| Library / Tipiṭaka / তিপিটক • Tipiṭaka / সুত্তনিপাত-অট্ঠকথা • Suttanipāta-aṭṭhakathā |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
খুদ্দকনিকাযে
Khuddakanikāye
সুত্তনিপাত-অট্ঠকথা
Suttanipāta-aṭṭhakathā
(পঠমো ভাগো)
(Paṭhamo bhāgo)
গন্থারম্ভকথা
Ganthārambhakathā
উত্তমং ৰন্দনেয্যানং, ৰন্দিত্ৰা রতনত্তযং।
Uttamaṃ vandaneyyānaṃ, vanditvā ratanattayaṃ;
যো খুদ্দকনিকাযম্হি, খুদ্দাচারপ্পহাযিনা॥
Yo khuddakanikāyamhi, khuddācārappahāyinā.
দেসিতো লোকনাথেন, লোকনিস্সরণেসিনা।
Desito lokanāthena, lokanissaraṇesinā;
তস্স সুত্তনিপাতস্স, করিস্সামত্থৰণ্ণনং॥
Tassa suttanipātassa, karissāmatthavaṇṇanaṃ.
অযং সুত্তনিপাতো চ, খুদ্দকেস্ৰেৰ ওগধো।
Ayaṃ suttanipāto ca, khuddakesveva ogadho;
যস্মা তস্মা ইমস্সাপি, করিস্সামত্থৰণ্ণনং॥
Yasmā tasmā imassāpi, karissāmatthavaṇṇanaṃ.
গাথাসতসমাকিণ্ণো, গেয্যব্যাকরণঙ্কিতো।
Gāthāsatasamākiṇṇo, geyyabyākaraṇaṅkito;
কস্মা সুত্তনিপাতোতি, সঙ্খমেস গতোতি চে॥
Kasmā suttanipātoti, saṅkhamesa gatoti ce.
সুৰুত্ততো সৰনতো, অত্থানং সুট্ঠু তাণতো।
Suvuttato savanato, atthānaṃ suṭṭhu tāṇato;
সূচনা সূদনা চেৰ, যস্মা সুত্তং পৰুচ্চতি॥
Sūcanā sūdanā ceva, yasmā suttaṃ pavuccati.
তথারূপানি সুত্তানি, নিপাতেত্ৰা ততো ততো।
Tathārūpāni suttāni, nipātetvā tato tato;
সমূহতো অযং তস্মা, সঙ্খমেৰমুপাগতো॥
Samūhato ayaṃ tasmā, saṅkhamevamupāgato.
সব্বানি চাপি সুত্তানি, পমাণন্তেন তাদিনো।
Sabbāni cāpi suttāni, pamāṇantena tādino;
ৰচনানি অযং তেসং, নিপাতো চ যতো ততো॥
Vacanāni ayaṃ tesaṃ, nipāto ca yato tato.
অঞ্ঞসঙ্খানিমিত্তানং, ৰিসেসানমভাৰতো।
Aññasaṅkhānimittānaṃ, visesānamabhāvato;
সঙ্খং সুত্তনিপাতোতি, এৰমেৰ সমজ্ঝগাতি॥
Saṅkhaṃ suttanipātoti, evameva samajjhagāti.
