| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂-၄. ဧတံမမသုတ္တာဒိဝဏ္ဏနာ
2-4. Etaṃmamasuttādivaṇṇanā
၂၀၇-၂၀၉. ဒိဋ္ဌံ ရူပာယတနံ စက္ခုနာ ဒဋ္ဌဗ္ဗတော။ သုတံ သဒ္ဒာယတနံ သောတေန သောတဗ္ဗတော။ မုတံ ဂန္ဓာယတနာဒိ တိဝိဓံ သမ္ပတ္တဂာဟီဟိ ဃာနာဒီဟိ ပတ္ဝာ ဂဟေတဗ္ဗတော။ အဝသေသာနိ စက္ခာဒီနိ သတ္တာယတနာနိ ဝိညာတံ နာမ ကေဝလံ မနောဝိညာဏေန ဝိဇာနိတဗ္ဗတော။ ပတ္တန္တိ အနုပ္ပတ္တံ, ယံ ကိဉ္စိ ပာပုဏိတဗ္ဗံ ပရိယေသိတ္ဝာ ဂဝေသိတ္ဝာ သမ္ပတ္တန္တိ အနုပ္ပတ္တံ။ ပရိယေသိတန္တိ ပရိယိဋ္ဌံ။ စိတ္တေန အနုသဉ္စရိတန္တိ မနသာ စိန္တိတံ။ ‘‘ပတ္တံ ပရိယေသိတ’’န္တိ ဧတသ္မိံ ပဒဒ္ဝယေ စတုက္ကံ သမ္ဘဝတီတိ တံ ဒသ္သေတ္ဝာ တသ္သ ဝသေန ပတ္တပရိယေသိတပဒာနိ, တတော မနသာ အနုဝိစရိတဉ္စ နီဟရိတ္ဝာ ဒသ္သေတုံ ‘‘လောကသ္မိံ ဟီ’’တိအာဒိ ဝုတ္တံ။ တတ္ထ ပရိယေသိတ္ဝာ ပတ္တံ နာမ ပရိယေသနာယ ပရိဂ္ဂာဟဘာဝတော။ ပရိယေသိတံ နာမ ကေဝလံ ပရိယေသိတမေဝာတိ ကတ္ဝာ ပရိယေသိတ္ဝာ ပတ္တသ္သ မနုသ္သာနုဝိစရိတသ္သ ဝုတ္တတ္တာ။ ပဌမဝိကပ္ပေ သင္ကရော အတ္ထီတိ အသင္ကရတော စ ဒသ္သေတုံ ‘‘အထ ဝာ’’တိအာဒိ ဝုတ္တံ။ သဗ္ဗန္တိ ဝိညာတာဒိ။ တဉ္ဟိ မနောဝိညာဏေန ဂဟိတတ္တာ မနသာ အနုဝိစရိတံ နာမ န ဒိဋ္ဌံ သုတံ မုတံ။
207-209.Diṭṭhaṃ rūpāyatanaṃ cakkhunā daṭṭhabbato. Sutaṃ saddāyatanaṃ sotena sotabbato. Mutaṃ gandhāyatanādi tividhaṃ sampattagāhīhi ghānādīhi patvā gahetabbato. Avasesāni cakkhādīni sattāyatanāni viññātaṃ nāma kevalaṃ manoviññāṇena vijānitabbato. Pattanti anuppattaṃ, yaṃ kiñci pāpuṇitabbaṃ pariyesitvā gavesitvā sampattanti anuppattaṃ. Pariyesitanti pariyiṭṭhaṃ. Cittena anusañcaritanti manasā cintitaṃ. ‘‘Pattaṃ pariyesita’’nti etasmiṃ padadvaye catukkaṃ sambhavatīti taṃ dassetvā tassa vasena pattapariyesitapadāni, tato manasā anuvicaritañca nīharitvā dassetuṃ ‘‘lokasmiṃ hī’’tiādi vuttaṃ. Tattha pariyesitvā pattaṃ nāma pariyesanāya pariggāhabhāvato. Pariyesitaṃ nāma kevalaṃ pariyesitamevāti katvā pariyesitvā pattassa manussānuvicaritassa vuttattā. Paṭhamavikappe saṅkaro atthīti asaṅkarato ca dassetuṃ ‘‘atha vā’’tiādi vuttaṃ. Sabbanti viññātādi. Tañhi manoviññāṇena gahitattā manasā anuvicaritaṃ nāma na diṭṭhaṃ sutaṃ mutaṃ.
ဧတံမမသုတ္တာဒိဝဏ္ဏနာ နိဋ္ဌိတာ။
Etaṃmamasuttādivaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၂. ဧတံမမသုတ္တံ • 2. Etaṃmamasuttaṃ
၃. သောအတ္တာသုတ္တံ • 3. Soattāsuttaṃ
၄. နောစမေသိယာသုတ္တံ • 4. Nocamesiyāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂-၄. ဧတံမမသုတ္တာဒိဝဏ္ဏနာ • 2-4. Etaṃmamasuttādivaṇṇanā
