| Library / Tipiṭaka / តិបិដក • Tipiṭaka / នេត្តិវិភាវិនី • Nettivibhāvinī |
។ នមោ តស្ស ភគវតោ អរហតោ សម្មាសម្ពុទ្ធស្ស។
Namo tassa bhagavato arahato sammāsambuddhassa
ខុទ្ទកនិកាយេ
Khuddakanikāye
នេត្តិវិភាវិនី
Nettivibhāvinī
គន្ថារម្ភកថា
Ganthārambhakathā
យជិតព្ពំ យជិត្វាន, នមិតព្ពំ នមាមហំ;
Yajitabbaṃ yajitvāna, namitabbaṃ namāmahaṃ;
យជនាទ្យានុភាវេន, អន្តរាយេ ជហំ សទា។
Yajanādyānubhāvena, antarāye jahaṃ sadā.
យេន យា រចិតា នេត្តិ, យេន សា អនុមោទិតា;
Yena yā racitā netti, yena sā anumoditā;
យេហិ សំវណ្ណនា កតា, តេសានុភាវនិស្សិតោ។
Yehi saṃvaṇṇanā katā, tesānubhāvanissito.
កិញ្ចិ កិញ្ចិ សរិត្វាន, លីនាលីនានុសន្ធ្យាទិំ;
Kiñci kiñci saritvāna, līnālīnānusandhyādiṃ;
ករិស្សំ ជិនសុត្តានំ, ហិតំ នេត្តិវិភាវនំ។
Karissaṃ jinasuttānaṃ, hitaṃ nettivibhāvanaṃ.
អប្បមេយ្យគុណោ មហាធម្មរាជវ្ហយោ ភវេ;
Appameyyaguṇo mahādhammarājavhayo bhave;
អច្ឆរិយោ អព្ភុតោ យោ, ពោធិសម្ភារបូរណោ។
Acchariyo abbhuto yo, bodhisambhārapūraṇo.
នានារដ្ឋិស្សរិស្សរោ, សេដ្ឋោ សាសនបគ្គហោ;
Nānāraṭṭhissarissaro, seṭṭho sāsanapaggaho;
បាសំសរាជបាសំសោ, នរាចិន្តេយ្យចិន្តកោ។
Pāsaṃsarājapāsaṃso, narācinteyyacintako.
ចិន្តិតការកោ រាជា, សិរដ្ឋិមាលបាលកោ;
Cintitakārako rājā, siraṭṭhimālapālako;
អជេយ្យជេយ្យកោ មហាចេត្យាទិការកោ សទា។
Ajeyyajeyyako mahācetyādikārako sadā.
អស្សាមច្ចេន ព្យត្តេន, ជិនចក្កហិតត្ថិនា;
Assāmaccena byattena, jinacakkahitatthinā;
អនន្តសុតិនាមេន, សក្កច្ចំ អភិយាចិតោ។
Anantasutināmena, sakkaccaṃ abhiyācito.
កាមំ សំវណ្ណនា កតា, ថេរាសភេហិ គម្ភីរា;
Kāmaṃ saṃvaṇṇanā katā, therāsabhehi gambhīrā;
គម្ភីរត្តា តុ ជានិតុំ, ជិនបុត្តេហិ ទុក្ករា។
Gambhīrattā tu jānituṃ, jinaputtehi dukkarā.
តស្មា យាចិតានុរូបេន, ករិស្សំ សាទរំ សុណ;
Tasmā yācitānurūpena, karissaṃ sādaraṃ suṇa;
សិស្សសិក្ខនយានុគំ, យោត្តំ នេត្តិវិភាវនន្តិ។
Sissasikkhanayānugaṃ, yottaṃ nettivibhāvananti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / នេត្តិប្បករណ-អដ្ឋកថា • Nettippakaraṇa-aṭṭhakathā / គន្ថារម្ភកថា • Ganthārambhakathā
ដីកា • Tīkā / សុត្តបិដក (ដីកា) • Suttapiṭaka (ṭīkā) / ខុទ្ទកនិកាយ (ដីកា) • Khuddakanikāya (ṭīkā) / នេត្តិប្បករណ-ដីកា • Nettippakaraṇa-ṭīkā / គន្ថារម្ភកថាវណ្ណនា • Ganthārambhakathāvaṇṇanā
