| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
மாதிகாவண்ணனா
Mātikāvaṇṇanā
(க²-ஜ) இதா³னி ‘‘ஸமாதிக’’ந்தி வுத்தத்தா மாதிகாபதா³னி தாவ உத்³தி³ஸிதுங் ‘‘பாராஜிகா ச சத்தாரோ’’திஆதி³ ஆரத்³த⁴ங். எத்தா²ஹ – தீஸு ஸிக்கா²ஸு அதி⁴ஸீலஸிக்கா²வ கஸ்மா பட²மங் வுத்தாதி? ஸப்³ப³ஸிக்கா²னங் மூலபூ⁴தத்தா. ‘‘ஸீலே பதிட்டா²ய நரோ ஸபஞ்ஞோ, சித்தங் பஞ்ஞஞ்ச பா⁴வய’’ந்தி (ஸங்॰ நி॰ 1.23; பேடகோ॰ 22; மி॰ ப॰ 2.1.9) ஹி வுத்தங். தத்ராபி மஹாஸாவஜ்ஜத்தா மூலச்சே²ஜ்ஜவஸேன பவத்தனதோ ஸப்³ப³பட²மங் ஜானிதப்³பா³தி பாராஜிகாவ பட²மங் வுத்தாதி வேதி³தப்³ப³ங். மாதிகாபதா³னங் பன அத்தோ² தஸ்ஸ தஸ்ஸ மாதிகாபத³ஸ்ஸ நித்³தே³ஸவஸேனேவ விஞ்ஞாயதீதி ந இத⁴ விஸுங் த³ஸ்ஸயிஸ்ஸாம. அவிஞ்ஞாயமானங் பன தத்த² தத்தே²வ பகாஸயிஸ்ஸாம.
(Kha-ja) idāni ‘‘samātika’’nti vuttattā mātikāpadāni tāva uddisituṃ ‘‘pārājikā ca cattāro’’tiādi āraddhaṃ. Etthāha – tīsu sikkhāsu adhisīlasikkhāva kasmā paṭhamaṃ vuttāti? Sabbasikkhānaṃ mūlabhūtattā. ‘‘Sīle patiṭṭhāya naro sapañño, cittaṃ paññañca bhāvaya’’nti (saṃ. ni. 1.23; peṭako. 22; mi. pa. 2.1.9) hi vuttaṃ. Tatrāpi mahāsāvajjattā mūlacchejjavasena pavattanato sabbapaṭhamaṃ jānitabbāti pārājikāva paṭhamaṃ vuttāti veditabbaṃ. Mātikāpadānaṃ pana attho tassa tassa mātikāpadassa niddesavaseneva viññāyatīti na idha visuṃ dassayissāma. Aviññāyamānaṃ pana tattha tattheva pakāsayissāma.
இதா³னி உத்³தி³ட்ட²பதா³னுக்கமேன நித்³தே³ஸங் ஆரப⁴ந்தோ ‘‘பாராஜிகா ச சத்தாரோ’’தி பட²மங் மாதிகாபத³ங் உத்³த⁴ரி. ஏவமுபரிபி. இதா³னி பாராஜிகாயோ உத்³தி³ஸித்வா உத்³தி³ட்ட²பதா³னுக்கமேன நித்³தே³ஸங் ஆரப⁴ந்தோ ‘‘க³ருகா நவா’’தி து³தியங் பத³ங் உத்³த⁴ரீதிஆதி³னா யதா²யோக³ங் வத்தப்³ப³ங். தத்த² ஸிக்கா²பத³ங் அதிக்கமித்வா ஆபத்திங் ஆபன்னா புக்³க³லா தாய பராஜயந்தீதி பராஜியா. தேயேவ பாராஜிகா உபஸக்³க³ஸ்ஸ வுத்³தி⁴ங் கத்வா ய-காரஸ்ஸ க-காரகரணேன. தே பன க³ணனபரிச்சே²த³வஸேன சத்தாரோதி அத்தோ².
Idāni uddiṭṭhapadānukkamena niddesaṃ ārabhanto ‘‘pārājikā ca cattāro’’ti paṭhamaṃ mātikāpadaṃ uddhari. Evamuparipi. Idāni pārājikāyo uddisitvā uddiṭṭhapadānukkamena niddesaṃ ārabhanto ‘‘garukā navā’’ti dutiyaṃ padaṃ uddharītiādinā yathāyogaṃ vattabbaṃ. Tattha sikkhāpadaṃ atikkamitvā āpattiṃ āpannā puggalā tāya parājayantīti parājiyā. Teyeva pārājikā upasaggassa vuddhiṃ katvā ya-kārassa ka-kārakaraṇena. Te pana gaṇanaparicchedavasena cattāroti attho.
