| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
க³ந்தா²ரம்ப⁴கதா²வண்ணனா
Ganthārambhakathāvaṇṇanā
(க) எத்தா²ஹ – கிமத்த²மாதி³தோவாயங் கா³தா² நிக்கி²த்தா, நனு யதா²தி⁴ப்பேதமேவ பகரணமாரப⁴னீயந்தி? வுச்சதே – ஸப்பயோஜனத்தா . ஸப்பயோஜனஞ்ஹி தங்த³ஸ்ஸனங் தாய ரதனத்தயப்பணாமாபி⁴தெ⁴ய்யகரணப்பகாரப்பயோஜனாபி⁴தா⁴னஸந்த³ஸ்ஸனதோ. தானி ச பன ஸப்பயோஜனானி அனந்தராயேன க³ந்த²பரிஸமாபனாதி³ப்பயோஜனானமபி⁴னிப்பா²த³னதோ. ததா² ஹி ஸோதூனமத்தனோ ச யதா²தி⁴ப்பேதத்த²னிப்பா²த³னங் ரதனத்தயப்பணாமகரணப்பயோஜனங். விதி³தாபி⁴தெ⁴ய்யஸ்ஸ க³ந்த²ஸ்ஸ விஞ்ஞூனமாத³ரணீயதா அபி⁴தெ⁴ய்யகத²னப்பயோஜனங். ஸோதுஜனஸமுஸ்ஸாஹஜனநங் கரணப்பகாரப்பயோஜனகத²னப்பயோஜனங். வோஹாரஸுக²தா பன அபி⁴தா⁴னகத²னப்பயோஜனங்.
(Ka) etthāha – kimatthamāditovāyaṃ gāthā nikkhittā, nanu yathādhippetameva pakaraṇamārabhanīyanti? Vuccate – sappayojanattā . Sappayojanañhi taṃdassanaṃ tāya ratanattayappaṇāmābhidheyyakaraṇappakārappayojanābhidhānasandassanato. Tāni ca pana sappayojanāni anantarāyena ganthaparisamāpanādippayojanānamabhinipphādanato. Tathā hi sotūnamattano ca yathādhippetatthanipphādanaṃ ratanattayappaṇāmakaraṇappayojanaṃ. Viditābhidheyyassa ganthassa viññūnamādaraṇīyatā abhidheyyakathanappayojanaṃ. Sotujanasamussāhajananaṃ karaṇappakārappayojanakathanappayojanaṃ. Vohārasukhatā pana abhidhānakathanappayojanaṃ.
தத்த² வந்தி³த்வா ரதனத்தயந்தி இமினா ரதனத்தயப்பணாமோ த³ஸ்ஸிதோ, கு²த்³த³ஸிக்க²ந்தி இமினா கு²த்³த³பூ⁴தானங் ஸிக்கா²னங் இத⁴ படிபாதே³தப்³ப³தாதீ³பனேன அபி⁴தெ⁴ய்யங், அபி⁴தெ⁴ய்யோ ச நாமேஸ ஸமுதி³தேன ஸத்தே²ன வசனீயத்தோ²தி. அபி⁴தா⁴னஞ்ச பன இமினாவ த³ஸ்ஸிதங் தேன அத்தா²னுக³தஸமஞ்ஞாபரிதீ³பனதோ. ஸமாதிகந்தி இமினா கரணப்பகாரோ, கு²த்³த³ஸிக்க²ந்தி இமினா ச, தேன கு²த்³த³பூ⁴தானங் ஸிக்கா²னங் இத⁴ த³ஸ்ஸேதப்³ப³பா⁴வப்பகாஸனதோ. ஆதி³தோ உபஸம்பன்ன ஸிக்கி²தப்³ப³ந்தி இமினா பயோஜனபயோஜனங் பன இமினாவ ஸாமத்தி²யதோ த³ஸ்ஸிதமேவ, தாஸங் ஸிக்கி²தப்³ப³ப்பகாஸனேன ஹி ஸிக்க²னே ஸதி தம்மூலிகாய தி³ட்ட²த⁴ம்மிகஸம்பராயிகத்த²னிப்ப²த்தியா ஸங்ஸிஜ்ஜ²னதோ. பகரணப்பயோஜனானங் ஸாத⁴னஸாதி⁴யலக்க²ணோ ஸம்ப³ந்தோ⁴ தன்னிஸ்ஸயத³ஸ்ஸனேனேவ த³ஸ்ஸிதோயேவாதி அயமெத்த² ஸமுதா³யத்தோ².
Tattha vanditvā ratanattayanti iminā ratanattayappaṇāmo dassito, khuddasikkhanti iminā khuddabhūtānaṃ sikkhānaṃ idha paṭipādetabbatādīpanena abhidheyyaṃ, abhidheyyo ca nāmesa samuditena satthena vacanīyatthoti. Abhidhānañca pana imināva dassitaṃ tena atthānugatasamaññāparidīpanato. Samātikanti iminā karaṇappakāro, khuddasikkhanti iminā ca, tena khuddabhūtānaṃ sikkhānaṃ idha dassetabbabhāvappakāsanato. Ādito upasampanna sikkhitabbanti iminā payojanapayojanaṃ pana imināva sāmatthiyato dassitameva, tāsaṃ sikkhitabbappakāsanena hi sikkhane sati tammūlikāya diṭṭhadhammikasamparāyikatthanipphattiyā saṃsijjhanato. Pakaraṇappayojanānaṃ sādhanasādhiyalakkhaṇo sambandho tannissayadassaneneva dassitoyevāti ayamettha samudāyattho.
அயங் பனெத்தா²வயவத்தோ² – ரதனத்தயங் வந்தி³த்வா கு²த்³த³ஸிக்க²ங் பவக்கா²மீதி ஸம்ப³ந்தோ⁴. ரதிஜனநட்டே²ன ரதனானி, பு³த்³த⁴த⁴ம்மஸங்கா⁴னமேதங் அதி⁴வசனங். அத² வா சித்தீகதாதி³னா காரணேன ரதனானி, பு³த்³தா⁴த³யோவ ரதனானி. ததா² ச வுத்தங் –
Ayaṃ panetthāvayavattho – ratanattayaṃ vanditvā khuddasikkhaṃ pavakkhāmīti sambandho. Ratijananaṭṭhena ratanāni, buddhadhammasaṅghānametaṃ adhivacanaṃ. Atha vā cittīkatādinā kāraṇena ratanāni, buddhādayova ratanāni. Tathā ca vuttaṃ –
‘‘சித்தீகதங் மஹக்³க⁴ஞ்ச, அதுலங் து³ல்லப⁴த³ஸ்ஸனங்;
‘‘Cittīkataṃ mahagghañca, atulaṃ dullabhadassanaṃ;
அனோமஸத்தபரிபோ⁴க³ங், ரதனங் தேன வுச்சதீ’’தி. (தீ³॰ நி॰ அட்ட²॰ 2.33; ஸங்॰ நி॰ அட்ட²॰ 3.5.223; கு²॰ பா॰ அட்ட²॰ 3; ஸு॰ நி॰ அட்ட²॰ 1.226; உதா³॰ அட்ட²॰ 45; மஹானி॰ அட்ட²॰ 50);
Anomasattaparibhogaṃ, ratanaṃ tena vuccatī’’ti. (dī. ni. aṭṭha. 2.33; saṃ. ni. aṭṭha. 3.5.223; khu. pā. aṭṭha. 3; su. ni. aṭṭha. 1.226; udā. aṭṭha. 45; mahāni. aṭṭha. 50);
தயோ அவயவா அஸ்ஸாதி தயங், ஸமுதா³யாபெக்க²ங் ஏகவசனங், அவயவவினிமுத்தஸ்ஸ பன ஸமுதா³யஸ்ஸ அபா⁴வதோ தீணி ஏவ ரதனானி வுச்சந்தி. ரதனானங் தயங் ரதனத்தயங். வந்தி³த்வாதி தீஹி த்³வாரேஹி நமஸ்ஸித்வா. ‘‘திஸ்ஸோ இமா, பி⁴க்க²வே, வந்த³னா காயேன வந்த³தி, வசஸா வந்த³தி, மனஸா வந்த³தீ’’தி (அ॰ நி॰ 3.155) ஹி வுத்தங். தத்த² விஞ்ஞத்திங் அனுப்பாதெ³த்வா கேவலங் ரதனத்தயகு³ணானுஸ்ஸரணவஸேன மனொத்³வாரே ப³ஹுலப்பவத்தா குஸலசேதனா மனொத்³வாரவந்த³னா. தங் தங் விஞ்ஞத்திங் உப்பாதெ³த்வா பன பவத்தா காயவசீத்³வாரவந்த³னா. ஸிக்கி²தப்³பா³தி ஸிக்கா², அதி⁴ஸீலஅதி⁴சித்தஅதி⁴பஞ்ஞாவஸேன திஸ்ஸோ ஸிக்கா². ஸிக்க²னஞ்செத்த² யதா²க்கமங் ஸீலாதி³த⁴ம்மானங் ஸங்வரணவஸேன, ஏகாரம்மணே சித்தசேதஸிகானங் ஸமாதா⁴னவஸேன, ஆரம்மணஜானநலக்க²ணப்படிவேத⁴மக்³க³பாதுபா⁴வபாபனவஸேன ச ஆஸேவனங் த³ட்ட²ப்³ப³ங். அஞ்ஞத்த² ப³ஹுவிதா⁴ ஸிக்கா², இத⁴ து ஸங்கே²பனயத்தா அப்பகாதி³அனேகத்த²ஸம்ப⁴வேபி கு²த்³த³-ஸத்³த³ஸ்ஸ அப்பகத்தோ²வெத்த² யுத்ததரோதி கு²த்³தா³ அப்பகா ஸிக்கா²தி கு²த்³த³ஸிக்கா². இத⁴ பன கு²த்³த³ஸிக்கா²ப்பகாஸகோ க³ந்தோ² தப்³போ³ஹாரூபசாரதோ இத்தி²லிங்க³வஸேன ‘‘கு²த்³த³ஸிக்கா²’’தி வுச்சதி யதா² ‘‘வருணானக³ர’’ந்தி. தங் கு²த்³த³ஸிக்க²ங். பவக்கா²மீதி கதெ²ஸ்ஸாமி.
Tayo avayavā assāti tayaṃ, samudāyāpekkhaṃ ekavacanaṃ, avayavavinimuttassa pana samudāyassa abhāvato tīṇi eva ratanāni vuccanti. Ratanānaṃ tayaṃ ratanattayaṃ. Vanditvāti tīhi dvārehi namassitvā. ‘‘Tisso imā, bhikkhave, vandanā kāyena vandati, vacasā vandati, manasā vandatī’’ti (a. ni. 3.155) hi vuttaṃ. Tattha viññattiṃ anuppādetvā kevalaṃ ratanattayaguṇānussaraṇavasena manodvāre bahulappavattā kusalacetanā manodvāravandanā. Taṃ taṃ viññattiṃ uppādetvā pana pavattā kāyavacīdvāravandanā. Sikkhitabbāti sikkhā, adhisīlaadhicittaadhipaññāvasena tisso sikkhā. Sikkhanañcettha yathākkamaṃ sīlādidhammānaṃ saṃvaraṇavasena, ekārammaṇe cittacetasikānaṃ samādhānavasena, ārammaṇajānanalakkhaṇappaṭivedhamaggapātubhāvapāpanavasena ca āsevanaṃ daṭṭhabbaṃ. Aññattha bahuvidhā sikkhā, idha tu saṅkhepanayattā appakādianekatthasambhavepi khudda-saddassa appakatthovettha yuttataroti khuddā appakā sikkhāti khuddasikkhā. Idha pana khuddasikkhāppakāsako gantho tabbohārūpacārato itthiliṅgavasena ‘‘khuddasikkhā’’ti vuccati yathā ‘‘varuṇānagara’’nti. Taṃ khuddasikkhaṃ. Pavakkhāmīti kathessāmi.
கீதி³ஸந்தி ஆஹ ‘‘ஆதி³தோ உபஸம்பன்னஸிக்கி²தப்³ப³’’ந்திஆதி³. ஆதி³-ஸத்³தோ³யமத்தி² அவயவவசனோ யதா² ‘‘ஸப்³பா³தீ³னி ஸப்³ப³னாமானீ’’தி. அத்தி² அபாதா³னவசனோ யதா² ‘‘பப்³ப³தாதீ³னி கெ²த்தானீ’’தி. தத்தா²வயவவாசீ கம்மஸாத⁴னோ ‘‘ஆதி³யதீத்யாதீ³’’தி. இதரோ அபாதா³னஸாத⁴னோ ‘‘ஆதி³யதி ஏதஸ்மாத்யாதீ³’’தி . தத்த² யோ அவயவவசனோ, தஸ்ஸேத³ங் க³ஹணங், தஸ்மா உபஸம்பன்னக்க²ணம்பி அந்தோ கத்வா ஆதி³பூ⁴தா உபஸம்பன்னக்க²ணதோயேவ பட்டா²யாதி ஏவமெத்த² அத்தோ² த³ட்ட²ப்³போ³. ஏவ-ஸத்³தோ³ பனெத்த² ஸப்³ப³வாக்யானங் அவதா⁴ரணப²லத்தா லப்³ப⁴தி. தோ-பச்சயோ அவதி⁴ம்ஹியேவ , ந ஆதா⁴ரே. தத்த² ஹி தோபச்சயே ஆதா⁴ரே வத்தமானே ஆதி³ம்ஹியேவ மஜ்ஜ²அந்தானங் அவயவபூ⁴தே உபஸம்பன்னக்க²ணேயேவாதி அத்தோ² ப⁴வெய்ய, ததா² ஸதி அவதா⁴ரணனிச்ச²யோ நியமோதி அத்த²ந்தரத்தா ஆதி³க்க²ணனியமேன மஜ்ஜா²த³யோ நிவத்தியெய்யுங். அபாதா³னவசனஸ்ஸாபி க³ஹணே அவதி⁴பூ⁴தோ உபஸம்பன்னக்க²ணோ நிவத்தியெய்ய ‘‘பப்³ப³தாதீ³னி கெ²த்தானீ’’தி எத்த² ஆதி³பூ⁴தபப்³ப³தபரிச்சாகே³ன கெ²த்தக்³க³ஹணங் வியாதி த³ட்ட²ப்³ப³ங். டீகாயங் பன ஆதா⁴ரத்தோ²பி வுத்தோ, ஸோ யதா²வுத்ததோ³ஸங் நாதிக³ச்ச²தி. ஸப்³ப³த்த² ‘‘டீகாய’’ந்தி ச வுத்தே எத்தே²வ புராணடீகாயந்தி க³ஹேதப்³ப³ங். ஆதி³தோதி இமினா இத³ங் தீ³பேதி – அதிது³ல்லப⁴ங் க²ணஸமவாயங் லபி⁴த்வா ஆலஸியதோ³ஸேன அப்படிபஜ்ஜந்தேஹி ச அஞ்ஞாணதோ³ஸேன அஞ்ஞதா² படிபஜ்ஜந்தேஹி ச அஹுத்வா ஆதி³தோ பட்டா²ய நிரந்தரமேவ தீஸு ஸிக்கா²ஸு ஸம்மாபடிபஜ்ஜனவஸேன ஆத³ரோ ஜனேதப்³போ³தி.
Kīdisanti āha ‘‘ādito upasampannasikkhitabba’’ntiādi. Ādi-saddoyamatthi avayavavacano yathā ‘‘sabbādīni sabbanāmānī’’ti. Atthi apādānavacano yathā ‘‘pabbatādīni khettānī’’ti. Tatthāvayavavācī kammasādhano ‘‘ādiyatītyādī’’ti. Itaro apādānasādhano ‘‘ādiyati etasmātyādī’’ti . Tattha yo avayavavacano, tassedaṃ gahaṇaṃ, tasmā upasampannakkhaṇampi anto katvā ādibhūtā upasampannakkhaṇatoyeva paṭṭhāyāti evamettha attho daṭṭhabbo. Eva-saddo panettha sabbavākyānaṃ avadhāraṇaphalattā labbhati. To-paccayo avadhimhiyeva , na ādhāre. Tattha hi topaccaye ādhāre vattamāne ādimhiyeva majjhaantānaṃ avayavabhūte upasampannakkhaṇeyevāti attho bhaveyya, tathā sati avadhāraṇanicchayo niyamoti atthantarattā ādikkhaṇaniyamena majjhādayo nivattiyeyyuṃ. Apādānavacanassāpi gahaṇe avadhibhūto upasampannakkhaṇo nivattiyeyya ‘‘pabbatādīni khettānī’’ti ettha ādibhūtapabbatapariccāgena khettaggahaṇaṃ viyāti daṭṭhabbaṃ. Ṭīkāyaṃ pana ādhāratthopi vutto, so yathāvuttadosaṃ nātigacchati. Sabbattha ‘‘ṭīkāya’’nti ca vutte ettheva purāṇaṭīkāyanti gahetabbaṃ. Āditoti iminā idaṃ dīpeti – atidullabhaṃ khaṇasamavāyaṃ labhitvā ālasiyadosena appaṭipajjantehi ca aññāṇadosena aññathā paṭipajjantehi ca ahutvā ādito paṭṭhāya nirantarameva tīsu sikkhāsu sammāpaṭipajjanavasena ādaro janetabboti.
உபஸம்பன்னேன உபஸம்பன்னாய ச ஸிக்கி²தப்³ப³ங் ஆஸேவிதப்³ப³ந்தி உபஸம்பன்னஸிக்கி²தப்³ப³ங், ஏகஸேஸனயேன உபஸம்பன்னதாஸாமஞ்ஞேன வா உபஸம்பன்னாயபி எத்தே²வாவிரோதோ⁴தி உபஸம்பன்னேன ஸிக்கி²தப்³ப³ந்தி ஸமாஸோ. நனு அதி⁴ஸீலாத³யோவ ஸிக்கி²தப்³பா³, ஏவங் ஸதி கத²ங் பகரணங் ஸிக்கி²தப்³ப³த்தேன வுத்தந்தி? நாயங் தோ³ஸோ, ஸிக்கா²ய ஸிக்கி²தப்³ப³த்தே ஸதி தத்³தீ³பகக³ந்த²ஸ்ஸாபி ஆஸேவிதப்³ப³தா ஆபஜ்ஜதீதி. ஸுக²க்³க³ஹணத்த²ங் வத்தப்³ப³வினிச்ச²யங் ஸகலம்பி ஸங்க³ஹெத்வா மாதிகாய ட²பனதோ ஸஹ மாதிகாயாதி ஸமாதிகங். தக்³கு³ணஸங்விஞ்ஞாணோயங் ப³ஹுப்³பீ³ஹி தஸ்ஸ கு²த்³த³ஸிக்கா²ஸங்கா²தஸ்ஸ அஞ்ஞபத³த்த²ஸ்ஸ யோ கு³ணோ மாதிகாஸங்கா²தங் விஸேஸனங், தஸ்ஸ இத⁴ விஞ்ஞாயமானத்தா. ஸுகே²னேவ ஹி க³ஹணங் ஸியா மாதிகானுஸாரேன தங் தங் வினிச்ச²யங் ஓலோகெந்தானங் ஸங்ஸயாபக³மதோ.
Upasampannena upasampannāya ca sikkhitabbaṃ āsevitabbanti upasampannasikkhitabbaṃ, ekasesanayena upasampannatāsāmaññena vā upasampannāyapi etthevāvirodhoti upasampannena sikkhitabbanti samāso. Nanu adhisīlādayova sikkhitabbā, evaṃ sati kathaṃ pakaraṇaṃ sikkhitabbattena vuttanti? Nāyaṃ doso, sikkhāya sikkhitabbatte sati taddīpakaganthassāpi āsevitabbatā āpajjatīti. Sukhaggahaṇatthaṃ vattabbavinicchayaṃ sakalampi saṅgahetvā mātikāya ṭhapanato saha mātikāyāti samātikaṃ. Tagguṇasaṃviññāṇoyaṃ bahubbīhi tassa khuddasikkhāsaṅkhātassa aññapadatthassa yo guṇo mātikāsaṅkhātaṃ visesanaṃ, tassa idha viññāyamānattā. Sukheneva hi gahaṇaṃ siyā mātikānusārena taṃ taṃ vinicchayaṃ olokentānaṃ saṃsayāpagamato.
