| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
១០. ឯណិជង្ឃសុត្តវណ្ណនា
10. Eṇijaṅghasuttavaṇṇanā
៣០. ទសមេ ឯណិជង្ឃន្តិ ឯណិមិគស្ស វិយ សុវដ្ដិតជង្ឃំ។ កិសន្តិ អថូលំ សមសរីរំ។ អថ វា អាតបេន មិលាតំ មាលាគន្ធវិលេបនេហិ អនុបព្រូហិតសរីរន្តិបិ អត្ថោ។ វីរន្តិ វីរិយវន្តំ។ អប្បាហារន្តិ ភោជនេ មត្តញ្ញុតាយ មិតាហារំ, វិកាលភោជនបដិក្ខេបវសេន វា បរិត្តាហារំ។ អលោលុបន្តិ ចតូសុ បច្ចយេសុ លោលុប្បវិរហិតំ។ រសតណ្ហាបដិក្ខេបោ វា ឯស។ សីហំវេកចរំ នាគន្តិ ឯកចរំ សីហំ វិយ, ឯកចរំ នាគំ វិយ។ គណវាសិនោ ហិ បមត្តា ហោន្តិ, ឯកចរា អប្បមត្តា, តស្មា ឯកចរាវ គហិតាតិ។ បវេទិតាតិ បកាសិតា កថិតា។ ឯត្ថាតិ ឯតស្មិំ នាមរូបេ។ បញ្ចកាមគុណវសេន ហិ រូបំ គហិតំ, មនេន នាមំ, ឧភយេហិ បន អវិនិភុត្តធម្មេ គហេត្វា បញ្ចក្ខន្ធាទិវសេនបេត្ថ ភុម្មំ យោជេតព្ពន្តិ។ ទសមំ។
30. Dasame eṇijaṅghanti eṇimigassa viya suvaṭṭitajaṅghaṃ. Kisanti athūlaṃ samasarīraṃ. Atha vā ātapena milātaṃ mālāgandhavilepanehi anupabrūhitasarīrantipi attho. Vīranti vīriyavantaṃ. Appāhāranti bhojane mattaññutāya mitāhāraṃ, vikālabhojanapaṭikkhepavasena vā parittāhāraṃ. Alolupanti catūsu paccayesu loluppavirahitaṃ. Rasataṇhāpaṭikkhepo vā esa. Sīhaṃvekacaraṃ nāganti ekacaraṃ sīhaṃ viya, ekacaraṃ nāgaṃ viya. Gaṇavāsino hi pamattā honti, ekacarā appamattā, tasmā ekacarāva gahitāti. Paveditāti pakāsitā kathitā. Etthāti etasmiṃ nāmarūpe. Pañcakāmaguṇavasena hi rūpaṃ gahitaṃ, manena nāmaṃ, ubhayehi pana avinibhuttadhamme gahetvā pañcakkhandhādivasenapettha bhummaṃ yojetabbanti. Dasamaṃ.
សត្តិវគ្គោ តតិយោ។
Sattivaggo tatiyo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១០. ឯណិជង្ឃសុត្តំ • 10. Eṇijaṅghasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. ឯណិជង្ឃសុត្តវណ្ណនា • 10. Eṇijaṅghasuttavaṇṇanā
