| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. க³ந்தோ⁴த³கியத்தே²ரஅபதா³னவண்ணனா
4. Gandhodakiyattheraapadānavaṇṇanā
பது³முத்தரபு³த்³த⁴ஸ்ஸாதிஆதி³கங் ஆயஸ்மதோ க³ந்தோ⁴த³கியத்தே²ரஸ்ஸ அபதா³னங். அயம்பி புரிமமுனிவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தோ பரினிப்³பு³தே ப⁴க³வதி நக³ரவாஸினோ போ³தி⁴பூஜங் குருமானே தி³ஸ்வா விசித்தக⁴டே சந்த³னகப்புராக³ருஆதி³மிஸ்ஸகஸுக³ந்தோ⁴த³கேன பூரெத்வா போ³தி⁴ருக்க²ங் அபி⁴ஸிஞ்சி. தஸ்மிங் க²ணே தே³வோ மஹாதா⁴ராஹி பவஸ்ஸி. ததா³ ஸோ அஸனிவேகே³ன காலங் கதோ. தேனேவ புஞ்ஞகம்மேன தே³வலோகே நிப்³ப³த்தி, தத்தே²வ டி²தோ ‘‘அஹோ பு³த்³தோ⁴, அஹோ த⁴ம்மோ’’திஆதி³கா³தா²யோ அபா⁴ஸி. ஏவங் ஸோ தே³வமனுஸ்ஸேஸு ஸம்பத்தியோ அனுப⁴வித்வா ஸப்³ப³பரிளாஹவிப்பமுத்தோ நிப்³ப³த்தனிப்³ப³த்தட்டா²னே ஸீதிபா⁴வமுபக³தோ ஸுகி²தோ இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸன்னோ பப்³ப³ஜித்வா கம்மட்டா²னங் ஆரபி⁴த்வா விபஸ்ஸந்தோ நசிரஸ்ஸேவ அரஹத்தங் பாபுணி. புப்³பே³ கதபுஞ்ஞேன க³ந்தோ⁴த³கியத்தே²ரோதி பாகடோ அஹோஸி.
Padumuttarabuddhassātiādikaṃ āyasmato gandhodakiyattherassa apadānaṃ. Ayampi purimamunivaresu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto parinibbute bhagavati nagaravāsino bodhipūjaṃ kurumāne disvā vicittaghaṭe candanakappurāgaruādimissakasugandhodakena pūretvā bodhirukkhaṃ abhisiñci. Tasmiṃ khaṇe devo mahādhārāhi pavassi. Tadā so asanivegena kālaṃ kato. Teneva puññakammena devaloke nibbatti, tattheva ṭhito ‘‘aho buddho, aho dhammo’’tiādigāthāyo abhāsi. Evaṃ so devamanussesu sampattiyo anubhavitvā sabbapariḷāhavippamutto nibbattanibbattaṭṭhāne sītibhāvamupagato sukhito imasmiṃ buddhuppāde kulagehe nibbatto viññutaṃ patto satthari pasanno pabbajitvā kammaṭṭhānaṃ ārabhitvā vipassanto nacirasseva arahattaṃ pāpuṇi. Pubbe katapuññena gandhodakiyattheroti pākaṭo ahosi.
25. ஸோ ஏகதி³வஸங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முதரஸ்ஸாதிஆதி³மாஹ. தங் வுத்தத்த²மேவ. மஹாபோ³தி⁴மஹோ அஹூதி மஹாபோ³தி⁴ருக்க²ஸ்ஸ பூஜா அஹோஸீதி அத்தோ². விசித்தங் க⁴டமாதா³யாதி அனேகேஹி சித்தகம்மஸுவண்ணகம்மேஹி விசித்தங் ஸோப⁴மானங் க³ந்தோ⁴த³கபுண்ணங் க⁴டங் க³ஹெத்வாதி அத்தோ² . க³ந்தோ⁴த³கமதா³ஸஹந்தி க³ந்தோ⁴த³கங் அதா³ஸிங், அஹங் க³ந்தோ⁴த³கேன அபி⁴ஸிஞ்சிந்தி அத்தோ².
25. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumutarassātiādimāha. Taṃ vuttatthameva. Mahābodhimaho ahūti mahābodhirukkhassa pūjā ahosīti attho. Vicittaṃ ghaṭamādāyāti anekehi cittakammasuvaṇṇakammehi vicittaṃ sobhamānaṃ gandhodakapuṇṇaṃ ghaṭaṃ gahetvāti attho . Gandhodakamadāsahanti gandhodakaṃ adāsiṃ, ahaṃ gandhodakena abhisiñcinti attho.
26. ந்ஹானகாலே ச போ³தி⁴யாதி போ³தி⁴யா பூஜாகரணஸமயேதி அத்தோ². ஸேஸங் உத்தானத்த²மேவாதி.
26.Nhānakāleca bodhiyāti bodhiyā pūjākaraṇasamayeti attho. Sesaṃ uttānatthamevāti.
க³ந்தோ⁴த³கியத்தே²ரஅபதா³னவண்ணனா ஸமத்தா.
Gandhodakiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. க³ந்தோ⁴த³கியத்தே²ரஅபதா³னங் • 4. Gandhodakiyattheraapadānaṃ
