| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤. គន្ធោទកិយត្ថេរអបទានវណ្ណនា
4. Gandhodakiyattheraapadānavaṇṇanā
និសជ្ជ បាសាទវរេតិអាទិកំ អាយស្មតោ គន្ធោទកិយត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ និព្ពានូបនិស្សយានិ បុញ្ញានិ ឧបចិនន្តោ វិបស្សីភគវតោ កាលេ សេដ្ឋិកុលេ និព្ពត្តោ វិញ្ញុតំ បត្វា មហទ្ធនោ មហាភោគោ ទិព្ពសុខមនុភវន្តោ វិយ មនុស្សសុខមនុភវន្តោ ឯកស្មិំ ទិវសេ បាសាទវរេ និសិន្នោ ហោតិ។ តទា ភគវា សុវណ្ណមហាមេរុ វិយ វីថិយា វិចរតិ, តំ វិចរមានំ ភគវន្តំ ទិស្វា បសន្នមានសោ គន្ត្វា វន្ទិត្វា សុគន្ធោទកេន ភគវន្តំ ឱសិញ្ចមានោ បូជេសិ។ សោ តេន បុញ្ញេន ទេវមនុស្សេសុ សំសរន្តោ ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វិញ្ញុតំ បត្តោ ឃរាវាសេន អនល្លីនោ សត្ថុ សន្តិកេ បព្ពជិត្វា កម្មដ្ឋានំ គហេត្វា វិបស្សនំ វឌ្ឍេត្វា នចិរស្សេវ អរហា អហោសិ។
Nisajja pāsādavaretiādikaṃ āyasmato gandhodakiyattherassa apadānaṃ. Ayampi purimabuddhesu katādhikāro tattha tattha bhave nibbānūpanissayāni puññāni upacinanto vipassībhagavato kāle seṭṭhikule nibbatto viññutaṃ patvā mahaddhano mahābhogo dibbasukhamanubhavanto viya manussasukhamanubhavanto ekasmiṃ divase pāsādavare nisinno hoti. Tadā bhagavā suvaṇṇamahāmeru viya vīthiyā vicarati, taṃ vicaramānaṃ bhagavantaṃ disvā pasannamānaso gantvā vanditvā sugandhodakena bhagavantaṃ osiñcamāno pūjesi. So tena puññena devamanussesu saṃsaranto imasmiṃ buddhuppāde ekasmiṃ kulagehe nibbatto viññutaṃ patto gharāvāsena anallīno satthu santike pabbajitvā kammaṭṭhānaṃ gahetvā vipassanaṃ vaḍḍhetvā nacirasseva arahā ahosi.
៣៥. សោ អបរភាគេ អត្តនោ បុព្ពកុសលំ សរិត្វា សោមនស្សជាតោ បុព្ពចរិតាបទានំ បកាសេន្តោ និសជ្ជ បាសាទវរេតិអាទិមាហ។ តត្ថ បាសាទោតិ បសាទំ សោមនស្សំ ជនេតិ ឧប្បាទេតីតិ បាសាទោ , មាលាកម្មចិត្តកម្មសុវណ្ណកម្មាទ្យនេកវិចិត្តំ ទិស្វា តត្ថ បវិដ្ឋានំ ជនានំ បសាទំ ជនយតីតិ អត្ថោ។ បាសាទោ ច សោ បត្ថេតព្ពដ្ឋេន វរោ ចាតិ បាសាទវរោ, តស្មិំ បាសាទវរេ និសជ្ជ និសីទិត្វា វិបស្សិំ ជិនវរំ អទ្ទសន្តិ សម្ពន្ធោ។ សេសំ សព្ពត្ថ ឧត្តានមេវាតិ។
35. So aparabhāge attano pubbakusalaṃ saritvā somanassajāto pubbacaritāpadānaṃ pakāsento nisajja pāsādavaretiādimāha. Tattha pāsādoti pasādaṃ somanassaṃ janeti uppādetīti pāsādo , mālākammacittakammasuvaṇṇakammādyanekavicittaṃ disvā tattha paviṭṭhānaṃ janānaṃ pasādaṃ janayatīti attho. Pāsādo ca so patthetabbaṭṭhena varo cāti pāsādavaro, tasmiṃ pāsādavare nisajja nisīditvā vipassiṃ jinavaraṃ addasanti sambandho. Sesaṃ sabbattha uttānamevāti.
គន្ធោទកិយត្ថេរអបទានវណ្ណនា សមត្តា។
Gandhodakiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៤. គន្ធោទកិយត្ថេរអបទានំ • 4. Gandhodakiyattheraapadānaṃ
