| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
3. நிஸ்ஸக்³கி³யனித்³தே³ஸவண்ணனா
3. Nissaggiyaniddesavaṇṇanā
17. இதா³னி சீவரவிதி⁴ங் த³ஸ்ஸேதுங் ‘‘விகப்பன’’ந்த்யாதி³முத்³த⁴டங். யோ பி⁴க்கு² அகாலசீவரங் விகப்பனஞ்ச அதி⁴ட்டா²னஞ்ச அகத்வா த³ஸாஹங் அதிக்காமேதி, தஸ்ஸ பி⁴க்கு²னோ நிஸ்ஸக்³கி³யங் ஸியாதி பிண்ட³த்தோ². தத்த² அகாலசீவரந்தி அகாலே சீவரங், கோ²மங் கப்பாஸிகங் கோஸெய்யங் கம்ப³லங் ஸாணங் ப⁴ங்க³ந்தி ஜாதிதோ ச² சீவரானி, து³கூலங் பட்டுண்ணங் ஸோமாரபட்டங் சீனபட்டங் இத்³தி⁴ஜங் தே³வதி³ன்னந்தி இமானி பன ச² அனுலோமசீவரானி. தேஸு து³கூலங் ஸாணஸ்ஸ அனுலோமங் வாகமயத்தா. பட்டுண்ணாதீ³னி தீணி கோஸெய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴ஜாதீ³னி த்³வயானி கோ²மாதீ³னங் அனுலோமானி தேஸமஞ்ஞதரபா⁴வதோ . இமேஸங் ச²ன்னங் சீவரானங் அஞ்ஞதரங் அகாலசீவரங்.
17. Idāni cīvaravidhiṃ dassetuṃ ‘‘vikappana’’ntyādimuddhaṭaṃ. Yo bhikkhu akālacīvaraṃ vikappanañca adhiṭṭhānañca akatvā dasāhaṃ atikkāmeti, tassa bhikkhuno nissaggiyaṃ siyāti piṇḍattho. Tattha akālacīvaranti akāle cīvaraṃ, khomaṃ kappāsikaṃ koseyyaṃ kambalaṃ sāṇaṃ bhaṅganti jātito cha cīvarāni, dukūlaṃ paṭṭuṇṇaṃ somārapaṭṭaṃ cīnapaṭṭaṃ iddhijaṃ devadinnanti imāni pana cha anulomacīvarāni. Tesu dukūlaṃ sāṇassa anulomaṃ vākamayattā. Paṭṭuṇṇādīni tīṇi koseyyassa anulomāni pāṇakehi katasuttamayattā. Iddhijādīni dvayāni khomādīnaṃ anulomāni tesamaññatarabhāvato . Imesaṃ channaṃ cīvarānaṃ aññataraṃ akālacīvaraṃ.
விகப்பனமதி⁴ட்டா²னந்தி எத்த² பன விகப்பனூபக³ங் அதி⁴ட்டா²னூபக³ஞ்ச ஏவங் வேதி³தப்³ப³ங். தத்ராயங் பாளி – ‘‘அனுஜானாமி, பி⁴க்க²வே, ஆயாமேன அட்ட²ங்கு³லங் ஸுக³தங்கு³லேன சதுரங்கு³லவித்த²தங் பச்சி²மசீவரங் விகப்பேது’’ந்தி (மஹாவ॰ 358). மஜ்ஜி²மஸ்ஸ புரிஸஸ்ஸ தீ³க⁴ஸோ த்³வே வித³த்தி²யோ, திரியங் வித³த்தி². த்³வே விகப்பனா ஸம்முகா²விகப்பனா ச பரம்முகா²விகப்பனா ச. கத²ங்? ‘‘இமங் சீவரங் துய்ஹங் விகப்பேமீ’’தி வத்தப்³ப³ங், அயங் ஸம்முகா²விகப்பனா. ‘‘மய்ஹங் ஸந்தகங் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயங் வா கரோஹீ’’தி, ஏகஸ்ஸ ஸந்திகே ‘‘இமங் சீவரங் திஸ்ஸஸ்ஸ பி⁴க்கு²னோ விகப்பேமீ’’தி வத்தப்³ப³ங், அயங் அபராபி ஸம்முகா²விகப்பனா. தேன பி⁴க்கு²னா ‘‘திஸ்ஸஸ்ஸ பி⁴க்கு²னோ ஸந்தகங் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயங் வா கரோஹீ’’தி, ‘‘இமங் சீவரங் துய்ஹங் விகப்பனத்தா²ய த³ம்மீ’’தி வத்தப்³ப³ங், தேன வத்தப்³போ³ ‘‘கோ தே மித்தோ வா ஸந்தி³ட்டோ² வா ஸம்ப⁴த்தோ வா’’தி, ததோ இதரேன ‘‘திஸ்ஸோ பி⁴க்கூ²’’தி வத்தப்³ப³ங், புன தேன ‘‘அஹங் திஸ்ஸஸ்ஸ பி⁴க்கு²னோ த³ம்மீ’’தி வத்தப்³ப³ங், அயங் பரம்முகா²விகப்பனா. ‘‘திஸ்ஸஸ்ஸ பி⁴க்கு²னோ ஸந்தகங் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயங் வா கரோஹீ’’தி வுத்தே பச்சுத்³தா⁴ரோ நாம ஹோதி. ப³ஹுகே ‘‘இமானீ’’தி, அஹத்த²பாஸே ‘‘ஏதங், ஏதானீ’’தி வா. ஏவங் விகப்பனஞ்ச அகத்வாதி அத்தோ².
Vikappanamadhiṭṭhānanti ettha pana vikappanūpagaṃ adhiṭṭhānūpagañca evaṃ veditabbaṃ. Tatrāyaṃ pāḷi – ‘‘anujānāmi, bhikkhave, āyāmena aṭṭhaṅgulaṃ sugataṅgulena caturaṅgulavitthataṃ pacchimacīvaraṃ vikappetu’’nti (mahāva. 358). Majjhimassa purisassa dīghaso dve vidatthiyo, tiriyaṃ vidatthi. Dve vikappanā sammukhāvikappanā ca parammukhāvikappanā ca. Kathaṃ? ‘‘Imaṃ cīvaraṃ tuyhaṃ vikappemī’’ti vattabbaṃ, ayaṃ sammukhāvikappanā. ‘‘Mayhaṃ santakaṃ paribhuñja vā vissajjehi vā yathāpaccayaṃ vā karohī’’ti, ekassa santike ‘‘imaṃ cīvaraṃ tissassa bhikkhuno vikappemī’’ti vattabbaṃ, ayaṃ aparāpi sammukhāvikappanā. Tena bhikkhunā ‘‘tissassa bhikkhuno santakaṃ paribhuñja vā vissajjehi vā yathāpaccayaṃ vā karohī’’ti, ‘‘imaṃ cīvaraṃ tuyhaṃ vikappanatthāya dammī’’ti vattabbaṃ, tena vattabbo ‘‘ko te mitto vā sandiṭṭho vā sambhatto vā’’ti, tato itarena ‘‘tisso bhikkhū’’ti vattabbaṃ, puna tena ‘‘ahaṃ tissassa bhikkhuno dammī’’ti vattabbaṃ, ayaṃ parammukhāvikappanā. ‘‘Tissassa bhikkhuno santakaṃ paribhuñja vā vissajjehi vā yathāpaccayaṃ vā karohī’’ti vutte paccuddhāro nāma hoti. Bahuke ‘‘imānī’’ti, ahatthapāse ‘‘etaṃ, etānī’’ti vā. Evaṃ vikappanañca akatvāti attho.
திசீவரஸ்ஸ பன பமாணங் உக்கட்ட²பரிச்சே²தே³ன ஸுக³தசீவரதோ ஊனகங் வட்டதி, லாமகபரிச்சே²தே³ன ஸங்கா⁴டியா, உத்தராஸங்க³ஸ்ஸ ச தீ³க⁴தோ முட்டி²பஞ்சகங், திரியங் முட்டி²த்திகங், அந்தரவாஸகோ தீ³க⁴தோ முட்டி²பஞ்சகோ, திரியங் த்³விஹத்தோ²பி அட்³ட⁴தெய்யோ வா வட்டதி. வுத்தப்பமாணதோ அதி⁴கஞ்ச ஊனகஞ்ச ‘‘பரிக்கா²ரசோள’’ந்தி அதி⁴ட்டா²தப்³ப³ங். த்³வே சீவரஸ்ஸ அதி⁴ட்டா²னா காயேன வா அதி⁴ட்டே²தி, வாசாய வா அதி⁴ட்டே²தி. திசீவரங் அதி⁴ட்ட²ஹந்தேன ரஜித்வா கப்பபி³ந்து³ங் த³த்வா புராணஸங்கா⁴டிங் ‘‘இமங் ஸங்கா⁴டிங் பச்சுத்³த⁴ராமீ’’தி பச்சுத்³த⁴ரித்வா நவங் ஸங்கா⁴டிங் ஹத்தே²ன க³ஹெத்வா ‘‘இமங் ஸங்கா⁴டிங் அதி⁴ட்டா²மீ’’தி சித்தேன ஆபோ⁴க³ங் கத்வா காயவிகாரங் கரொந்தேன காயேன அதி⁴ட்டா²தப்³பா³, இத³ங் காயேன அதி⁴ட்டா²னங். தங் யேன கேனசி ஸரீராவயவேன அபு²ஸந்தஸ்ஸ ந வட்டதி. வாசாய அதி⁴ட்டா²னங் பன வசீபே⁴த³ங் கத்வா வாசாய அதி⁴ட்டா²தப்³ப³ங், ஸசே ஹத்த²பாஸே ‘‘இமங் ஸங்கா⁴டிங் அதி⁴ட்டா²மீ’’தி, ஸசே அஹத்த²பாஸே ட²பிதட்டா²னங் ஸல்லக்கெ²த்வா ‘‘ஏதங் ஸங்கா⁴டிங் அதி⁴ட்டா²மீ’’தி வாசா பி⁴ந்தி³தப்³பா³ . ஏஸ நயோ உத்தராஸங்கே³, அந்தரவாஸகே ச. திசீவராதீ³னி ஸப்³பா³னி ஏகதோ கத்வா ‘‘இமானி சீவரானி பரிக்கா²ரசோளானி அதி⁴ட்டா²மீ’’தி அதி⁴ட்டா²தும்பி வட்டதீதி. ஏவங் அதி⁴ட்டா²னஞ்ச அகத்வாதி அத்தோ².
Ticīvarassa pana pamāṇaṃ ukkaṭṭhaparicchedena sugatacīvarato ūnakaṃ vaṭṭati, lāmakaparicchedena saṅghāṭiyā, uttarāsaṅgassa ca dīghato muṭṭhipañcakaṃ, tiriyaṃ muṭṭhittikaṃ, antaravāsako dīghato muṭṭhipañcako, tiriyaṃ dvihatthopi aḍḍhateyyo vā vaṭṭati. Vuttappamāṇato adhikañca ūnakañca ‘‘parikkhāracoḷa’’nti adhiṭṭhātabbaṃ. Dve cīvarassa adhiṭṭhānā kāyena vā adhiṭṭheti, vācāya vā adhiṭṭheti. Ticīvaraṃ adhiṭṭhahantena rajitvā kappabinduṃ datvā purāṇasaṅghāṭiṃ ‘‘imaṃ saṅghāṭiṃ paccuddharāmī’’ti paccuddharitvā navaṃ saṅghāṭiṃ hatthena gahetvā ‘‘imaṃ saṅghāṭiṃ adhiṭṭhāmī’’ti cittena ābhogaṃ katvā kāyavikāraṃ karontena kāyena adhiṭṭhātabbā, idaṃ kāyena adhiṭṭhānaṃ. Taṃ yena kenaci sarīrāvayavena aphusantassa na vaṭṭati. Vācāya adhiṭṭhānaṃ pana vacībhedaṃ katvā vācāya adhiṭṭhātabbaṃ, sace hatthapāse ‘‘imaṃ saṅghāṭiṃ adhiṭṭhāmī’’ti, sace ahatthapāse ṭhapitaṭṭhānaṃ sallakkhetvā ‘‘etaṃ saṅghāṭiṃ adhiṭṭhāmī’’ti vācā bhinditabbā . Esa nayo uttarāsaṅge, antaravāsake ca. Ticīvarādīni sabbāni ekato katvā ‘‘imāni cīvarāni parikkhāracoḷāni adhiṭṭhāmī’’ti adhiṭṭhātumpi vaṭṭatīti. Evaṃ adhiṭṭhānañca akatvāti attho.
த³ஸ அஹானி த³ஸாஹங். அதிமாபேதீதி அதிக்காமேதி. தஸ்ஸாதி தஸ்ஸ பி⁴க்கு²னோ. நிஸ்ஸக்³கி³யந்தி நிஸ்ஸஜ்ஜனங் நிஸ்ஸக்³கி³யங், புப்³ப³பா⁴கே³ கத்தப்³ப³ஸ்ஸ வினயகம்மஸ்ஸேதங் நாமங், நிஸ்ஸக்³கி³யமஸ்ஸ அத்தீ²தி நிஸ்ஸக்³கி³யங், கிங் தங்? பாசித்தியங், தங் அதிக்காமயதோ ஸஹனிஸ்ஸக்³கி³யவினயகம்மங் பாசித்தியங் ஸியா, அயமெத்த² அத்தோ². தங் பனேதங் சீவரங் யங் தி³வஸங் உப்பன்னங், தஸ்ஸ யோ அருணோ, ஸோ உப்பன்னதி³வஸனிஸ்ஸிதோ, தஸ்மா சீவருப்பாத³தி³வஸேன ஸத்³தி⁴ங் ஏகாத³ஸே அருணுக்³க³மனே த³ஸாஹாதிக்கமிதங் ஹோதீதி. சீவரஸ்ஸ அத்தனோ ஸந்தகதா, ஜாதிப்பமாணயுத்ததா, சி²ன்னபலிபோ³த⁴பா⁴வோ, அதிரேகசீவரதா, த³ஸாஹாதிக்கமோதி இமானெத்த² பஞ்ச அங்கா³னி. பட²மகதி²னஸிக்கா²பத³ங்.
Dasa ahāni dasāhaṃ. Atimāpetīti atikkāmeti. Tassāti tassa bhikkhuno. Nissaggiyanti nissajjanaṃ nissaggiyaṃ, pubbabhāge kattabbassa vinayakammassetaṃ nāmaṃ, nissaggiyamassa atthīti nissaggiyaṃ, kiṃ taṃ? Pācittiyaṃ, taṃ atikkāmayato sahanissaggiyavinayakammaṃ pācittiyaṃ siyā, ayamettha attho. Taṃ panetaṃ cīvaraṃ yaṃ divasaṃ uppannaṃ, tassa yo aruṇo, so uppannadivasanissito, tasmā cīvaruppādadivasena saddhiṃ ekādase aruṇuggamane dasāhātikkamitaṃ hotīti. Cīvarassa attano santakatā, jātippamāṇayuttatā, chinnapalibodhabhāvo, atirekacīvaratā, dasāhātikkamoti imānettha pañca aṅgāni. Paṭhamakathinasikkhāpadaṃ.
18. இதா³னி து³தியங் த³ஸ்ஸேதுங் ‘‘பி⁴க்கு²ஸம்முதியா’’த்யாதி³மாரத்³த⁴ங். யோ பி⁴க்கு²ஸம்முதிங் வஜ்ஜெத்வா காலஞ்ச வினா அதி⁴ட்டி²தங் திசீவரங் ஏகாஹங் அதிக்கமாபேதி, தஸ்ஸ நிஸ்ஸக்³கி³யங் ஸியாதி ஸம்ப³ந்தோ⁴. தத்த² பி⁴க்கு²ஸம்முதியாஞ்ஞத்ராதி யங் ஸங்கோ⁴ கி³லானஸ்ஸ பி⁴க்கு²னோ திசீவரேன விப்பவாஸஸம்முதிங் தே³தி , தங் ட²பெத்வா. திசீவரமதி⁴ட்டி²தந்தி கரணத்தே² உபயோக³வசனங், தேன திசீவராதி⁴ட்டா²னநயேன அதி⁴ட்டி²தேஸு ஸங்கா⁴டிஆதீ³ஸு யேன கேனசி சீவரேன. ஏகாஹந்தி ஏகரத்தங். அதிமாபேதீதி விப்பவஸதி, வியுத்தோ வஸதீதி அத்தோ². தஸ்ஸ அலத்³த⁴ஸம்முதிகஸ்ஸ பி⁴க்கு²னோ ஏகரத்தம்பி சீவரேன விப்பவாஸதோ நிஸ்ஸக்³கி³யங் பாசித்தியங் ஸியாதி அத்தோ². ஸமயங் வினாதி சீவரகாலங் வஜ்ஜெத்வா. அதி⁴ட்டி²தசீவரதா, அனத்த²தகதி²னதா, அலத்³த⁴ஸம்முதிதா, ரத்திவிப்பவாஸோதி இமானெத்த² சத்தாரி அங்கா³னி. து³தியகதி²னஸிக்கா²பத³ங்.
18. Idāni dutiyaṃ dassetuṃ ‘‘bhikkhusammutiyā’’tyādimāraddhaṃ. Yo bhikkhusammutiṃ vajjetvā kālañca vinā adhiṭṭhitaṃ ticīvaraṃ ekāhaṃ atikkamāpeti, tassa nissaggiyaṃ siyāti sambandho. Tattha bhikkhusammutiyāññatrāti yaṃ saṅgho gilānassa bhikkhuno ticīvarena vippavāsasammutiṃ deti , taṃ ṭhapetvā. Ticīvaramadhiṭṭhitanti karaṇatthe upayogavacanaṃ, tena ticīvarādhiṭṭhānanayena adhiṭṭhitesu saṅghāṭiādīsu yena kenaci cīvarena. Ekāhanti ekarattaṃ. Atimāpetīti vippavasati, viyutto vasatīti attho. Tassa aladdhasammutikassa bhikkhuno ekarattampi cīvarena vippavāsato nissaggiyaṃ pācittiyaṃ siyāti attho. Samayaṃ vināti cīvarakālaṃ vajjetvā. Adhiṭṭhitacīvaratā, anatthatakathinatā, aladdhasammutitā, rattivippavāsoti imānettha cattāri aṅgāni. Dutiyakathinasikkhāpadaṃ.
19. இதா³னி புராணசீவரங் த³ஸ்ஸேதுங் ‘‘அஞ்ஞாதிகா’’த்யாதி³ ஆரத்³த⁴ங். தத்த² அஞ்ஞாதிகாதி அஞ்ஞாதிகாய ‘‘படிஸங்கா² யோனிஸோ’’திஆதீ³ஸு விய, அஞ்ஞாதிகாய நேவ மாதுஸம்ப³ந்தே⁴ன ந பிதுஸம்ப³ந்தே⁴ன ஸம்ப³த்³தா⁴யாதி வுத்தங் ஹோதி. பி⁴க்கு²னியாதி அட்ட²வாசிககம்மேன உபஸம்பன்னாய. ஆகோடாபேதீதி பஹராபேதி. தந்தி நிஸ்ஸக்³கி³யங் பாசித்தியங் ப⁴வெய்யாதி அத்தோ². புராணசீவரதா, உபசாரே ட²த்வா அஞ்ஞாதிகாய பி⁴க்கு²னியா ஆணாபனங், தஸ்ஸா தோ⁴வனாதீ³னி சாதி இமானெத்த² தீணி அங்கா³னி. புராணசீவரஸிக்கா²பத³ங்.
19. Idāni purāṇacīvaraṃ dassetuṃ ‘‘aññātikā’’tyādi āraddhaṃ. Tattha aññātikāti aññātikāya ‘‘paṭisaṅkhā yoniso’’tiādīsu viya, aññātikāya neva mātusambandhena na pitusambandhena sambaddhāyāti vuttaṃ hoti. Bhikkhuniyāti aṭṭhavācikakammena upasampannāya. Ākoṭāpetīti paharāpeti. Tanti nissaggiyaṃ pācittiyaṃ bhaveyyāti attho. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovanādīni cāti imānettha tīṇi aṅgāni. Purāṇacīvarasikkhāpadaṃ.
20. கிஞ்சி மூலகந்தி கிஞ்சி பாப⁴தங். சீவராதா³னேதி சீவரஸ்ஸ ஆதா³னே சீவரப்படிக்³க³ஹணே. விகப்பனூபக³சீவரதா, பாரிவத்தகாபா⁴வோ, அஞ்ஞாதிகாய ஹத்த²தோ க³ஹணந்தி இமானெத்த² தீணி அங்கா³னி. சீவரப்படிக்³க³ஹணஸிக்கா²பத³ங்.
20.Kiñci mūlakanti kiñci pābhataṃ. Cīvarādāneti cīvarassa ādāne cīvarappaṭiggahaṇe. Vikappanūpagacīvaratā, pārivattakābhāvo, aññātikāya hatthato gahaṇanti imānettha tīṇi aṅgāni. Cīvarappaṭiggahaṇasikkhāpadaṃ.
21. அப்பவாரிதந்தி ‘‘வதெ³ய்யாத², ப⁴ந்தே, யேன அத்தோ²’’தி இச்சா²பிதங் இச்ச²ங் ருசிங் உப்பாதி³தங், ந பவாரிதந்தி அப்பவாரிதங். விஞ்ஞாபெந்தஸ்ஸாதி யாசந்தஸ்ஸ. அஞ்ஞத்ர ஸமயாதி நட்ட²சீவரகாலங் ட²பெத்வா. விகப்பனூபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய ச படிலாபோ⁴தி இமானெத்த² சத்தாரி அங்கா³னி. அஞ்ஞாதகவிஞ்ஞத்திஸிக்கா²பத³ங்.
21.Appavāritanti ‘‘vadeyyātha, bhante, yena attho’’ti icchāpitaṃ icchaṃ ruciṃ uppāditaṃ, na pavāritanti appavāritaṃ. Viññāpentassāti yācantassa. Aññatra samayāti naṭṭhacīvarakālaṃ ṭhapetvā. Vikappanūpagacīvaratā, samayābhāvo, aññātakaviññatti, tāya ca paṭilābhoti imānettha cattāri aṅgāni. Aññātakaviññattisikkhāpadaṃ.
22. ரஜதந்தி ரூபியங். ஜாதரூபந்தி ஸுவண்ணங். மாஸகந்தி தயோ மாஸகா லோஹமாஸகோ தா³ருமாஸகோ ஜதுமாஸகோதி. தத்த² லோஹமாஸகோதி தம்ப³லோஹாதீ³ஹி கதமாஸகோ. தா³ருமாஸகோதி ஸாரதா³ருனா வா வேளுபேஸிகாய வா அந்தமஸோ தாலபண்ணேனபி ரூபங் சி²ந்தி³த்வா கதமாஸகோ. ஜதுமாஸகோதி லாகா²ய வா நிய்யாஸேன வா ரூபங் ஸமுட்டா²பெத்வா கதமாஸகோ. கஹாபணந்தி ஸுவண்ணமயங் வா ரூபியமயங் வா பாகதிகங் வா. க³ண்ஹெய்யாதி அத்தனோ அத்தா²ய தீ³யமானங் வா கத்த²சி டி²தங் வா நிப்பரிக்³க³ஹங் தி³ஸ்வா ஸயங் க³ண்ஹெய்ய. க³ண்ஹாபெய்யாதி ததே³வ அஞ்ஞேன கா³ஹாபெய்ய. நிஸ்ஸக்³கீ³தி க³ஹணாதீ³ஸு யங் கிஞ்சி கரொந்தஸ்ஸ அக⁴னப³த்³தே⁴ஸு வத்து²க³ணனாய நிஸ்ஸக்³கி³ ஸியாதி அத்தோ². ஸாதி³யெய்ய வாதி காயவாசாஹி அப்படிக்கி²பித்வா சித்தேன அதி⁴வாஸெய்ய. ஜாதரூபரஜதபா⁴வோ, அத்துத்³தே³ஸிகதா, க³ஹணாதீ³ஸு அஞ்ஞதரபா⁴வோதி இமானெத்த² தீணி அங்கா³னி. ரூபியப்படிக்³க³ஹணஸிக்கா²பத³ங்.
22.Rajatanti rūpiyaṃ. Jātarūpanti suvaṇṇaṃ. Māsakanti tayo māsakā lohamāsako dārumāsako jatumāsakoti. Tattha lohamāsakoti tambalohādīhi katamāsako. Dārumāsakoti sāradārunā vā veḷupesikāya vā antamaso tālapaṇṇenapi rūpaṃ chinditvā katamāsako. Jatumāsakoti lākhāya vā niyyāsena vā rūpaṃ samuṭṭhāpetvā katamāsako. Kahāpaṇanti suvaṇṇamayaṃ vā rūpiyamayaṃ vā pākatikaṃ vā. Gaṇheyyāti attano atthāya dīyamānaṃ vā katthaci ṭhitaṃ vā nippariggahaṃ disvā sayaṃ gaṇheyya. Gaṇhāpeyyāti tadeva aññena gāhāpeyya. Nissaggīti gahaṇādīsu yaṃ kiñci karontassa aghanabaddhesu vatthugaṇanāya nissaggi siyāti attho. Sādiyeyya vāti kāyavācāhi appaṭikkhipitvā cittena adhivāseyya. Jātarūparajatabhāvo, attuddesikatā, gahaṇādīsu aññatarabhāvoti imānettha tīṇi aṅgāni. Rūpiyappaṭiggahaṇasikkhāpadaṃ.
23. ரஜதாதி³சதுப்³பி³த⁴ங் அகப்பியங் கப்பியேனாபி பரிவத்தெய்ய ஸஹத⁴ம்மிகே ட²பெத்வா, நிஸ்ஸக்³கி³யங் ஸியாதி ஸம்ப³ந்தோ⁴. தத்த² அகப்பியந்தி அகப்பியவத்து²ங். கப்பியேனாதி கப்பியவத்து²னா. ஸஹத⁴ம்மிகேதி பி⁴க்கு²பி⁴க்கு²னிஸாமணேரஸாமணேரிஸிக்க²மானஸங்கா²தே பஞ்ச ஸஹத⁴ம்மிகே. ரூபியபா⁴வோ, பரிவத்தனஞ்சாதி இமானெத்த² த்³வே அங்கா³னி. ரூபியபரிவத்தனஸிக்கா²பத³ங்.
23. Rajatādicatubbidhaṃ akappiyaṃ kappiyenāpi parivatteyya sahadhammike ṭhapetvā, nissaggiyaṃ siyāti sambandho. Tattha akappiyanti akappiyavatthuṃ. Kappiyenāti kappiyavatthunā. Sahadhammiketi bhikkhubhikkhunisāmaṇerasāmaṇerisikkhamānasaṅkhāte pañca sahadhammike. Rūpiyabhāvo, parivattanañcāti imānettha dve aṅgāni. Rūpiyaparivattanasikkhāpadaṃ.
24. ‘‘இமங் பத்தங் துய்ஹங் விகப்பேமீ’’திஆதி³னா விகப்பனஞ்ச ‘‘இமங் பத்தங் அதி⁴ட்டா²மீ’’திஆதி³னா அதி⁴ட்டா²னஞ்ச அகத்வாதி அத்தோ². பமாணிகந்தி எத்தா²யங் வினிச்ச²யோ – அனுபஹதபுராணஸாலிதண்டு³லானங் ஸுகொட்டிதபரிஸுத்³தா⁴னங் த்³வே மக³த⁴னாளியோ க³ஹெத்வா தேஹி தண்டு³லேஹி அனுத்தண்டு³லமகிலின்னமபிண்டி³தங் ஸுவிஸத³ங் குந்த³மகுளராஸிஸதி³ஸங் அவஸ்ஸாவிதோத³னங் பசித்வா நிரவஸேஸங் பத்தே பக்கி²பித்வா தஸ்ஸ ஓத³னஸ்ஸ சதுத்த²பா⁴க³ப்பமாணோ நாதிக⁴னோ நாதிதனுகோ ஹத்த²ஹாரியோ ஸப்³ப³ஸம்பா⁴ரஸங்க²தோ முக்³க³ஸூபோ பக்கி²பிதப்³போ³, ததோ ஆலோபஸ்ஸ அனுரூபங் யாவசரிமாலோபப்பஹோனகங் மச்ச²மங்ஸாதி³ப்³யஞ்ஜனங் பக்கி²பிதப்³ப³ங். ஸப்பிதேலதக்கரஸகஞ்ஜிகாதீ³னி பன அக³ணனூபகா³னி ஹொந்தி. தானி ஹி ஓத³னக³திகானி நேவ ஹாபேதுங், ந வட்³டே⁴துங் ஸக்கொந்தி. ஏவமேதங் ஸப்³ப³ம்பி பக்கி²த்தங் ஸசே பன பத்தஸ்ஸ முக²வட்டியா ஹெட்டி²மராஜிஸமங் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹெட்டி²மந்தங் பு²ஸதி, அயங் உக்கட்டோ² நாம பத்தோ. ஸசே தங் ராஜிங் அதிக்கம்ம தூ²பீகதங் திட்ட²தி, அயங் உக்கட்டோ²மகோ நாம பத்தோ. ஸசே தங் ராஜிங் ந ஸம்பாபுணாதி, அந்தோக³தமேவ ஹோதி, அயங் உக்கட்டு²க்கட்டோ² நாம. உக்கட்ட²தோ உபட்³ட⁴ப்பமாணோ மஜ்ஜி²மோ. மஜ்ஜி²மதோ உபட்³ட⁴ப்பமாணோ ஓமகோ. தேஸம்பி வுத்தனயேனேவ பபே⁴தோ³ வேதி³தப்³போ³. இச்சேதேஸு உக்கட்டு²க்கட்டோ² ச ஓமகோமகோ சாதி த்³வே அபத்தா, ஸேஸா ஸத்த பத்தா பமாணயுத்தா நாமாதி ஏவங் பமாணேன யுத்தோ பமாணிகோ, தங் பமாணிகங். பத்தந்தி ஸத்தஸு பத்தேஸு அஞ்ஞதரங் பத்தங். பத்தஸ்ஸ அத்தனோ ஸந்தகதா, பமாணயுத்ததா, அதி⁴ட்டா²னூபக³தா, அதிரேகபத்ததா, த³ஸாஹாதிக்கமோதி இமானெத்த² பஞ்ச அங்கா³னி. பட²மபத்தஸிக்கா²பத³ங்.
24. ‘‘Imaṃ pattaṃ tuyhaṃ vikappemī’’tiādinā vikappanañca ‘‘imaṃ pattaṃ adhiṭṭhāmī’’tiādinā adhiṭṭhānañca akatvāti attho. Pamāṇikanti etthāyaṃ vinicchayo – anupahatapurāṇasālitaṇḍulānaṃ sukoṭṭitaparisuddhānaṃ dve magadhanāḷiyo gahetvā tehi taṇḍulehi anuttaṇḍulamakilinnamapiṇḍitaṃ suvisadaṃ kundamakuḷarāsisadisaṃ avassāvitodanaṃ pacitvā niravasesaṃ patte pakkhipitvā tassa odanassa catutthabhāgappamāṇo nātighano nātitanuko hatthahāriyo sabbasambhārasaṅkhato muggasūpo pakkhipitabbo, tato ālopassa anurūpaṃ yāvacarimālopappahonakaṃ macchamaṃsādibyañjanaṃ pakkhipitabbaṃ. Sappitelatakkarasakañjikādīni pana agaṇanūpagāni honti. Tāni hi odanagatikāni neva hāpetuṃ, na vaḍḍhetuṃ sakkonti. Evametaṃ sabbampi pakkhittaṃ sace pana pattassa mukhavaṭṭiyā heṭṭhimarājisamaṃ tiṭṭhati, suttena vā hīrena vā chindantassa suttassa vā hīrassa vā heṭṭhimantaṃ phusati, ayaṃ ukkaṭṭho nāma patto. Sace taṃ rājiṃ atikkamma thūpīkataṃ tiṭṭhati, ayaṃ ukkaṭṭhomako nāma patto. Sace taṃ rājiṃ na sampāpuṇāti, antogatameva hoti, ayaṃ ukkaṭṭhukkaṭṭho nāma. Ukkaṭṭhato upaḍḍhappamāṇo majjhimo. Majjhimato upaḍḍhappamāṇo omako. Tesampi vuttanayeneva pabhedo veditabbo. Iccetesu ukkaṭṭhukkaṭṭho ca omakomako cāti dve apattā, sesā satta pattā pamāṇayuttā nāmāti evaṃ pamāṇena yutto pamāṇiko, taṃ pamāṇikaṃ. Pattanti sattasu pattesu aññataraṃ pattaṃ. Pattassa attano santakatā, pamāṇayuttatā, adhiṭṭhānūpagatā, atirekapattatā, dasāhātikkamoti imānettha pañca aṅgāni. Paṭhamapattasikkhāpadaṃ.
25. யோ பி⁴க்கு² பஞ்சப³ந்த⁴னதோ ஊனபத்தே ஸதி பரங் பன நவங் பத்தங் விஞ்ஞாபேதி, தஸ்ஸபி பி⁴க்கு²னோ நிஸ்ஸக்³கி³யங் ஸியாதி ஸம்ப³ந்தோ⁴. தத்த² பரந்தி அஞ்ஞங், ‘‘நவங் பத்த’’ந்திமினா துல்யாதி⁴கரணங். அதி⁴ட்டா²னூபக³பத்தஸ்ஸ ஊனபஞ்சப³ந்த⁴னதா, அத்துத்³தே³ஸிகதா, கதவிஞ்ஞத்தி, தாய ச படிலாபோ⁴தி இமானெத்த² சத்தாரி அங்கா³னி. ஊனபஞ்சப³ந்த⁴னஸிக்கா²பத³ங்.
25. Yo bhikkhu pañcabandhanato ūnapatte sati paraṃ pana navaṃ pattaṃ viññāpeti, tassapi bhikkhuno nissaggiyaṃ siyāti sambandho. Tattha paranti aññaṃ, ‘‘navaṃ patta’’ntiminā tulyādhikaraṇaṃ. Adhiṭṭhānūpagapattassa ūnapañcabandhanatā, attuddesikatā, kataviññatti, tāya ca paṭilābhoti imānettha cattāri aṅgāni. Ūnapañcabandhanasikkhāpadaṃ.
26. யோ ஸப்பிதேலாதி³கங் பன பே⁴ஸஜ்ஜங் படிக்³க³ஹெத்வா ஸத்தாஹபரமங் ஸன்னிதி⁴காரகங் பு⁴ஞ்ஜந்தோ ஸத்தாஹங் அதிக்காமேதி , தஸ்ஸ நிஸ்ஸக்³கி³யங் ஸியாதி அத்தோ². தத்த² ஸப்பிதேலாதி³கந்தி எத்த² ஆதி³-ஸத்³தோ³ நவனீதமது⁴பா²ணிதங் ஸங்க³ண்ஹாதி. தத்த² ஸப்பி நாம க³வாதீ³னங் ஸப்பி, யேஸங் மங்ஸங் கப்பதி, தேஸங் ஸப்பி, ததா² நவனீதங். தேலங் நாம திலஸாஸபமது⁴கஏரண்ட³வஸாதீ³ஹி நிப்³ப³த்தங். மது⁴ நாம மக்கி²காமது⁴மேவ. உச்சு²ரஸங் உபாதா³ய பன அபக்கா வா அவத்து²கபக்கா வா ஸப்³பா³பி உச்சு²விகதி பா²ணிதந்தி வேதி³தப்³ப³ங். பே⁴ஸஜ்ஜவிதா⁴னஸிக்கா²பத³ங்.
26. Yo sappitelādikaṃ pana bhesajjaṃ paṭiggahetvā sattāhaparamaṃ sannidhikārakaṃ bhuñjanto sattāhaṃ atikkāmeti , tassa nissaggiyaṃ siyāti attho. Tattha sappitelādikanti ettha ādi-saddo navanītamadhuphāṇitaṃ saṅgaṇhāti. Tattha sappi nāma gavādīnaṃ sappi, yesaṃ maṃsaṃ kappati, tesaṃ sappi, tathā navanītaṃ. Telaṃ nāma tilasāsapamadhukaeraṇḍavasādīhi nibbattaṃ. Madhu nāma makkhikāmadhumeva. Ucchurasaṃ upādāya pana apakkā vā avatthukapakkā vā sabbāpi ucchuvikati phāṇitanti veditabbaṃ. Bhesajjavidhānasikkhāpadaṃ.
27. பி⁴க்கு²ஸ்ஸ சீவரங் த³த்வா புன தங் சீவரங் ஸகஸஞ்ஞாய அச்சி²ந்த³ந்தஸ்ஸ வா அச்சி²ந்தா³பயதோபி வா நிஸ்ஸக்³கி³யங் ஸியாதி யோஜனா. தத்த² த³த்வாதி வெய்யாவச்சாதீ³னி பச்சாஸீஸமானோ த³த்வா. அச்சி²ந்த³ந்தஸ்ஸாதி வெய்யாவச்சாதீ³னி அகரொந்தங் தி³ஸ்வா ப³லக்காரேன க³ண்ஹந்தஸ்ஸ, ததா² அச்சி²ந்தா³பயதோதி. விகப்பனூபக³சீவரதா, ஸாமங்தி³ன்னதா, ஸகஸஞ்ஞிதா, உபஸம்பன்னதா, கோத⁴வஸேன அச்சி²ந்த³னங் வா அச்சி²ந்தா³பனங் வாதி இமானெத்த² பஞ்ச அங்கா³னி. அச்சி²ந்த³னஸிக்கா²பத³ங்.
27. Bhikkhussa cīvaraṃ datvā puna taṃ cīvaraṃ sakasaññāya acchindantassa vā acchindāpayatopi vā nissaggiyaṃ siyāti yojanā. Tattha datvāti veyyāvaccādīni paccāsīsamāno datvā. Acchindantassāti veyyāvaccādīni akarontaṃ disvā balakkārena gaṇhantassa, tathā acchindāpayatoti. Vikappanūpagacīvaratā, sāmaṃdinnatā, sakasaññitā, upasampannatā, kodhavasena acchindanaṃ vā acchindāpanaṃ vāti imānettha pañca aṅgāni. Acchindanasikkhāpadaṃ.
28. அப்பவாரிதங் அஞ்ஞாதிங் க³ஹபதிங் ஸுத்தங் யாசித்வா ஞாதிப்பவாரிதே வஜ்ஜெத்வா தந்தவாயேஹி சீவரங் வாயாபெந்தஸ்ஸ நிஸ்ஸக்³கி³யங் ஸியாதி பிண்ட³த்தோ². தத்த² ஸுத்தந்தி ச²ப்³பி³த⁴ங் கோ²மஸுத்தாதி³கங் வா தேஸங் அனுலோமங் வா. யாசியாதி சீவரத்தா²ய யாசித்வா. சீவரத்தா²ய விஞ்ஞாபிதஸுத்தங், அத்துத்³தே³ஸிகதா, அகப்பியதந்தவாயேன அகப்பியவிஞ்ஞத்தியா வாயாபனந்தி இமானெத்த² தீணி அங்கா³னி. ஸுத்தவிஞ்ஞத்திஸிக்கா²பத³ங்.
28. Appavāritaṃ aññātiṃ gahapatiṃ suttaṃ yācitvā ñātippavārite vajjetvā tantavāyehi cīvaraṃ vāyāpentassa nissaggiyaṃ siyāti piṇḍattho. Tattha suttanti chabbidhaṃ khomasuttādikaṃ vā tesaṃ anulomaṃ vā. Yāciyāti cīvaratthāya yācitvā. Cīvaratthāya viññāpitasuttaṃ, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni. Suttaviññattisikkhāpadaṃ.
29. யோ பி⁴க்கு² ஸங்க⁴ஸ்ஸ பரிணதங் லாப⁴ங் ஜானந்தோ அத்தனோ பரிணாமேதி, தஸ்ஸ நிஸ்ஸக்³கி³யங் ஸியாதி அத்தோ². தத்த² ஜானந்தி ஜானந்தோ. லாப⁴ந்தி லபி⁴தப்³ப³ங் சீவராதி³வத்து²ங். பரிணதந்தி ஸங்க⁴ஸ்ஸ நின்னங் ஸங்க⁴ஸ்ஸ போணங் ஸங்க⁴ஸ்ஸ பப்³பா⁴ரங் ஹுத்வா டி²தங். அத்தனோ பரிணாமேதீதி ‘‘மய்ஹங் தே³தா²’’திஆதீ³னி வத³ந்தோ அத்தனி நின்னங் கரோதி. ஸங்கே⁴ பரிணதபா⁴வோ, தங் ஞத்வா அத்தனோ பரிணாமனங், படிலாபோ⁴தி இமானெத்த² தீணி அங்கா³னி. பரிணாமனஸிக்கா²பத³ங்.
29. Yo bhikkhu saṅghassa pariṇataṃ lābhaṃ jānanto attano pariṇāmeti, tassa nissaggiyaṃ siyāti attho. Tattha jānanti jānanto. Lābhanti labhitabbaṃ cīvarādivatthuṃ. Pariṇatanti saṅghassa ninnaṃ saṅghassa poṇaṃ saṅghassa pabbhāraṃ hutvā ṭhitaṃ. Attano pariṇāmetīti ‘‘mayhaṃ dethā’’tiādīni vadanto attani ninnaṃ karoti. Saṅghe pariṇatabhāvo, taṃ ñatvā attano pariṇāmanaṃ, paṭilābhoti imānettha tīṇi aṅgāni. Pariṇāmanasikkhāpadaṃ.
நிஸ்ஸக்³கி³யனித்³தே³ஸவண்ணனா நிட்டி²தா.
Nissaggiyaniddesavaṇṇanā niṭṭhitā.
