanassādo muttassādo methunassādo phassassādo kaṇḍūvanassādo dassanassādo nisajjassādo vācassādo gehasitapemaṃ vanabhaṅgiyanti. Tattha mocanassādacetanāya cetento ceva assādento ca upakkamati, muccati, saṅghādiseso , na muccati ce, thullaccayaṃ. Sace pana sayanakāle rāgapariyuṭṭhito hutvā ūrunā vā muṭṭhinā vā aṅgajātaṃ gāḷhaṃ pīḷetvā mocanatthāya saussāho supati, supantassa cassa asuci muccati, saṅghādiseso. Muccanassāde attano dhammatāya muccamānaṃ assādeti, na upakkamati, muccati, anāpatti. Muttassāde attano dhammatāya mutte ṭhānā cute asucimhi pacchā assādentassa vinā upakkamena muccati, anāpatti. Methunassāde methunarāgena mātugāmaṃ gaṇhāti, tena asuci muccati, anāpatti, dukkaṭaṃ pana āpajjati. Phassassādo duvidho ajjhattiko bāhiro cāti. Tattha attano nimittaṃ ‘‘thaddhaṃ, mudukanti jānissāmī’’ti vā lolabhāvena vā kīḷāpayato asuci muccati, anāpatti. Bāhiraphassassāde pana kāyasaṃsaggarāgena itthiṃ phusato, āliṅgato ca asuci muccati, anāpatti, kāyasaṃsaggasaṅghādisesaṃ pana āpajjati.
கண்டூ³வனஸ்ஸாதே³ த³த்³து³கச்சு²பிளகபாணகாதீ³னங் அஞ்ஞதரேன க²ஜ்ஜமானங் நிமித்தங் கண்டூ³வனஸ்ஸாதே³ன கண்டூ³வதோ அஸுசி முச்சதி, அனாபத்தி. த³ஸ்ஸனஸ்ஸாதே³ இத்தி²யா அனோகாஸங் உபனிஜ்ஜா²யதோ அஸுசி முச்சதி, அனாபத்தி, து³க்கடங் பன ஹோதி. நிஸஜ்ஜஸ்ஸாதே³ மாதுகா³மேன ஸத்³தி⁴ங் ரஹோ நிஸின்னஸ்ஸ முத்தேபி அனாபத்தி , ரஹோனிஸஜ்ஜாபத்தி பன ஹோதி. வாசஸ்ஸாதே³ மாதுகா³மங் மேது²னப்படிஸங்யுத்தாஹி வாசாஹி ஓபா⁴ஸந்தஸ்ஸ முத்தேபி அனாபத்தி, து³ட்டு²ல்லவாசாஸங்கா⁴தி³ஸேஸங் பன ஆபஜ்ஜதி. கே³ஹஸிதபேமே மாதாதீ³னங் மாதாதி³பேமேன ஆலிங்க³னாதி³ங் கரொந்தஸ்ஸ முத்தேபி அனாபத்தி. வனப⁴ங்க³ங் ஸந்த²வகரணத்தா²ய இத்தி²யா பேஸிதபுப்பா²தி³வனப⁴ங்க³ஸஞ்ஞிதங் பண்ணாகாரங் ‘‘இத்த²ன்னாமாய இமங் பேஸித’’ந்தி அஸ்ஸாதே³ன ஆமஸந்தஸ்ஸ முத்தேபி அனாபத்தீதி. ஏவமேதேஸு மோசனஸ்ஸாதே³ன ஆபத்தி ஹோதீதி த³ஸ்ஸேதுங் ‘‘மோசேது…பே॰… நா’’தி வுத்தங். அத² வா மோசேதுகாமங் சித்தங் யஸ்ஸ ஸோயங் மோசேதுகாமசித்தோ, தேன, இத்த²ம்பூ⁴தே கரணவசனங், மோசேதுகாமசித்தோ ஹுத்வாதி அத்தோ².
Kaṇḍūvanassāde daddukacchupiḷakapāṇakādīnaṃ aññatarena khajjamānaṃ nimittaṃ kaṇḍūvanassādena kaṇḍūvato asuci muccati, anāpatti. Dassanassāde itthiyā anokāsaṃ upanijjhāyato asuci muccati, anāpatti, dukkaṭaṃ pana hoti. Nisajjassāde mātugāmena saddhiṃ raho nisinnassa muttepi anāpatti , rahonisajjāpatti pana hoti. Vācassāde mātugāmaṃ methunappaṭisaṃyuttāhi vācāhi obhāsantassa muttepi anāpatti, duṭṭhullavācāsaṅghādisesaṃ pana āpajjati. Gehasitapeme mātādīnaṃ mātādipemena āliṅganādiṃ karontassa muttepi anāpatti. Vanabhaṅgaṃ santhavakaraṇatthāya itthiyā pesitapupphādivanabhaṅgasaññitaṃ paṇṇākāraṃ ‘‘itthannāmāya imaṃ pesita’’nti assādena āmasantassa muttepi anāpattīti. Evametesu mocanassādena āpatti hotīti dassetuṃ ‘‘mocetu…pe… nā’’ti vuttaṃ. Atha vā mocetukāmaṃ cittaṃ yassa soyaṃ mocetukāmacitto, tena, itthambhūte karaṇavacanaṃ, mocetukāmacitto hutvāti attho.
உபக்கம்மாதி ஹத்தா²தீ³ஸு யேன கேனசி நிமித்தே உபக்கமித்வாதி அத்தோ². விமோசயந்தி யங் அந்தமஸோ ஏகா கு²த்³த³கமக்கி²கா பிவெய்ய, தத்தகம்பி விமோசெந்தோதி அத்தோ². ஸுக்கந்தி நீலபீதலோஹிதோதா³ததக்கதேலத³ககீ²ரத³தி⁴ஸப்பிவண்ணஸங்கா²தேஸு த³ஸவிதே⁴ஸு ஸுக்கேஸு யங் கிஞ்சி ஸுக்கங். அஞ்ஞத்ர ஸுபினாதி யா ஸுபினந்தே ஸுக்கவிஸ்ஸட்டி² ஹோதி, தங் ட²பெத்வாதி அத்தோ². ஸமணோதி யோ கோசி உபஸம்பன்னோ. க³ருகந்தி ஸங்கா⁴தி³ஸேஸங். பு²ஸேதி ஆபஜ்ஜெய்யாதி அத்தோ². சேதனா உபக்கமோ முச்சனந்தி இமானெத்த² தீணி அங்கா³னீதி. ஸுக்கவிஸ்ஸட்டி²ஸிக்கா²பத³ங்.
Upakkammāti hatthādīsu yena kenaci nimitte upakkamitvāti attho. Vimocayanti yaṃ antamaso ekā khuddakamakkhikā piveyya, tattakampi vimocentoti attho. Sukkanti nīlapītalohitodātatakkateladakakhīradadhisappivaṇṇasaṅkhātesu dasavidhesu sukkesu yaṃ kiñci sukkaṃ. Aññatra supināti yā supinante sukkavissaṭṭhi hoti, taṃ ṭhapetvāti attho. Samaṇoti yo koci upasampanno. Garukanti saṅghādisesaṃ. Phuseti āpajjeyyāti attho. Cetanā upakkamo muccananti imānettha tīṇi aṅgānīti. Sukkavissaṭṭhisikkhāpadaṃ.
11. இதா³னி காயஸங்ஸக்³க³ங் த³ஸ்ஸேதுங் ‘‘காயஸங்ஸக்³க³ராகே³னா’’திஆதி³மாரத்³த⁴ங். பி⁴க்கு² மனுஸ்ஸித்தி²யா மனுஸ்ஸித்தி²ஸஞ்ஞீ ஹுத்வா காயஸங்ஸக்³க³ராகே³ன உபக்கமித்வா மனுஸ்ஸித்தி²ங் பராமஸந்தோ ஸங்கா⁴தி³ஸேஸங் ஆபஜ்ஜெய்யாதி யோஜனா. தத்த² காயஸங்ஸக்³க³ராகே³னாதி ஹத்த²க்³க³ஹணாதி³காயஸம்ப²ஸ்ஸேன ராகே³ன காயமிஸ்ஸராகே³ன. மனுஸ்ஸித்தி²ந்தி தத³ஹுஜாதம்பி ஜீவமானகமனுஸ்ஸித்தி²ங். பராமஸந்தி பராமஸந்தோ, இத்தீ²தி ஸஞ்ஞா இத்தி²ஸஞ்ஞா , ஸா அஸ்ஸ அத்தீ²தி இத்தி²ஸஞ்ஞீ, இத்தி²ஸஞ்ஞீ ஹுத்வாதி அத்தோ². மனுஸ்ஸித்தீ², இத்தி²ஸஞ்ஞிதா, காயஸங்ஸக்³க³ராகோ³, தேன ராகே³ன வாயாமோ, ஹத்த²க்³கா³ஹாதி³ஸமாபஜ்ஜனந்தி இமானெத்த² பஞ்ச அங்கா³னி. காயஸங்ஸக்³க³ஸிக்கா²பத³ங்.
11. Idāni kāyasaṃsaggaṃ dassetuṃ ‘‘kāyasaṃsaggarāgenā’’tiādimāraddhaṃ. Bhikkhu manussitthiyā manussitthisaññī hutvā kāyasaṃsaggarāgena upakkamitvā manussitthiṃ parāmasanto saṅghādisesaṃ āpajjeyyāti yojanā. Tattha kāyasaṃsaggarāgenāti hatthaggahaṇādikāyasamphassena rāgena kāyamissarāgena. Manussitthinti tadahujātampi jīvamānakamanussitthiṃ. Parāmasanti parāmasanto, itthīti saññā itthisaññā , sā assa atthīti itthisaññī, itthisaññī hutvāti attho. Manussitthī, itthisaññitā, kāyasaṃsaggarāgo, tena rāgena vāyāmo, hatthaggāhādisamāpajjananti imānettha pañca aṅgāni. Kāyasaṃsaggasikkhāpadaṃ.
12. இதா³னி து³ட்டு²ல்லங் த³ஸ்ஸேதுங் ‘‘து³ட்டு²ல்லவாசஸ்ஸாதே³னா’’திஆதி³ ஆரத்³த⁴ங். தத்த² து³ட்டு²ல்லவாசஸ்ஸாதே³னாதி வச்சமக்³க³பஸ்ஸாவமக்³க³மேது²னத⁴ம்மப்படிஸங்யுத்தவாசஸ்ஸாத³ராகே³ன. மக்³க³ங் வாரப்³ப⁴ மேது²னந்தி வச்சமக்³க³பஸ்ஸாவமக்³கா³னங் அஞ்ஞதரங் மக்³க³ங் வா மேது²னங் வா ஆரப்³பா⁴தி அத்தோ². ஓபா⁴ஸந்தோதி அவபா⁴ஸந்தோ. மனுஸ்ஸித்தி²ந்தி விஞ்ஞுங் படிப³லங் ஸுபா⁴ஸிதது³ப்³பா⁴ஸிதங் து³ட்டு²ல்லாது³ட்டு²ல்லங் ஸல்லக்க²ணஸமத்த²ங் மனுஸ்ஸித்தி²ங். ஸுணமானந்தி ஸுணந்திங். இமினா படிப³லாயபி இத்தி²யா அவிஞ்ஞத்திபதே² டி²தாய தூ³தேன வா பண்ணேன வா ஆரோசெந்தஸ்ஸ து³ட்டு²ல்லவாசாபத்தி ந ஹோதீதி தீ³பிதங் ஹோதி. மனுஸ்ஸித்தீ², இத்தி²ஸஞ்ஞிதா, து³ட்டு²ல்லவாசஸ்ஸாத³ராகோ³, தேன ராகே³ன ஓபா⁴ஸனங், தங்க²ணவிஜானநந்தி இமானெத்த² பஞ்ச அங்கா³னி. து³ட்டு²ல்லவாசஸ்ஸாத³ஸிக்கா²பத³ங்.
12. Idāni duṭṭhullaṃ dassetuṃ ‘‘duṭṭhullavācassādenā’’tiādi āraddhaṃ. Tattha duṭṭhullavācassādenāti vaccamaggapassāvamaggamethunadhammappaṭisaṃyuttavācassādarāgena. Maggaṃ vārabbha methunanti vaccamaggapassāvamaggānaṃ aññataraṃ maggaṃ vā methunaṃ vā ārabbhāti attho. Obhāsantoti avabhāsanto. Manussitthinti viññuṃ paṭibalaṃ subhāsitadubbhāsitaṃ duṭṭhullāduṭṭhullaṃ sallakkhaṇasamatthaṃ manussitthiṃ. Suṇamānanti suṇantiṃ. Iminā paṭibalāyapi itthiyā aviññattipathe ṭhitāya dūtena vā paṇṇena vā ārocentassa duṭṭhullavācāpatti na hotīti dīpitaṃ hoti. Manussitthī, itthisaññitā, duṭṭhullavācassādarāgo, tena rāgena obhāsanaṃ, taṅkhaṇavijānananti imānettha pañca aṅgāni. Duṭṭhullavācassādasikkhāpadaṃ.
13. இதா³னி அத்தகாமபாரிசரியங் த³ஸ்ஸேதுங் ‘‘வண்ண’’ந்த்யாதி³ வுத்தங். தத்த² யோ பி⁴க்கு² அத்தனோ காமபாரிசரியாய வண்ணங் வத்வா மேது²னராகே³ன இத்தி²ங் மேது²னங் யாசமானோ க³ருங் பு²ஸேதி ஸம்ப³ந்தோ⁴. வண்ணங் வத்வாதி கு³ணங் ஆனிஸங்ஸங் பகாஸெத்வா. அத்தனோகாமபாரிசரியாயாதி மேது²னத⁴ம்மஸங்கா²தேன காமேன பாரிசரியா காமபாரிசரியா, அத்தனோ அத்தா²ய காமபாரிசரியா அத்தனோகாமபாரிசரியா, அலுத்தஸமாஸோயங். அத² வா அத்தனோதி கத்வத்தே² ஸாமிவசனங், அத்தனோ காமிதா இச்சி²தாதி அத்தனோகாமா, ஸயங் மேது²னராக³வஸேன பத்தி²தாதி அத்தோ², அத்தனோகாமா ச ஸா பாரிசரியா சாதி அத்தனோகாமபாரிசரியா , தாய அத்தனோகாமபாரிசரியாய, ‘‘ஏதத³க்³க³ங், ப⁴கி³னி, பாரிசரியானங், யா மாதி³ஸங் ஸீலவந்தங் கல்யாணத⁴ம்மங் ப்³ரஹ்மசாரிங் ஏதேன த⁴ம்மேன பரிசரெய்யா’’தி ஏவங் வண்ணங் வத்வாதி அத்தோ². யாசதா⁴துனோ த்³விகம்மிகத்தா ‘‘இத்தி²ங் மேது²னங் யாசமானோ’’தி வுத்தங். தத்த² இத்தி²ந்தி து³ட்டு²ல்லோபா⁴ஸனே வுத்தப்பகாரங் இத்தி²ங். மனுஸ்ஸித்தீ², இத்தி²ஸஞ்ஞிதா , அத்தகாமபாரிசரியாய ராகோ³, தேன ராகே³ன வண்ணப⁴ணனங், தங்க²ணவிஜானநந்தி இமானெத்த² பஞ்ச அங்கா³னி. அத்தகாமபாரிசரியஸிக்கா²பத³ங்.
13. Idāni attakāmapāricariyaṃ dassetuṃ ‘‘vaṇṇa’’ntyādi vuttaṃ. Tattha yo bhikkhu attano kāmapāricariyāya vaṇṇaṃ vatvā methunarāgena itthiṃ methunaṃ yācamāno garuṃ phuseti sambandho. Vaṇṇaṃ vatvāti guṇaṃ ānisaṃsaṃ pakāsetvā. Attanokāmapāricariyāyāti methunadhammasaṅkhātena kāmena pāricariyā kāmapāricariyā, attano atthāya kāmapāricariyā attanokāmapāricariyā, aluttasamāsoyaṃ. Atha vā attanoti katvatthe sāmivacanaṃ, attano kāmitā icchitāti attanokāmā, sayaṃ methunarāgavasena patthitāti attho, attanokāmā ca sā pāricariyā cāti attanokāmapāricariyā , tāya attanokāmapāricariyāya, ‘‘etadaggaṃ, bhagini, pāricariyānaṃ, yā mādisaṃ sīlavantaṃ kalyāṇadhammaṃ brahmacāriṃ etena dhammena paricareyyā’’ti evaṃ vaṇṇaṃ vatvāti attho. Yācadhātuno dvikammikattā ‘‘itthiṃ methunaṃ yācamāno’’ti vuttaṃ. Tattha itthinti duṭṭhullobhāsane vuttappakāraṃ itthiṃ. Manussitthī, itthisaññitā , attakāmapāricariyāya rāgo, tena rāgena vaṇṇabhaṇanaṃ, taṅkhaṇavijānananti imānettha pañca aṅgāni. Attakāmapāricariyasikkhāpadaṃ.
14. இதா³னி ஸஞ்சரித்தங் த³ஸ்ஸேதுங் ‘‘ஸந்தே³ஸ’’ந்த்யாதி³மாரத்³த⁴ங். தத்த² பி⁴க்கு² புரிஸஸ்ஸ வா ஸந்தே³ஸங், இத்தி²யா வா ஸந்தே³ஸங் படிக்³க³ஹெத்வா வீமங்ஸித்வா பச்சாஹரந்தோ க³ருகங் பு²ஸேதி ஸம்ப³ந்தோ⁴. தத்த² ஸந்தே³ஸந்தி ‘‘க³ச்ச², ப⁴ந்தே, இத்த²ன்னாமங் மாதுரக்கி²தங் ப்³ரூஹி ‘ஹோஹி கிர இத்த²ன்னாமஸ்ஸ ப⁴ரியா த⁴னக்கீதா’’தி (பாரா॰ 305) ஏவங் வுத்தங் புரிஸஸ்ஸ ஸாஸனங், ‘‘க³ச்ச², ப⁴ந்தே, இத்த²ன்னாமங் புரிஸங் ப்³ரூஹி ‘அஹங் தஸ்ஸ ப⁴ரியா ப⁴விஸ்ஸாமீ’’தி (பாரா॰ 326-327 தோ²கங் விஸதி³ஸங்) ஏவங் வுத்தங் இத்தி²யா ஸாஸனங். படிக்³க³ண்ஹித்வாதி ‘‘ஸாது⁴ உபாஸகா’’தி வா ‘‘ஹோதூ’’தி வா ‘‘ஆரோசெஸ்ஸாமீ’’தி வா யேன கேனசி ஆகாரேன வசீபே⁴த³ங் கத்வா வா ஸீஸகம்பனாதீ³ஹி வா படிக்³க³ண்ஹித்வா ஸம்படிச்சி²த்வாதி அத்தோ². வீமங்ஸித்வாதி வுத்தப்பகாரேன ஸாஸனங் க³ஹெத்வா புரிஸஸ்ஸ வா இத்தி²யா வா தேஸங் அவஸ்ஸாரோசனகானங் மாதாபிதாபா⁴தாப⁴கி³னிஆதீ³னங் வா ஆரோசெத்வாதி அத்தோ². ஹரங்பச்சாதி எத்த² ‘‘பச்சாஹர’’ந்தி வத்தப்³பே³ ச²ந்த³ஹானிப⁴யா ஹர-ஸத்³த³ங் புப்³ப³னிபாதங் கத்வா வுத்தந்தி த³ட்ட²ப்³ப³ங். யத்த² பஹிதேன தத்த² க³ந்த்வா தேன ஆரோசிதா ஸா இத்தீ² ‘‘ஸாதூ⁴’’தி ஸம்படிச்ச²து வா படிக்கி²பது வா லஜ்ஜாய வா துண்ஹீ ஹோது, புன ஆக³ந்த்வா தஸ்ஸ புரிஸஸ்ஸ ஹரந்தோ எத்தாவதா இமாய படிக்³க³ஹணாரோசனப்பச்சாஹரணஸங்கா²தாய திவங்க³ஸம்பத்தியா ஸோ பி⁴க்கு² ஸங்கா⁴தி³ஸேஸங் ஆபஜ்ஜெய்யாதி அத்தோ². தேஸங் மனுஸ்ஸஜாதிகதா, அலங்வசனீயதா, படிக்³க³ண்ஹனவீமங்ஸனப்பச்சாஹரணானீதி இமானெத்த² பஞ்ச அங்கா³னி. ஸஞ்சரித்தஸிக்கா²பத³ங்.
14. Idāni sañcarittaṃ dassetuṃ ‘‘sandesa’’ntyādimāraddhaṃ. Tattha bhikkhu purisassa vā sandesaṃ, itthiyā vā sandesaṃ paṭiggahetvā vīmaṃsitvā paccāharanto garukaṃ phuseti sambandho. Tattha sandesanti ‘‘gaccha, bhante, itthannāmaṃ māturakkhitaṃ brūhi ‘hohi kira itthannāmassa bhariyā dhanakkītā’’ti (pārā. 305) evaṃ vuttaṃ purisassa sāsanaṃ, ‘‘gaccha, bhante, itthannāmaṃ purisaṃ brūhi ‘ahaṃ tassa bhariyā bhavissāmī’’ti (pārā. 326-327 thokaṃ visadisaṃ) evaṃ vuttaṃ itthiyā sāsanaṃ. Paṭiggaṇhitvāti ‘‘sādhu upāsakā’’ti vā ‘‘hotū’’ti vā ‘‘ārocessāmī’’ti vā yena kenaci ākārena vacībhedaṃ katvā vā sīsakampanādīhi vā paṭiggaṇhitvā sampaṭicchitvāti attho. Vīmaṃsitvāti vuttappakārena sāsanaṃ gahetvā purisassa vā itthiyā vā tesaṃ avassārocanakānaṃ mātāpitābhātābhaginiādīnaṃ vā ārocetvāti attho. Haraṃpaccāti ettha ‘‘paccāhara’’nti vattabbe chandahānibhayā hara-saddaṃ pubbanipātaṃ katvā vuttanti daṭṭhabbaṃ. Yattha pahitena tattha gantvā tena ārocitā sā itthī ‘‘sādhū’’ti sampaṭicchatu vā paṭikkhipatu vā lajjāya vā tuṇhī hotu, puna āgantvā tassa purisassa haranto ettāvatā imāya paṭiggahaṇārocanappaccāharaṇasaṅkhātāya tivaṅgasampattiyā so bhikkhu saṅghādisesaṃ āpajjeyyāti attho. Tesaṃ manussajātikatā, alaṃvacanīyatā, paṭiggaṇhanavīmaṃsanappaccāharaṇānīti imānettha pañca aṅgāni. Sañcarittasikkhāpadaṃ.
15. இதா³னி அமூலகங் பகாஸேதுங் ‘‘சாவேதுகாமோ’’திஆதி³மாரத்³த⁴ங். சாவேதுகாமோ பி⁴க்கு² அமூலந்திமவத்து²னா அஞ்ஞங் ஸுணமானங் பி⁴க்கு²ங் சோதெ³ந்தோ வா சோதா³பெந்தோ வா க³ருங் பு²ஸேதி ஸம்ப³ந்தோ⁴. தத்த² சாவேதுகாமோதி ப்³ரஹ்மசரியா சாவேதுகாமோ. சோதெ³ந்தோதி ‘‘த்வங் பாராஜிகங் த⁴ம்மங் ஆபன்னோஸி, அஸ்ஸமணோஸி, அஸக்யபுத்தியோஸீ’’திஆதீ³ஹி வசனேஹி ஸயங் சோதெ³ந்தோதி அத்தோ². ஏவங் சோதெ³ந்தஸ்ஸ வாசாய வாசாய ஸங்கா⁴தி³ஸேஸோ. அமூலந்திமவத்து²னாதி யங் சோத³கேன சுதி³தகம்ஹி புக்³க³லே அதி³ட்ட²ங் அஸுதங் அபரிஸங்கிதங், இத³ங் ஏதேஸங் த³ஸ்ஸனஸவனபரிஸங்கிதஸங்கா²தானங் மூலானங் அபா⁴வதோ நாஸ்ஸ மூலந்தி அமூலங், அந்திமங் வத்து² யஸ்ஸ பாராஜிகஸ்ஸ ததி³த³ங் அந்திமவத்து², அமூலஞ்ச தங் அந்திமவத்து² சேதி அமூலந்திமவத்து², தேன அமூலந்திமவத்து²னா, பி⁴க்கு²னோ அனுரூபேஸு ஏகூனவீஸதியா பாராஜிகேஸு அஞ்ஞதரேனாதி அத்தோ². சோதா³பயந்தி சோதா³பயந்தோ, தஸ்ஸ ஸமீபே ட²த்வா அஞ்ஞங் பி⁴க்கு²ங் ஆணாபெத்வா சோதா³பெந்தோ தஸ்ஸ ஆணத்தஸ்ஸ வாசாய வாசாய க³ருங் பு²ஸேதி அத்தோ². ஸுணமானந்தி இமினா பரம்முகா² தூ³தேன வா பண்ணேன வா சோதெ³ந்தஸ்ஸ ந ருஹதீதி தீ³பிதங் ஹோதி. பரம்முகா² பன ஸத்தஹி ஆபத்திக்க²ந்தே⁴ஹி வத³ந்தஸ்ஸ து³க்கடங். யங் சோதே³தி, தஸ்ஸ உபஸம்பன்னோதி ஸங்க்²யூபக³மனங், தஸ்மிங் ஸுத்³த⁴ஸஞ்ஞிதா, யேன பாராஜிகேன சோதே³தி, தஸ்ஸ தி³ட்டா²தி³வஸேன அமூலகதா, சாவனாதி⁴ப்பாயேன ஸம்முகா² சோத³னா, தஸ்ஸ தங்க²ணவிஜானநந்தி இமானெத்த² பஞ்ச அங்கா³னி. அமூலகஸிக்கா²பத³ங்.
15. Idāni amūlakaṃ pakāsetuṃ ‘‘cāvetukāmo’’tiādimāraddhaṃ. Cāvetukāmo bhikkhu amūlantimavatthunā aññaṃ suṇamānaṃ bhikkhuṃ codento vā codāpento vā garuṃ phuseti sambandho. Tattha cāvetukāmoti brahmacariyā cāvetukāmo. Codentoti ‘‘tvaṃ pārājikaṃ dhammaṃ āpannosi, assamaṇosi, asakyaputtiyosī’’tiādīhi vacanehi sayaṃ codentoti attho. Evaṃ codentassa vācāya vācāya saṅghādiseso. Amūlantimavatthunāti yaṃ codakena cuditakamhi puggale adiṭṭhaṃ asutaṃ aparisaṅkitaṃ, idaṃ etesaṃ dassanasavanaparisaṅkitasaṅkhātānaṃ mūlānaṃ abhāvato nāssa mūlanti amūlaṃ, antimaṃ vatthu yassa pārājikassa tadidaṃ antimavatthu, amūlañca taṃ antimavatthu ceti amūlantimavatthu, tena amūlantimavatthunā, bhikkhuno anurūpesu ekūnavīsatiyā pārājikesu aññatarenāti attho. Codāpayanti codāpayanto, tassa samīpe ṭhatvā aññaṃ bhikkhuṃ āṇāpetvā codāpento tassa āṇattassa vācāya vācāya garuṃ phuseti attho. Suṇamānanti iminā parammukhā dūtena vā paṇṇena vā codentassa na ruhatīti dīpitaṃ hoti. Parammukhā pana sattahi āpattikkhandhehi vadantassa dukkaṭaṃ. Yaṃ codeti, tassa upasampannoti saṅkhyūpagamanaṃ, tasmiṃ suddhasaññitā, yena pārājikena codeti, tassa diṭṭhādivasena amūlakatā, cāvanādhippāyena sammukhā codanā, tassa taṅkhaṇavijānananti imānettha pañca aṅgāni. Amūlakasikkhāpadaṃ.
16. இதா³னி அஞ்ஞபா⁴கி³யங் த³ஸ்ஸேதுங் ‘‘லேஸமத்த’’ந்திஆதி³மாஹ. தத்த² லேஸமத்தமுபாதா³யாதி ஜாதினாமகொ³த்தலிங்கா³பத்திபத்தசீவரூபஜ்ஜா²யாசரியஸேனாஸனலேஸஸங்கா²தேஸு த³ஸஸு லேஸேஸு யோ தஸ்மிங் புக்³க³லே தி³ஸ்ஸதி, தங் லேஸமத்தங் உபாதா³ய நிஸ்ஸாய பி⁴க்கு²ங் ப்³ரஹ்மசரியா சாவேதுகாமோ அமூலந்திமவத்து²னா ஸுணமானங் பி⁴க்கு²ங் சோதெ³ந்தோ க³ருங் பு²ஸேதி அத்தோ². கத²ங்? அஞ்ஞோ க²த்தியஜாதிகோ இமினா சோத³கேன பாராஜிகங் த⁴ம்மங் அஜ்ஜா²பஜ்ஜந்தோ தி³ட்டோ² ஹோதி, ஸோ அஞ்ஞங் அத்தனோ வேரிங் க²த்தியஜாதிகங் பி⁴க்கு²ங் பஸ்ஸித்வா தங் க²த்தியஜாதிலேஸங் க³ஹெத்வா ஏவங் ‘‘க²த்தியோ மயா தி³ட்டோ² பாராஜிகங் த⁴ம்மங் அஜ்ஜா²பஜ்ஜந்தோ, த்வங் க²த்தியோ பாராஜிகங் த⁴ம்மங் ஆபன்னோஸீ’’தி வா ‘‘த்வங் ஸோ க²த்தியோ, நாஞ்ஞோ, பாராஜிகங் த⁴ம்மங் அஜ்ஜா²பன்னோஸீ’’தி வா சோதே³தி, ஏவங் நாமலேஸாத³யோபி வேதி³தப்³பா³. அங்கா³னி பனெத்த² அனந்தரஸதி³ஸானி. அஞ்ஞபா⁴கி³யஸிக்கா²பத³ங்.
16. Idāni aññabhāgiyaṃ dassetuṃ ‘‘lesamatta’’ntiādimāha. Tattha lesamattamupādāyāti jātināmagottaliṅgāpattipattacīvarūpajjhāyācariyasenāsanalesasaṅkhātesu dasasu lesesu yo tasmiṃ puggale dissati, taṃ lesamattaṃ upādāya nissāya bhikkhuṃ brahmacariyā cāvetukāmo amūlantimavatthunā suṇamānaṃ bhikkhuṃ codento garuṃ phuseti attho. Kathaṃ? Añño khattiyajātiko iminā codakena pārājikaṃ dhammaṃ ajjhāpajjanto diṭṭho hoti, so aññaṃ attano veriṃ khattiyajātikaṃ bhikkhuṃ passitvā taṃ khattiyajātilesaṃ gahetvā evaṃ ‘‘khattiyo mayā diṭṭho pārājikaṃ dhammaṃ ajjhāpajjanto, tvaṃ khattiyo pārājikaṃ dhammaṃ āpannosī’’ti vā ‘‘tvaṃ so khattiyo, nāñño, pārājikaṃ dhammaṃ ajjhāpannosī’’ti vā codeti, evaṃ nāmalesādayopi veditabbā. Aṅgāni panettha anantarasadisāni. Aññabhāgiyasikkhāpadaṃ.
க³ருகாபத்தினித்³தே³ஸவண்ணனா நிட்டி²தா.
Garukāpattiniddesavaṇṇanā niṭṭhitā.
