| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
॥ नमो तस्स भगवतो अरहतो सम्मासम्बुद्धस्स॥
Namo tassa bhagavato arahato sammāsambuddhassa
खुद्दसिक्खा-मूलसिक्खा
Khuddasikkhā-mūlasikkhā
खुद्दसिक्खा
Khuddasikkhā
गन्थारम्भकथा
Ganthārambhakathā
(क)
(Ka)
आदितो उपसम्पन्न-सिक्खितब्बं समातिकं।
Ādito upasampanna-sikkhitabbaṃ samātikaṃ;
खुद्दसिक्खं पवक्खामि, वन्दित्वा रतनत्तयं॥
Khuddasikkhaṃ pavakkhāmi, vanditvā ratanattayaṃ.
तत्रायं मातिका –
Tatrāyaṃ mātikā –
(ख)
(Kha)
पाराजिका च चत्तारो, गरुका नव चीवरं।
Pārājikā ca cattāro, garukā nava cīvaraṃ;
रजनानि च पत्तो च, थालका च पवारणा॥
Rajanāni ca patto ca, thālakā ca pavāraṇā.
(ग)
(Ga)
कालिका च पटिग्गाहो, मंसेसु च अकप्पियं।
Kālikā ca paṭiggāho, maṃsesu ca akappiyaṃ;
निस्सग्गियानि पाचित्ति, समणकप्प भूमियो॥
Nissaggiyāni pācitti, samaṇakappa bhūmiyo.
(घ)
(Gha)
उपज्झाचरियवत्तानि, वच्चप्पस्सावठानिकं।
Upajjhācariyavattāni, vaccappassāvaṭhānikaṃ;
आपुच्छकरणं नग्गो, न्हानकप्पो अवन्दियो॥
Āpucchakaraṇaṃ naggo, nhānakappo avandiyo.
(ङ)
(Ṅa)
चम्मं उपाहना चेव, अनोलोकियमञ्जनी।
Cammaṃ upāhanā ceva, anolokiyamañjanī;
अकप्पियसयनानि, समानासनिकोपि च॥
Akappiyasayanāni, samānāsanikopi ca.
(च)
(Ca)
असंवासिको च कम्मं, मिच्छाजीवविवज्जना।
Asaṃvāsiko ca kammaṃ, micchājīvavivajjanā;
वत्तं विकप्पना चेव, निस्सयो कायबन्धनं॥
Vattaṃ vikappanā ceva, nissayo kāyabandhanaṃ.
(छ)
(Cha)
पथवी च परिक्खारो, भेसज्जुग्गहदूसनं।
Pathavī ca parikkhāro, bhesajjuggahadūsanaṃ;
वस्सूपनायिका चेवावेभङ्गियं पकिण्णकं॥
Vassūpanāyikā cevāvebhaṅgiyaṃ pakiṇṇakaṃ.
(ज)
(Ja)
देसना छन्ददानादि, उपोसथप्पवारणा।
Desanā chandadānādi, uposathappavāraṇā;
संवरो सुद्धि सन्तोसो, चतुरक्खा विपस्सनाति॥
Saṃvaro suddhi santoso, caturakkhā vipassanāti.
