| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
។ នមោ តស្ស ភគវតោ អរហតោ សម្មាសម្ពុទ្ធស្ស។
Namo tassa bhagavato arahato sammāsambuddhassa
វិនយបិដកេ
Vinayapiṭake
វិមតិវិនោទនី-ដីកា (បឋមោ ភាគោ)
Vimativinodanī-ṭīkā (paṭhamo bhāgo)
គន្ថារម្ភកថា
Ganthārambhakathā
ករុណាបុណ្ណហទយំ , សុគតំ ហិតទាយកំ;
Karuṇāpuṇṇahadayaṃ , sugataṃ hitadāyakaṃ;
នត្វា ធម្មញ្ច វិមលំ, សង្ឃញ្ច គុណសម្បទំ។
Natvā dhammañca vimalaṃ, saṅghañca guṇasampadaṃ.
វណ្ណនា និបុណាហេសុំ, វិនយដ្ឋកថាយ យា;
Vaṇṇanā nipuṇāhesuṃ, vinayaṭṭhakathāya yā;
បុព្ពកេហិ កតា នេកា, នានានយសមាកុលា។
Pubbakehi katā nekā, nānānayasamākulā.
តត្ថ កាចិ សុវិត្ថិណ្ណា, ទុក្ខោគាហា ច គន្ថតោ;
Tattha kāci suvitthiṇṇā, dukkhogāhā ca ganthato;
វិរទ្ធា អត្ថតោ ចាបិ, សទ្ទតោ ចាបិ កត្ថចិ។
Viraddhā atthato cāpi, saddato cāpi katthaci.
កាចិ កត្ថចិ អបុណ្ណា, កាចិ សម្មោហការិនី;
Kāci katthaci apuṇṇā, kāci sammohakārinī;
តស្មា តាហិ សមាទាយ, សារំ សង្ខេបរូបតោ។
Tasmā tāhi samādāya, sāraṃ saṅkheparūpato.
លីនត្ថញ្ច បកាសេន្តោ, វិរទ្ធញ្ច វិសោធយំ;
Līnatthañca pakāsento, viraddhañca visodhayaṃ;
ឧបដ្ឋិតនយញ្ចាបិ, តត្ថ តត្ថ បកាសយំ។
Upaṭṭhitanayañcāpi, tattha tattha pakāsayaṃ.
វិនយេ វិមតិំ ឆេតុំ, ភិក្ខូនំ លហុវុត្តិនំ;
Vinaye vimatiṃ chetuṃ, bhikkhūnaṃ lahuvuttinaṃ;
សង្ខេបេន លិខិស្សាមិ, តស្សា លីនត្ថវណ្ណនំ។
Saṅkhepena likhissāmi, tassā līnatthavaṇṇanaṃ.
